𝐌𝐀𝐍𝐈𝐏𝐔𝐑𝐀𝐇 𝐏𝐑𝐄𝐒𝐈𝐃𝐄𝐍𝐓 𝐑𝐔𝐋𝐄

Thla 18 lai min chiah ta bawk a, Manipur chungchang hi a beidawnthlak rum rum thin a nih hi. A tih dan tur hria hi an awm ngang lo ni tur a nia. Hre thui deuh anga kan ngaihte han zawt ila, “Buaina hi a reh mai a rinawm loh,” te an la ti ta deuh deuh. He thil thleng hi chu a pawi takzet a ni. Mi 250 vel an thi tawh a, mi 100000 vel lai mahni in leh lo luah thei lova awm nia hriat a ni a. Nunphung a tihdanglam dan hi chu mak tak a ni. TV-ah Meitei nu pakhat ang chuan, “Gujarat buaina mi 1000 chuang thihna kha ni 3 chhungin an tidai thei a, Muzaffarnagar buaina ni 20, Delhi a thleng kha ni 7 chhungin an tireh thei a, Manipur buaina heti thleng thleng a nih hi thuneitu leh rorelna chelhtuten heti hian buai se an tih vang mai a ni,” a ti riap riap mai. Heti ringawta dah reng hi chuan buaina tihreh zawnga hmasawnna a awm lo a ni awm e.

𝐒𝐨𝐫𝐤𝐚𝐫 𝐚 𝐜𝐡𝐚𝐤 𝐭𝐚𝐰𝐤 𝐥𝐨 𝐭𝐢𝐡 𝐚 𝐜𝐡𝐢𝐚𝐧𝐠

Hei leh thleng inremna kawng zawh tur awm lo leh kut tuar an awm reng mai hi state sorkar hian a enkawl zo lo a ni tih a chiang tawh hle a. State sorkar leh central sorkar hi pawl khat an nih miau avangin hemi chungchangah hian an mualpho ve ve tih a chiang hle. Nge Meitei nu an hla ang khian an duh dan reng a ni zawk? Thenkhat sawi ang hian thil lian tak an lo tum zawk em ni? Manipur dinhmun hi pawm thiam a har tak em avang leh heti ringawt chu ni reng tura an ngaih loh avangin NDA zawmtu NPP pawhin Manipur sorkar an thlawpna an hlip hial a, kan Chief Minister zahawm tak pawhin huaisen takin Manipur CM ber pawh ‘liability’ tiin a puh hmiah ngam kha a nia. State pakhat CM-in thenawm CM a beih nan chuan na khelkhawl tak chu a ni. Kan CM ngaihdan tawma President Rule a nih em loh pawhin CM thlak tal chu tula hria an tam tawh khawp mai. Hei hi an BJP MLA tam tak duh dan pawh a ni tawhin a hriat theih a ni.

Eng kawng pawh hi ni se an CM tan chuan a phurawm lo ve ve a. Naupan laia zawhna maksak deuh, “Ha kuh mawngkaw kawm nge i duh mawng er tukkhum tawng,” tih zawhna kan inzawh fiam thin ang deuhvin thlan bik tur a awm vak lo. Thangthar zelin an hriat reng dan tur hi a chhe ngawt dawnin a rin theih. Manipur atanga tribalho thianfaitu ni thei sela chuan Meiteiho chuan an chawimawi kumkhua tawh tur a nia. Mahse, chu chu thil tih theih niin a lang rih si lo va. ‘Manipur phel darh vektu’ tiin an hriat mai pawh thil awm thei a ni. Tuna a dinhmun duhawm lo lai tak pakhat chu Tribal lam hian anmahni tantu leh an tana tha tura reltu angin an en thei ta tlat lo hi a ni a. Meitei lam tang, tribal hawtu anga an ngaih tlat chuan Manipur pumpui tan ‘Pa’ nih a tling thlawt lo a ni ber mai. State CM nihna a phur chhuak zo lo a ni ber mai.

