𝐋𝐞𝐡𝐤𝐡𝐚𝐛𝐮 𝐓𝐢 𝐓𝐢 : ‘𝐌𝐈𝐙𝐎 𝐒𝐀𝐆𝐀’ 𝐁𝐘 𝐉𝐎𝐇𝐍 𝐂𝐇𝐇𝐀𝐍𝐀

Corona Virus vanga buaina tak tak kara thil tha deuh lo chhuak pakhat chu lehkhabu a chhuak zawih zawih mai hi a ni ngei ang. Mizotawng lehkhabu deuh vek a nih laiin Mizo history Saptawnga ziak ngat lo chhuak ta hi thil thar tha tak pakhat chu a ni bawk a. Ni 23.9.2021 khan chutiang Saptawnga ziak Mizo Saga tih chu a ziaktu John Chhana khua Shillonga North East India Christian Council Conference Hall-ah Rev. Dr. K. Lalrinkima, Administrative Secretary, Presbyterian Church of India General Assembly-in a tlangzarh a, then leh rual thaten an tawiawm tha hle a ni.

A ziaktu

John Chhana hi Shillonga sei lian, Master degree 2, Science leh Arts (Biochemistry leh English)-a nei ve ve, College-a zirtirtu hna thawk mek a ni a. Kohhran leh khawtlangah theih tawp chhuaha inhmangin tunah hian Mizo Students Union, Shillong-ah President a ni a (Sociology-ah MA a zir leh mek a ni), KTP Shillong Branch-ah Secretary chanvo a chelh bawk a. Youtube Channel neiin hemi khawvelah hian mi hriat a hlawh angreng viau a. A pa Rev. Remnghaka hi Mizoram Synod hnuaia ordained minister a ni nghe nghe a ni. Hetiang lehkhabu, Mizote tana rohlu, kan chanchin hnam dangte zinga pholanna hmanraw pawimawh tak a han ziak hi a lawmawm takzet a, a pen atang hian a dang tam takin a rawn zui zel beiseina nen he lehkhabu hi chhiar theuh ila a tha ngawt ang.

Lehkhabu chu

Lehkhabu chhah lenglawng tak, phek 558 lai a ni a, lehkhabu dang man atanga chhut chuan a man Rs. 270/- hi a beitham hlein a hriat theih. Hetiang a ni thei hi Mizoram Publication Board duhsakna a dawn vang a ni a, a leitute pawhin chu chu kan lo chhawr lehzel a ni. Publication Board hmalakna hi a lawmawm tak zet a, hma nasa takin sawn zel se a tihna a lian hle mai. Lehkhabu ziak thei leh ziak duh tam tak an awm zel ang, sum sen pawh a pung zel dawn a ni. Publication Board hi thang zelin belh tlak leh innghahna tlak ni zel a va duhawm em!

He lehkhabu chhutu Lois Bet Print & Publication, Chanmari kutchhuak hi a fiahfaiin, a lehkhapuan hman pawh a tha hle. A kawm quality phei hi chu sang tak a ni. A ziaktu design ngat, Mizo tak si a kawma an hman hi a chhung thu nen a inhmeh ngawt mai. Amaherawhchu, lehkhabu chhung design hi magazine emaw tih mai tura hawrawp hraw tak tak an hman hian a titialin a ‘ti-naupang’ deuhvin ka hre ve thung. Publishing company lian zawkte tih ngai loh niin ka hria. Newspaper, Magazine, Pamphlet, Children’s Book, Encyclopedia, etc., hi an nihphung a dang vek a, chhiartuten kan beisei dan pawh a hrang vek mai. Tuna kan lehkhabu sawi mek hi chu a lehkhabu nihna leh a chhung text and design dan hi a inmil chiah lovin ka hre ve mai mai a. Chutih rualin thenkhat phei chuan an lo duh zawk thei tho tih pawh a hriat tho bawk a. A kawm hnung lama a chhung thu chungchang inziak lo leh a ziaktu chungchang he lehkhabu khawi lai maha ziaka a awm lo hi hmaih palh liau liau a nih a rinawm.

