Khawngaihna Mak, Mawi leh Duhawm
KHAWNGAIHNA MAK, MAWI LEH DUHAWM
Luke 15:11-32
He thu ka ngaihtuah run deuh lai, hman ni lawk khan kan fate school an sport dawn a. Ka fapa chu a phur hle mai. A nuin lukhum thar a lei sak bawk a, t-shirt var nen, infiamna chi kekawr bul a bun a, mawza leh pheikhawk nen a intam at mai a. Intlansiak a chak tawh ngang a ni ang, zingah khan inah vawi hnih vawi thum a thlan chhin hman a. Tlan chak pawh a tum khawp mai. “A pa, chaw pawh ka ei teuh !” tiin min hrilh chamchi mai a ni. School chu an va kal ta ngei a, beisei angin thil a thleng ta lo a niang. A nuin min rawn phone a, “Lo ngaihven deuh te u, a tlei lo lutuk, a tap deuh pur reng mai,” a rawn ti. A lo haw chu kan lo zawt a, tlan chak a lang ta lo, lawmman lak a lang pha lo; an sports chu sawi hrehawm a ti ve hlein a lang. “Naktukah chak deuhin ka tlan tawh dawn,” te a ti. Engnge thleng zawh lahin a sawi thiam vak bawk si lo. Lawmman a rawn hawn lo tih chu kan hria. Thil chiang tak chu a tum angin thil a thleng lova, nuam a ti lo, ama hriat thiam chinah pawh a beidawng deuh a ni.
Hetah chiah hian Pathianin a mite a hmangaihna ang chi ka nunah a rawn lang ta. Ka fapa-in beiseina pha lova, a tum ang lo taka thiltih ropui a tumna zawng zawng kha a hlawhchham tih kan hria, mahse kei a pa khan ka ngaihnep phah reng reng lo; ka huat phah miah lova; chuti ahneh chuan a hreawmna kha ka tuarpui a, pawi ka ti a, ka khawngaih a, hreawm a tih ka hlauh luatah a uten ‘lawmman’ lam rik leh an tum pawhin ka khap a, “Lawmman lak a tul reng reng lo; naktukah sports-ah i tel leh ang a, lawmman i lak loh pawhin a pawi lo, lawmman I duh chuan keinin kan pe mai dawn che alawm,” ka ti. Thiante hnenah pawh, “Lawmman a lak theih loh pawhin a pawi lo, a pa a chhun a ni ve mai a. Kei pawhin ka naupan laiin ka la ngai hleinem,” ka ti. Chu chiah chu Pathian hmangaihnain min enna thinlung chu a ni. Kan tih that leh felah, kan tih ropui leh ropui loh hi min tehna a ni lova, a fa kan nih hi a tana kan hlut chhan chu a ni. Ka fapa kha an pawlah tlan chak ber se ka hmangaih sawt lova, lawmman a lak loh kha ka khawngaihna a kiam phah lova (ka khawngaih zawk hial a ni), chung aia nasa chu kan Pathian Khawngaihna chu a ni.
Hmangaih vanga na Khawngaihtu chu
Mi tam takin, “Fapa Tlan Bo” tehkhin thu hi a thupui an vuah sual, an ti thin. “Pa Hmangaihna Mak,” tih tur zawk niin an hria. He tehkhin thu hian a tihlan tum chu fapa tlan bo ta chanchin aiin a pa hmangaihna ropui tak, Pharisaite hriat thiam loh, fapa u zawkin a hriat thiam loh kha a ni zawkin a lang. A hma chiaha “Duli bo,” leh “Beram bo,” tehkhin thute nena tangrual, Pathian hmangaihna mak zia tehkhinna an ni.