𝐏𝐫𝐞𝐬𝐢𝐝𝐞𝐧𝐭 𝐑𝐮𝐥𝐞 𝐜𝐡𝐮 𝐥𝐞

India ram Newspaper lian leh zahawm ber pakhat mi The Hindu chuan, “Manipur state-ah hian dan leh hrai kenkawh kawnga hlawhchhamna nasa tak kan hmu a, President-in Article 356 a puan hi loh theih loh a ni tawh,”(24.11.2024) a ti hial. He state chhunga underground pawl 60 aia tam an chhiar theih lai mek a Police Station atanga duh duha silai an la emaw tih mai theih khawpa rorelna tlakbalna hi hmun dangah awm thei tak ang maw? Civil War ni awm taka state chhunga mi han inbeih a, han inthah chhawk reng mai te hi chu President Rule ni awm hliah hliah a ni tawh mawle. Manipur tan ngei pawh hian President Rule tih mai maite chu thil thar a ni lem lo, vawi 10 lai hetiang ‘Rule’ hnuaiah hian a lo awm tawh zawk a ni.

President Rule kan tih pawh chu lo thleng ta se, President ber pawh tuna Manipur rorel lai pawl mi a lo ni leh tho a. A hmanrua ber tur Governor pawh anmahni pawl pek tho kha a nia, eng tehchiama a danglam a beisei awm lo thei a ni. Amaherawhchu, eng pawh lo ni dawn se duhthlan tur dang tha zawk kan nei lo niin a lang. Chutih laiin mi tam tak chuan sorkar laipui hian duh tak zet sela chuan buaina chu a reh daih tawh turah an ngai a. Heti taka min ral chhaih leh a hmuna awmten an ti tha duh lo anga a lang hi kan hriat phak loh thiltum turu deuh te hi an lo nei a ni reng lovang maw? tih te pawh hi ngaihtuah theih a ni. Chuti a nih loh chuan Manipur thil thleng hian rorel lai pawlte a tihmingchhiain, a ni telin mi rilruah an hniam sat sat chu a ni mai si a. Eng hlawkna nge hai chhuah an la tum cheu ni dawn ni?

𝐀 𝐚𝐧𝐠 𝐧𝐚𝐬𝐚 𝐛𝐚𝐰𝐫𝐡 𝐛𝐚𝐰𝐫𝐡 𝐚𝐬𝐢𝐧

The Shillong Times, Nov 30 2024-a chhuakah an Editor a ang nasa bian bian khawp mai a. Editorial thupui pawh ‘Manipur: BJP’s fatal flaw’ (Manipur: BJP tihsual pawi ber) a tih hmiah mai a ni. “Thla 18 lai buaina sosang taka a awm tawhna state CM-in tan bik nei a pawl lehlam ‘ruihhlo sumdawng’ leh ram dang mi dan lova lo lut tia puh chhetu hi sorkarna an la chelh tir reng a nih chuan buaina a kian mai a beiseiawm hlawl lo a ni. Kuki leh Meiteite hian an tuar ve ve….Dik taka rorel ni sela chuan President Rulea awm daih tawh tur a ni….Central sorkar hi anmahni pawl sorkarnaah phei chuan a inrawlh thuai tur a ni a. Chu mai bakah a ram mi leh mi inthat reng te chu a titawp thuai tur a ni…

Manipur hi dan kenkawh hleihtheih lohna ram a ni mek tih chu a chiang a, mahse centrala BJP sorkar lah hi a che duh eih si lo…Prime Minister hian he khawvel hmawra awm ram hi inthlan lai a nih chauh loh chuan eng atan mah a ti lo a nih ber awm hi….Sipai thawn luh belh ringawt hian, a roreltu ber central sorkar a nih si loh chuan, buaina hi a tireh zo lovang…Mahse Modia sorkar hian chu chu pawi a ti ang em? Manipur mite nunna hi a hlut tak tak meuh em?” a ti miah miah mai a ni. Ang nasa han ti ngawt mah ila a thusawi hi a fingin a ngaihnawm ka ti thlawt. Kawtah mi an insual chuan thil pahnih tih theih kan nei. Pakhatna chu intina thei lova pawh then phawt a ni, pahnihna chu an inhuatna tireh tura hmalak a ni. Sorkar chak tak hian duh se chuan a pakhatna hi a ti mai theiah ngai ta ila, a pahnihna erawh hi chuan hun a duh deuh mahna.

A ni e. Tu tan pawh he thil hi chu a harsa bawk a ni. Mihring finna, thiamna leh hriatna zawng zawng a tawngchham zia a lang a nih hi. Tih duh tak takna thinlung nen lo chuan a har lehzual thin bawk si a. Remna leh muanna hi thleng ngei se titu tan leh rorelna fawng chelhtu tan chuan kawng chu awm ngei tur chu a ni e. I tawngtai zel phawt mai teh ang u.

*****