𝐍𝐄𝐖 𝐀𝐓𝐇𝐄𝐈𝐒𝐌 𝐋𝐄𝐇 𝐀 𝐁𝐄𝐇𝐁𝐀𝐖𝐌

Pathian hriatna hi mihring nihphunga bei ve ang hiala ngaih theih a nih laiin tunlai khawvelah Pathian hnawlna leh a awm tak tak pawh rin lohna a lian sawt hle. Pathian awm hnawlna (Atheism) hi mihring chanchina thil thar tak a ni a, Oxford English Dictionary sawi danin English-a Atheism tih tawngkam an hman hmasakna ber chu 1568 chauh kha a ni. Hemi hma daih pawh hian Pathian ngaihsak lo leh Pathian awm ring lo te pawh an awm tawh tih kan hria a. Amaherawhchu, mipui nawlpui rin dân an nghawr nghing pha ngai lo.Tun hma deuha Atheist Scientist leh Philosopher te khân an rin dan an ngawihpui deuh mai mai laiin, tunlaia mite erawh chuan a ninin Pathian an ‘ning’ tawh a, Pathian awm lohzia ‘chanchin tha’ chu thahnemngai takin an hril ta a ni. Tichuan, hemi chugnchanga khawvel inher vel dan chu: ‘Pathian a awm’→ ‘Pathian a awm dawn em ni?’ → ‘Pathian a awm lo a niang,’ → ‘Pathian awm rin hi buaina thlentu a ni’→ ‘Pathian awm rin tlat chu a mawl thlak’ → ‘Pathian a ninawm’→ ‘Pathian awm rin hi thil hlauhawm tak a ni’ → ‘Pathian awm rin tlat hi thil tha lo tak a ni’– tih a ni ta hial a ni.

𝐍𝐞𝐰 𝐀𝐭𝐡𝐞𝐢𝐬𝐭-𝐭𝐞 𝐡𝐧𝐮𝐡𝐦𝐚

New Atheism kan tih hian Atheism lo awm reng tawh ang lo va ze thar lo nei ta kan sawina a ni ber a. Hei hi Terrorist hovin September 11, 2001-a New York Twin Tower rapthlak taka khualzin phur thlawhna pahnih hmanga an sut chhiat ni atanga lo piang niin an sawi thin a. A tuk lawkah khan Sam Harris chuan a lehkhabu The End of Faith chu a ziak tan ta reng a. A hralh that dan ngaihtuahin miten sakhua sawiselna chu an lem duak duak a ni tih a lang ta a ni. Hemi hnu hian Richard Dawkins, The God Delusion (2006); Daniel Dennet, Breaking the Spell (2007); A.C. Grayling, Against All Gods (2007) and The God Argument (2013); Sam Harris, The Moral Landscape (2010); Christopher Hitchens, God Is Not Great(2007); Lawrence M. Krauss, A Universe from Nothing (2012); Michel Onfray, In Defence of Atheism (2007); Victor J. Stenger, The New Atheism (2009); leh Peter Boghossian, A Manual for Creating Atheists (2013) tih te a chhuak chho ta zel a ni. New Atheism hian science leh sakhua chu thil inkalh tlat angin a zirtir a. Sakhua chu zeldin thu bawl mai mai, Atheism erawh finfiahna awm vek ‘worldview’ (khawvel thlirna) –a innghat angin an sawi thin. Ngaihtuahna fim leh science hmasawnna hmelma lian ber anga ngaiin sakhua/rinna chu dik loh mai piah lamah thil tha lo tak niin an hria a ni deuh ber awm e. ‘New Atheist’ tih tawngkam hman hmasak berna chu kum 2006-a Wired magazine article Gary Wolf-a ziah kha a ni, an ti a. Chu article chuan New Atheism chu sakhaw lak firfiakna ang thova atheism firfiakna angin a sawi hlauh a ni tih pawh hre nghe nghe ila a tha awm e. New Atheism hi chuan sakhua hi a do nasa a, nuai ral a tum a ni ber. Rinna mitdel leh engkim tichhetu nia ngaiin a na thei ang bera sawisel a, beih rawn leh en liam mai mai lova hnial thlak zel tur tih hi an inzirtirna a ni.