Pa hmangaihna chuan a fapa naupang zawkin a duhzawng a dil khan a duh ang taka a awm theih nan a phal mai a. A ro chan ai zawng zawng kha advance-in a pe hmak mai a ni. Pa hmangaihna chuan a fapa chunga a mawhphurhna chu a ro chan ai pekah khan a tawp taah a ngai reng reng lo. Nitinin a khawsak dan tur te a thlir a, thil tha lo leh duhawm lo-ah a inti bawrbang thei a, khawvel thianten a chan a chhiat hnuah eng atan mah an ti dawn lo tih hriain a lo kir leh hun tur a lo nghak a a ni. A lo kir leh meuh chuan a fapa dinhmun chu a chhe hle mai. Chhuan tur a awm miah lova, fapa pawhin engmah han chhuan a, han chapopui tur a hre ngang lo a ni. “I fapaa vuah tlak ka ni ta lo, i chhiahhlawhte zinga mite ber angah mi siam ve rawh,” chu chu demand ni lovin, khawngaih dilna a ni. “I hnena ropui, i hnena hlim, i hnena hausak, i hnena malsawmna dawn, i hnena ka chanvo dik tak chan leh, i hnena awma duh zawng zawng buaipui, i huang chhung atang him taka mahni duh dana nun zui,” tih a chhut pha reng reng lo. Chu chu khawngaihna dawngtu zia a ni teuh si lo. “I rawngbawl turin; ek paih i tih chuan ek paih; thawhrim i tih chuan thawhrim, hna rum i tih chuan hna rum, hah i tih chuan hah, ei chhiat i tih chuan ei chhiat…,” tiin a pa hnen a rawn pan a nih kha. A pa chuan a kawr tenawm tak leh a nun tenawm tak kha a lo buaipui miah lo. A sum theh thang zah leh nawhchizuar engzah nge a dawr, mi engzahnge a bum a, engtiangin nge a va ruih thin, engmah a zawt lo. A lo fawp ngawih ngawih mai a ni. Pa-in a fapa, a hnen atanga tlanbo thei khawpa puitling tawh chu a ir chuktuahin a fawp ngawih ngawih mai a ni. A hlawhchhamna avangin a diriam lova, sualin a tihnat leh hrehawmna avangin a tuar zawk. Chu chu a ni Pathian hmangaihna chu. A hmangaihna dawngtu nihna leh dinhmunin hmangaihtu hmangaihna a dal lo.
Ziaktu lar tak Philip Yancey-an hetiang deuh Pastor pakhat leh a fanu fawr chhuak zak zak chanchin a sawi a.[1] A fanu kum 15 mi chu a awm tha duh lo ve hle. Zan tam tak a rawn haw duh tawh lova, a khawsa bawraw hle tih an hria. Hremna leh thununna chi hrang hrang an hman pawhin awmzia a nei thei lo. An fanu chuan dawt a hrilh a, a bum a, a sual chhan pawh, “Nangni in pawng strict lutuk vang a nih hi!” tiin a puh let hlauh.
A pa Pastor chuan ti hian a sawi, “Ka fanu a lo haw beisei a tukverh atanga ka thlir chhuah vawng vawng lai ka hre reng. Ka thin hi a ur tak zet a. Fapa tlan bo-a pa ang kha nih ka duh a, mahse ka fanu-in min tihretheih zia leh kan rilru tina tura a khawsak dan zawng zawng ka ngaihtuah chuan a satin ka sa a ni. Midang zawng aiin amah leh amah a intichhe nasa ber tih chu ka hria. Thuthlung Hluia zawlneiten Pathian thinurna an puan thin awmzia kha ka man thiam ta a. Mipuite khan Pathian thinlung khei dan an hria a, Pathian rilru na chu a zawlneite kaah a au chhuak thin a nih kha.
“Mahse hei hi ka hrilh ang che. Zinga ka fanu a rawn haw ka han hmuh meuh chuan; Khawvela ka thil duh ber chu ka fanu chu pawm vawng vawng a, ka hmangaih zia te, ka khawngaih zia te, a tana thil tha ka duhsak zia te hrilh a ni. A pa hian tih theih ka nei lo, hmangaihna vangin ka na vawng vawng a ni, tih mai lo chu.” Khawngaihtu Pa Pathian chu min Hmangaihna vanga na ngawih ngawih a ni e. Kan sual a, kan bawhchhia a, kan tenawm a, chhuan tur kan nei lo. Kan Pathian hian min kuah a chak ngawih ngawih a, min hmangaih zia min hrilh a chak a, min ngaihdam a chak em em a ni.
Pathian min hmangaihna tipung turin engmah tih theih kan nei lova;
Pathian min hmangaihna tinep turin engmah tih theih kan nei bawk lo.
Pathian Khawngaihna chung changa pawm thiam har ber pakhat chu kan mihring thiltih hian a hmangaihna a tipungin a tinep thei lo, tih hi a ni. Hriat thiam hark a ti a, in tih ve tho ka ring. Khawvel rilru kalphung chu kan tih that leh chhiata inteh a ni a, chu awmdan dungzuia inlawm leh inhuat a ni. Pathian khawngaihna erawh chu a hrang daih mai. Min hmangaih chhan hi keimahni lam a ni hauh lo, amah lam zawk a ni. Kan thianghlim leh thianghlim loh, thahnemngaih leh ngaih loh hi min hmangaih chhan a ni lo. Min hmangaih chhan chu Amahah khan a awm zawk daih a ni.
