𝗔𝗧𝗛𝗘𝗜𝗦𝗧 𝗡𝗚𝗔𝗡 𝗕𝗘𝗥 𝗔 𝗧𝗟𝗔𝗪𝗠 𝗧𝗛𝗨

𝘔𝘺 𝘥𝘪𝘴𝘤𝘰𝘷𝘦𝘳𝘺 𝘰𝘧 𝘵𝘩𝘦 𝘋𝘪𝘷𝘪𝘯𝘦 𝘩𝘢𝘴 𝘣𝘦𝘦𝘯 𝘢 𝘗𝘪𝘭𝘨𝘳𝘪𝘮𝘢𝘨𝘦 𝘰𝘧 𝘙𝘦𝘢𝘴𝘰𝘯 𝘯𝘰𝘵 𝘰𝘧 𝘍𝘢𝘪𝘵𝘩. - 𝘈𝘯𝘵𝘰𝘯𝘺 𝘍𝘭𝘦𝘸 (1923-2010)

Thiamna khawvel awmzia miin a lo hriat ve det det hian Pathian meuh pawh a cho ta deuh uai thin a ni awm e. Hriatna a lo zau thawkhat hian hre tam thawkhat viaua inngaihna leh kan hriat loh a la tam si zia mangnghilh thut a awl a ni mai thei. Chumi kawnga kal chu thangthar an awm nual thin a. Mi changkang leh lehkhathiam filawrte tan Pathian awm han rin tlur te pawh inhmeh lo, mi tluangtlam zawkte nih dan tur hriatna a awm thin a ni mahna le. Chutiang chu a ni lem lo tih hriat a tul ta hle mai. University tha ber ber leh an thiamna kawnga mi turu ber berte zingah Pathian hnawl harsa ti an ther fer fur tih hriat a nuam thin. Chutiang zingah chuan Antony Flew (1923-2010) a chanchin hi a ngaihnawmin a mak danglam khawp mai.

𝗣𝗮𝘀𝘁𝗼𝗿 𝗳𝗮𝗽𝗮 𝗵𝗲𝗹

Anthony Flew-a hi Methodist Pastor hriat hlawh tak fapa, ngaihtuahna a hman thiam tirh atanga sakhaw thil ngai ho leh Pathian awm ring thei lo chho ta ngar ngar a ni a. A thluak a that em avang pawh a ni ang khawvela university hlun ber leh tha ber pawl Oxford University-ah te zirtirtu hna a thawk zak zak a ni. A article ziah hmasak ber ‘Theology and Falsification’ phei chu Philosophy thuziak-ah chuan chhuah chhawn nasat ber a ni e, an ti hial a. Ani tluka Atheism tana thawh hlawk leh Pathian awm lohzia sawifiah tumna lam kutchhuak nei tam awm lova sawitute pawh an awm. Kum 50 vel chu inthlahdah lo takin mithiamte zingah Pathian awm a awihawm lohzia thu a lo tlangaupui tawh thin a a. A lehkhabu zawng pawhin Pathian awm leh awm loh chungchanga textbook rawn nasat ber pawl God and Philosophy tih te, The Presumption of Atheism tih te a lo ziak tawh bawk a ni. Mi thenkhat chu Atheist niin chumi lam subject-ah kut hnu an nei nual a ni mai thei e, mahse Antony Flew aia Atheism zirtirna duang hneh hi an awm lo, ti pawlte pawh an awm.

𝗔 𝘀𝗮𝘄𝗶 𝘃𝗲 𝗻𝘂𝗮𝗹

Antony Flew-a hian lehkhabu 30 chuang a ziak a, chung zinga mi chu zir hlawh tak takte an ni. Kan sawi tak a article hmasa kum 27 a nih kuma a ziak, “Theology and Falsification”, ah chuan Pathian chungchang sawi hian awmzia nei tak tak lo, ‘finfiahna awm thei lo a nih miau avangin sawi a sawt lo’, tiin a tang a. A lar phah hle. Hei hi vawiin thlengin tanchhanah thenkhat chuan an hmang a ni. God and Philosophy (1966) –ah phei chuan a bei ta tak tak a. ‘Pathian’ han tih hrim hrim pawh thil hriat thiam harsa a nihzia, ruangam nei lo ngat phei chu thil awm thei a nih lohzia te a sawi nasa hle. Antony Flew hian Pathian awm loh hrim hrim lam aimahin awmzia a awm lohzia hi a sawi nasa zawk a ni awm e. Tichuan, 1976-ah The Presumption of Atheism tih a ziak leh ta a. He lehkhabuah hian Pathian awm ringte chuan Pathian a awmzia finfiahna leh tihchianna an pe hmasa tur a ni, tiin a nawr na hle a ni. Atheist lam dinhmun a sawh nghet hlea an ngaih avangin Pathian awm ring lo lam an lawm dar dar hle a ni awm e. Pathian hnawltu a kutchhuaka inhnangfak an tam hle tih a hriat reng mai.

