WCC ka lainat mang e

                                              WCC KA LAINAT MANG E

-          RE Ralte

          Evangelism is the test of true ecumenism.  -  Philip Potter, WCC General Secretary (1972-1984)

Mizote Pathian Thu kalpui danah hian World Council of Churches hian a chhe zawngin hmun a luah zau  hlein ka hria. Hei hi tun hnaia Presbytery engemaw zahin zawm an ngam lohnaah hian a lang chiang a ni. Naupang  tihthaih rual chauh anga mi sawi thaih mai mai avanga lo hmu ramhuai ta mai kan ni ang tih a hlauhawm khawp mai. WCC nihna, thiltum leh rawngbawl dan hre chianga Mizo Kristiante hian kan hnawl a nih chuan a pawi lovah ngai ila. Amaherawhchu, WCC chung chang ka hriat ve chin chauh atang pawh hian, kan hmu chhe lutuk hi chu ka lainat ve deuh thin a ni.

WCC hi pawl naupang tak, 1948-a din chauh ni mah se, lo hmakhalhtu chu World Missionary Conference 1910 (Edinburgh) kha a ni a. Kha conference kha khawvel missionary pawl hrang hrang, mahni thiam ang anga thawk bawrh bawrh leh innghirngho ti tuai thinte thawh ho that theih nana buatsaih a ni. Conference kha a hlawhtlin em avangin ‘Life and Work’ tih te, ‘Faith and Order’ tih thuang te a lo awm belh ta zel a. A tum ber chu Kristiante inpumkhatna leh rawngbawlna a ni. WCC zia pawh a inthlak ve zel tih erawh chu hai chi a ni lovang.

Kohhran a ni lo

Kan hriat hmasak tur pawimawh em em chu- WCC HI KOHHRAN A NI LO tih hi a ni. Kohhran emaw, kohhran aia thuneitu zawk deuh (super Church) anga puhtute hian an suangtuahna ram thil an sawi ve mai thin niin a lang. (UNO pawh, mahnia ro inrel sawrkar hrang hrang control vektua ngai kan awm ang deuh hi a ni ang). WCC website, www.oikoumene.org –ah chuan, “WCC chuan a member kohhran ho chungah thu a nei lo, an zawm ngei ngei tur thuthlukna a siam thei lo,” an ti hmiah a ni. Kohhran chuan doctrine a nei thin a (a memberte chu a thurin ring tur pawh an ni). WCC chuan a nei ve lo. A hnaih ber chu hei hi a ni –“WCC chu Pathian Thu-a inziak ang taka Lalpa Isua Krista, Pathian leh Chhandamtu a nihna puangtu, Pathian pakhat- Pa, Fapa, Thlarau Thianghlim, ropuina tura an kohna dawn ho hlen chhuak tura kohhrante insuihkhawmna leh inpawlhona  a ni,” a ti mai. Hei chin hi chu a him veng vawng hle. Kei chuan hnawlna ka nei miah lo.

WCC member kohhran hrang hrangte hi thurin nei vek an ni ang. A chunga mi hi an kalh loh phawt chuan chung zawng zawng chu a lo pawm thei vek a ni. PCI pawh hian zawm ta ila, kan kohhran doctrine leh nihphung hi thlauhthlak tur a awm chuang lovang. Kan nihna a dal sawt dawn tihna a ni lo. WCC-in a tum chu ringtute inpumkhatna leh thawh hona a ni mai e. WCC-ah hian member kohhran hrang hrang 349 an awm a, chung zingah chuan Baptist tih hming pu 15, Presbyterian hming pu 33, Evangelical hming pu 75 aia tlem lo an tel a ni.

Zep thu cheng suh WCC hian hming hliauna chi hrang hrang a lo nei tawh thin. Duh thawh luat avanga a lo pal khuk ve rum rum changte a awm thin a ni awm e. Kohhran hrang hrang, Pathian Thu chai dan hrang hrang, intelkhawm a ni miau a, a mawh lo ve. Chung zawng zawng chu tuna sawi chhuaha chirh theh nana hman chu nu, tu leh fa nei duah tawh hnu a nulat  lai chet chhiatna leh mualphona zawng zawng phawrh chhuah sak ang hi a ni ngei ang. A tih sual chhui duh ila chuan Kristian sakhua chanchinah ngei pawh hian zahpuiawm ve tak tak a tam teh a nia.