𝐒𝐞𝐥𝐧𝐚 𝐚𝐧𝐤𝐚 𝐚𝐧 𝐭𝐚𝐰𝐧𝐠 𝐧𝐚𝐬𝐚

‘New Atheists’ te hian thawm nei ringin an thil sawi lam uar thiam viau mah se mithiam tak tak leh philosopher puitling taka ngaih an ni hauh lo a lo ni a. An beih ber Theology an hriat chian lohna avanga nuih an hlawh deuhthaw fo zawk a ni. A scientist-pui Francis Collins-an New Atheists zinga lar deuh ber Richard Dawkins a chu ‘Amateur Theologian’ a ti. Oxford mathematician leh Kristian apologist John Lennox chuan New Atheist te chu, “Rinna zawng zawng hi rinna mitdel anga ngaitu rinna mitdel,” niin a puh let ve hmiah mai bawk a. Richard Dawkins chuan sakhua reng reng hi a dik leh dik loh buk mumal lova duh ang zawng pawm tawp thin anga puhin a helh nasa hle a. Hei chiah hi scientism (science hriatna chauh ngaihsan bikna) worldview, New Atheist te khawthlir tarmit hman rawn nasat tak nihna a ni ve tho si hi anmahni ngum khak an hmuh lohna nuihzatthak tak a ni. New Atheism chu scientism na taka kalpuitu, scientific materialism (hmuh theih leh khawih theih chauh hi a awm tia ngaihna) pawmna leh na taka sakhaw thil reng reng dona a ni deuh ber zawk a. Pathian rinna that loh em emziaa mi hneh tumin hun an hmanhlel a, chutih rualin Pathian ber an hnawl si chuan thil tha leh tha lo tehfung (moral standard) chu khawi atangin nge an neih tak ang? Hetah hian pawh hian an zirtirnaa thil inkawlkalh awm hi a lang reng a ni.

𝐁𝐚𝐤 𝐧𝐞𝐢 𝐡𝐫𝐢𝐚𝐭𝐧𝐚

New Atheists ho hian thil sawi dik loh (factual errors) leh ngaih sual (logical fallacies) an ngah hle tih Norway Christian Apologist Peter S. Williams-an Dictionary of Christianity and Science –ah a sawi nasa a. Thenkhat phei chuan hnialkhan tui pai tam lo tak tak leh history hriat lohna thlaler atanga thil sawi thin niin an puh hial. An thiampuipa Richard Dawkins hian Chanchin Tha bute hi phuahchawp thawnthu mai mai angin a puh a, hetiang thuziak hi an hun laia chhuak tam viau angin a sawi thei nia! Zirna huanga mithiamte hnawl tlan tawh thil tam tak chu mi hriat loh hre ber anga inngaiin a thutak sawi vak vak thin bawk a. Entirnan, science leh sakhua indo tlat anga ngaih te, Isua chanchin hi phuahchawp thawnthu mai nia ngaih chungchang te leh a chanchin Kristiante sawi dan hi a hunlai mimawl ho thuvuvuka innghat anga sawi te. Chutih laiin thu thenkhat chik tak tak an ngam bawk si lo. John Lennox a bawk khan, “New Atheist te hian Isua thawhlehna chungchang hi an zir chiang ngam lo,” a ti hial. Thilmak (miracle) hi awm thei lo hrim hrima an ngaih sa avangin zir chiang lem chuang lovin an hnawl sa tawp mai a ni.

𝐓𝐡𝐢𝐚𝐦𝐧𝐚 𝐭𝐚𝐰𝐧𝐠𝐜𝐡𝐡𝐚𝐦

“New Atheists ho hian Pathian awm zia emaw, awm loh zia emaw tangfung tha mite lo sawi tawh te chik taka an bih ngun lo,” chu mak a tih zia California state-a Westmont College Philosophy zirtirtu James E. Taylor chuan a lo sawi chhuak tawh a. Theism (Pathian awm rinna) hnawlin Naturalism (thil nih ang ang hi chatuana awm tawp) an tan nasa satliah mai a ni awm e. Tunhnaia Kristian Philosopher ropui ber anga chhal theih Alvin Plantinga chuan New Atheist zinga thiamna lama chhuanawm ber anga an ngaih Daniel Dennett meuh pawh a kheng na hle mai “Dennett hian tunlai Analytic Philosophy of Religion a hre hlawl lo, mahse chu chuan mi zinga a ngaihdan fahrah te te sawi chhuah a titim chuang lo,” tiin. Dennett zawk hian, “Pathian awm zia sawifiahna te chu tanfungte ka chai hman vak dawn loh avangin Dawkins-an hneh taka a chhut chhiatnate kha ka ring mai e,” a la ti ta deuh deuh a ni awm a. Hemi chungchang hi Peter S. Williams bawk hian, “Mitdelin mitdel vek a hruaina dik tak a ni,” a ti ve thung.

