𝙉𝙀𝙄𝘾𝘾 𝘿𝙖𝙮 𝙤𝙛 𝙋𝙧𝙖𝙮𝙚𝙧 2021 𝙋𝙪𝙖𝙡: 𝗞𝗢𝗛𝗛𝗥𝗔𝗡 𝗜𝗡𝗣𝗨𝗠𝗞𝗛𝗔𝗧𝗡𝗔 𝗞𝗔𝗪𝗡𝗚 𝗕𝗨𝗠𝗕𝗢𝗛

Naktuk October 17 khi India Hmarchhak Kohhranten kum tina an hman thin ‘NEICC Day of Prayer’ a lo ni leh ta a. Thupui atana thlan pawh II Korinth 5:18 behchhanin “Inremna Rawngbawl Hna” tih a ni. Nikum lamah hripui len avangin duh ang takin hman theih a ni lo va, kumin chu a ziaawm deuh tawh beisei ila. Hemi niah hian North East India Christian Council tana tawngtai hona leh thupui ruat sa behchhan sermon ngaihthlak hona bakah NEICC tana thilpek lak khawmna neih thin a ni a. Kum that kumah chuan ‘Pulpit Exchange’ neiin thuhriltu inkalthelh thin a ni a, Pastor/Minister/Upaten mahni kohhran huang chhung chhuahsana, midang kohhran (denomination)-a thu va sawi chu nuam an ti tlang thin hle a ni awm e. Nuam an tihna tak hi thil lawmawm, Kohhrante inzahtawnna leh inkungkaihna thatzia lanna a ni nghal bawk tih kan hre thiam tlang mai awm e.

𝗖𝗼𝘂𝗻𝗰𝗶𝗹 𝗱𝗶𝗻 𝘁𝘂𝗿𝗮 𝗵𝗺𝗮𝗹𝗮𝗸𝗻𝗮

India hmarchhakah hian Chanchin Tha hi pawl hrang hrang Presbyterian, Baptist, Lutheran, Anglican, Roman Catholic, adt., ten an rawn phur lut a. Chutia pawl hrang hranga awm reng chu tha tih lohna lian tak an nei nghal tih hriat theihin ringtute inpumkhatna an buaipui nasa a. A bik takin Protestant (thurin laipui inang tlang) te phei chu insu buai fo lova awmho ngei an duh a ni tih a lang chiang a ni. Hetih lai hian India ramah National Council of Churches in India a lo ding tawh a, regional council hrang hrang lo zi chhuakin Bengal Christian Council angte a lo ding chho ta bawk a. BCC chu hmarchhak Kohhran ho chuan an zawm ve mai a, mahse kar a hlat mai bakah thil tam takah danglamna a awm thin avangin remchan lohna a awm ta fo a ni. North East Kohhran intelkhawm ngei chu neih tul tihna a lian ta a ni.

𝗜𝗻𝘁𝗮𝘄𝗵𝗸𝗵𝗮𝘄𝗺 𝗵𝗺𝗮𝘀𝗮 𝗯𝗲𝗿

September 22, 1936-ah chuan Welsh Presbyterian Mission hmalaknain meeting hmasa ber chu Shillong hmunah neih a ni ta a. He meetinga tel te chu:

1. Dr. V.H. Sword (The American Baptist Mission),

2. Rev. O. Eie (The Santal Mission of the Northern Churches),

3. Rev. J.H. Schernat (The Gossner Evangelical Lutheran Mission),

4. Miss J.H. Rose (The Co-operative Baptist Mission of North America- The Mid Mission),

5. Miss E.M. Chapman (The English Baptist Mision, South Lushai Hills),

6. Rev. J.J.M. Nichols Roy (The Church of God),

7. Rev. E.H. Williams, Rev. J.W. Roberts, Rev. E. Adams, Miss E.M. Jones (The Welsh Presbyterian Mission), leh

8. The Church of India, Shillonga Chaplain (a hming hriat a ni tawh lo) te an ni.

He meeting hian Chairman atan Dr. V.H. Sword an thlang a, Secretary chu Rev. E. Adams a ni thung. Tih theih nei tam rih lo mah se, Council neih ngei tulzia te, pawl dang sawm belh zel chungchang te, thu ziak lama tan ho te, theological college changtlung zawk din ho chungchang te leh sorkar lam dawr chungchang thlengin an sawi ho tha hle a ni.

𝗔𝘀𝘀𝗮𝗺 𝗖𝗵𝗿𝗶𝘀𝘁𝗶𝗮𝗻 𝗖𝗼𝘂𝗻𝗰𝗶𝗹 𝗮 𝗱𝗶𝗻𝗴 𝘁𝗮

Pathian hruaina duhawm tak an chan avangin thil a inher fuh viau zel. April 15, 1937 ah meeting an nei leh a, chutah chuan Council din ngei chu lungrual takin an phar thlu leh a. Constitution an lo duan lawk chu pawm a ni ta bawk a. Tichuan November 23, 1937-a Shillonga meetingah Rev. J.W. Roberts, Vice-President chuan Assam Christian Council chu din a nih thu a puang ta. Inkhawmpui hmasa ber chu December 2-5, 1938-ah Gauhati-a neih a ni a, chu inkhawmpui hmasa bera palai tirtu pawl 7-te pawh han hre nghal ila:

1. The American Baptist Mission and Assam Baptist Convention.

2. The Welsh Presbyterian Mission and Church.

3. The Anglican Communion.

4. The Baptist missionary Society and Church-Lushai Hills.

5. The Santal Mission of the Northern Churches.

6. The Gossner Evangelical Lutheran Mission and Church.

7. The Bible Society.

Assam Christian Council din chhan hi a chiang a: (i) Kristian pawl hrang hrang zingah inpawlna nung, thawh hona tha leh inngeihna thlentir zel tura tan lak; (ii) Zirna, Kristian thuziak chhuah, Lalpa leh Chhandamtu Isua Krista Chanchin Tha hrilna kawnga tan ho; (iii) Kristiante duh dan puan chhuah thin; (iv) Kristian Council dangte nena a tul ang zela thawh ho, te a ni. Vawiin thlengin a la pawimawh hle zel a ni tih kan hria.

