SAWI BUAI NGAI LO KAN BIBLE

     Bible lehlin chungchang thu hi mi tam zawk chuan kan chhiar ning tawh hial awm e. Ziah pawh inthlahrunawm zawk a ni tawh a, mahse tam tak kan la buai nak nak avang hian chian lehzual duh pawh kan awm a ni mai thei. Chung mite tan chuan han ziak leh ila. Ka thuziak hmasa Pu B. Lallianthangan a rawn selna(The Aizawl Post, Oct 8, 2016) behchhan deuh khan sawi ta ila, chhiartute tan hriat thiam a awl deuh ka beisei.

Bible ‘Providence’ bik a awm em ni?

     Hebrai leh Greek thiama inchhal ve thei lo tan chuan Textual Criticism(Thliar fel hna) chungchang han ziah ve ngialte hi a zahthlak thei mai dawnin ka hria a, hre ber ang phei chuan ka inngai hauh lo tih sawi hmasak ka duh a. Mahse, tunlai Biblical Scholarship-in a pawm tlan dan leh a bik takin Conservative Evangelical-te chhuanvawr Scholarte pawhina an pawm dan tlangpui ka sawi chhawn ka tum mai a ni a.

     Thenkhat chuan Erasmus-a lo lak khawm Greek NT chhut hmasak ber leh a hnua an siam that Textus Receptus an tih chu an ngaisang zual a, Pathian ‘providence’ angin an ngai hial a ni awm e. Ama hunah chuan chutiang chu a ni ngei ang tih ka pawm thlap. Mahse, Erasmusan hmanhmawh phelenga Greek Manuscript(Kutziakbu) 6 vel a hmuh ang ang fawm chawpa a siam ‘providence’(Pathian remruat)  a nih theih chuan Textus Receptus an hman hnua Greek NT fiah, fai, fel leh a loh bera kum 300 vel laia upa zawk, bakah Greek NT Manuscript copy tam tak an hmuh chhuah hi eng vangin nge ‘providence’ anga kan ngaih theih loh bik ang le? Kei chuan ka ngai hmak a, Theodore Beza te hnungzuia Reformed Theology la tuipui chhunzawm zel tam zawk leh ‘Bible Dik Lo Thei Lo’ tih tan tlattu tam zawk hian ‘providence’ ve thoah an ngai a tih ngam a ni.

Tu tan pawh zir zel a tha

     Hman deuh khan Conservative Evangelicals zingah inhnialna buru angreng tak a awm a. Christian Apologist Michael Licona chuan Isua Thawhlehna (Resurrection) chungchang ropui taka a defend laiin a thusawi thenkhat a ‘Conservative’ puiin an pawmpui theih loh a awm ta a. Pawmpuitu pawh tam tak an ni tho. Ngaihdan insual karah chuan Michael Licona chuan thuchhuah siamin, “Ka lo sawi dan kha zuk chuang lo leh midangte pawm dan pawh thil ni thei tho a nihzia pawmin, ka ngaihdan awm sa kha ‘re-examine’-in ka research chhunzawm zel dawn a ni,” tizawngin thu a chhuah ta a. Boruak a dai ta a ni. Tumahin Michael Licona, tuna Houston Baptist University-a thawk mek, hi an ngaihnep phah awm lo ve. Ka thuziakah khan mi thiam tak Pu PC Biaksiaman a hre tawk lo tia ngaihnep lam ni lovin, zirna huanga thu awm a insut nat tak emah chuan rilru hawng zau deuh tura ka duhsakna thu a ni zawk. He thil hian a lo tih that tawh tam tak a hliahkhuhsak ka hlauhpui zawk a ni.

Thurin khawih pawi se kan ti zawk hial em ni?

