BELH NGE PAIH?

KJV/NKJV leh Modern Version dangte (BSI Bible telin) chungchang hi lehlinna tawngkam a ni mai lo va. Greek NT  hman dik zawk inchuhna a ni. KJV/NKJV hian Textus Receptus-a innghat a hmang a, a dang ho hian Critical Text an tih an hmang thung. Khawi hi nge a original zawk tih thu an inchuh a ni ber awm e.

Tunlaia Bible translation zawng zawng chuan Critical text hi an ring zawk vek a tih theih a, hei hian liberal, conservative, evangelical, a huam vek. KJV-a text thenkhat footnote-ahte dah an nih tak nachhan hi NT text copy chhawn zel a nihna kawngah copytuten an belh nia hriat vang a ni a. Doctrine thenkhat duh loh avanga hlawi thla an nih chu a rinawm loh. A chhan chu Kristian Doctrine pangngai hnawl khawp hi engmah hetiang thil hi a awm lo a ni awm e. BSI Bible (Critical Text) chuan ‘KJV hian Bible originalah khan a lo belh nual a, a original bera nia lang hi a ‘main text’ ah awm se, belh nia lang chu ‘footnote’ lamah awm mai teh se,’ a ti ang deuh a nia. A chhan pawh KJV innghahna Greek Text ang chi hi AD 500 hmalama ziak Greek Manuscript (Thuthlung Thar Kutziakbu) kan hmuh theih zawng zawngah chiang fakin a awm lo a ni awm e.

KJV tan ho erawh chuan Textus Receptus kha dik berah an ngai a, hlu bik leh kim bik, Pathian malsawm bikah an ngai hial a ni awm e. Greek Manuscript rau rauah copy tam ber chu Majority Text (Textus Receptus leh a zawlpui) an ni a, chuta tang chuan (a original zawk) tunlai mi thenkhatin thumal leh sentence thenkhat hi an hlawi thla a ni, an ti tlat. Critical Text thlangtu scholar ho erawh chuan, ‘A copy tam zawk a nih avangin original zawk a ni ngawt lo, a copy-tu an tam a ni mai,’ an ti thung.

Hei hi han ngaihtuah teh:

1.      English Modern Bible Versions leh BSI-in Critical text a hman zawk hi ‘liberal’ –na niin i hria em? Hemi a hman avang hian doctrine challenge theih a awm miah si lo. KJV hian Bible original text-ah thumal leh sentence thenkhat a lo belh a nih chuan a ‘liberal’ zawk a ni lo maw?

2.      KJV hi dah san loh zawk hi Rinna kawnga huai tawk loh vang niin i hria em? Zir bing leh mi thiam zawkten Critical Text an dah san zawk laia, KJV text te dik zawk tlata ngaihna hian Bible original zawk pawm ngam lohna a ni zawk hial lo maw?

3.      Bible chi hnih a awm em ni? Pakhat hnawla pakhat pawm theih pawh a ni dawn em ni? Thumal leh sentence thenkhat, doctrine lama buaina thlen zo vak lote, hi tuten emaw an BELH tih leh, tuten emaw an PAIH tih thu mai a ni. BSI lamin ‘an lo belh aniang’ an ti a, KJV lam hian ‘an lo paih alawm le’ an ti, a ni ber mai.

4.      Liberal leh liberal loh chu Bible thu kan nun atana kan pawm ngam leh ngam loh a ni mai zawk lo maw?