𝐅𝐄𝐋𝐇𝐀𝐋𝐍𝐀 𝐋𝐄𝐇 𝐅𝐄𝐋𝐓𝐀𝐌𝐍𝐀

Kan pian chhuah chiah atanga mamawh nei tura siam kan ni a. Nu hnute tui lovin a khawsa thei lo titih nghal a ni. Dam chhungin thil chakna chu a awm ta reng a. Mahse, thil chak erawh chu a ngai reng lem lo. Riltam pangngai leh tuihal atangin thil dang chaknaah kan thang zel a. Chutiang chakna chu kan nun kaihruaitu ber a lo ni a, kan nunin zawn ber pawh a ni tih kan hre tlang. Kan thil chak hi a danglam thei viau tih pawh kan chiang hlawm a. Kan tuihalna a inang lova, mahse tuihal vek kan ni thung.

𝐅𝐞𝐥𝐡𝐚𝐥𝐧𝐚 𝐥𝐞𝐡 𝐟𝐞𝐥𝐭𝐚𝐦𝐧𝐚 𝐜𝐡𝐮

Lal Isuan Matthaia 5:6-a tuihalna hlu ber leh tha ber a sawi hi ngaihtuah thin a pawimawh khawp mai. Mizo Bibleah, “Felnaa riltama tuihalte chu an eng a thawl e; An la tlai dawn si a,” (LH) “Felna duha riltama tuihalte chu an chan a tha e, an la tlai dawn si a,”(LT) tiin dah a ni a. Helai takah hi chuan Mizotawng hi ka khamkhawp lo ve deuh tlat mai. Felna duh avanga taksa riltam leh tuihal tuar a kawk thei deuh va. Mahse, a sawi tum tak chu ‘Blessed are those who hunger and thirst for righteousness’ tih a ni a. Felna chaka hal huam huam, felna chaka tam ngawih ngawih a tihna a ni. Felna a chak avanga taksa riltam leh tuihal tuar lam aiin – felna a chak dan chu tuihalin tui a chak ang, riltamin chaw a mamawh ang a ‘fel-hal’ leh ‘fel-tam’ a nih ber chu. Chutiang tak chuan felna hi kan nunin kan chak em le? Felna hi kan chak huam huam nge pumpelh theih dan kan zawng ru dek dek thin zawk? Isuan mi vannei a tih ang hi kan ni ve ang em?

𝐅𝐞𝐥𝐧𝐚 𝐢𝐧 𝐤𝐡𝐚𝐰𝐥𝐡 𝐤𝐡𝐚𝐰𝐥𝐡

Heta ‘felna’ hi a greek tawng chuan dikaiosune a ni a. Chu chu Thuthlung Tharah ‘Pathian hmaa felna’ leh ‘dikna/felna’ (justice) hrim hrim sawi nan an hmang thin. Thil inzawm reng an ni tih a hriat bawk a. Khawvel rilru hian Pathian laka felna chak hi a hlat telh telh dawn. Pathian lakah ni lovin kan mihringpuite emaw, kan hmuh phakte laka felna emaw, fel anga lanna emaw hi an duhtawk fo dawn a ni. Khawvel finna leh thiamna chuan chu chu a ngaih pawimawh theih chin a ni bawk. Mihring thlarau erawh chuan chu chu a khamkhawp hauh lo. Tin, chu Pathian laka felna chu mihringin amah maia a neih zawh rual a ni lo va, Isua rinin a neih theih a ni. Isua Krista lal leh chhandamtu a nihna pawmtute tan chuan Krista felna chu an tan dahin a awm ta a ni. An felna atan Krista felna chu chhiarsak an ni a, Isua mark lo hmuh tawh zawng zawng chu an mark atana ziah luh a ni ta a nih chu! Isua felna chu an felna a ni ta der mai! Chu chu Pathian khawngaihna anmahnia lang a ni. Anni chu an la pangngai reng, an la fel lo reng, mahse fela puan an ni tawh si. Isua felna chu an in khawlh khawlh a, an hap bawrh bawrh a ni ber e.

𝐍𝐞𝐢𝐡 𝐬𝐚 𝐜𝐡𝐚𝐤 𝐜𝐡𝐡𝐮𝐧𝐳𝐚𝐰𝐦 𝐳𝐞𝐥 𝐧𝐮𝐧

Hetah hian engkim a tawp a ni hauh lo a nia. Thlarau Thianghlim chuan ringtuah chuan hna a thawk chhunzawm zel a. Chumi Krista felna khawngaihna avang chauha a neih tawh chu a nuna par chhuahtir turin a chak chhunzawm ta tlat a. Ni tina langsar zual telh telh tur – Krista chu tam telh telh a, amah chu tlem telh telh turin ama hringnun chu a kheh a, Krista felna chu pho chhuah a tum ta a ni. Chu Krista felna chak chuan a tuihal tlat tawh si a. Fel-halna leh Fel-tamnain a khalh nun chu Kristian nun kan tih tak hi a ni. Mimal nun piahlamah ama in chhung, thenawm khawveng leh khawtlangah te felna chak chuan a halin a tam huam huam a ni ber tawh a. ‘I hming zahawm rawh se, I ram lo thleng rawh se, I duh zawng vana an tih angin leia min ti rawh se,’ tiin a tawngtai ni tin ta a. Chu felna lo chuan a nun a lungawi zo tawh lo a ni.