     Ka thu lakna pakhat Bible.org chuan kum 2006 record-in a ziah danah Thuthlung Thar Manuscript hrang hrang, a kim leh kim lo, hi 5745 a awm. Heng Manuscripta inziak dan danglam hret hret (hawrawp hmaih, inthlakthleng, belh hret, etc.,) chu nuai chuang ni hialin a sawi bawk. Danglam hret hret te chu pawi tak ni se, a buaithlak ngawt ang. Kristian Thurin a khawihbuai phak loh hi a kan Bible ropuina, Pathian venhimna ni ngeiin ka hre zawk a ni. B. Lallianthanga hian Trinity chungchang leh Vanram lut tur chungchangah Kristian Thurin tidanglam thei ang deuhvin a rawn ziak a. A mak hle mai. Parallel Bible chhuah hma BSI Bible chauh kan neih lai khan Trinity kan zirtir a, ‘Vanram kai turte chu Isua ringtute chauh an ni,’ tiin kan inzirtir tlur tlur a ni lawm ni? Hei hian ‘variant readings’ chhe te teten Kristian Thurin a khawih pawi lohzia a tifiah ngawt mai.

     A rawn thur chhuah I Johana 5:7 thu phei hi chu ngaihnawm tak a tling. Erasmusa khan a tirah chuan KJV(Textus Receptus)a inziak ‘Trinitarian formula’ ang khan a dah lo va, Roman Catholic kohhran Latin Bible hmangho khan an haw hle nghe nghe. A dah loh chhan chu Greek Manuscript pakhatah mah a hmuh loh vang niin a tang tlat thung. 1520-ah Oxford scholar Roy-an chutianga inziahna Greek text (codex 61) chu a siam chawp a, an telh ta tiin Evangelical Theological Society President ni mek leh Dallas Theological Seminary NT Professor thawk mek Dr. Daniel B. Wallace chuan a sawi.

     Pu Lallianthanga hian Parallel Bible leh KJV/NKJV dah dan- “Vanah hriatpuitu pathum an awm: Pa, leh Thu leh Thlarau Thianghlimte an ni: heng pathumte hi pakhat (pumkhat) an ni’ - tih hi a rawn fak hle mah se, mahni doctrine mil zawnga lehlin a ang tak zet. He chang hi ‘Johannine Comma’ tiin mi thiam zingah chuan a lar hle a. ‘Comma’ hmanga Trinity thurin mil taka sem diat diat hi kum AD 1400 hma lama kutziakbu (Mss) kan neihah a awm miah lo va, kum AD 1215 hma lama Greek lehkha ziakah a awm miah lo, an tih chu! (‘The oldest mss with the Comma in its text is from the 14th century…indeed, the comma appears in no Greek witness of any kind (either mss, patristic, or Greek translation of some other version) until A.D. 1215’ The NET Bible notes, p. 2394f). Hetianga inziahna Greek Mss hi 4 chiah a awm, an ti deuh deuh!

     Heti a nih avang hian BSI Bible Lehlin Hluiin a dah dan hi a dik theih lohna chhan tur tha tak kei chuan ka hre lem lo va, BSI Bible Lehlin Thar phei chuan, “Hriatpuitu pathum an awm, Thlarau leh tui leh thisen chu, chung pathumte chu an inthurual a ni,” tiin a dah hlauh thung. Ka sawi nawn duh chu – helai chang hriat dan chungchangah ngaihdan inang lo awm mah se, Trinity thurin a khawih buai kan ti thei dawn em ni? Chang dangah a la tam lawm ni? (ref. Matt. 28:29; II Kor. 13:14, etc.,)

     Vanram lut turte (Thup. 21:24) chungchangah KJV/NKJV/Parallel Bible-in a lehlin dan kha a thu chuan pawm vek mah ila, a inziak dan a nih hmel loh hle. English Modern Translations ten ‘atanga a chhandamte’ tih kha an telh lo deuh vek a. Ka han bih chiang deuh a, Commentary te pawhin helai thu a telh loh chhan pawh an sawi peih mang lo (Mss thenkhatah a lo tel a ni ve mai). BSI Biblein ‘Hnam tin atanga chhandamte’ ti kher lovin ‘hnam tin’ emaw ‘Jentailte’ emaw lo ti mah se Johana 3:16 “…a ring apiang” tih te, 14:6 “…keimaha kal lo chu tuman Pa hnen an thleng ngai lo,” tih te, Tirhkohte 4:12 “Tu dang hnenah mah chhandamna a awm lo, van hnuaia mihring hming sak zingah min chhandam thei hming dang reng reng a awm lo,” leh a dang dang a la kuh tun mai. Vanram kai turte kan him e!

