𝐋𝐔𝐀𝐍𝐆 𝐙𝐀 𝐀𝐍𝐆 𝐔

Hla hi thu nena an danglamna chu thluk a nei hi a ni a. ‘A thua tui lovin a thlukah chauh in tui,’ intih ngawt chi a ni lem lo. A thu kha a thluk chunga chuang a ni miau si a. Hla thenkhat thu tha em em si a thluk nalh vak lo a awm thei a, hetiang ho hi an lar mawh hle a ni awm e. A thluk mawi tak chu a thu chuti teh lua ni lem lo mah se sak an hlawh viau thin bawk a. A thu phu lovin a lar chawk. Hla tha tling tur chuan a thu leh a thluk a nalh tawn a ni tih a chiang a. Chu mai piah lamah a thu leh a thluk a inhmeh em em phei hi chuan hlu tak a ni. Chutiang hla zinga pakhat chu ‘Luang za ang u’ tih Lalzidinga phuah hi niin ka hria. A mawi leh that ang hua he hla kan sa lar lo hi mak tiin ka ui hle thin a ni.

𝐊𝐡𝐞𝐤 𝐜𝐡𝐡𝐮𝐚𝐡𝐧𝐚

He hla hi Youtube lama ka hmuh ve chauh a ni a. YZTP zai thiam mi eng emaw zahin thiam taka an sak ho a ni a. A sa hmasatu ber hi a phuahtu niin ka’n ngai ngawt a. Ka ring dik a nih chuan a kum a la naupan hmel ang huin a thil vei chu puitling tak a ni dawn a ni. A thiamna ka dah sang hle bawk a. Mizo hnam bil te te hi kan tih ho thatna hmunah chuan ti tha ve tak kan ni a, kan insutna ruamah erawh chuan insu na ve tak kan ni tih a hre pha a ni mai thei e. Chutiang insutna boruak hrehawm chu a tuartuah a lo tang tawh thin pawh a ni mahna. Hetianga kan kal zel chuan unau ni reng siin kan inhmelma zual zel dawn niin a hria a, theih patawpin a au chhuak ta a nih ber hi. Zawhna pawimawh ber ‘Pathianin engtin nge aw a ngaih ang?’ zawtin Siamtu a ngaihtuah thleng pha hial a ni.

Mim ang piang hmun u leh nau,
Chawmkhuang beng a,
Ningzu thlum tui dawnza thin kha,
Tunah ram hran mual hrana leng a,
Khual hraileng kan chang zo tur hi,
Ka dawnin thinlai a na,
Khuanu lengin engtin ngai ve ang maw.

𝐇𝐦𝐚𝐧𝐡𝐦𝐚𝐰𝐡 𝐧𝐠𝐚𝐢

A phuahtu hian Zotawng a thiam tehreng nen engvangin nge ni ang tawngkam mam zawk anga lang ‘chhingmit mengin’ ti lo va, ‘chhingmit hawngin’ a tih teh tlat tih ka ngaihtuah a. Chu chu a tlar dawt chiaha a sawi ‘Zo hnam dam nan’ a pawimawh em avanga uar a tum luatah ‘i chhingmit chu a mena men pangngai ni lovin a hawnin han hawng teh’ a tihna niah ka ngai ta a. He hla phuahtu hi chuan Mizo hnam inpumkhatna hi kan ngaihven thuai thuai loh chuan a tlai chhiat theihin a ngai ni ngeiin a lang. Kan awm dan pangngaia kan awm reng hi chuan kan tlai mai a hlau te pawh a ni ang, ‘Zo kalsiam lamlian zau sial a hun ta’ tiin a au chhuak rawih rawih mai a nih hi. Hla mawi pangngai tak ang mai maiah chuan ngaihsak a harsa. ‘Zo kalsiam lamlian zau sial a hun ta’ han tihte hi kan ngaihtuahna san leh hniam ang zela chai tham, thu ril tak a ni.