𝐋𝐮𝐡𝐜𝐡𝐢𝐥𝐡 𝐥𝐨𝐡 𝐛𝐢𝐚𝐡𝐭𝐡𝐮

New Atheists zinga lar ber tih theih Richard Dawkins hian hmanlai atanga an lo chai tawh thin Pathian awm zia sawina tanfungte (arguments for God’s existence) zir chiang tawk lo leh lepse fumfe lo nia sawi an awm thin a. Chuvang chu aniang man chhuah mai theihin thil a sawi sual leh nawk thin. Thuziak mi James Hannam phei chuan Dawkina lehkhabu The God Delusion kha ‘under-research’ (zir chianna tawngchham) leh ‘under-argued’ (sawifiahna tawngchham) angin a ngai (http://www.bede.org.uk/goddelusion.htm). Hmanlai atanga tawha Pathian awm zia sawifiahna chi hrang hrangte chu luhchilh fumfe si lovin tanfung dang hmangin a bei ta vak vak ni deuh berah an ngai a ni. Dawkins-a hian a lehkhabuah Pathian awm zia sawi nana an hman thin tanfung sawifiahna 10 vel chai nan phek 37 chauh a hmang a, Kristian Philosopher Alvin Plantinga te chuan dawrzawn 12 (24 tihna) chuang fe mai awlsam taka phawrh mai tur an hre si a. The Blackwell Companion to Natural Theology tih lehkhabu pawimawh tak tunlai Christian Apologist ropui pahnih William Lane Craig leh J. P. Moreland te buatsaihah chuan tanfung 9 (pakua) lai chipchiar taka zirna an thur chhuah laiin Richard Dawkins ve thung chuan heta mi 4 (pali) chauh chu a lehkhabuah hian a chai ve leuh leuh a ni awm e. Heti a nih avang hian Pathian awm leh awm loh hi hriat a tum tak tak lo va, a zir chiang tak tak lo niin mi tam takin an hria a ni.

𝐇𝐥𝐚𝐮𝐡 𝐭𝐡𝐚𝐦 𝐥𝐨𝐡

America rama Christian Philosopher leh Apologist William Lane Craig chuan Dawkins-a tanfungte hi a hlau lo hle mai a, Kristiante rinna hi, “…a hliam tham lo va, tihhlum phei chu hlat tak a ni,” a ti mai a ni. Kum 2011-a debatepuia a chona kha Richard Dawkins-an a chhang ngam ngang lo a nih reng kha. Melbourne chanchinbu The Age –a sakhaw lam chungchang editor Barney Zwartz chuan, “Hmanlai atanga Pathian awm zia sawi nana an tanfung pawimawh chhawpchhuah thin ontological arguments, cosmological argument leh arguments from design te chungchangah Dawkina hriatna hi a beitham hle a. Atheist ve tho Oxford Philosopher, Mathematician leh Litterateur Bertrand Russel te meuh pawhin hnial hleihtheiha an lo hriat mumal lohte pawh vawi hnih khat thenkhumin a hnawl miah miah mai a ni,” a ti hial (https://www.theage.com.au/.../the-god-delusion-20061125...). Alvin Plantinga bawk kha a tawng na ngaih ngaih mawle, “Tanfung atana hman tam tak han chik hian Dawkins-a hian pawl 10 Philosophy exam a fail ang,” a ti a nih kha (http://www.biblicalcatholic.com/.../DawkinsGodDelusionPla...). Kristiante Philosophy thiampuipa Plantinga hian New Atheists te chu, “rilru inhawng tawk lo, finfiahna tam tak hnawl lui, leh tanfung tha tak zawn aia mahni hnialpuite deu, nuihzat leh an sawi miah loh sawitir ching,” angin a puh hial a ni awm e. Kristian Philosopher chhuanawm tak ve tho Paul Copan pawhin hemi zulzui hian New Atheism hi fimkhur lo taka Theism beihna niin a hria a, “tunlai khawvela Pathian awm zia sawitute tanfung tha tha man pha lo,” angin a hmu hniam hlawm hle a ni. A thianpa William Lane Craig ngei pawh khan New Atheism chu, ‘mahni nihna lo anga lan tumna, mi mawl zawk te leh hre tlem zawkte bum tumna,’ thil niin a sawi bawk.

