LALPA TAWNGTAINA TAWNGKAM KIM

Lalpa Tawngtainaa a kharna kan sawi thin ‘Doxology’ an tih, “Ram te, thiltihtheihnate, ropui te chatuana i ta a ni si a,” tih Matthew 6:13 tawp lam hi kan Bibleah a awm ve loh avang hian mi tam takin mak an ti thin a. English lamah pawh Modern Versions-te chuan Mizo Bible Lehlin Thar angin footnoteah an dah tlangpui a, an telh a nih pawhin bracket chhungah an dah thin. Engvang nge maw ni le? He thu hi duh lovin an lo hlawi thla em ni?

Footnote-a dah thlak a phu em?

1. AD 700 hmalama Greek Thuthlung Thar  kutziakbu (Mss) kan neih zinga pakhat chiahah he doxology hi a tel, chu chu Codex Washingtonianus (4^th/5^th Cent)  a ni.

2. Kutziakbu hlui ber Codex Vaticanus leh Codex Sinaiticus (350 AD) ahte a awm loh bawk avangin Codex Washingtonianus-ah hi chuan engtin emaw copy chhawngtuten an lo belh a ni mai thei.

3. Kum zabi 3-naa church fathers Origen, Cyprian, leh Tertullian-a ten an sawi tel ngai lo.

4. He doxology inziahna kutziakbu (Mss) ten an ziah dan hi a inang lo hlawm nual, a then chuan “…Pa leh Fapa leh Thlarau Thianghlim ropui nan”, tih te a ni nuaih mai awm e. Hei hian copy chhawngtute belh a nih a tirinawm zual hle.

5. Chanchin Tha Luka ziakah hian a awm ve lo.

6. Heti a nih avang hian NT text original berah te kha chuan a awm lo a nih a rinawm zawk a. Tunlai Bible-te chuan hnawl chiah si lovin ‘footnote’ah an dah tlangpui a ni ang.

            New English Translation chuan, “He doxology hi kohhran hmasate Pathian Biak thu leh hla atana I Chro. 29:11-13 behchhana an phuah a ni mai thei; a ziak chhawngtuten vantlang inkhawma hman atan remchang tiin an belh a ni thei ang. Bible chhung thu leh pawn lam tehfung hmanga tehin telh loh hi a awm zawk,” tiin note awmze nei tak a siam. Tin, he doxology hi tu tan mah helh tur awm theia a lan loh avangin tuman duh thu ngeia an hlawi thlak chu niin a rinawm loh.

Lalpa Tawngtaina atang pawh hian kan paih mai dawn lawm ni?

1. Kan hman mek Lalpa Tawngtainaa he doxology a tel hi a pawina leh fuh lohna a awm lo niin a lang. Matthaia ziak original-ah lo awm lo pawh ni se, kohhran tiak tir atanga an lo hman dan ni ngeiin a hriat theih a, sawiselna tur a awmin a lang lo.

 2.‘Lalpa Tawngtaina’ kan tih hi tawngtaina pakhat hming a ni. Isua zirtir ang chiah chiah kher phut a ngai lem lo.

3. Doxology hi Apostolte zirtirna lehkhabu kal zel upa tak Didache (1^st/2^nd Cent) ah a tel a, Kristianten an hmang hma hle tih a hriat.

4. Codex Washingtonianus hi codex zinga upa ber 3-na a nia, chuta inziak a nih chuan a original text-ah a awm lo a nih pawhin an hmang hma hle tih a hriat mai.

5. Church Father John Chrysostom(AD 347-407) pawhin hemi behchhan hian a lo sermon nghek tawh thin a ni.

6. Matthaia ziakah hian kan telh emaw, telh lo emaw thil pawi tak a awm theiin a hriat loh va. Theih patawpa original kan duh a nih chuan Matthaia hian a lo telh lo zawk a ni mai thei.