𝘽𝙞𝙗𝙡𝙚 𝙎𝙩𝙪𝙙𝙮 𝐊𝐇𝐀𝐖𝐍𝐆𝐀𝐈𝐇𝐍𝐀 𝐓𝐑𝐀𝐈𝐍𝐈𝐍𝐆 (𝑻𝒊𝒕𝒂 2:11-14

 

Kohhran innghahna leh bultanna chu Pathian Khawngaihna lo lang hi a ni. Chu chu Isua lo lan hma chuan Juda ho ta bik emaw an ti a, tunah c huan hnam tin tan a ni ta. Chu Khawngaihna chu mi sual chhandamna, phû loh malsawmna, ringtute chunga lo baw thla zawih zawih chu a ni. Krista rin avanga Chhandam nihnaah a intan a, Krista avang Kraws kawng zawh zelin a zui a, Krista avanga ropuinaah luh ni a thlen dawn a ni. Pathian Khawngaihna Tak chu Pathian Duhzawnga min nuntir theitu chu a ni. Chu Khawngaihna lo langin tunlai khawvel atana a kentel, Khawngaihna Trainning, chu châng 12 leh 13-ah a rawn lang ta a ni.

𝐁𝐚𝐧 𝐒𝐚𝐧 𝐓𝐮𝐫

Pathian Khawngaihna training kan lâkna hmun tur chu Khawvel a ni a, Kristiante awmna chu khawvel a nih tlat avangin Trainning Centreah an chet that a ngai a ni. Chuvangin bansan tur leh um tur a ngah a.

(𝐢) 𝐏𝐚𝐭𝐡𝐢𝐚𝐧 𝐍𝐠𝐚𝐢𝐡𝐬𝐚𝐤 𝐋𝐨𝐡𝐧𝐚

Tunlai khawvelah hian sakhaw ngaihhlutna hi a tlahniam nasa hle tawh tih mithiamte chuan an sawi thin. Ziaktu lâr tak Salman Rushdie chuan, “Sakhua hi hmanlaia mihring mawl lai thil a ni a, tunlai indona hmanraw tha ber ber nena an tan kawp chuan thil hlauhawm tak a ni thei…Ngaihdan dang zawng zawng ang thovin sakhua hi zir chian leh sawisel ngamin a tul chuan tim hauh lova kan endawng ngam pawh a ngai a ni,” a ti. Thangthar tam tak chu sakhua hi thil hnawksak, Pathian sawi fo hi awmze awm lo angah an ngai a. Hmasawnna tura hriatna tihpun nan Science an duh tawk a, nun hona atana sorkar tha tak neih chu a tawkah an ngai mai tawh a ni.

Thuthlung Thara ‘Pathian Ngaihsak Lohna,’ chu kalsanin ‘Pathian Dona’ hun kan thleng a ni ber tawh a. Kristianna hi tihduhdah tuar nasa ber sakhua a ni a, thlatinin mi 180 martar ang kan ni. Ram 60 velah hian an sorkar leh khawtlang tihduhdah tuar a ni reng a, a nasatna ber ram chu North Korea a ni a, Muslim firfiak ho kut an tuar nasa em em. Kristian ram nia chhâl thin leh thawh hlawk ber US of America ramah meuh pawh Kristian an chêp sawt hle a. Kristiante chu midangte ngaithei lo, hnawksak an ni zel dawn a ni ber. Heng zawng zawng avang hian Pastor ropui tak Erwin Lutzer chuan, “Awm mai mai Kristian nih hun chu a tawp tawh. Thutlukna harsa tak siam a ngaih loh beisei a, mi tihdan phung zui ve mai mai a theih tawh dawn loh a ni,” tiin a au chhuak tawh a ni.

