𝐁𝐄𝐓𝐇𝐋𝐄𝐇𝐄𝐌

 

Naupangin Bible kaihhnawih a tawngkam hriat hmasak pawl chu ‘Bethlehem’ tih te hi a ni ngei ang. Kan Pathian Thu hriatna leh naupan lai hriatna hrim hrim hi chhut let ta ila Krismas kaihhnawih hi a ni deuh vek awm e. Fakna hla kan sak theih hmasak, lengkhawm hla kan hriat hmasak leh nu ho lam kan hmuh hmasak ber chu Krismas kan hman te kha a ni berin ka hre thin. Chuvang tak chuan Krismas hi a hlu a, kan than len zelna kawngah  a pawimawh a ni. Kan hman dan kan uluk a ngai a, Krismas thlarau dik tak kan lan chhuah tir ngei a pawimawh ang. Hlimna ni a nih anga hlim thei ang bera hmang turin duhsakna kan inhlan a ni.

 

𝐉𝐮𝐝𝐚𝐢 𝐤𝐡𝐚𝐰𝐩𝐮𝐢 𝐳𝐢𝐧𝐠𝐚 𝐭𝐞 𝐛𝐞𝐫 𝐥𝐨

Bethlehem khaw chungchang sawi hmasakna ber chu Jerusalem Governor atana Pharo-an a dah Abdi-Heba lehkhathawn, BC 1400 lai vel daih kha ni tawhin an sawi. He lehkhathawnah hian ‘Bit-Lahmi’ tiin a sawi nghe nghe. Heti a nih avang hian a hming hmasa chu ‘Beit Lahama’ (Kanan ho pathian Lahmu in, tihna) nia sawi pawl an awm. Mahse, hriat dan tlanglawn zawkah chuan ‘Bet Lehem’ (Chhang in) tihna hi a ni zawk a, Arab ho chuan ‘Bayt Lahm’ (Sa in) an ti a ni awm e. He thingtlang khaw lian lo tak thin, lal Davida leh Lal Isua pianna khua lo ni ngat tawh hian Zofate lung a len ngang ni tur a ni, khaw tin hian veng pakhat hmingah ‘Bethlehem’ tih hi kan nei fur awm asin!

Tunah chuan Bethlehem hi West Bank huam chhunga awm, Jerusalem atanga chhim lam Km 10 vel chauha hla a ni a. Kum 2017 inchhiarpui khan min 28,591 an awm tih a ni a. Chuti a nih chuan Champhai khawpui nen khian intiat velah a ngaih theih awm e. A khawchhunga mite ei hmuhna ber chu khualzin (tourist) an ni a. He khuaah hian Biak In pakhat ‘Church of the Nativity’ an tih, Isua pianna hmun behchhana an sak avang chuan tlawh a hlawh nasat phah hle a ni. Tunlai dinhmunah erawh chuan khualzin an tlem avangin he khaw mite ei leh bar zawnna pawh a tlahniam nasa hle a ni. Judai khawpui te zinga a tet ber loh chhan pawh a chhunga piang avang ni ngat hi vawiinah chuan hmun khawhar a ni ber awm e

 

𝐁𝐞𝐭𝐡𝐥𝐞𝐡𝐞𝐦 𝐭𝐚𝐤 𝐞𝐫𝐚𝐰𝐡 𝐚 𝐫𝐞𝐡 𝐫𝐮𝐚𝐢 𝐦𝐚𝐢

Chutih laiin tunlai hian Bethlehem tak tak erawh a reh ruai mai a. Kum 2 a ni ta, a hlimhlawp zawnga Krismas boruak neih a har hle a ni awm e. Indo a reh hleithei si lova Bethlehem khaw mite chuan an tuar tlawk tlawk mai ni tur a ni. I tawngtaisak thin ang u. Hetih lai mek hian kan Manipur unaute chuan kumin chu a theih ang anga Krismas hman an tum a. Nikum khan engmah ti lovin an ngawi ral kha a nia. Kumin chu ral muang kim zat lo deuh a nih pawhin hlim taka hman an tum a ni. An dinhmun ngaihtuahpui hian an khawngaihthlakin a ‘tunlai Bethlehem’ angreng hle a ni. Israel ram Bethlehemah pawh hian an halpuah hriat chu bomb tak tak, halmawi hmuh phak pawh missile tak tak thlawk vur vur leh puak leh dur thin te a ni lovang tih sawi theih a ni lo.

