𝐓𝐑𝐈𝐍𝐈𝐓𝐘 𝐂𝐇𝐔𝐍𝐆𝐂𝐇𝐀𝐍𝐆

Tun hnaia debate kha rinaiin ngaihven a hlawh daih mai a. A debator-te mi lar sa an nih vang pawh a ni mai thei. An thu inchuh pawhin chai zui a hlawh nasa. Debate that riauna chu mi rilru a khawih thar a, keini ang ngaihdan fumfe tak nei sa tawh te pawh kan lo inchhiar nawn phah a, thil tam tak kan hriat belh phah thin hi a ni. Amaherawhchu, debate hrim hrim hi ngaihdan tawk neih a tha. A debator-te chet fuh leh fuh loh, hun tiam chin nei a sawi leh an thu hriat china innghat mai a nih avangin thutawp a hril lem lo va. Debatea chak leh chak loh hian thutak a kawk chuang lem lo thin. Chuvangin inhnial fiamna hlimawm tak a ni mai chauh tih hriat a tha. Hmanlai theologianten ‘hriau hmawrah vantirhkoh engzah nge lam thei ang?’ tih te, ‘Tui thianghlimah hian tho bawlhhlawh tla ta se a tui kha a tibawlhhlawh dawn nge, tho kha tui thianghlimin a tithianghlim zawk dawn?’ tih an chai vak vak anga sawt lo a nih palh erawh a hlauhawm ve tho va. A tawk chin hriat thiam tum ila a tha mai awm e.

𝐓𝐫𝐢𝐧𝐢𝐭𝐲 𝐬𝐚𝐰𝐢𝐟𝐢𝐚𝐡 𝐭𝐮𝐫𝐚 𝐢𝐧𝐛𝐞𝐢𝐬𝐞𝐢𝐧𝐚

Trinity thurin hi Kristian thurin zinga inhnialna chhuak hmasa ber zinga mi a ni a. Sawifiah dan chi hrang hrang a awm nual tawh nangin tun thleng hian sawifiah fak thei an la awm lo a ni awm e. Pathian pakhata minung pathum hi sawifiah tura inphut chi a ni vak lo a niang. Mithiam tam takin an lo tum tawh thin. A pawm duhtu tan chuan a tha hlawm hle, mahse duh lo tana lungawi zanna khawp a la awm lo a ni. Chumi awmzia chu sawifiah theih hi a ropuina a ni lem lo tihna a ni mai thei. Sawifiah chian theih avanga pawm leh pawm loh tur chu ni se Kohhranin official taka kum 2000 a lo pawm tawh hi an thlauhthlakna a rei tawh ang ka ring. Dik lo ni ta se Thlarau Thianghlimin a Kohhran hruaite hi chuti taka rei chu a dawt a rintir lo tawp ang. Chu chu Trinity thurin hi rintlak a nihzia ka pawm chhan pakhat a ni. Chu bakah Trinity thurin hi a pawmnahawm a ni tih chu Bible chhiar a, Kohhran Chanchin ngaihven a, Theological thinking nei thiam ve tittet tan chuan a lang mai bawk a ni. Ka smartphone chhunga thil awm zawng zawng leh a hnathawh dan chu ka sawifiah zo hauh lo, mahse ka smartphone chu a awm ngei a, ka hmang tangkai ngei a ni tih ka hre si. Chutiang ang deuh chuan Pathian pakhata minung pathum chu a lang fiah em em a, engtiang takin nge chu chu a awm tih hriat phak loh chu mihring tan a zahthlak lem lo a ni.

𝐏𝐚𝐭𝐡𝐢𝐚𝐧 𝐩𝐚𝐤𝐡𝐚𝐭 𝐜𝐡𝐚𝐮𝐡

Kristiante hi Pathian pakhat chauh betute kan ni tih hi hriatfiah hle tur a ni. Trinity ringtute hi Pathian pathum bia anga min puhthluk an tum tlat thin a. Chumi thangah chuan awh bik miah loh tur a ni. A nihna takah chuan Biblea inziakte hriat fiah tumna kawngah chuan Trinitarian ho dinhmun hi Oneness/Unitarian te aiin a tha zawk daihin a lang. Pakhat anga sawi zawng zawng hi Trinitarian chuan a kalh hauh lo, mahse Isua leh a Pa sawi hranna te, Isua leh Thlarau Thianghlim sawi hranna te zawng zawng hi Trinity thurin atang lo chuan sawifiah hleih theih loh tluk a ni. Sawifiah hram hram tumtute hian an tum em avangin an lungawi lui mai mai niin a lang zawk. A text-in a sawi piah lam an bel chawp ni ngeiin a lang thin. Chu chiah chu Trinity tantute pawhin a tihsual ve theih tho tih hriat erawh chu a tha a. Thuthlung Hlui lamah phei chuan trinitarian formula kan tih kha a la hmang meuh lo va, zir bingtuten an en letin Trinity anga inpuanna anga pawm theih an hmu thin a ni chauh zawk tih hria ila.Thuthlung Tharah chuan trinitarian formula hi an hmang tan a, an la ziak chiang fek fawk lo nain a rawn lang fiah tawh hle a ni tih a hriat theih a ni. Chu chu Pathian Kohhranin a hmu fiah ta zel a ni mai awm e. A tir atanga Pathian inpuanna chu a Kohhrante a nih zel avangin a Kohhrante sawi kha chu kan pawm chhunzawm ta zel chu a nih mai hi.