(𝒊𝒊) 𝑲𝒉𝒂𝒘𝒗𝒆𝒍 𝑪𝒉𝒂̂𝒌𝒏𝒂

Pathian awm ringlo ho chuan engang pawhin sakhua chu lo sawisel pawh ni se. A awm ringte pawh hian Pathian hi kan la serious lo sawt khawp mai. Pathian hi Pathian a nihna angin engkim mai hmaah hian a awm tur niawm tak a ni a. Kan nun laihrui vuantu atana hman harsa kan ti. Mahni châkna lam, kan nawmna tur, min tihlim tur atan chuan pawi kan ti lo a nih hi. Tunlai khawvel hi intihhlim khawvel a ni a, midangte duhzawng ti thiam thiam an hausa a ni mai. Entertainment hi kan thil duh ber a ni mai awm a ni. Kan nawmna tur nia kan hriat hi kan rilru luahtu lian ber a ni mai. Chu chu kan Kristiannaah pawh hian kan lalût tlatin a hriat thin.

Min tinuam zirtirna, min tihlim thu kan duh ngawih ngawih a; rilru leh taksaa kan nawm chem chemna tur zawngin Thlarau nia kan hriat kan um luih luih a nih deuh ber hi. America ram Pastor ropui tak David Platt hian a hmu chiang hle a ni. Sap Kristian ho pawh a thoh nasa a. “Eng nge Kristiante thuchah chu? Pathianin keimah min hmangaih êm avangin a Fapa Isua Krista keimatana thi turin min pe a ni. He thu hi a ropui hle lai hian Bible thu a ni em aw? Pathianin Keimah min hmangaih. Keimah. Kristian sakhaw tum ber nia ka hriat chu Keimah mawle”. A va mak ta em!

Keimahni tan chauh anga ngaiha, “Pathianin min hmangaih” tih tuahhum ringawt mai hi Bible zirtirna dik a ni lo. Bible thu anga kan sawi dawn chuan hei hi a ni, “Pathianin Ama duhzawng, Ama chhandamna, Ama ropuina, te ram zawng zawng hnena ka tihlan theihna turin keimah hi min hmangaih a ni,” tih hi a ni. Tichuan, Pathian chu kan rinna thiltum ber a lo ni a, Kristianna chu amahah a inphuar vek vek a. Keini chu Chanchin Tha tum ber kan ni lo va. Chanchin Thain a tum ber chu Pathian a ni si a. Chhandamnaah ngat pawh hian Pathian chuan a lailum a inchantir tlat. Ezekiela bu kha ngaithla teh: Min chhandam, keimahni tan ni lovin, Ama hming thianghlim tan a ni. Chhandam kan nih chhan chu a hming ram zawng zawnga a puan chhuah a nih theih nan a ni a. Pathianin Ama tan min hmangaih mai a ni.” Nangmahah chhut tawp lovin Pathianah zel tawp tir zawk ang che.

.

𝐀𝐰𝐦 𝐃𝐚𝐧 𝐓𝐮𝐫

Khawngaihna vanga Chhandamte awm dan tur pawh a sawi chiang a – (i) insûm, (ii) fel tak, leh (iii) Pathian ngaihsak, te an ni. A kim hle mai. Khawngaihnaah hian kan training fat fat a ngai zel.

Insûm tih hi ‘invawng fel’ tihna a ni a, a awmzia chu ‘sound mind’ tih a ni. Chet buh nuaih loh tur, tihna a nih chu. Mahni neih ang tawka khawsaka, indaih loh rum rum loh tur. Cheng 50000 hlawhin 50000 hlawh awma an awm laiin, cheng 3000 hlawhin chutianga awm ve mai a chi loh tihna a ni. Kan nihnain a phak loh chin thil tam tam a awm. Pûk tur zawn ruai reng loh tur. Harsatna tak tak tawha loh theih loh chu a awm, mahse inven lawk thiam tum tlat tur a ni ang chu. Insumtheih tur a ni. A awmze dang chu ‘chin dawklak neih loh’ tih te pawh a nia. Thlarau Thianghlim lo chu min control-tu awm lo sela. Pathianin khawvela awm zawng zawng hi a siam a ni a, thil tha lo a awm miah lo. Thil tha lo chu hman sual chauh hi a ni. Chuvang chuan ‘fel taka awm’, ‘insum theih’, ‘chin dawklak neih loh’, mahni invawn fel hi Khawngaihna lo lang hnathawh, min trainna thil a ni.