Pathian chatuan mi, danglam ngai lo a nih avangin a hmangaihna chu pung leh chuang tur a awm chuang lova, a nih tur ang ang chu a ni zo vek tawh a ni. Thil tih thata a hmangaihna hi dawn nasat lehzual tur a awm tawh chuang lo. Pastor, Upa, Tirhkoh, SS zirtirtu, Kohhran Hmeichhe hruaitu, KTP hruaitu, rawngbawlna kawnga thahnemngai, … eng pawh ni la, Pathianin a hmangaihna che hi hetiang ho hian a tipungin a titam miah lo a nia. Pathian hmangaihna neih belha, hlawh chhuah tumin thawk reng reng suh. A hmangaihna i chunga lang kha i chhang let zo chuang lovang. Pathian hmangaihna tihpun hi kan hna a ni lova, chhan let hi kan tih tur a ni mai zawk a ni.
Zu i lem ral tawh zah i chhiar seng lova, i nun i tihbawrhban nasat tawh zia ngaihtuah pawh i ngaihtuah ngam lova, i chhungte i ei tlaran vek tawha, i uire tawh a, thenawm khawvengte i hmusitin an chungah pawh tha lo tak takin i ti tawh thin. Pathianin a hmangaihna che a kiam chuang hauh lo mai. Chu hmangaihna tuifinriat atang chuan pava khat pawh suah chhuah a la ni lo. A liam zawih zawih reng a ni. I thiltihin Pathian hmangaihna a ti kiam thei lo a ni. Nangmaha awm lam kha chu a chiang lo sa. Pathian lam awm zawk erawh chu a chianga a che lo bawk.
Bible han thlir teh. Jakoba, a hming awmzia pawh ‘bumtua’ Pathianin a hmangaih dan hi, a pian hma rengin ‘Jakoba ka hmangaiha Esauva chu ka hua,’ tih a nih kha. Pathian a buan hnuah a thlahte chu ‘Israel’ (Pathian Lal Fa) tih an an ni zui. Mi nu uiretu, tualthattu Pathianin lal ropui takah a siam a, ‘ka rilru ang pu mi,’ a ti lehnghal. Kohhran lo ding tir chu Lal Isua anchhia lawh a, ‘Chumi chu ka hre ngai lo,’ titu Petera a enkawl tir a nih kha. Kristiante sawisa a, Kohhran vuak mih tumtu Paula chu a missionary ropui berah a chantir a. Pathian chu Petera tawngkamin, “Khawngaihna zawng zawng Pathian,” a ni e. Khawngaihna awmzia chu- Pathian min hmangaihna tipung turin engmah tih theih kan nei lova, tinep turin engmah tih theih kan nei bawk lo. Misual ber, tenawm ber, hrem phu ngawih ngawih ni mah ila, Pathian chhungkuaa Chhandamna ruai ropui kil ve tura sawm ka nih hi Khawngaihna Mak chu a ni.
Khawngaihna chuan kan nih angin min dawr lo
Kohhran mi tam takin Pathian khawngaihna awmzia kan man thelh a nih a hlauhawm ngawt mai. Pathian khawngaihna chung changah keimahni lama lang chhuak Simna leh Rinna (Chhandamnaah chuan pawisa hmai hnih anga paih bik awm thei lo v eve) kan sawi thin avang hian, heng Simna leh Rinna-te hian kan thleng emaw, kan hlawh chhuak emaw ti deuh mai kan awm. Kan ti chiah lo a nih pawhin heti zawnga ngaihtuahna hian min hneh tlangpui a ni. Sim ringawt mah ila, ring ringawt mah ila, Pathian khawngaihna tel lo chuan engmah a ni chuang lo. Chu chauh a ni hleinem, Pathian khawngaihna tel lo chuan misual hian a simin a ring thei lo bawk. Simna leh Rinna hi khawngaihna tellovin awm thei pawh ni ta se, chhandam turin engmah a thawk chhuak zo lo a. Kan sima kan ring hi Pathian khawngaihna vanga Thlarau Thianghlim hnathawh kan chunga thleng a ni zawk a ni, chu chu chhandamteah chuan hmuhin a awm zel thin. Misual nuna Simna, Rinna lo lang chhuak zawng zawng hi Pathian Khawngaihna hnathawh, phu lo misualte hnena pek, Khawngaihna Mak dawngtute nuna lo lang chhuak a ni. Sim tura koh i nih a, Ring tura sawm i nih hian Pathianin , “Chung thilte chuan i rawn thleng dawn nia. Nangmah lamah Simna leh Rinna rawn keng la, keiin Khawngaihnain ka lo chhandam ang che,” a ti lo a ni.
