𝐀𝐌𝐄𝐑𝐈𝐂𝐀 𝐑𝐀𝐌𝐀𝐇 𝐓𝐇𝐈𝐋𝐌𝐀𝐊 𝐀 𝐓𝐇𝐋𝐄𝐍𝐆

 

Hringnun nawmna pakhat chu kan rin loh deuh deuh a tha zawnga a thleng ve thut thin hi a ni a. Beidawnna chhum thim mup karah kan khawsa reng dawn emaw tih laiin kan chung van a rawn en uar hun hi a awm ve bawk thin a ni. Rom sorkarin Kristiante kum 300 vel a tihduhdah hnuah lal Constantine-an ‘state-religion’ atan Kristianna a han puang dur mai kha chu, ropui an tilutuk a an hamhaih deuhthaw hial a ni awm e. Khami dinhmun em tluk lo mah se tun hnaia United States Supreme Court-in ‘Nau tihtlak hi hmeichhe dikna chanvo a ni lem lo,’ tia kum 50 vel an hman tawh Roe vs Wade thutlukna an tih mai a hnawl takna hi thilmak tak chu a ni. Thil thleng thei lo tur anga ngaih a thleng tlat si.

 

Nau tihthlak (Abortion) chungchang

 

Kan la kal ve lem lo naa United States khu hmeichhiat-mipatna an hman zalenna hmun niin a ral hriat deuh theuh awm e (state pawn lam miin Mizoram min hmuh dan ang deuh a ni mai thei). Chuti a nih avang khuan fimkhur sen loh avangin nau pai palh ta an tam a ni mai thei. Nau tihtlak a hluar hle bawk a. Kum 2019 chhung chauh pawh khan nau tihtlak case 629,898 a awm an ti. Chutih rualin Kristian zinga a duhtui pawlte chuan Pathian duh loh zawng thil rapthlak ber, tualthahna nia ngaiin an do nasa em em mai bawk. American ho zinga Kristian leh Kristian lote inthenna thuk tak pakhat a ni. Kum 50 vel chu Supreme Court-in hmeichhe chhunga naute chu a hmeichhe taksa a nih miau avangin titlak leh tlak loh chu a thu turah a ngai a, a dikna chanvo anga a ngaih miau avangin state zawng zawngin an phal mai lo thei lo va. Tunah US Supreme Court meuhin a thu a zuk tak avangin thil danglam tak a thleng ta a ni. Boruak erawh chu khawi lam lam atang pawhin a na chho viau dawnin a lang.

 

Roe v Wade

 

He court thutlukna (Roe v Wade) hi Kristian lamin an helh em avang hian a lar hle a. A lo intanna pawh hmeichhe awm khawlo angreng tak, a hming lem atana Jane Roe an tih takin bakberh tak chung leh kum 21 nih hmaa vawi 3-na lai nau pai hman harsatna tawhte vang a ni ber a. A pai hmasak ber chuan kum 16 a ni a, a kum lehah a pai leh a; a fate chu midang hnena pek (adopt) sak zel a ni a. Kum 21 a nih kuma a pathumna a pai leh meuh chuan tihtlak a tum nasa hle. Mahse heng hun lai hian sorkarin chhan tha te a awm loh chuan nau tihtlak mai mai a phal loh avangin a duh angin a puitlin thei lo va. A lo tanpuitu Dan lam thiam mi an lo awm bawk nen. Supreme Court an thleng ta rup mai a ni. US Court sang ber chuan kum 1973 khan anmahni pai ngei nau tihtlak leh tlak loh chu a paitu thu a ni, tiin constitutional right an pe ta a. Heti a nih avang hian thui tak mahnia ro inrel state-te pawhin an lo phal lo thei ta lo va. A duh lotu pawh an tam hle zel a ni. Kumin June 24 khan chu thutlukna chu an lo thai chhe leh ta a. US state 50 zinga a zahve chuan an khap chho mai turah an ngai a. American ho chu an buai leh map map dawn a ni.

 

India ramah hian le

 

India ram Kristiante chu kan buai ve map lo thung niin a lang. Sorkar chuan a phal zau angreng hle mai a mahse kan thek inthawng a khawih pha meuh lo. Hnam chi hrang hrang leh ngaihdan chi hrang hrang awm khawm kan nih vang leh, mihring tam lutuk buaipui ram kan nih vang pawh a ni mai thei e. Engemaw zawnga ngaihtuah chuan sorkar laipui pawhin promote zawk hial duhin a rin theih a. US-ah te ngei ngei pawh Kristian intite zingah ngaihdan a inang vek bik lo va. Mi thenkhat chuan an Kristian nihna atangin duh lo hle mah se, ram zalen a nihna changchawiin mahni rinna atang midang thiltih teh leh dan hmanga khuahkhirh chu an tih loh turah an ngai thin. Dik awm taka a lan theih dan pawh a awm. Han ngaihtuah chian erawh chuan dodal loh theih loh tluk a ni. Khawtlang nuna thil rapthlak thleng reng mai chu dan hmanga khap beh a tul dawn lawm ni? Caste system te, sati te pawh missionary ten an lo do nasa tawh thin tih kan hria. Nau tihtlak hi tualthahna tluka ngaih dawn phei chuan rapthlak tak a ni.

 

Keini ho ve hi le

 

Nau tih tlak chungchang hi Mizo Kristiante zinga chai hlawh lo pawl tak a ni. A paitu nunnain a tuar phah dawn loh chuan Kristian taka thil tih chi niin kan ngai lo tlang tih erawh chu a hriat a. Chu chu Kohhran leh sakhaw ngaihdan ni mai mah se mipui rilru sukthlek hrim hrim han thlir hian pawisakna a nasa lo hlein a hriat theih a ni. Hei hi kan inzirtir that tawk loh vang pawh a ni pakhat mai thei e. Sual lungrun taka ngai an tam lo niin a lang. Kan clinic leh hospital te hi an chik ta ila nau titla case hian min thawng nasa viau mai thei a ni. Chuvangin, kan khawtlang nuna thil tha lo awm dang ang tho hian hmachhawn ila. Tleirawl nun thianghlimna vawn pawimawhzia inzirtir leh nau tihtlak rapthlakzia inzirtir a pawimawh ta hle. Pian pun pawimawhzia leh nupui/pasal  nei lova awm mai mai a that lohzia kan inzirtir mek lai hian a kaihhnawih ve tho nau tihtlak that lohzia leh rapthlakzia inzirtir tam kan mamawh ta niin a lang. A nihna takah chuan America ram pawh hian inthlahpun tam pawimawhna hi an hre ta a ni mai thei, heti taka kum 50 chhung an lo hman tawh dan, anmahni mil tak ni bawk si, an thiah tak danah hian. America ramah hian thilmak tak a thleng mek tih loh theih loh a nih hi. I lo thlir zel phawt teh ang.

  

*****