𝐙𝐔 𝐋𝐄𝐇 𝐑𝐔𝐈𝐇𝐇𝐋𝐎: 𝐓𝐇𝐋𝐀𝐑𝐀𝐔 𝐍𝐔𝐍 𝐀 𝐍𝐆𝐇𝐀𝐖𝐍𝐆 𝐃𝐀𝐍

                                                        
                                                              ATHEISM BIHCHIANNA

                                                                        

Pathian hriatna hi mihring nihphunga bei ve ang hiala ngaih theih a nih laiin tunlai khawvelah Pathian hnawlna leh a awm tak tak pawh rin lohna a lian sawt hle. Pathian awm hnawlna (Atheism) hi mihring chanchinah thil thar tak a nih rualin scientific worldview-in a chîm sân telh telh ang zelin Pathian awm rinna (theism) a tlahniam telh telh thung a. Tun hma deuh chuan Atheist Scientist leh Philosopher te chuan an thurin an ngawihpui deuh mai mai laiin, tunlaia mite erawh chuan Pathian an ‘ning’ tawh a, Pathian awm lohzia ‘Chanchin \ha’ chu \hahnemngai takin an hril tawh a ni.[1] Tichuan, khawvel inher dan chu: ‘Pathian a awm’→ ‘Pathian awm dawn em ni?’ →  ‘Pathian a awm lo a niang,’ → ‘Pathian awm rin hi buaina thlentu a ni’→  ‘Pathian awm rin tlat chu a mawl thlak’ → ‘Pathian a ninawm’– tih a ni ta hial a ni.

            Kan hriat angin ‘New Atheists’ an tih mai Richard Dawkins, Sam Harris, Christopher Hitschen, leh Daniel C. Dennett te hian thawm an nei ring angreng hle a.[2] Amaherawhchu, an thil sawi lam uar thiam viau mah se thinker leh philosopher puitling taka ngaih an ni hauh lo. An beih ber Theology an hriat chian lohna avanga nuih an hlawh deuhthaw fo mai.[3] Daniel Dennett tih loh hi ‘seasoned thinker’ han tih tur an awm lo a ni awm e. Atheist Philosopher Michael Ruse phei chuan, “Heng mite hian Atheist nih min tizak,” a ti hial a ni.

           

                         Pathian Nihna (Attributes) Chungchânga Harsatna

                                (The Problem of God-Concept):

Fiamthua kan lo inzawh \hin pawh ni se, “Pathianin a chawi zawh loh lung a siam thei ang em?” tih hian Pathian nihna sawifiah a harsatzia a tilang a. Pathian nihna kan pawm pangngai ‘famkim(perfect)’, ‘engkimtithei(omnipotent),’ ‘engkimhria(omniscient),’ tih angte hi mi pakhata hmehbel vek dawn chuan sawi fiah harsa tak a ni a. A nihna pakhat chu a nihna dang kalhin a lang zel. Pathian nihna hrang hrang (attributes) avang hian \henkhat chuan Pathian chungchâng chu thil inkawlkalhin a bawm (self-contradictory) a ni a, thil awm thei lo (divine impossibility) a ni, an lo ti ta \hin a ni. Heti teh nuaih a nih avang hian Philosopher James Thrower chuan Pathian chungchâng hi sawi loh law law fihlim thlak zawkah a ngai a hial a ni.[4] A harsat dân chu hetiang hi a ni:

(i)                 Pathian hi engkimhria a nih chuan hmalam hun zawng zawng pawh a hria tihna a ni ang a, mahse engkim tithei a nih leh si chuan hmalam hun zawng zawng pawh a tidanglam leh vek thei tihna a ni dawn a. He nihna pahnih hi inkalh tlat, hmer kawp theih lohah an ngai.

(ii)               Pathian hi thlarau (taksa nei lo) a nih chuan minung (person) anga sawi hleihtheih loh a ni mai dawn a ni, tiin Philosopher Antony Flew a \ang tawh \hin a.[5] Minung (person) nihnain ruangâm (body) neih a keng telah a ngai.

(iii)             Pathian ‘tawp chin nei lo’ (infinite) hian thil dang zawng zawng laka hrang a nihna nen hmer kawp a harzia sawiin, “Mihrang nihna chuan tawp chin neih (finite) a keng tel a. Tawp chin nei lo na na na chu thil dang nena a hranna pawh kan sawi thei chuang lovang. Heng thil pahnihte hi inkawlkalh an ni,”[6] tiin Atheist Philosopher lâr Kai Nielsen a \awng chhuak a ni.