Record kan hmuh theih hla ber chu 1940-a an Inkhawmpui Vawi 3-na Bu kha a ni rih a. Chutah chuan Executive Committee Member zingah Zopa Rev. Thianga, a lo tel vang tawh a ni. Rev. Thianga hi Reiek khuaa piang, Welsh Zosap-te hnuaia lehkha zir thin a ni a. Rawngbawlna avangin Cachar Hill Tribe Synod lamah a awm nghet ta zawk a ni. He kohhran inpumkhatna hi Mizoten atir atangin kan lo ngai pawimawh tih a chiang a ni. Assam Christian Council inkhawmpui vawi 3-naah hian Presbyterian Church in Assam palai zingah Rev. Saiaithanga leh Pu Muka te hming a lang ve vang bawk a ni.

𝗥𝗮𝘄𝗻𝗴𝗯𝗮𝘄𝗹𝗵𝗼𝗻𝗮 𝗮𝗻 𝗻𝗴𝗮𝗶 𝗽𝗮𝘄𝗶𝗺𝗮𝘄𝗵

Christian Council din leh rawngbawlna neih ho hi a inrual emaw tih theih khawpin Christian College din chungchang an ngaihtuah nghal a. A tirah chuan Pathian Thu zirna ‘theological college’ lam an sawi zawk a, mahse Kristian college pangngai mamawhna a sanzia an hre thiam telh telh a, theology leh zirna pangngai inkawp college din an sawi leh a, a tawpah chuan Union Christian College chu Kristian taka inkaihhruai a, Kristian nun dan tha chhawm nun zelna atan 1952 khan an din ta. Tunah chuan he college hi changtlung tak a ni tawh a. Mizote zingah pawh he college atanga inzir chhuak hi Kohhran hruaitu, khawtlang hruaitu leh sorkar mi lian tam tak an awm tawh a ni. Hmarchhak kohhrante tan honain zir viau phei se chuan college mai piah lama University hial pawh ni thei tawh tura khawpa hmun leh hma nei tha a ni a. Hemi kawngah hian tawngtai tam a ngai khawp mai.

𝗜𝗻𝗽𝘂𝗺𝗸𝗵𝗮𝘁𝗻𝗮 𝗿𝗶𝗹𝗿𝘂 𝗮 𝘁𝗵𝗶 𝗻𝗴𝗮𝗶 𝗹𝗼

Kristiante inpumkhatzia a lan chhuahna kawng khat leh inpumkhat lehzual zelna atana din a nih angin hma a la chhunzawm zel a. A tirah phei chuan India ram ringtu zawng zawng Kohhran pakhata la awm ho vek an beiseina te pawh an sawi hial a ni. Tichuan, India hmarchhak bikah Kohhran khata luan za tumna chu a kal zel a, kum 1970 –ah phei chuan ‘Draft Constitution’ an tichhuak ta hial a. Unit tinah sem darhin an ngaihdan an zawh theuh a ni a. Mizo kohhrante phei chuan an kohhran bil nihna leh kalphung hlauh thak khawpin ‘Church of North East India’ chu din rem an ti tlang a. Amaherawhchu, hmun dang atangin harsatna a awm tak avangin a tlawlh ta a ni. Kum 1980 chho-ah khan thar thawh duhna a lo awm leh a, chu phei chuan beisei angin ngaihven a hlawh zui ta vak lo a ni mai thei. Kohhran inpumkhatna kan sawi hian Kohhran pakhata awm ho ringawt ni lovin ‘inpawmtawn, inzahtawn leh inngaihsaktawn’ te hi inpumkhatna ze hlu tak a nihzia pawh kan hriat tel a tha tho awm e.

𝗧𝗮𝘄𝗻𝗴𝘁𝗮𝗶 𝘇𝗲𝗹 𝗶𝗹𝗮

‘Assam Christian Council’ tih hming chu remchan zawkna avangin 1962 khan ‘North East India Christian Council’ tia thlak a ni a. A tira member 7 awm kha tunah chuan 52 lai (Kohhran 35 leh Kristian pawl 17) a ni ta a. Hetih lai hian member nih dil engemaw zah an awm reng bawk a. Pathian hruaina avangin a thang zel tih loh theih a ni lo. Shillong khaw laili, Raj Bhavan (Governor’s House) bulah compound zau tak neiin Office leh Quarters te leh Guest Rooms hialte pawh neiin a phuisui ve tawh hle a, Office leh Guest Room te phei hi chu tihchangtlun hna thawh mek a ni a. He ‘NEICC Day of Prayer’-a thilpek kan thawh khawm thin hian kawng ro a su nasa hle a ni. Chutih rualin Pathian duh dan hmu thiam tura India Hmarchhak Kristiante tanpui leh a tul huna an aiawha ding turin tan a la sauh sauh bawk a. A rawngbawlna pangngai bakah North East-in kan mamawh em em, hun rei tak atang tawha a lo tum tawh thin, ‘Peace Centre’ (Centre for Research, Documentation and Training) din turin hmalakna a kal mek. Chuvangin, he ‘NEICC tana tawngtai rual ni’ leh hun lo kal zel turah hian thahnemngai takin i tawngtai thin ang u.

*****