     Isua Pathianna chungchang phei chu KJV aiin tunlai Modern Versions thenkhat hi chuan a sawifiah zawk a. Johana 1:18-a KJV-in ‘begotten Son’ a tih mai khan ESV chuan ‘the Only God’ tiin a dah; Tita 2:13-a “…the glorious appearing of the great God and our Saviour Jesus Christ,” tia ‘God’ leh ‘Saviour’ sawi hran theiha KJV-in a dah kha ESV chuan, “…appearing of the great God and Saviour Jesus Christ,” tiin a hmer kawp a; tin, II Peter 1:1-a “…through the righteousness of God and our Saviour Jesus Christ,” tih mai hi ESV bawkin, “…by the righteousness of God and Savior Jesus Christ,” tiin a Isua Pathian leh Chhandamtu nihna chu a sawi kawp leh hmak mai a ni.

Pathian leh Mi thiam

     Mizote hi chu kan chapo ve ngawtin ka hre thin. Pathian Thu-ah ngat phei chuan ‘mithiamte’ hriat dan hi ‘thlarau’ lo deuh riauvin kan hre fo. Pathian Thu (Bible) sawi ngat pawh hi sawi se, ‘a thlarau lo’, ‘thlaraua hriatna a ni lo’ ti tawk kan kat nuk thin. Miten taimak leh inpumpeka Pathian Thu hriat tuma an beihna te kan hmu ‘tisa’ fo a, mahni dawn dan leh duh dan chu kan ngai ‘thlarau’ viau lawi si. ‘Tisa’ tak kan nih theih dan a awm zawk thinin ka hria. Mi thiam tam tak hi keini aia Krista hmangaih zawk, tawngtai tam zawk, insum thei zawk, taima zawk, an ni thei tih hi I hai lovang u. Pu B. Lallianthanga pawh hian Textus Receptus/KJV/NKJV/Parallel Bible te chu Pathian pawmpui bik, a dang zawng chu ‘Mithiam pawmpui’ angin a rawn chhuah titih hial mai. A mak hle thin mai. Engvanga Pathianin a pawmpui bik anga ngai thei ni maw? Pawmpui zawnga kan sawi dawn pawhin kan Mizo Bible neih pangngai hi a pawmpui ngei a nihzia hi Mizo Kristian history-ah hian a chiang a ni lawm ni?

     Kei ve chuan mi ten Pathian tih a, Bible zir chik a, Commentary leh Dictionary min lo dahsaktu ‘mi thiamte’ avang hian lawmthu ka sawi thin. An thawhrimna leh inpekna leh an thiamnate hi mak tiin ka hun ka hmang fo. An ngaihtuahna ram thlen phak loh leh an thiam bikna man phak loh a awm chang hian hlim leh lawmna mak tak ka nei thin a. An thawhrimna leh taimakna zawng zawng chhawrtu ka nih chang hian Pathian ‘providence’ ah ka lawm veng veng thin a ni. Pu Biaksiama ziak Bible Rintlak Loh a Awm Em? tih kha chhiar turin min duhsak hle a, kha lehkhabu kha thian tha pakhatin min present ka nei nghe nghe. Amaherawhchu, ani hi kawng tam takah mi thiam chhuanawm tak ni mah se Textual Criticism subject-ah ngat chuan ani kutchhuak hi innghah nana hmang lovin Conservative scholars  FF Bruce, Ray Comfort, Daniel B. Wallace, Gordon D. Fee, DA Carson leh James White te kutchhuak ka hriat thiam ve ruai ruai te hi innghahna tur zawk niin ka hria a; an ni aia la turu lehzual Bruce M. Metzger leh Kurt & Barbara Aland bakah Bart Ehrman, tih vel hi chu ka man phak lo achha a ni zawk e.