Kan thin khei lai tak nia lang

Kum 1961 New Delhi Conference-ah khan a rawngbawl danah ringlote ringtua siam lam aiin khawtlang thatna (social work) lam a uar ta a. Sakhaw dang betute zinga rawngbawl danah ‘conservative evangelical’ ngaihdan pangngai, ‘Isua Krista-ah chauh lo chuan Chhandamna a awm lo,’ tih chu thlung betin ‘dialogue’ an tih ‘midangte chung tlaka hnawl mai lova inbiangbiakna tha neih,’ chu a uar ta a ni. He mi kawnga hma latu kal nasa tak tak Stanley Samartha te ang kha an awm nuk avangin Mizo Kristiante ang chi conservative evangelicalte ngeng a chhun na hle thin a, inthenna pawh a awm thui hle a ni.

Evangelical lam chuan an han tawng ta tak tak a. Mizoram buai tan kum khan Wheaton leh Berlinah Inkhawmpui neiin an thu a rum ang reng hle a ni. Evangelist Billy Graham chuan Opening Address sawiin ‘Chanchintha Hril’ (evangelism) awmzia te, hril chhan te, chanchintha thuchah te leh Chanchintha hril dan chung changa buaina lo awm ching fel tura inkhawmpui nei an nih thu a sawi.  Kum 1974-ah Switzerland, Lausanne khuaah Inkhawmpui Congress on World Evangelization a nei leh a. Hemi tuma an thuchhuah  Lausanne Thuthlung (Lausanne Covenant) an tih mai chu tun thleng pawhin Evangelical ho leh Mission chung chang zirtu (Missiologist) ho thu pawimawh a ni ta. He thuthlung hi a zau ta hle a. Chanchintha hril awmzia, pawimawhna leh tulna a sawi bakah WCC-in a influence tih loh theih lohvin a hmaa an ngaih pawimawh ngai vak loh thil ‘Christian Social Responsibility,’ (Khawtlanga Kristiante Mawhphurhna) chu point 5-naah a rawn tel ta vah mai. Heta tang hian Evangelical-te pawhin ‘social responsibility’ hi an ngaihthah ta ngai lo, ti ila ka sawi sualin ka ring lo. Lausanne Movement hi, WCC ai chuan, Mizo Kristiante pawm thiam chi a ni zawk mai thei.

WCC pawh a pangngai reng bik lo

Hetih lai hian WCC pawh a inenfiah ve zel a, Evangelical influence pawh a na ve hle tho mai. 1975 Nairobi inkhawmpui-ah khan ‘Confessing Christ Today,’ tih thupui an hmang a, Evangelical Methodist Church in Bolivia Bishop Mortimer Arias-a paper present phei chu ‘evangelical’ tak a ni. Arias-a hian, Chanchintha hril (evangelism) chu Kohhran hna - ‘loh theih loh’(essential),  ‘tul hmasa ber’(primary), ‘kristian tih tur pangngai’(normal), ‘danglam thei lo(permanent), leh ‘man tam tak’(costly), a ti hmiah mai a ni. A paper rawn tuihnihtu evangelical leader ropui John Stott-a pawhin WCC kalphung chu point 5-in hneh takin a rawn kheng a. Hengte hian WCC kalphung chu a thlak danglam vek hauh lova, amaherawhchu, a inher ve hret hret tih Nairobi thuchhuah evangelical group tana chhiar ngaihnawm takah a lang thei.

