𝐀 𝐑𝐀𝐌 𝐋𝐄𝐇 𝐀 𝐅𝐄𝐋𝐍𝐀

  

 

Hmalam hun ngaihtuah vak vak avanga intihhrehawm hi Lal Isua tha tih loh zawng tak ni ngei tur a ni. Naktuk atana lungkham luat avanga sual kawng zawh hial leh Pathian ngaihsak hlei thei lo nun te pawh neih theih a ni, Chu mai bakah rilru hrisel lo tak - thikna, erna, thinchhiat leh lungawi lo rilru neih reng a awl bawk. He lungkhamna bansan nghal hi a finthlak.

 

Lungkham loh hian kan hmalam hun atana inbuatsaihna tha te, ngaihtuahna hman tam te a hnawl hauh lo va, chutiang chu hringnuna thil pawimawh tak a ni tih kan hria. Chutih laiin  lungkhamna hi rinna chak lo zia a nih dan a awm. He lai thuruk hi eng nge ni ta? Ransa ang maia thawveng taka nung mawp mawp mai turin min duh em ni? A awmzia hre tura luh thuk deuh a ngai a ni.

 

         𝟏.    𝐙𝐚𝐰𝐧 𝐡𝐦𝐚𝐬𝐚𝐤 𝐭𝐮𝐫

 

Lal Isua thu sawi, “A ram leh a felna chu zawng hmasa zawk rawh u; tichuan heng zawng zawng hi a pek belhchhah dawn che u nia,” (Mt 6:33) tih ngaithlatute khawsakna dinhmun kha a chhe ve hle a ni ngei ang, dam chhung khawsakna thil lungkham lo turin a hrilh nasa em mai! He lungkhamna hian sual leh thil tha lo tam takah min hruai lut thin tih pawh a chiang a ni.

 

He thu hian inlak thawvena lungkham loh tawp ringawt ni lovin Pathian ram leh a felna zawn a keng tel tlat tih hria ila. Lal Isua zirtirna hi Samdala theipui lawh tum anga amaha a lo tlak nghah tawp mai a ni lova; Pathian ram leh a felna buaipui hmasak zel tur tihna a ni zawk. Chutiang nunah chuan Pathian enkawlna leh a mite a enkawl thinzia ringtu nunin a tawng baw dawn a ni.

 

Kan nunin a zawn hmasak zel tur chu Pathian ram a ni a. America rama harhna ropui hruaitu leh theologian ropui Jonathan Edwards chuan, “Kristian nunin a ngaih pawimawh ber chu Pathian Ram zawn a ni,” a ti. Chu chu Pathian rorelna, lalna a channa hmun, a duh zawng a thlen leh a hming zahawm taka a awmna hmun a ni. Mimal nun leh khawtlang dinhmun a kawk thei ve ve a, ropui taka a thlen a duhawm ve ve. He Pathian Ram zawng tlattute chuan Pathianin a enkawl hneh hle thin tih an hria ang.

 

        𝟐.    𝐀 𝐟𝐞𝐥𝐧𝐚 𝐜𝐡𝐮

 

Chanchin Tha duhawmna leh ropuina lai ber, a ngaihnawmna lai tak, mi tam zawkin kan hriat loh fo chu ‘Felna Bel’ chungchang hi a ni a. Hei tak hi Pathian hmaa mi sualte mi fel anga an lan theihna chhan a ni a. Ringtuah chuan Krista felna chu belsak a ni a, chu Krista felna a inbel chu ama felna anga pawmsak a lo ni ta. Pathian hmaa kan felna hi keimahnia atanga chhuak, kan thawhchhuah a ni lo tihna a ni nghal bawk. Chu felna chu ring lo tan neih theih a ni (a zawn chuan), ringtu tan hlei hlei zawn nasat a ngai!