     Mahni tan lam lak nat luatah Church Father Origen, Textual Critics hmasa BF Westcott, FJA Hort te mi sual tak anga chhuah chhiat tum hi a ‘game’ a hniam ka ti ngawt mai. An pathum chanchin hi kan hre chiang duh a nih chuan Rev. Lalfakzualan a article tha tak, “Kan Bible hman lai hi a rintlak a ni,” (Didakhe, July-Aug, 2016) tih kha chhiar a tha e. Ka tehfung ve chu – Bible hi sual vanga tichingpen duh ni se an hlawhchham a ni hial ang. Thu pawi tham an hlawi pawh a ni dawn si lo. Trinity thurin paih tuma chang thenkhat hlawi ni se, hmun danga mi hi an hmu lo em ni ang? Vanram lut tur phal zauva chang thenkhat an lo hmaih lui ni se, engvangin nge a aia chiang an paih loh? Westcott leh Hort phei chuan Greek NT Kutziakbu Alexandriaa lo awm kha a hlutna an va hmu chhuak thar a ni chauh si a. Chhawk lam a ni lo. An nungchang ang zelin an ‘work’ teh dawn ta ila, Erasmusa ngei pawh kha Roman Catholic puithiam sawn, Kohhran Siamthat (Reformation) lai pawha Catholic Kohhran chhuahsan lo leh midangte hmakhalh tuma hmawhsaruma a Greek NT buatsaih ngei pawh kha ‘dik lo thei lo’ anga ngai lem lo a ni ve tho e.

Sawi buai ngai lo hi aw!

     Textual Criticism (Thliar fel hna) tak tak kan thlir dawn chuan hemi KJV family hrim hrim hian Pu Lallianthangan a  sawi ‘conjectural amendation’ (a ni ang tia ngaih tlatna zulzuia kal) a pawl zawk vekin ka hria. A manuscript copy tam lam te argumenta kan lak dawn chuan eng tik laia tam kha nge? Kum zabi 9-na hmalamah kha chuan tuna Majority Text(Byzantine text) te hi Minority text (Copy tlem zawk) an nia. Textus Receptus (KJV) ang chi (Byzantine Text-type) hi AD 300 hma khan kohhranin an hmang tih ‘evidence’ pakhat mah a awm lo, tiin Biblical Scholar pakhat chuan a sawi hial! PC(USA) a liberal tak avanga chhuahsana Presbyterian Church in America (tuna Orthodox Presbyterian Church) dintu Pastor zing tel ngat Allan A. Macrae chuan, “Byzantine text te hi tam viauin Manuscript 95% hial ni mah se heng te hi AD 700 hnua copy vek an ni; Thuthlung Thar an ziah hnu kum 700 velah,” tiin copy tam tam Textual Criticism-ah chuan a hlut loh theih thozia a sawi.  Chuvangin, mithiam, Pathian Thu hi ring a, Chanchin Tha hril nana hun puma inpe tam tak, tunlai khawvel buai tawh taka Pathian Thu Bible humhalhtuten Critical Text hi an innghahna zawkah an hmang vek tawh chu a ni.

     Hei hi a chian em emna chu – tunlai Bible lehlinah NT Greek Text atana Textus Receptus hmang chu KJV/NKJV chiah hi a ni tawh a. Conservative Evangelical Bible Version tunhnaia mi English Standard Version an tih Conservative Publishers Crossway Books-in a chhuah ngat leh kum zabi 20-naa Reformed Evangelical Theology defend leh zirtirtu ropui bera an chhal thin Dr. J.I. Packer leh a thuihhruaiten an lehlin a nia. Chutiang bawkin NIV te, HCSB te pawh Conservative Bible ni bawk a Critical Text-a innghat si a ni. Billy Grahama lar vang lai ngat pawh khan New International Version te, New Living Translation te hi an Crusade-ah an sem chur chur thin a nih kha. I buai i buai lovang u. KJV leh ‘V’ lo insualtir hi a ropui lua lo e.

*****RE13102016*****