Ka’n peng zawk teh ang. Rinna hi Pathian Khawngaihna thilpek, amah atanga chhuak a nihzia sawi uar tumna lamah thenkhatin, “Keimahni rinna ni lovin, Isua-a awm rinna zawk, min pek a ni. Keimahni chuan kan ring thei lo,” an ti mai. An duhthawh luatah an Bible hrilhfiah dan pangngai an kal pel hrat a ni. KJV Bible-a, “by the faith which is in Christ Jesus,” tih kha an la vawnga, “rinna, Isua Kristaa awm,” tih a nia lawm, an ti thin. Hei hi chu Saptawng kalhmang belhchian loh vang leh mi sawi tum lam ngaihtuah lova mahni remchan zawnga her phet tumna thil niin a lang. A sawi tum chu – Chhandamna chang tura rinna chu keimahni rinna, he khawvel sum leh ropuina, nawmchenna leh thiltihtheihna-a kan daha kan nghah ni lovin, Isua Krista zawka kan va daha kan va nghahna chiah kha a ni. Isua Krista kan rinna kha. Chu rinna chu Pathian atanga chhuak, Pathian pek, Pathian Khawngaihna thilthlawnpek, ringtu zawng zawngin kan chan, min pek chhan kan hriat miah loh, kan that vang leh phu vang ni miah lo, a khawngaihna thiltih, a process kal zel chu a ni zawk. Tumahin Simna leh Rinnain Pathian khawngaihna hi an thleng lo.
Tin, a lehlamah thung chuan, Khawngaihna hi dah san em avanga mihring nun pangngai hmuh kan an awm bawk. “Thiltih vanga chhandam kan ni lo, kan tih ve hi Pathianin a pawm lo, Chhandam nan thiltih ring duh ting suh,” an ti. An uar luatah an kal thui ve hrat bawk a ang. Mihring thiltih sawi bo hi ‘thlarau’ riau-ah an ngai a. Pathian khawngaihna chuan kan nun hi eng vaka ngai ta lo hialin an hria. Chhandamna chungchanga nun ulukna leh pawimawhna sawi thinte chu thiltih chhuang ang hialin an hre thin. Heng mite hi chuan pianthar hma leh hnu taksa nun kha danglam tehchiam lo mah se rinnaa Isua Krista pawmtu chu chhandam ni tho turin an zirtir. Thiltih avanga Chhandam a nih loh avangin mihring chak lo chu sualin nung reng mah se Isua a rin phawt chuan Chhandam a ni tho vang, tia ngailui an awm hial. A pawi hle a ni. Chu chu Bible-in Pathian Khawngaihna a sawi dan a ni miah lo mai. Thuthlung Tharin Khawngaihna a sawi dan chu- I thatna leh felna, nangma lama awm thiltih reng reng kha Chhandamna hlawh chhuak turin a tling lo. Chuvangin Pathian hmangaihna chuan A Fapa thisenin I Chhandamna chu a rawn lei a, chu tlanna avang chuan Sual bawih ata vawiinah leh chatuan thlengin chhuak thei ta a ni, tih hi a ni. I nunah sualnain ro a rel chung pawhin a Khawngaihna avangin Chhandam i ni tho vang, tih hi Pathian Khawngaihna thu a ni lo. Khawngaihna chuan kan nihna angin min dawr lova, kan nihna pangngaiah min dah lo bawk. Khawngaihna chu kan taksa nun en kan a, min chhandam ta tho tho a ni lo tih i hria ang u. Khawngaihna chuan nun thar min pein, mahni inphata nitin Kraws puin Krista min zui theih tir zawk a ni.