 

Ringtu chu ama nihnaah chuan a fel loh ngaiin a la fel lo reng a, mi sual leh tling lo a ni reng, mahse mi fel angin Pathianin a pawm a, a puang ta bawk a ni. Chhuan tur pakhat mah a nei lo tih a chiang khawp mai. Chu chauh chu ni lovin Thlarau Thianghlim tihnunna chu amahah a lang tan ta a, chu khawngaihna avang liau liaua a neih Krista felna, amaha bel chu a buaipui ta a ni. Chu chu piangthar tak tak leh piangthar tak tak lo danglamna a ni ta bawk. Kristian dik tak chuan ‘Krista felna’ chu a zawng ta ngar ngar thin a ni.

 

He ‘Krista felna buaipuina’ tak hi chu ‘Kristian nun’ kan tih hi a ni nghal bawk a. Lung tum chhunga lunghlu inphum kher chhuah tuma miin a bei ang hian a ta ni tawh Krista felna chu a lei nuna lan chhuahtir tumin a tang ta a. Chu lai nun tak chu ‘a felna zawn’ kan tih hi a ni awm e. Mimal nun leh khawtlang nun, kawng engkimah a lo lang chhuak thin. A tuamtu lung a kher thlak fai poh that poh leh lunghlu chu a lang fiah dawn ang hian ringtu chuan tisa thil a paih tam poh leh Krista felna chu a langsar mai dawn a ni.

 

 

        𝟑.    𝐀 𝐛𝐞𝐥𝐡𝐜𝐡𝐡𝐚𝐡𝐧𝐚

 

Isua khan tluantling takin thu a sawi thin a. Hringnun kan hmachhawn dan tur ‘life’s principle’ duhsak takin mite a hrilh thin a nih kha. Keini ho anga he lei ropuina leh awm nawmna, inchhekarbawm leh thuneihna atanga mi hlawhtlinna a teh lem loh avang erawh chuan vawiin thlengin a ngaithlatute tan hriat thiam a har lek lek thin zawk a ni.

 

Kan nunin Pathian leh a duh zawng a dah hmasak tlat chuan kan damchhung mamawh zawng zawng chu min pek belhchhah dawn tih min hrilh a. A felna kan chaka kan tui hal phawt chuan keimahniah a rawn par chhuak ngei ngei ang. Kan mihring duhamnain a it zawng apiang kan nei thei dawn ta tihna ni lovin Pathian thlirna atanga kan nunin a mamawh apiang min neihtir dawn tihna a ni. Keimahnia lang felna chu Krista chawimawina atan zel tih a chiang bawk ang.

 

He khawvel hausakna leh nawmna hian Isua zirtirnaah hmun a chang lian lem lo hle tih erawh hre reng ila. Chutih laiin ringtute zingah hian he khawvel tehfung pawha khawsa nuam tak te pawh awm theih a ni. Chutiang chu Pathian malsawm belhchhahna a ni mai ang chu. Han chhut chian phei chuan a belhchhahna hi kan dawng hnem hlawm hle awm asin. Tam tak erawh chuan atthlak takin he a belhchhahna mai mai hi an buaipui thin.

 

    𝐓𝐥𝐚𝐧𝐠𝐤𝐚𝐰𝐦𝐧𝐚

 

Mahni hmalam hun tur hre lawk thei tumah kan awm lo tih a chiang. Eng nge lo thleng dawn a, engin nge min chim buai dawn? Eng ang takin nge kan khawsak ang a, eng malsawmnain nge min hmuak? A tha lam leh a chhe zawng pawhin thil a thleng thei ve ve. Pathian kuta dah thiam a, vawiina amah hnaih zel hi kan Lalpa min duh dan ber chu a ni awm e. Chumiah tak chuan heta Lal Isua thu sawi hi a pawimawhna a langsar zual a. A ram leh a felna zawn hmasak zel hi a ni.

 

Chu ‘zawnna’ chuan kan thiltih engkim kaihhnawih tur a ni a. Piangthar tawh leh piangthar lo tan zawm theih a ni nghal bawk. Pathiana nun la nei lo ten ‘Pathian ram leh Pathian felna’  chu an zawng ang a, nunna nei tawh ten chu Pathian ram anmahnia thleng tawh chu he khawvela a thlen theih nan leh Krista felna belsak an nih tawha chu a par chhuah theih nan an tang ta char char a ni. Hetiang mite hian an hmu ngei thin a, pek belhchhah an ni ngei bawk thin.