Nitin nuna kan ngaihtuahna pangngai a\ang chuan heng thute hi holam angreng tak angin lang thei mah se, ngaihtuahna fîm a\ang chuan hnawl theih an ni mang lo a. Mizo Kristiante Pathian rin dan pangngai Theism a\angin a harsa zual a. Theologian ten nasa taka sawifiah an tumna, Analogical approach (Thomas Aquinas), Panentheistic (Paul Tillich) leh Process theology (Charles Hartshone) tih te hi an \an lak dân langsar zual a ni a.[7] Hêng theological explanations te hian pawm tiawlsam deuhvin lang mah se, theistic God, kan buaipui tak hi an hnawl emaw, an sawi nêp deuh emaw a ni deuh mai si a, keini ho chuan pawm harsa kan tih ka ring.

Heng hnawlna zawng zawngte hian an tum ram tak an thleng bik lo vek a. A hmasa berah chuan, Pathian nihna hmerkawp chungchangah hriatfiah har deuh awm mah se, Pathian a awm loh chhan \ha anga ngaih ngawtin awmzia a nei vak chuang lo va; a nihna te sawifiah a ngaihna a tilang mai zawk a ni. Person nihna hi taksa neihah a innghat ber lo tih hi Philosopher tam tak pawm dan a ni ve tho bawk a. Dualist philosopher te chuan rilru leh taksa hi inzawm thukin inluhthelh zeng zung mah se thil hrang an nihzia an sawi \hin.[8]

Tin, Pathian engkimtithei (omnipotent) a nihna kan sawi hi fimkhur a \ha. Rilru a lo  lang zawng zawng ti vek thei leh ti duh mai tura ngaih chi a ni lo vang. Engkimtithei a nihna chu a nihphung (nature)a innghat a ni tho a, a nihphung kalhin engmah a ti dawn lo va, a ti thei lo a ni. Engkim tihtheihna chuan thilsiam zawng zawng chunga thu a neihna a lantir a, a thu thuin an awm a ni, tih hi a ni zawk. Pathianin square hi a tibial thei lovang, a nihphung nen a inmil lo; a chawi zawh loh lung a siam thei lovang, a nihna a kalh a ni mai dawn si. Pathian chu a sual thei lo a, a thi thei lo a, chatuan mi nihna leh thilsiam nih a kawp thei lo a, a nihna kalhin engmah a ti thei lo a ni.

Pathian chungchânga harsatna langsar tak dang chu Pathian a inthup tlat (hiddenness) hi a ni. Kum zabi 20-na chawhma lama Atheist lar ber pawl Bertrand Russell khan, “I thih hunah Pathian han hmu ta la eng nge i sawi ang?” tih zawhna chu, “Pathian hnenah chuan ‘Evidence min pe \ha tawk lo’ ka ti ang,” tiin a chhang. Eng vangin nge Pathian a awm leh awm loh inhnial a ngaih fo? Mi zawng zawng hriatin inlantir mai se. Eng vangin nge kan mamawh lai ber hian a ngawih vung vung \hin le? Mi zawng zawng hmuh theihin chiang bangin inlantir se ni mai tur. Heti a nih avang hian Atheist ho chuan inlantir tur Pathian a awm lo emaw, Pathian sual tak kan mamawh lai taka inthup bo tlat emaw a ni e, an ti.

Kristian Theologian leh Philosopher ho tan chhanna awlsam tak a vâng khawp mai. Oxford Philosopher Richard Swinburne-an Pathian inthup tlat nachhan chu a fin leh \hat vang zawka ngaiin, hnial rual lohva chianga a inlantir mai chuan mihring tan duhthlanna hman theih a ni tawh lo vanga, Pathian nena kan inkar chu tihluihna thil a ni mai dawn niin a sawi a.[9] Hemi zûl tho hian 1957 daih tawh khan Alisdair MacIntyre chuan, “Pathian awmzia hi logic leh ngaihtuahna fîm hmanga pho chhuah theih ni se chuan keimahni duhthlanna thiang ngeia Pathian hmangaih a theih dawn lo a ni,” a lo ti daih tawh bawk.[10] Tin, Pathian hi a nih ang angin kan hmaah inlan sela chuan mihring rilru, taksa leh thlarau chakna hian a dawngsawng zo dawn lovang a, mihring tihboralna a ni zawk hlauh lovang maw? A inthup hi min hum a tumna zawk a ni lovang maw? Thilsiam leh mi rilru leh thinlunga a inpuanna hi mihring tlin tawk leh hmu duh leh pawm duh tâna chiang tawk a ni lawm ni?

2.