Chhingmit hawngin ngun takin dawn chiang ila,
Hmatiang thlirin zo hnam dam nan;
Zo kalsiam lamlian zau sial a hun ta,
Phei lai vawrin i penchhuak ang u,
Phengphe khua a tlai hma ngei hian,
Zofaleng hnam tin insuihkhawm leh zai i rel ang u.

𝐋𝐮𝐚𝐧 𝐳𝐚

Hla phuahtu leh letlingtute fimkhurna tur pawimawh tak chu a hla ‘punch’ (thuchah laimu) vawrh chhuah nawn thin kha a ni a. Mi rilru hnehtu tak leh a hla an duh chhan a ni thin a. A bik takin hla lehlinah uluk lehzual a ngaiin a lang. Entirnan, ‘Four days late’ tih hlaah khan a ‘punch’ ber chu ‘He’s still on time’ (a hunah a thleng) tih kha a ni a. Isua kha ni 4 laiin tlai mah se a hunah a la thleng tih khan mi a hneh hlawm hle a ni. Mizotawnga letlingtu khan a punch kha thu pangngai tak ‘A va ropui em!’ a ti ta daih a, thu thar vak a awm lo kha pawi ka lo ti hle a ni. He hlaah thung hi chuan a punch hi ‘I luang za ang u’ tih a hmang a, ‘luan za’ a rawt a ni. A thu pawh a mawi hle mai. A mawi chauh ni lovin a thu a thain a thuk bawk. Pawng inhawr khawm a sawi lo va, kal khawm satliah leh intawhkhawm mai mai a sawi lo. Khawi emaw lam pan a ‘luan za’ a sawi a ni. Lui te tam tak luang khawmin lui lian zawk a siam hnuah chuan an lui te te nihna chu a ral vek a, lui pui an ni ta a ni. Lui te nihna chu an ngai tawh lo va, luipui nihna chu chang theuhvin an luang ta nguah nguah mai a nih chu. Chu lui pakhat nihna chu he hla phuahtuin mawi em ema a phawrh chhuah chu a ni.   ‘Chu Zofa zawng zawng lungrualna, hmasawnna leh ropuina hmun pan chuan vawiinah hian hmangaihnaa insuihkhawmin, ‘I luang za ang u aw,’ tiin,

Lenna tlang leh kan tuanna mual te,
Dai ang dang tawh mahsela;
Hmangaihna a insuihkhawmin,
Zofaleng zawng te lungrualin,
Zaikhata luangin chawnban inkai ila,
Hal lo te'n suihlung rualin i leng za ang u.

𝐌𝐚𝐰𝐢 𝐧𝐚𝐫𝐚𝐰𝐡

A thluk a mawi a, a thu chheh a nalh hle bawk a. A Zotawng quality hrim hrim pawh hi a sang hlein ka lo hre ve ngawt a. ‘Khual hraileng kan chang zo tur hi,’ ‘Hril thiam, tial thiam, dawnsei lenrual teh u,’ ‘Zo kalsiam lamlian zau sial a hun ta,’ ‘Hmangaih zia tial hlanin,’ ‘I luang za ang u,’ tih te hi a nep lo hle mai. A hla hrim hrim hi zai thiam tan lungrun taka sak vawng vawng chi a ni a, Mizote thiltih khawm ni apianga a lailum luah phuaha sak dual dual chi pawh a ni mai thei e. Duh aiin youtube-a YZTP music video pawh hian en a la hlawh tam rih lo a, www.youtube.com/watch?v=6C76-KRwgu0 ah hian i en chur chur teh ang u. Kan mamawh hlawm em mai!

Hril thiam, tial thiam, dawnsei lenrual te u,
Hril zel ang, i puang zel ang u;
Zothlah hnam tin, khua tin hrut ila,
Chin lai lungduh unau te hnenah,
Hmangaih zia tial hlanin unau za kan ni,
Insuihkhawm ang u tiin.

*****