Sangawizawnpuite thu-hla

Atheism hi thil thar a ni lo va, mahse huaisar taka lo inlar ta hi chu thil thar ve deuh a nia. An chet dan hian heng ho lo lan hmaa Atheist lo ni ve keuh keuh tawh te ngaihdan a pel ve det thin a ni awm e. An nihphung leh hnial khan te a hmuhin atheist ve tho Michael Ruse chuan, “Atheist nih min tizak,” a ti hial a, “Dawkins-an philosophy leh theology a hriat lohzia (history of science chu sawi lo ta ila) hi a mualpho thlak takzet a ni. An thluak thatna leh thil puak chhuah thar chhuanga nuam ti tur an ni mawlh lo…a nihna takah chuan, an thu rawn chhawp chhuah tharte hi ‘second rate’ a ni a, chu chu thukhuh taka ‘chhe hlawm tawp’ sawina a ni,” tiin a bei a ni. Atheist lar Julian Baggini ngaihdanah chuan an style (Theism beih vak vak) hian rah tha lo a chhuah zawk dawnin a hria a. British Philosopher Daniel Came pawhin, “New Atheist-ten an bitumte an beihna hriamhreiah hian han buaipui tlak vak a awm lo,” a lo tihsak tawh bawk a. Chu mai a ni lo, Atheism khawvela zah hlawh ve tak Thomas Nagel chuan, “Kal hmasate zahna chhete pawh nei lovin Dawkins-a hian Pathian awm zia sawifiahna tanfungte chu a rawn hnawl miah miah mai a ni a, a philosophy hi a nep hlein ka hria,” a lo ti ve thlawt bawk a ni. Philosopher of Science lar tak Massimo Pigliucci pawhin New Atheist ho scientism hi a duh lo khawp mai a, Dawkins-a lehkhabu God Delusion phei chu, “Hriatna tawngchham tak nena mahni tan lam tan teh vutna,” tiin a sawisak a ni. Thil kal dan han en hian New Atheism hi chuan a daih rei dawn lo a ang e.

𝐀𝐭𝐡𝐞𝐢𝐬𝐦-𝐢𝐧 𝐚 𝐤𝐞𝐧 𝐭𝐞𝐥

Tumahin Pathian awm zia hi an sawi bo zawh ka ring ngai lo a. A ringhlel erawh chu an awm thei ang. Mithiam tam takin Pathian awm an rin loh chhan awmze nei tak tak an sawi chhuak tawh a, awih duh tan chuan awihawm tak anga lang pawh a awm ve tho thin tih hria ila. Amaherawhchu, Pathian a awm lo a nih chuan kan thil ngaihtuahna kalphunga thil awm lo lutuk nia kan hriat kan pawm tel a ngai dawn a, buaina namenin kan buai dawn lo a lo ni ve tho. Atheism hi kan pawm a nih chuan a thu ken tel a hnuaia mite hi kan pawm tlang a ni dawn si a:

1. Engmah lo atangin engemaw a lo chhuak thei;

2. Lei leh van kalphung inrem fel tak hi amaha lo inrem fel mai a ni;

3. Nunna awm miah lohnaah nunna a lo intan tawp;

4. Thil inpawlhsawp buai nuaiin thil awmze nei tak a thlen;

5. Lungtum ang maia rilru nei lo thil awm mai mai atangin ngaihtuahna fing a lo awm;

6. Awmze nei lo atangin awmze nei a rawn zi chhuak;

7. Awm chhan nei miah lo khawvel hian dam chhan hre lova lungawi thei lo mihring hi a hring.

Heng zawng zawng ngaihtuah hian Atheism hi thu fing tak a ni thei dawn em ni le?

𝐓𝐥𝐚𝐧𝐠𝐤𝐚𝐰𝐦𝐧𝐚

Pathian awm han rin loh ngawt hi mihring zia nen a inkalh hial a ni awm e. Chu vang chu a ni ang khawvel culture zawng zawng hi Pathian awm ring culture kan ni vek a, khawvelah hian Atheist hi an tam lo. Kan ramah phei chuan social media kaltlanga hming lem hmang lem lo phei chuan langsar takin inlâr pawh an inlâr ngam lo hial mai thei. Chuti a nih avang chuan ngaihthah theih a ni chuang lo. Mi thenkhat lo buai ru deuh te hruai dik a, a buai miah lote pawh an rinna a dikzia zirtir hi kan tih tur a ni ngei ang. Atheist hneh zawh tawh loh kan nei a nih pawhin, Kristian sakhua hi rintlak sakhua a ni a, Isua Krista hi enliam mai mai theih a ni lo tih lantir leh sawifiah hi tihmakmawh a ni a. Hemi kawngah hian thangtharte thlen chin china luhchhuah thei kan nih hi a pawimawh zel dawn a ni.

*****