Chu khawngaihna chuan i nun hmalam zawng record kha a en lova, i hmalam record erawh chu a ngaih pawimawh em avangin i sual a silfai sak vek che a, a ngaidam che a, tanpuitu, zirtirtu, thlamuantu Thlarau Thianghlim pein a chhinchhiah che a, Krista taksa Kohhran ho zingah a awm tir che a nih hi. Chu chu Pathian Khawngaihna chu a ni. I nun hluia nung reng chunga Chhandam nih tho dan i zawng a nih chuan Kohhranah i hmu lovang a, Bible-ah i hmu lovang a, kum sanghnih chhunga Kristianten ‘zirtirna him’ an lo tih tawh zawng zawngah i hmu lovang. Zirtirna penhleh deuh, mahni tui zawng zawnga Pathian Thu chaina hmunah chuan i hmu mai thei. Amaherawhchu, “He ka sual rit tak phurh hi engtinnge ngaihdamin a awm ang? He sual kawl ata hi engtinnge ka chhuah theih ang? Pathianin min la ngaidam duh ang em?” i tih chuan, “E le, Unau duhtak, Lal Isua hnenah lo kal rawh. Anin a lo ngaidam nasa dawn che a, ngaidam mai ni lovin a fa atan a la ang che a, thlarau lam malsawmna tinrengin a vur dawn che,” tiin a Khawngaihna thu chu kan hril mek a nih hi.
Khawngaihna chuan kan nih angin min kalsan lo
Khawngaihna chu ‘phu loh/ thawh chhuah loh malsawmna’, tling lo misualte chunga Pathian duhsakna lo thleng a ni. Misual chuan a thawh chhuah reng reng loh, a neih phak reng reng loh chu a lo dawng tawp mai a ni. Hetah hi chuan simna leh rinnaa thleng a awm tawh lova, suala nun zui zel theih a nih leh nih loh a buaipui tawh lo. A nun hlui leh kha Khawngaihna a dawn kha a inthlauvin a inpersan lutuk a, a dawngtu chuan a luh chilh mai thin. Fapa tlanbo khan chu khawngaihna chu a dawng chiang khawp mai. A pa hnena a let lehna khan chu khawngaihna chu a thlenga, a lei a ni lova; nuam tawl zel chungin a pa fapa a ni thei tho pawh a ni lova (a nuam tawl zawng zawng ai khan a Pa-in a vur malsawmna zawng zawng kha a duhawmin, a ropui zawk fe tawh si). Kha fapa sual, mahni pa leh unau tlanbo santu, ama inhriat danah pawh chhiahhlawh pakhat dinhmun pawh sang tak ni tawh khan KHAWNGAIHNA avangin fapa nihna, kawr mawi ber ber, zung bun, ruai ropui thehsak a dawng ta a nih kha. Ringtuten thlarau lam malsawmna tinreng kan chan – fa nihna te, ngaihdamna te, thiamchanna te, thianghlimna te, ropuina te, etc., zawng zawng hi Pathian khawngaihna chu a ni. A fa nih tawh hnu-a kan sualnate en kan zelna a ni lo va; a pa in atanga tlan chhuah leh pawhin a fa nihna la chen zel theology a ang lo a ni.
Pa leh a fapa indawrnaah khan fapa tlanbo sualna zawng zawng kha buaipui a ni lo. Pa-in a hriat reng sak lo va, kha mi a innghat khan a dawr lo; keini pawh kan sualna zawng zawng kha min en sak tawh lova, A fapa inthawina avangin a fa atan min pawm mai zawk a ni e. Chu chauh pawh a ni la ni lo. Kan nih angin min pawm a, kan nihna anga awm reng tur chuan khawngaihna min pe hauh lo mai. Kan nihna hlui kan kalsan theih chhan chu kan pianthar hma ang lovin Awmpuitu kan neih tak vang a ni. Zakhamna Thlarau Thianghlim, tinungtu leh zirtirtu chu min pe a. Piangthar zawng zawngah chu chu a awm ang. Chuvang chuan vawiina Kristian nuna kan thiltih hi kan chhuang lo, a chhan chu khawngaihna vang chauha chhandam kan nih kan hria a, keimahnia Thlarau Thianghlim hnathawh chhunzawm zel avang chauha Kristian nun nei thei kan ni. Hei vang hian alawm, kan nunah leh, ringtu zawng zawng nunah, kan rinna chu thiltihin a rah chhuak ngei ang tih kan hria. Khawngaihna dawng, piangthar leh piangthar lo, midangah leh mahnia inhriat awlsamna ber chu Thlarau Thianghlim ni lo thildang – zu, drugs, hurna, sum, chapona, etc,. hian kan nun a thunun em? tih hi a ni. Thil dang min control tlattu a awm a nih chuan, mi hriatah kan hmai mam viau mah se, Chhandamna kawngah chuan ngaihthatna chhan tur a vang hle ang.
