𝐒𝐈𝐀𝐌𝐓𝐔 𝐋𝐄𝐇 𝐒𝐂𝐈𝐄𝐍𝐂𝐄

 

 

 

Atheism (Pathian awm zia hnawlna)  hi a tawngchham angreng khawp mai a. Lei leh van lo awm chhan leh a hawi lam hi a sawifiah thei lo a ni ber. Pathian a awm lo a nih chuan universe (lei leh van) hi chatuana awm (eternal) emaw, engmah lo (nothing) atanga lo piang tawp emaw, a ni ang. Chu chu rin harsa tak a ni ve ve. Physicist kan neih ropui berten universe hi chatuana awm a ni lo tih hi an thutlukna tlangpui a ni tawh a. Tunhma kha chuan ‘steady-state’ theory an tih, universe hi chatuana awm ve mai anga ngaihna, kha an sawi thin a. Tunah erawh chuan chu ngaihdan chu an kal san thui tawh khawp mai. Tunlai science huanga cosmological theory pawm tlanglawn ber pakhat ‘Big Bang Theory’ chuan hemi kalh chiah hian, universe chuan awm tan ni nei angin a zirtir nghe nghe a ni. 

 

Awm lo ata awmah

 

Finthuril zawhna pawimawh tak pakhat chu ‘Engvangin nge thil hrim hrim hi a lo awm le?’ (Why is there something other than nothing?) tih a ni a. Lei leh van (universe) awm hi a tul em ni? Eng atana awm nge? tih zawhnate hi Atheism dinhmun atang chuan chhan ngaihna vak a awm lo a ni. Sawifiahna pakhatah chuan universe chu amahin a lo awm mai a ni, tih hi a ni leh a. Hei phei hi chu ‘Eng mah lo atanga engemaw lo chhuak’, (‘something out of nothing’) a ni tawh a. Chu chu mihring thil ngaihtuah thiam dân (rationality) piah lam a ni. Thil a awm reng rengin awmtirtu a awm hmasa zel. Scientist te pawhin tunhmaa ‘creation by chance’ tih te, ‘evolution by chance’ tih te kha an kal pel tawh tih hria ila. Engmah lo (nothing) atanga eng emaw lo chhuak tlat hi chu science kalhmang a nih loh avangin, dawi (magic) emaw, thilmak (miracle) emaw a nih duh hmel zawk!  Pathian awm ring lo ho hian hetiang lam hi an lo ring reng emaw ni dawn zawk le? Mahni leh mahni han ‘inhrin’ tawp mai chu!

 

Engmah lo atanga thil engemaw lo chhuak tawp mai chu Atheist thenkhat tan pawh awih a har a, J.L. Mackie an, “Kei ngei pawh hian engmah lo atanga mahni leh mahni han insiam tawp mai chu pawm har ka ti thin; hun eng anga rei pawh ni se. Engmah a awm lo a nih tak tak chuan, engtin nge a lo awm ngawt ang?” (Times Literary Supplement, 5.2.1982) tiin he ngaihdan hi a pawm theih loh thu a sawi a ni. Engmah lo atanga universe meuh lo pian chhuah thu hi chu a ‘scientific’ thei lo a nih ber hi! Hetiang ‘scientific law’ hi a awm miah lo!  Chuvangin, Atheism chuan lei leh van awm chhan (origin) chungchângah sawi theih a nei thui vak lo va, han khaikhin tak tak chuan Theism hi  pawmnahawm tak a ni zawk awm e.

 

Universe hian chatuan a daih ang em?

 

Thenkhat thung chuan universe hi chatuana awm tawp niin an ngai a. Hetianga ngai thei si hi hian ‘Chatuan Pathian’ awm erawh chu an awih duh miah si lo! Eng pawh ni se universe hi chatuana awm tawh a nih chuan hun kal tawh zawng zawng kha tawp chin awm lo, bul tan ni awm lo a ni dawn a, vawiin kan thleng thei dawn lo a ni hial ang! Bul tan ni kha a awm dawn si lo.  Chuvangin, thil tawp chin awm lo (infinity) hi thil awm thei lo tluk a ni. Mathematics-ah a chiang hle. Number pangngai (natural numbers) zawng zawng hi infinite (tawp chin awm lo) angah lo ngai ta ila, chumi atang chuan number kawpkim lo (odd numbers) infinite tho han paih dawn ta la, a dikna chu infinite tho a ni dawn a, a buai zo vek a ni ber (infinite - infinite=infinite). Mathematics danin a zo lo!

 

Heti a nih avang hian Mathematician ropui David Hilbert-a chuan, “Tawp chin awm lo tih hi khawiah mah hmuh tur a awm lo. Khawvelah hmuh tur a awm lo va, ngaihtuahna fim atanga dik theih dan a awm lo. Rilrua awm, a taka awm si lo a ni ber mai,” (Philosophy of Mathematics, 1964) a ti hial. Hun kal tawha thil thlengte chu rilrua awm (idea) mai ni lovin thil thleng tak tak a nih avangin ‘infinite’ an ni thei lo. Chuvangin, awm tan hun an neih ngei a ngai. Heti zawnga sawi hi Kalam Cosmological Argument an ti. Tunlai Astronomy leh Astrophysics theory tunlai berte chuan hei hi an sawi thin a ni.

