PARALLEL BIBLE CHUNGCHANGA BUAINA HI

Tunlaiah Mizo Bible lehlin, a bik takin Parallel Bible Upa Dr. PC Biaksiama lehlin leh a kaihhnawih thil thenkhat chungchangah sawi neuh neuh a tam hle a. He buaina ka hmuh thiam ve dan han thai lang ve ila:

1. He thil hi thil ho te-a buaina, ‘much ado about nothing’ a nih theih dan a awm. Thahnemngaih luat avanga mahni ngaihdan sawhsawn theih loh vang mai mai emaw, Biblical Textual Criticism man chian loh vang emaw a ni mai thei. Hei hi hria ila. Thuthlung Thar lehkhabu 27 te ziak kha miten an copy chhawng zel a, chutiang copy chu a bu kim leh kim lo copy (kutziakbu) 5700 dawn lai  a awm a, chung copya a inziah dan chu  danglam hret hret a awm nual. Thliar fel hna (Textual Criticism) chuan Bible kan neih ang hi min chhawp chhuak chauh a ni a. Textual Criticism hi awm lo se, a buai nuaih mai dawn a ni. Copy 5700 dawn chu han en tawn ta ila, a danglamna zawng zawng lak khawm pawhin 15% bakin a tam lo a (chhut dan azirin 5%, 2% te pawh a ni thei), chu zaa sawm leh panga vel chauh Kristian Thurin khawih buai khawpa pawi pha hauh si lo te chu, he buaina hringtu a nih tak chu!

2. Bible hi Pathian Thu a nihna leh a rintlak zia a lanna chu heng danglamna neuh neuh hian  Kristian Thurin pakhat mah khawih pawi pha lo hi a ni a. Bible ringtu tan engmah buaina tur a awm lo, a pawm theih vek. Buaina thlentu chu chutiang Kutziakbu chu kum zabi 2-na atanga kum zabi 15-na vela ziak a awm duah vang a ni a. Kutziakbu (Mss) upa zawka ngaihah a naupang zawka an hmuh thumal(word) leh thuhlawm(sentence leh paragraph)  thenkhat tel lo a awm zeuh zeuh avangin a ‘original’ zawkah a awm lova ngaiin NT Critical Text te chuan an telh lo mai a ni a. Hei hi a pawina a awm lem awm lo ve. Tunlaia Textual Critic ten an sawi hma khan Bible ziak tam takah (a original hnaih zawk nia ngaih theihah te) a lo awm tawh lo hrim hrim tih hriat a tha.  

3. Thangtharten tawng thar leh thil hriat thiam dan thar bakah sawi duh dan thar an neih zel avangin Bible hi lehlin thar zel a ngaih chhan a awm a. Bakah lehlin lo awm tawhte kha a that tawk lohna hmuh chhuah thar theih a ni bawk tih hria ila. Parallel Bible letlingtu pawh a lawina Presbytery-in thunun tak chhan pawh BSI Bible, Mizoten kan lo than hnan tawh kha Bible dik lo zawk anga a chirhtheh vak vang leh NT Textual Critics hovin an pawm tlan zawk Greek Text chu dik lo fe zawk leh mi sual thiltiha a ngaih hial vang a ni deuh mai awm e. A thu zukna turin hun rei tak an pe tih pawh hria ila. Tunah pawh hian ‘E khai, ka mi thiampuiten heti taka min pawmpui si loh chuan, ka lo zir chiang leh zawk ang e,’ han ti thei se chuan thil a veng kuarin ka ring.

3. Bible hi pakhat a ni a, Parallel Bible a ni emaw, BSI Bible a ni emaw Bible chu pakhat a ni. Thenkhatin thu pui tak anga an han sawi hnawk chiam chhan chu Bible kutziakbu thenkhata danglamna tlemte vel vang mai mai a nia (‘Krista Isua’ tih leh ‘Isua Krista’ tih ziak danglam ang chi te). NT Scholar Daniel B. Wallace chuan 98% ah an lungrual thlap, a ti hial a. KJV(Textus Receptus) thlang zawktu scholar pakhat chuan, “95% inpawm tawn reng a nih avang hian he thilah hian ka buai ka buai peih lo,’ ti zawngin a sawi hial. English NKJV Preface pawhin, “It is most important to emphasize that fully  eighty-five percent of the New Testament text is the same in the Textus Receptus, the Alexandrian Text, and the Majority Text,” a ti ve lawm lawm mai. NKJV Translators te hian Textus Receptus la hmang tho mah se Critical Text leh Majority Text-a chuang lo thute(words & phrases) chu an footnote thlap thlap a ni. Ramhuai thiltihah an ngai ngawt lo tih a hriat a ni. Heti a nih avang hian heti taka buai hi a tul lo hle. Kristian Thurin sawi danglam thei text danglam hi a awm lo hrim hrim. Kan sawi vak hian Kristiante hian Bible pahnih kan nei emaw kan ti mai ang tih a hlauhawm thei.