𝐈𝐬𝐮𝐚 𝐏𝐚𝐭𝐡𝐢𝐚𝐧𝐧𝐚 𝐯𝐚𝐰𝐧 𝐭𝐮𝐦𝐢𝐧

Mizo Kristiante hi chuan Isua hi kan hmu Pathian em em a. A mihrinna lam hi kan ngaihthah thak thin. Juda, Jehovah’s Witness, Muslim leh Pathian ringlo ho chuan an hmu Pathian lo nasa a ni. Kristian inti zingah pawh liberal tak tak ho Isua Pathianna ring lo an awm furin a rinawm. Muslim apologist ho chuan Trinity hi an bei nasa hle a, debate ngaihnawm tak tak pawh youtube lamah a awm tih hria ila. An ngaihdan bulthutah chuan Isua hi Pathian angin an ngai lo tih a chiang hle. Hei hian awmzia thuk tak a nei. Trinity thurin hi hnawl dawn chuan Isua Pathianna chungchanga kan thurin hi a tiderthawng hial zawk a ni mai thei. Chuti zawng chuan Bible text tanchhan tur an lo hmu ve fur thin si a. Tin, Trinity thurin lo than chhoh zel leh Kohhranin heti taka a vawn nghehna hi Isua Krista chungchang zirtirna (Christology) a lo than zelnain a ken tel a ni bawk a. Trinity theology awm lo se Isua hi mihring pangngai danglam tak leh ropui tak anga chhuah a awl dawn riau tihna a ni. Chu chu Bible sawi dan leh ringtu hmasate hriat dan a nih miau loh avangin sawifiah harsa teh mah se Trinity thurin hi a lo awm ta a ni, ti ila kan sawi sual lovang. Sawifiah theihna aiin a nihna pawm theih lamah an tuan thui zawk a nih chu! Sawifiah zawnga ramtan dawn chuan Pathian nihna hrim hrim te hi sawifiah harsa eltiang a ni a, Oneness/Unity pawh ni se a lem chuang lo.

𝐓𝐡𝐮𝐫𝐢𝐧 𝐤𝐚𝐥𝐩𝐡𝐮𝐧𝐠 𝐝𝐢𝐤

Mizote Kristianna chungchanga lawmawm em em chu Bible thuneihna kan la vawng tha hle hi a ni a. ‘Bible-in a sawi alawm’ kan tih tawh hi chuan hnial ngam kan la awm meuh lo. Pathianin min la chenchilh nasa tih a chiang a ni. Chutih rualin Bible kan hman dan erawh a inang lo deuh thin a ni. Tlemin unau kan inhnial leh bap bap thin a nih hi. Thurin him duang chhuak tur erawh chuan Bible thu, Theology leh Kohhran Chanchin atanga teh a ngaiin ka hre thin. Bible-in a sawi chian na na na hi chu han hnualsuat leh rinhlelh tum lo phawt ila. Chiang tawk lo leh Bible hrilhfiah dan chi hrang hrang atanga danglam theiah chuan theological thinking (rilrua thliar felna, thu inlaklawn dan hriat thiamna) tha tak hman thiam tum ta ila. Tichuan, Kohhran Chanchin kum 2000 kan neih hi hman tangkai ngei ngei tur a ni ang. Bible hi Thuneitu ber ni mah se Pathian chu a Kohhrante kaihruai leh enkawlin kum 2000 chhung a thawk tawh a ni tih hi hmaih hauh loh tur a ni a. Kan zir chian tur hlu tak leh ngaihnawm tak a ni. Baptisma leh Trinity chungchangah te pawh hian Apostle-te zirtir chhawngte hunlai atanga ringtute thuziak rinrawl Didache bute, Apostle ten an kaihhruai leh trained Kohhran Pate zirtirna te hi Bible kalhtir lova, Bible hriat thiam nana hman zawk tur ni awm tak a ni. A thuhrimah tuna Bible kan tih pawh hi chutiang thu kalzelin a vawrh chhuah (canonized) a nih miau avangin Kohhran lehkha tam tak hnualsuat loh tur chin a awm tih a lang. Kum 2000 hnu-a tarmit thara chhiara zirtir mai zawng a him loh palh a hlauhawm e. Kristianna din tirh atanga ringtu zawng zawng deuhthaw chhandam ni lo tura ngaih mai theihna theology ang chite phei hi chu a lutuk deuhvin a hriat loh theih lohva, Trinity vs Oneness tih angreng-te pawh hi inpawm tlan theih dan zawng ta zawk ila a har lutuk lovin ka ring tlat. Trinitarian hovin Pathian pakhata minung pathum, an ti a; Oneness lamin Pathian pakhat lan dan pathum, an ti ve thung a - hnaivai angreng tak chu a ni.

𝐓𝐫𝐢𝐧𝐢𝐭𝐲 𝐡𝐥𝐮𝐭𝐧𝐚 𝐤𝐚𝐧 𝐡𝐫𝐞 𝐝𝐚𝐰𝐧 𝐜𝐡𝐚𝐮𝐡

Tunlai Kristian thurin zirna lam kan thlir chuan Trinity thurin hi mithiamten hnawl lam aiin a hlutna an hmu chhuak zel zawk niin a hriat theih tlat mai. Lehkhabu hlu tak tak a chhuak rei rui mai tih hria ila. Kristiante rawngbawl dan tur zir chian kawngah Trinity ruangam entawna beih dan tur te, mihring nun hona kawngah chatuana Pathian awm dan - hrang si, pumkhat ni si – ang hlutziate pawh an zir chhuak hial a ni. Kristiante hian Trinity Thurin hlutna hi kan pawh telh telh ang a, buaina chhana hman aiin kan chhuang hle zel zawk dawn pawh a ni mai thei. Pa leh Fapa leh Thlarau Thianghlim te minung hrang theuh Pakhat ni si te awm danah hian Zoram Kristiante pawhin kan Kristaa kan inpumkhatna leh kan danglamnate hi nunpui thiam ila a va tha dawn em!

*****