‘Fel tak’ tih a ni leh a. Dik taka awm a kawk bawk. Saptawnga ‘righteous’ hi ‘fel’ leh ‘dik’ hian a lehlin theih ve ve a; a awmzia pawh a har lo. Fel taka awm chu a dik ngei ngei a, dik taka awm chu a fel ngei ngei a ni. Sawi dan pakhat chu ‘mi nun ngil’ (upright) tih a ni a. Kohhran hruaitute zingah ngei pawh khawtlanga a kawi pawl nih a awl khawp mai, chutiang mi pawh chu kan awm nualin ka hria. Trainning kan lakna tur chu mi nun ngil pangngai tak nih hi a ni.

Pathian Thu hi chu a kim thin a ni. ‘Insum theih’ leh ‘Ngil’ te khi chu tupawhin an thei vek. Sakhaw dang vuantute hi a thei hlei hlei an ni awm e. Mahse, a tawpah Pathian ngaihsak a rawn tel ta tlat mai. Invawn fel a tha e, mahse a tawk lo; dik taka awm a tul e, mahse a kim lo; ‘Pathian Ngaihsak’ nih a ngai tel. Kan ni tin hna leh mawhphurhnaah min thununtu chin dawklak nei lem lova, ngil taka nun a pawimawh laiin ‘Pathian Ngaihsak’ lovin a awm theih ang. Chutiang nun kalsan Khawngaihnain min train tumna lam a ni.

Thenkhat chuan ‘Work is Worship’(Hna thawh hi Pathian biakna a ni) tih hi la sualin hna thawh mawlh mawlh hi Pathian ngaihsak nun emaw an ti mai a ni awm e. ‘Work is Worship’ tihte pawh hi Bible-a awm emaw an ti hial. A ni der si lo. Hnathawh chu a pawimawhna ruamah chuan a pawimawh nangiang e. Kristian chuan hna a thawk tur pawh a ni. Mahse ‘Pathian ngaihsakin’. ‘Pathian ngaihsak’ tih hi Saptawng Bible-a an dah dan chu, ‘Godly’ tih a ni tawp mai. ‘Pathian Takin’ ti ila a dik ber awm e. Engkim Pathian taka tih tur. Pathian telin, a rawngbawlna ngaihsakin, amah biak thlahthlam lovin, ‘Pathian lam thila khatin.’ Sum lamah chuan Pathianin 1/10 (10%) a phut a ni mai thei, hun chungchangah erawh chuan 1/7 (14%) a phut a a ni tih te pawh hi hriat nawn fo a tha.

𝐀 𝐭𝐞𝐚 𝐭𝐞𝐧𝐢𝐧𝐠 𝐧𝐠𝐚𝐭

Thenkhat chuan Pathian Khawngaihna chungchangah hian a dawna kan dawn lam chauh an ngaihtuah thiam a. Han training ngial te nen chuan inmil lo tak a ni. Mahse khawngaihna tak dawngtu chuan ‘training’ hi a hmuh hmaih hauh lo. Sipai dik tak chuan sipai tlina hlawh neih ngawr ngawr chauh a ngaihtuah ngai hauh lo va, phur takin trainning awm zawng zawng a la a, ral do turin a intat hriam a, a invawng a, a ran tana a nun pumpui hlan chu a nuam tih zawng leh tum ber a ni thin. Chutiang mi tan chuan Khawngaihna leh Trainning a inkalh lo. A inhmeh hle zawk a ni. Chu tak chu he laia Pathian Thu hian min zirtir a ni awm e.

“...Pathian khawngaihna chu tihlan a lo ni ta a. Tunlai hunah hian Pathian ngaihsak lohna leh khawvel lam thil bansan te, mahni invawng fela, dik taka awma sakhaw ngaihsak nun te min zirtir (train) a ni.” (Tita 2:11,12)

****