𝗗𝗮𝘄𝗹 𝘇𝗮𝘄𝗿𝗶𝗻 𝗮 𝘇𝗮𝘄𝗿 𝘁𝗮 𝘁𝗹𝗮𝘁

Chuti taka a beih hnu leh a hming pawh a than viau tawh hnu, kum 2004 khan ‘Ka thu ka zuk e. Pathian hi a awm a ni tih ka ring ta,’ tih thu a puang ta roh a nih chu. Mithiamten mak an ti nasa. A kamliam lo chang tawh Atheist tam takin an haw zual hle. Sawichhiat leh deusawh pawh a tawng nasa hle a. Mahse, ani lah chuan “ ‘A awmang zawk zawk chu ka pawm mai tur a ni’ tih hi ka tanna a ni reng…hman atangin,” a ti mai si. Atheist ropui chu a tlawm ta a ni. Kum 2007 khan hetianga a ngaihdan a sawhsawn nachhan ziakin lehkhabu There is a God: How the World’s Most Notorious Atheist Changed His Mind, tih a chhuah a. Chhiar manhla tak a ni. Anthony Flew-a hian khawvela tuarna rapthlak tak tak awm avang hian Pathian Engkimtithei a awm hi ring lo thinin, Pathian hi a awm ngei a ni tih kan finfiah theih hma chuan ‘a awm lo’ tih hi kan bultanna a ni tur a ni, tih thu te hi a lo sawi vung tawh thin a. Mahse tunah chuan van leh khawvel hi Siamtu awm lova rawn awm ngawt a nih theih lohzia te, Thilsiam inrem fel mak tak avanga Pathian awm a awihawmzia te, leh Pathian avang chauha mihring zinga nun dan dik chungchang sawi theih a nihziate chu thu ho mai maiah a lo ngai thei ta ngang lo a, zah pawh dawn zo lovin a ‘Dawl zawrin ka zawr, ka tlawm e’ a ti ta a ni ber mai.

𝗧𝗵𝗶𝗹 𝗮𝘄𝗺𝗮𝗻𝗴 𝘇𝗮𝘄𝗸 𝗹𝗮𝗺𝘁𝗹𝘂𝗮𝗻𝗴 𝘇𝗮𝘄𝗵 𝗺𝗮𝗶

A rilru thlaktu ber nia sawi chu tunlai science thil hmuh chhuahte hi a ni tlat mai. Hei hi a chhinchhiah tlak hle a ni. Universe hi bul tan ni nei tia Big Bang Theory a rawn lar takah hian ‘engmah lo’ (nothing) atangin ‘thil’(something) hi a rawn chhuah ngawt a ring thei lovin Siamtu a awm a ring ta tlat a ni ber a. DNA chungchanga science-in a thil hmuh chhuah tharte a thlir hian ‘finna’ tel lovin hetiang thil mak hi mihringah a inphan chhuah vek a ring thei lo a ni. Tin, he khawvela nunna (life) a awm theih nana vansang planet-te leh arsite reng reng inrem fel dan mak tak mai hian ‘remfeltu’ awm lova awm theiah a ngai thei ta ngang lo a ni. Entirnan, science thiamte bawkin an chhut danin eng (light) hi a kal chak dan chu 299792458 metres/sec a ni a. Hei hi second khatin emaw danglam ta se, he khawvelah hian nunna (life) hi a awm thei dawn lo a ni. Hetiang thil awmzia hian Flew-a chu mihring piah lam finna awm ngei hi pawm lo thei ni lovin a siam a ni a. Lei leh van thununtu dan (laws) Science-in a hmuhfiah zel hian Pathian bak thil dang kawkin a hre thei ta thlawt lo a ni. Ani chuan chiang tawka ngaiin ‘I have to follow where the argument leads’ a ti mai nia.

𝗔𝘁𝗵𝗲𝗶𝘀𝘁 𝗻𝗶𝗵 𝗹𝗼𝗵 𝗻𝗴𝗮𝘄𝘁 𝗽𝗮𝘄𝗵 𝗮 𝘁𝗮𝘄𝗸 𝗰𝗵𝘂𝗮𝗻𝗴 𝗹𝗼

April 8, 2010 khan Anthony Flew chuan he khawvel hi a lo chhuahsan ve ta a. A nunah hian zir tur tam tak kan nei. Thangthar lehkhathiam thenkhat zingah rilru hmang leh mithiam tak tak ten Pathian awm an ring mang loa hriate an awm ta nawk mai. Science leh Pathian inkalh tlata hriate pawh an awm. Mithiam chungchuang Anthony Flew te meuh pawhin Science thil hmuhchhuahin a Pathian a kawk chiang ngeia ngaiin Atheism atangin Theism-ah an inlet a, tlawm leh zah pawh an dawn zo lo a nih hi. Amaerawhchu, heti a nih avang hian Antony Flew hian Isua Krista a ring ta a ni chuang lo va. Chumi kawngah chuan a thih thlengin Kristian a nih thu kan hre lo. Pathian a awm tih rinna pangngai hi Chhandam nihna turin a tawk hauh lo va, Pathian lawmzawnga awm turin Atheist nih ve loh satliah a tawk lo. Kristianten Chhandamna Chanchin Tha kan hril tak hi chu Lal Isua nihna pawm chungchang a ni tlat. Eng pawh ni se, Atheist ngan ber pakhat a han tlawm hrim hrim hian ngaihtuahna a tithui a ni.

*****