4. Parallel Bible hian NKJV a letling a, chu chu KJV siam that niin Thuthlung Thar Kutziakbu(Manuscript) ah Textus Receptus  Byzantine ram (Eastern Roman Empire) lama an hmuh ang chi(family) hman a ni. He Byzantine text te hi a copy a tam em em a(NT kutziakbu zawng zawng 80%), mahse inang lo a tam a, mithiamten a quality an dahsang ber lo a ni. Tin, a upat lam an tehin 500 AD aia upa a awm meuh lo a. A ngaisangtuten an ngaihsan laklawh chhan ni awm chu Protestant lo chhuah tirh khan KJV kha an hman nasat laklawh tawh vang niin a hriat theih.

5. Tunlai Bible Version zawng zawng(RSV, NRSV, NIV,NLT, ESV, NASB, HCSB, etc.,) chuan Byzantine text hi hmang tawh lovin Critical Text an tih Alexandria khua(Egypt) lama an hmuh ang chi an hmang. Chu chu BSI pawhin a hman hi a ni a. Thuthlung Thar bu pum an hmuh upa ber chu 325 AD vel a ni daih a. NT ziak themnem deuh(fragments) an hmuh upa ber ber (200 AD vela an ziak) te leh Church Fathers hmasaten quotations-a an hmuhte pawhin he Critical Text hi an pawl vek zawk a. Chuvangin KJV/NKJV/Parallel Bible-in a hman ang chi hi an thlang lo zawk vek tawh, tih theih a ni.

6. Chutih laiin ‘KJV Only’ Movement hi Sapramah a awm ve hrim hrim a, Version dang zawng zawng hi chu ramhuai hnathawha ngaih deuhna pawh a awm. He thil hi a  duhawm loh lamah chuan duhawm lo ve tak a ni a. Methodist Pastor lar tak pakhat phei chuan, “The King James Only Movement is one of the most destructive cultic movements in the Church today,” a ti hial. ‘KJV Only’ chu ti em lo mah ila he thil hian Mizote min kangkai ve deuh a ni mai thei. Hetiang a nih chhan ber chu – an lo bel tawh KJV-a inziak thenkhat kha Critical Text-ah a awm loh vang a ni roh a, Pathian Thu paih thenah an ngai a, sual vanga chhawkah an puh ta mai a ni. Heti lo zawng hian han ngaihtuah chhin ta ila- A original zawkah khan a copy chhawngtuten an lo belh a ni zawk lo maw? An lo belh anga a lan chuan paih ngam tur kan ni zawk dawn lawm ni? Pathian Thu-a lo belh an ni sia!

7. Thenkhat chuan hetianga thumal leh chang thenkhat a awm ta lo hi mi thiam thenkhatin rilru chhe taka an paih luih niin an hria a. Hei hi thil nih dan a nih a rinawm loh hle mai. Sual vang leh Kristian Thurin thenkhat chhawk duh vanga chhawk lo ni ta se, engvanginnge thu turu deuh te hi an chhawk loh le? For e.g, Johana 3:16, 14:6 , etc., te hi paih awm zawk an nia. Isua lo kal leh chungchang sawina chang te hi chhawk awm a nia! An paih nia an sawiah hian Kristian Doctrine hnawl tham hi a awm lo hrim hrim a ni e. Textual Critic thenkhat phei chuan KJV(Textus Receptus) pawh hian a chhawk ve teuh alawm, an ti ve tho.

8. Bible hi a zahawm a, KJV a ni emaw, RSV a ni emaw, Parallel Bible a ni emaw, BSI Bible a ni emaw, Byzantine  text a ni emaw, Alexandrian text a ni emaw – a hluin a ropui vek mai. Pawm vek tur a ni ngei ang. Pawm vek leh pawm vek loh hi Kristian nunah a danglamna vak a awm lem lo. An danglam a nih pawhin chaw tak khuka khukpui tham a nih hmel loh. Chutih rualin miin Pathian Thu ngaihhlut avanga, a dik thei ang ber zawn kawnga , a original hnaih ber zawnna ruamah chuan BSI Bible kan hman lai hi chuan tunlai Bible ngaisangtu (Evangelical, Conservative te pawh huam vekin) mi thiam tam zawkin an pawm tlan tawh zawk Critical Texts (Alexandrian) hi a pawm zawk a ni mai a ni. A original hnaih zawk nia an hriat chu an thlang zawk a ni deuh mai. Thlang lo thei pawh a ni lo a niang e. Pakhat zawk hi hnawl bur thu erawh chu a awm lo. Hnawlin awmzia a nei vak lo bawk a – 98% an lungrual kan tih tawh kha! KJV/NKJV/Parallel Bible-a Pathian Thu awihtu ringtu leh Critical Text/BSI Bible-a Pathian Thu awihtu ringtu hi a danglam vak theih loh!

9. Bible chungchangah hian liberal kan hlau hle a. Thil lawmawm tak a ni. Mahse hetiang thil hian ‘liberal’ leh ‘ral’ loh lam a hril lo. Bible Thu kan chunga thuneitu atana kan hman duh leh duh loh hi ‘liberal’ leh ‘ral’ loh chu a ni mai zawk a. BSI Bible (Critical Text) hi pawm thlap chuan ‘liberal’ ngaihna a awm lo. Liberal theology do nasa berte hi Alexandrian/Critical Text/BSI hman ang chi, hmangtu an ni tih i hre tel bawk ang u.

*****RE19092016*****