Khawngaihna chang tura kohna chu
Pathian khawngaihna thu hi tehkhin thu pakhat hian a sawifiah vek zo lova, Fapa tlan bo tehkhin thuah hian Pathian hmangaihna leh misual chung chang kan hmu. A fapa sualna kha buru khawp mai. “Ka pa, ka rochan ai mi pe rawh,” tih kha an culture-ah chuan, “Ka pa, thi tawh la ka va ti ve. Thi tawh rawh,” tihna tluk a ni e, an ti. A pa rorelna leh thatna zawng zawng lakah khan a hel a ni. Tichuan ama tana nungin, amah chauh inngaihtuahin nawmsip a bawl ta a ni. A chhungte a ngaihtuah pha reng reng lo. A neih zawng zawng a chen da thak. Chutiang mi pawh chu Pathian hmangaihna chuan a lo tuam hlawm a, a fa atan a iai reng reng lova, thi-a tho leh angin, a tlan bo hmaa a enkawlna aia thain a lo enkawl a, malsawmna thar tam tak a vur ta zawk a nih kha. A nih ang anga lo pawmtu Khawngaihna leh Malsawmtu hmangaihna chu hetah hian kan hmu a. Duli bo leh Beram bo tehkhin thuah hian Pathian misualte zawng chhuaktu- Zawngtu Khawngaihna chu kan hmu bawk a ni. Misual chhandamna hi a bul atanga a tawp chu Khawngaihna Mak, Mawi leh Duhawm hi a ni reng dawn a ni.
Chu khawngaihna dawngtu chuan, “Sual hi a nuam a, chen ka duh bawk a, mahse vanram kai ka duh bawk si. Ka sualna zawng zawng nen hian Vanram ka kai thei dawn em? Khawngaihna avangin a theih a ni maw? Ka rin phawt chuan suala nung reng chung hian Chhandam ka ni thei dawn maw? A va tha ve. Chu chu ni maw Khawngaihna chu? Han tum thin mah ila kan tha tak tak ngai lo reng a ni,” a ti ngai lo. A ni lo bawk. Chutiang chu a loh berah Setana khawngaihna a ni ang. Pathian Khawngaihna Tak dawngtu erawh chuan, “Ka sual hi Pathian hmaah a va tenawmin ngaihdam tlak pawh ka va ni lo em! Ka sualna lam en miah lovin Krista zarah ngaihdam ka ni a, thiam chantir ka lo ni ta maw? Chutiang chuan Pathianin misual chungah ro a rel a ni maw? A va mak ve. Malsawmna tinrenga min vurin a roluahtu atan min siam a duh maw? Thlarau Thianghlimin min chhinchhiah maw? Sual hnehna nun min pe maw? Kohhran ho zingah min dah maw? Chu khawngaihna mak chu a ni maw van thlen thlenga min hruaitu tur,” tiin hla a sa tawh zawk a ni.
Unau duh tak, chu khawngaihna chu i la chang lo a nih chuan a pawi dawn mang e. Mihringte tan chuan lei leh vana thil duhawm ber chu he Khawngaihna hi a ni. Krista hnawla, sual kawng hi i la thlang zel a nih chuan Khawngaihna chu i la chang lo tihna a ni. Khawngaihna aia duh zawk, ngaihhlut zawk ila neih zel chuan Pathian Khawngaihna chu i mamawh ve lo tihna a ni a, mamawh lo na na na chu an pe dawn si lo. A mamawh lo ten Pathian Khawngaihna hi an chang ngai lovang. A mamawhte chuan an kalsan phal tawh ngai lo thung.
Mi zawng zawng deuh thawin Pathian Khawngaihna hi ‘tawp chin awm lo’ angin kan ngai a. Sawifiah hleih theih loh, mihringin a tawp chin hriat zawh loh angah kan ngai tlat. Heti a nih avang hian hremhmun tla leh vanram kai tur chungchangah pawh kan zau viau thei thin. Khawngaihna hun hi inhawng reng turah te pawh kan ngai deuh roh a ni awm e. Mahse, Pathian Khawngaihna hi ‘tawp chin nei lo’ a ni tih hi Bible-ah hmuh tur zuk awm hauh lova. Sawtpui lova hmuh theih a ni. Pathian khawngaihna hian tawp chin a nei a. Khawngaihna hun a hawn chhung hian i hun tha hi bawh chhe lo hram ang che.
*******
RE210911
Comments
Post a Comment