Kum 1982 khan tun thlenga WCC thuchhuah pawimawh leh lar ber Mission and Evangelism: An Ecumenical Affirmation tih a lo chhuak ta. Hei hi WCC-in a pawm ngat a ni a, tun thlenga a innghahna a ni bawk. He document phei hi chu Mizo Kristiante tan hnawl tur a awm lo niin a lang. He thuchhuah chang 10-ah chuan, “Krista lalna leh chhandamna hre tur leh pawm tura mimal tin sawmna hi Chanchintha hril chuan a huam. Chu chu miin minung Krista nena an inzawmna, Thlarau Thianghlimin a hriattir, a ngaihdamna a chan,  zuitu a nihna leh rawngbawl zel tur a nihna a pawmzia puan chhuahna hi a ni,” tih a ni. Chang 41-na chuan, “Kristiante chuan mimal tin leh mi chi tinte hnenah Isua Kristaa Pathian chhandamna thuchah hi an ba,” a ti hial. Missiologist HA Ashmall phei chuan, “He Ecumenical Affirmation hian thil tam tak min hrilh nawn; Chanchintha hril, lalna leh thiltihtheihna hnawl, tanpui ngaite tanpui, hringnun hlutna hriat: heng thu te hi Biblea innghat leh vawiin khawvela pawimawh em em vek si a ni. Kohhran rawngbawlna hian heng hi a hlamchhiah chuan a Lalpa duh danin a hriam tawk dawn lo tih a chiang a, a Lalpa duhna hmunah rawng a bawl lo tihna a ni dawn a ni,” a ti hial a ni.

Hnawl tum hmasa lem lova lo thlirtu tan chuan WCC chu a inher rem ve zel tih hmaih chi a ni lo. Kum 2000 khan document thar an ti chhuak leh a. Ecumenical Affirmation-a innghat tho hian Mission hrilhfiahna huapzo tak a rawn nei ta, chu chu: “Mission” chuan zau tak a kawk a: tawngka(kerygma), thiltih (diakonia), tawngtai leh biakna (leiturgia) leh nitin Kristian nuna thuhretu nih (martyria) zawng zawngaChanchintha puan leh hril: Pathian leh mihring inkar leh mihring leh mihring inkara inkungkaihna tha a awm theih nana inzirtir leh intihchak te; koinonia- Pathian nena inpumkhatna, mihring inkara inpumkhatna leh thil siam zawng zawng nena inpumkhatna a lo awm theih nana tuam damna leh inremna hi a ni,” tih a ni. Tin, ‘evangelism’ pawh ti hian a hrilh fiah – “mission thuang dang laka lak hran tur ni lo mah se, evangelism chuan Kristaa nun thar leh a zuitu ni tura mimal Chanchinthain a sawmna chiang taka puan chhuah hi a kawk bik,” a ti. An khaikhawmna-ah chuan, “Mission chuan Kristian Rinna leh theology-ah hmun lailum a luah a. Duha duh loh theih ni lovin kohna leh tihtur a ni. Mission chuan Kohhran nihna leh Kristian zawng zawng nihna hi a phan chhuak vek a ni,” a ti tawp mai. Hetiang hi a ni dawn lawm ni kan Zoram leh khawvelin  a mamawh chu? Kan Lalpa Kristan min duh dan chu hei hi a ni dawn lawm ni?

Tunlai hnaiah hian

Kum 2010-ah khan WCC-in World Missionary Conference hmasa ber atanga kum 100-na lawm pahin Edinburgh-ah ngei inkhawmpui a nei leh a. He inkhawmpuia Opening Address sawitu WCC General Secretary, Rev. Dr Olav Fykse Tveit chuan, “Krista thuhretu nih chu Chanchintha hril, dikna leh remna dinpui ngam leh thilsiamte duat tura zawlnei hna thawh hi a ni (To witness to Christ is both evangelism and the prophetic stand for Christ’s will for justice, peace and care of creation)” a ti. He inkhawmpui thuchhuah Edinburgh 2010 Common Call phei hi chu ‘evangelical’ tak Mizo Kristiante tan pawh hnawl tur a awm lo niin a lang. No. 1 leh 2 chauh hi han en ila:  1. Trinity ring chung leh he hna hmanhmawh thlak zia hre chungin, chhandamna Chanchintha thu te, sual ngaihdamna thu te, nun tam chung chang te, rethei leh pachhiate chhanchhuahna thute hi puanga a taka chantir tura koh kan ni. Pathianin khawvel tana a duh hmangaihna, felna leh dikna nunpuia a thuhretu ni tur leh a hrila hril turin min cho a ni. 2. Khawvel chhandam nana Kristan Krawsa a inhlanna leh a thawhlehna hre rengin, inbiangbiakna dik tak, inngaihsakna zahawm leh thuhretu inngaitlawmna nena, rinna dang vuantute leh rinna nei miah lote zinga, Krista danglam bikna (uniqueness) thu hril turin min ko a. Hei hi Chanchintha ring zo huaisenna nen kan ti tur a ni.” Heng thute hi Mizo Kristian rilru hmang thei chin chuan han hnawl tur chia ngaih a har. Evangelical thu chhuah a ang hial a ni.