Mizote hi lehkhabu hmelhmang siam lamah hian hma kan sawn a ngai hlein ka hre thin (thiam tak tak chu an awm nual tawh tho nangin). Lehkhapuan tha tak tak hmang si a design mit tikham tak tak lo awm thin hi a uiawm ngawih ngawih thin. Tunhma deuhva Christian Literature Society, Bangalore lehkhabu chhuahte kha lehkhapuan man tlawm tak tak, a kawm atan pawh chutianga paper tha hman a ni ngai lo a, mahse an hawrawp thlan leh rem dan an uluk em avang khan a zahawmin chhiar a nuam em em tho thin a ni. Chutianga kan tih theih chuan lehkhabu man te pawh hi a tlawm sawt sawt ang a, a leitu tan pawh lo awlsam zawkin a chhuahtu tan pawh sum sen a tlem phah theiin ka beisei.

A chhung thu

He lehkhabu hming ‘Mizo Saga’ tih hi ‘Mizo Chanchin’ tihna mai a ni a. Chu chuan a chhung thu a phawk chhuak tha hle nghe nghe. Mizo hnam hrang hrangte inkar, inkungkaih dan leh an lo zik chhuah dan a ziak ngaihnawmin a hawl kim hle mai. Mahse, he lehkhabu hian Mizote chanchin tir lam, kan lo zik chhuahna leh hnam chi hrang hrangte tobul deuh chauh chhut hman avang hian sub-title lo pe sela fuh zawk tur niin ka hria a - Mizo Saga – The Beginnings han ti phei se chuan a mawiin a lehkhabuin a sawi hi a phawk chhuak tha lehzual awm mang e, ka lo ti ve mai mai a ni.

A ziaktu hi a inthlahrung thiam hle a, kan mithiam ber berte lehkhabu rawn a, Saptawnga dah mai a nih thu a sawi a. Mahse chutianga tih chu thil awlsam lo tak, mi mai mai tih theih loh a ni. Bibliography-ah a thu lakna 59 tarlan a ni a, Mizo chanchin tir lam ziah nana thulakna tur chuan a tha tawk viauin ka ring. Hetiang lehkhabu buatsaih hi thil namai a ni lo va, a ziaktu thiltih pawimawh leh hlu takin a ken tel ngei ngei zingah – Mizo chanchina a eng lai berte hi nge lak chhuaha telh manhla ang? Ngaihdan inang lo a lo awmin engtia chhawp chhuah tur nge? Engtin nge Saptawngin nalh taka dah a nih ang? Eng tiang takin nge a thu (narrative) hi kan rem ang? tih chhanna te hi a tel ngei ang. Hetiang zawng zawng paltlang vek a Saptawng tha leh mawihnai taka Mizo history tir lam a han dah thei hi hlu hle a ni. Hetiang zawng zawng ti thei tur hian thiamna thuk tak (creativity) leh taimakna hlu tak neih a ngai ni tih hai rual a ni lo. Tunah chuan hnam dangte hnenah, “Mizo history, Mizote tobul leh Mizo hnam zawng zawng inkungkaih dante i hriat duh chuan John Chhana ziak Mizo Saga tih bu kha chhiar ta che,” kan ti thei tawh dawn a ni.

Hnam inpumkhatna

He lehkhabu hlutna dang pakhat chu Mizo hnam inpumkhatna a thluk tha em em hi a ni a. Mizo huang chhunga hnam zawng zawng chu kan lang kim tha hlein ka hria a, hei hi kan kal mek dan leh kal zel dan tur pawimawh tak a ni phawt mai. Chu mai chu ni lovin, Zoram chhunga sei lian pawh ni miah lovin hetiang tak lehkhabu a ziak hian thil tam tak a hril bawk a. Ram pawna Mizote hi an Mizo hle bakah Mizo hnam tana tangkaina an ngah hle a ni tih a lang chiang a. Mi rama sei lian ta na na chu Zoram chhunga chengte nena khaikhin chuan Mizotawng hman te an lo nal tawk lovin, an tawng chhuakte pawh a paiin a lo awn deuh a ni mai thei e. Mahse, an tangkaina ruam thungah chuan, a tlangpuia chhutin, tawng dangte an lo thiam zawk a; hnam dang nena inkungkaihna tha siam te pawh an lo thiam thin. Mizo hnam chet velna hrim hrimah hian an chanvo hlu tak hi kan hriat thiampui a, anmahni pawhin an inhriat a pawimawh hle a ni. Kan hnam movement tarmit hi lian zual zelin fiah zual zel rawh se. Tunah pawh hian John Chhana hian Mizo chanchin chu hnam dangte pawhin an chhiar theih atan a chhawp chhuak ta ruau mai a nih hi. A thawh hlawkin Mizo hnam tan rohlu tak pakhat a thawh a ni ta reng mai le.

*****