Israel ramah khuan indo neuh neuh, a nasa deuh leh ziaawm deuhte chu 1948-a independence an puan atang khan an chawl mang lo va. Tun hnaia a thar ber khu chu October 7, 2023 atanga an tan kha a ni a. Tawp zai an la rel thei ngang lo a nih khu. Remna Lal pianna hmunah remna a awm hleithei lo va, Van angel ho zai ri te pawh hriat tur awm tawh lova reh ngawih ngawihin Bethlehem dai vel pawh nghawr nghingtu a awm tawh lo ni ngei tur a ni. Mi tin thinlungah Remna Lal chu rawn piang nawn leh ngei teh se! Mihringte zinga heti taka indo leh innghirngho a tam mai hi chu hringfa ni ve lo min hretu an awm ngai a nih chuan atthlak an ti ve ngawt thin ang maw le.

 

𝐁𝐮𝐚𝐢𝐧𝐚 𝐭𝐡𝐥𝐢-𝐢𝐧 𝐚 𝐥𝐞𝐧 𝐯𝐞𝐥 𝐭𝐡𝐢𝐧

Rom sorkar hnuaiah khan Bethlehem chu Emperor Hadrian-an a tichhe hneh hle a, mahse lal Constantine-an tung ding leh a nih kha. Constantine-a hian 327 AD khan ‘Church of the Nativity’ Biak In chu sakna tur thu a pe nghe nghe a ni. Hemin hnu hian Samari ho helin an tichhe nasa leh hle a, Roman Emperor Justinian I -an a siam tha leh a. Muslim ho hnuaiah rei fe a awm hnuin Crusaders ho khan an la let a, Catholic kohhran thuneihna hnuaiah a awm chho ta a ni. Tunah tak hian Palestinian National Authority hnuaia awm a ni awm e.

He lung tileng tak khua hi Arab Kristian ho khua anga ngaih thin a ni a, tunah erawh chuan Muslim an tam zawk daih tawh a. Kum 1955 vela 86% kha 2022-ah chuan 10% vel chauh an ni tawh a ni. Krismas hi kum khatah vawi 3 he khuaah hian an lawm thin a. Roman Catholic leh Protestant ten December 25-a an lawm thin hi Greek Coptic leh Syrian Orthodox Kristiante chuan January 6-ah an lawm thung. Armenian Orthodox an titen January 19-ah an lawm ve leh thin bawj a ni. Hriat dan a dang a, tih dan phung pawh a dan thin lai hian Isua pian ni aiin a lo pianna hi lawm ila a tha tlang theuh mai awm e.

𝐁𝐞𝐭𝐡𝐥𝐞𝐡𝐞𝐦 𝐓𝐡𝐮𝐜𝐡𝐚𝐡 𝐤𝐡𝐚

Khatia Samuela lal Saula chunga a beidawng, Pathianin Bethlehema chho a, lal atana a mi thlan hriak thih tura a tih khan. Zawlnei Samuela meuh pawh khan mihring tehfung hmangin pianphung thatna te a lo en  ve a, mahse Pathian thutak chuan, “…mihring chuan pâwn lama lan dân an en ṭhîn a, LALPA erawh chuan thinlung lam a en zâwk ṭhîn a ni,” a ti hmiah mai a, lal awm lo ber anga an ngaih Davida a thih tir ta mai a nih kha. Beramputen an beram an ven zan Bethlehem dai velah khan “Chungnung berah Pathian ropui takin awm rawh se, Lei chunga a lawm êm êm mihringte hnênah rem thu lêng rawh se,” tiin van zaipawl te an rawn zai tuar tuar a nih kha.

Heng Bethlehema puanchhuah tak thuchah zawng zawng khi he khawvel hian a va la mamawh em!

 *****