Kumin 2011-ah phei chuan World Evangelical Alliance leh Catholic lam nena tangrualin WCC chuan Chanchintha Hril kawnga hriat tur Recommendations for Christian Witness an tih chu an siam ta hial a. Chung zingah chuan: “Isua Krista leh kohhran hmasaten an lo zirtir leh tih dan kha Kristian mission hruaitu tur chu a ni…Rinna hrang hrang tam tak kara Kristiante thuhretu nih dan tur chu sakhaw dang betute leh culture dangte nena inbiangbiakna neih a ni…Chanchintha nunpui leh hril harsatna hmunah pawh rinawm tak leh inthuruala a thuhretu ni turin Kristiante chu Krista tirh an ni…Kristiante chuan Krista thuhretu nih chu an mawhphurhna ni mah se ringtua siamtu chu Thlarau Thianghlim a ni tih an hria,” tih te a ni. Hmuh sakawlh tum hram chi a ni lo a ang.

Kan hlau dawn em?

He article ka ziah chhan hi WCC ka tan em em vang a ni lo. Bible, Isua Kristaa Chhandamna leh Chanchintha hrilna kawnga kan duh fir avanga zawm duh lo kan nih chuan kan ulukna hrim hrim chu a lawmawm ngawt ang. WCC mission-in a bawh nasat lam chu khawtlang nun siam that lam a ni tih a chiang a. Chu chuan sorkar, economy, politics, culture, etc., a huam thin avangin mi tam takin an hre thiam lo thin. Mizo Kristian tam tak, lam leh hlim chauh buaipuia thlarau ber anga ngai tan chuan a har thin deuh bawk a ni. Mahse, ‘I ram lo thleng rawh se,” tia tawngtai a, mihring nun pumpui Kristan a fan chhuah duh ngawih ngawihte tan chuan helam mission hi hnar hleih theih a ni lo. Tin, WCC hi chuan  rethei leh rahbehte lam tangin dawm kan hi a tum pui ber a ni tih a history zir chianin a hriat theih mai. Kan ram rethei, mite hnuaichhiah leh chawmhlawm ang chi tan hian WCC hi a pawimawh ngawt lo maw? tia inzawh let hi  kan tih tur ni zawk awm tak niin a lang. Tin, kan dawn tur lam chauh ngaihtuah lovin, he rawngbawlnaa theih ang anga tel hi a chakawm a, a tul a ni lawm ni? a tih theih bawk.