𝐇𝐚𝐥 𝐥𝐞𝐡 𝐭𝐚𝐦 𝐧𝐚𝐬𝐚𝐭 𝐝𝐚𝐧 𝐚𝐳𝐢𝐫 𝐳𝐞𝐥𝐢𝐧

Isuan vannei a tih leh tih loh chu kan ‘felhalna’ levelin a hril dawn tihna a nih chu. He felhalna hi i neih phawt chuan i rin leh beisei aiin a hruai sangin a nawr thui dawn che a ni. I lenna a la hniam viau chuan i la hal tawk lo a ni mai thei. Kel chi khat Ibex an tih hi awihawm loh khawpa bang lawn thei an ni a. Youtube-ah hmuhnawm eltiang a awm. Tuikhuah (dam) bang sang em em ramsa dang chu sawi loh mihring kuttang sawm nei tan pawha lawn phak rual loh te chu an han thleng mai a ni. Engvang nge hetiang bang sang em emte hi a lawn theih? Chu lung bang sang tak atanga lo hnam chhuak tui al, calcium tel ngat mai chu an chak a lo ni a. An ruh te a lo chaka a lo than theih nana an mamawh chu an chak huam huam avangin awihawm loh khawpa lung bang sangte pawh chu lawn thei an ni. Nang leh kei pawh Felna chaka kan hal leh tam nasat ang zelin Kristian nun leh rawngbawlnaah hian kan thleng sang dawn a ni. Ramsa tuihal ve lo Awle leh Ibex kel tuihal huam huam thlen chin a insan hleih em mai!

𝐃𝐢𝐧𝐡𝐦𝐮𝐧 𝐡𝐫𝐢𝐬𝐞𝐥 𝐥𝐨

A lehlama sawi chuan chu fel-halna leh fel-tamna nei miah lo nun chu ngaihtuahawm tak a ni a. Felna chaka i hal ngai lo va, i tam ngai lo a nih chuan dinhmun hlauhawm takah i awm a ni mai thei asin. Mihring taksa pawh hi chaw chakna a han bo mai chu a buaithlak teh a nia. Mi pangngaiin chaw ei tuina kan han hloh chu Doctorte an phawk nghat viau zel hi. Chhung lamah dik lo a awm a ni tlangpui. Chu chiah chu thlarau nunah pawh hian a chiang. Fel-halna i neih loh chuan dik lo a awm a ni ngei ang. Fel-tamna a tlak hniam viau chuan i chhungah awm lo turin bu a khuar a ni mai lovang maw? Fellohna i en liam mai mai thei a, i ngaizam mai mai thei a nih chuan inenfiah a hun hle tihna a ni ang. Nunna i nei lo pawh a lo ni reng mai thei asin. Nunna nei chhinchhiahna chu tuihalna leh riltamna a ni miau si a.

𝐇𝐥𝐮 𝐤𝐚𝐧 𝐭𝐢𝐡 𝐳𝐚𝐰𝐧𝐠 𝐳𝐚𝐰𝐧𝐠 𝐚𝐢𝐚 𝐡𝐥𝐮

He felna hi a han hlut em em zia chu mak tak a ni. Chu felna avanga tihduhdah tuar meuh pawh vanneihna a nih lehzel a nih chu. Chumi felna, Lal Isua Krista, chu a hlut em avangin tihduhdah, mi hauh leh dawta sual tinrenga puha awm pawhin ‘lawm ulang nasa takin hlim rawh u’ (Mt. 5:11,12) zu ti lehzela mawle. Isua hian hre sual awm lo tak a nia. Kan thil duh ber berte avang hian ‘hauh’ ‘tihduhdah’ ‘dawta sual tinrenga puh’ ni dawn ta ila a manhla tawkin kan hria ang em? Hausak hi a hlu e, mahse hausak vang hian min tiduhdahin, dawtin sual tinrengin min puh dawn ta se hausak hi kan chak ang em? Hmeltha hi an vannei e, mahse miten tihduhdah phah dawn ta se hmelchhiat an thlang mai lovang maw? Felna erawh chu a hlu em a, chu felna avang chuan miin min hau emaw, min tiduhdah emaw, dawtin sual tinrengin min puh emaw a nih pawhin ‘Haleluiah’ pek a awm zawk a nih chu. Lawma zuan zawr zawr-na tur thil a ni.

𝐀𝐧 𝐥𝐚 𝐭𝐥𝐚𝐢 𝐝𝐚𝐰𝐧 𝐬𝐢 𝐚

Chu felna chaka tuihalte nihlawh em em chhan chu eng nge ni? Tawi tein Isuan a sawi – An la tlai dawn a ni. A tawngkam hi a mawi ngawt mai. An mamawh zawng zawng, an duh zawng zawng, hnianghnar leh kim takin an la nei dawn. Pathian hun tiam kan nghak peih lo thin hi a buaithlakna lai tak chu a ni zawk fo. Kan Pathian hi a thiltih tawh chu hneh taka ti thin Pathian a ni a. Josefa kha chawimawi a duh hunah chuan a chawimawi hneh khawp mai. A hunlaia sorkar ropui ber Aigupta sorkar Prime Ministerah a dah luah mai. Daniela chawimawi a duh hunah chuan a a hun laia sorkar ropui ber tho Babulon Prime Minister-ah a hlang kai bawk. Thingtlanga sei lian ve mai Davida kha chawimawi a duh hunah chuan a chawimawi thiam teh e. Kan Pathian hi hnehban theih a ni lo. A duh hunah chuan ‘nova liam zawih zawih’ a thlentir mai a ni. Chu felna chak chuan hal huam huam la, tlai hun lo thleng tur nghak peih ang che. Lal David hi a tlai chiang khawp mai.

“Mi dotute mit hmuhah ka hmaah

Dawhkan i buatsaih thin a;

Ka lu hi hriat i thih tawh a;

Ka novah hian a liam reng a;

Matheilovin thatna leh ngilneihnain

ka damchhung zawng hian mi zui zel ang a.

Tichuan, Lalpa inah kumkhuain ka awm reng ang,” (Sam 23: 5,6)

*****