 

Universe thih hun

 

Kan universe tawp dan tur pawh hi ngaihtuah tham tak a ni. Second Law of Thermodynamics hi a dik a nih chuan universe-a chakna thahrui hmantlak (useful energy) zawng zawng hian daih loh hun an nei ngei dawn a. Chuvangin, scientist te chuan ‘Heat Death’ (lumna ral)/‘Big Freeze’ (Vawt tak tak) te an sawi thin. He dinhmunah hi chuan universe-ah chakna thahrui hmantlak (energy) a ral vek tawh a. A vawt em em ringawt mai a ni. Tunlai huna scientist lar ber Stephen Hawking-an a thih hma lawka a ziak article-a ‘eternal expansion’ (chatuana zau zel) a sawi nen pawh a inrem viau a ni awm e. Atheist ho kan zawh tur chu hei hi a ni – “Bul tan ni a awm loh chuan tun hunah hian eng vangin nge universe-ah hian chakna thahrui hmantlak (useful energy) a la awm? Chuti taka a rei tawh chuan 'useful energy' zawng zawng chu ral vek tawha ‘heat death,’ emaw, ‘big freeze’ emaw thleng daih tawh tur a ni dawn lawm ni? Universe hi chatuana awm tawh a nih tak tak chuan vawiinah hi chuan thi dai duak tawh tur a nih hmel! A la nih si loh chuan bul tan ni nei, bul tantirtu nei a ni mai dawn lawm ni?

 

Awm tan ni nei chuan awmtirtu a nei

 

Thil zawng zawng hian awm tan ni an nei vek lo va, thil siam an ni vek lo bawk. Mahse, awm tan ni nei zawng zawng chuan siamtu an nei thin a ni. Kristian Philosopher leh Theologian hriat hlawh tak William Lane Craig-an a article, “Why I Believe God Exists” tih-ah a sawi fiah hle mai:

 

1.  Whatever begins to exist has a cause

      (Thil awm tan ni nei zawng zawng chuan awmtirtu a nei).

2.  The universe began to exist (universe hian awm tan ni a nei).

3.  Therefore, the universe has a cause

     (Tichuan, universe chuan awmtirtu a nei a ni).

 

Fimkhur taka chhiar ngai chu Premise 1 hi a ni a, ‘thil zawng zawngin awmtirtu an nei (everything has a cause), a ti lo va, ‘awm tan ni nei zawng zawngin awmtirtu a nei,’ a ti mai a nih hi. Universe chuan awm tan ni a nei a, chuvangin awmtirtu a nei a ni, a tihna a ni. A pawimawh hle mai. Pathian chu awm tan ni nei a nih loh avangin awmtirtu phut a ngai lo tih a chiang nghal bawk a ni.

 

Pathian chu tu siam nge?

 

‘Thil a awm chuan Awmtirtu a ngai thin’ tih ngaihdan sawichhetute chuan, ‘thil engkim Pathianin a siam chuan Pathian chu tu siam nge?’ ti zawngin ‘infinite regress’ (tawp intai awm lova a kaikuang ber zawnna) anga puhin an hnawl thin a. Atheist lar Richard Dawkins-a ngei pawhin ‘unmoved mover’ (che hmasa ber che ve si lo), ‘uncaused cause’ (thil awm chhan awm chhan nei ve si lo) leh ‘cosmological argument’ te chuan, “Thil zawng zawng bul Pathianah an chhui lut lui mai mai a. Pathian chuan awm chhan mamawh lo bik angin an sawi lui tlat thin,” tiin a hnawl (The God Delusion, 2004). Amaherawhchu, thil zawng zawng hi bul tan ni nei, thil siam an ni vek lo tih kan hriat a tul ang. Entirnân, logical law (ngaihtuah dan dik) leh moral law (thatna dan) te hi thil awm ngei si, awm tan ni nei lo, chatuana Pathiana awm an ni. Kristian Apologist Philosopher Paul Copan-an hemi chungchângah hian, “Thil zawng zawng, Pathian thlengin, a siamtu awm ngei tul anga sawi hi a dik thei lo – ‘Rawng hring hi a thlum em?’ tih zawhna ang chauh a ni. Siamtu a neih loh vangin Pathian chu thiam loh kan chantir mai dawn em ni ang? ‘Mahnia awm, siam ve loh Siamtu, a nihphung renga thil siam ni ve lo chu engin nge siam ang ni?” (“If God made the universe, who made God?”, 2007) tiin Pathian siamtu chungchang hriat phut tlat chu thil awmze awm lo a nihzia a sawi a ni. A nihphung kan pawm tlan dan rengah Pathian chu, 'cause-effect' pawn lam a ni si a.

 

            A thuhrimah, Pathian hi hun leh hmun (time and space) piah lam, chutiangin a thunun loh a nih chuan 'Tunge siam?' tih zawhna ang chite hi chu a zawh chi loh hrim hrim, kan buai zual zel zawk dawn a ni: "Hun (time) hnuaia a awm loh chuan engtik khan nge an siam tak ang? Hmun (space)  a awm loh chuan khawnge an dah tak ang?" Chuvangin, 'Pathian chu tunge siam?" tih ang chi hi chu zawhna awmze nei lo, chhanna beisei tur awm lo a ni hial awm e.

*****

 

-       2.10.2021