“WCC hian Chanchintha hril hi a khapin a kalh em?” tiin zawt ila, a chhanna chiang tak chu ‘AIH’ tih hi a nih ka ring. Sakhaw dang betute chhandamna chung changah hian Mizo Kristiante ngaihdan pangngai ai chuan a zau deuh zawk fo. Kan sawi tawh angin fawr taka zirtir pawh an lo awm tawh thin. A uchuak deuhte kal dan kha WCC-a mi zawng zawng pawm dan a ni vek lem lo.  Eng pawh ni se, keini ho ngaihdana, “Ringlo chu meidil tla tur,” han tih hlawm tawp mai hi an tim thin a. San Antonio, Texas (1989) leh Salvador, Brazil (1996) Mission Conferences leh Mission and Evangelism in Unity Today (2000) thuchhuak chuan: “Isua Krista lo chu Chhandamna kawng kawh hmuh tur kan nei lova; chutih rualin, Pathianin  chhandam tura a thiltihtheihna hi ramri kan lo kham sak thei ngawt lovang. Sawi fel theih rih loh thil pahnih a la awm a ni (We can not point to any other way of salvation than Jesus Christ; at the same time, we can not set limits to the saving power of God. There is a tension between these two statements which has not yet been resolved.)” a ti. “Heng thil pahnih inkawlkalh awm tak takte hi tha kan ti ve ve a, sawifel pawh kan tum ber chuang lo,” tih thu 1998-a WCC lehkhabu chhuah Called to One Hope: The Gospel in Diverse Cultures tih chuan a sawi bawk.

Ka mimal ngaihdan leh Bible zirtirna ka hriat thiam danah Isua ring lo leh pawm lote tan hian Chhandamna a awm theih ka ring lo va. PCI Thurin 10-naa, “Ringlote leh misualte chuan thiam loh changin  an sual hremna an tuar ang,” tih hi Mizo Kristianten kan thlahdul(compromise) hauh loh tur thurin kan vawn zel atan ka duh bawk. Amaherawhchu, tilaia WCC zirtirna hi WCC thinhrik leh hlauh phahna chhan em em turah ka ngai lem lo. He pawm dan zau zawk hi pawm lo mai ila, WCC-ah chuan kan leng em em a. Memberte pawm ngei ngei tur pawhin an ti chuang lo. “Isua Krista chauh Chhandamtu a ni,” tih ‘evangelical stand’ hi WCC-a au chhuahpui a, he khawvel kohhran inzawmkhawm pawla he thu tan tlattute zinga pakhat kan nih belh phei chuan a tha viau zawk lovang maw? Tin, evangelism lama WCC hi a hriam tawk lo a nih pawhin evangelical lam hi khawtlang nun siam that lamah kan hriam tawk bik chuang lova, Mizo kohhrante hian kan chak lohna ruam hnawh khah nan WCC hi hman thiam tum ta ila, kan Lalpa min duh dan a ni zawk lovang maw?

Tlangkawmna

WCC hi Protestant kohhrante inzawmkhawmna a ni ber a, tunah chuan Orthodox pawh an tel a ni. A member kohhrante zingah hian ze hrang hrang pu leh tih dan chi hrang hrang hmang an tam khawp mai a, Christian ethics, ministry, spirituality, etc., kan duh dan a inang lo nuaih ang. Mahse, kan Lalpa tawngtaina tihlawhtling tura Kristianpui midangte thawhpui thiam khawpa rilru zau put a hun ta. Amah ringtute pumkhat an nih hi kan Lalpa Isua Krista tawngtaina a ni si (Johana 17). WCC member kohhrante nen inanna kan nei teh meuh mai. Chu chu Isua Krista hi Pathian leh Chhandamtu a nih kan ring. Tin, trinity kan ring bawk. Isua Krista  hminga min pawm theitu pawm theih loh hi ze tha a ni lo mai thei a ni. Chapo emaw, dawih emaw, mawl emaw, Amah rin tawk lohna vang emaw a ni ang tih a hlauhawm. Bible, Isua Krista leh a Chhandamna, Chanchintha hril kan kalpui dan pangngai hi kan thlah chuang lovang a, Kristian nun leh rawngbawlna kawng tam taka hmasawna kan nun a lo hausak telh telh theih nan kei chu WCC hi ka hlau miah lo. Tin, a tih tih hi pawm duak duakin ka hmu ‘Pathian’ lem lo bawk. Thenkhatin kan hmu sakhi a, kan hmu sakawlh a, kan hmu Setana hial thin hi chu ka lainat thin ngawt zawk a. Thiam leh theih ang anga thahnemngaia thil tha tih tuma rawngbawl hram hramtu sawisel leh chung tlak zek chan ka chan deuh e.

                                                                              *****

RE25102011