Ngaihdamna Namai Lo, Thiamchanna Man Tlem Lo

            Ephesi 1:7 “…a thisen avangin amahah chuan kan tlanna kan nei a ni – 

a khawngaihna ngahzia ang zela kan bawhchhiatnate ngaihdamna chu.”

­­­­Pathian hmangaihna, a khawngaihna leh dawhtheihna, Pa a nihna zia hi man sual lo tura fimkhur a ngai hle a ni. Pathian chu ngilneihna leh zaidamnaa khat a nih avangin kan sualte hi a ngaizam ang a, min enliam mai tura beisei a awl thin. Ringtu puitling thawkhat tak takte pawh hian hetianga rilru put hi a awl khawp mai. Chatuan nun khawih pawi pha lo sual leh thihna khawp sual thliar a, ngaihthat mai hi chin fo a ni. Sual a huat riau chin leh mena a thlak ve mai sual pawi lutuk lo a awma hriat a awl thin. Hetiang ngaihdan hi Bible-a hmuh tur awm lo, keimahnin ni se kan tih em avanga kan phuah chawp ni maiin a lang. Kan ramah hian kan nunin a tlin loh em avanga Pathian Thu kalhmang thiam deuha  phuahchawp kual vel ta mai mai pawh kan tamin ka hria.

Pathianin sual a ngaihdam theihna hmun awm chhun chu Kraws rapthlak tak hi a ni. A thatna emaw, a hmangaihna emaw, a ngilneihna emaw a ngaihdamna emaw hi Kraws kal tlang lova kan zawng dawn a nih chuan kan tisual ang. Kan sual ngaidam a, a hnena min pawm let theih dan awmchhun chu Kraws tihbaiawm chauh a ni. Kawng dang a awm lo! Kan tana sawi nuam leh pawm nuam tak ngaihdamna hi, tuihal leh dangchar a, na rapthlak ber tuar a, mangang leh hreawma Kristan Krawsa a tuar vang a ni tih i theihnghilh lovang u. Chhandamna hi rinna mawl te avanga lo awm ta maia ngai a, Thlarau Thianghlim hnathawha, sual ngaihdamna hi chang ta maiah a inngaih theih awm e. Ni vek si, kim si lo; dik lo tih hleih theih loh, dik tluan tling si lo a ni. Ringtu sual a ngaihdamna tura Pathianin a man a pek hi a tam a, a to a, chatuana kan chhut zawh loh tur a ni.

I sual ngaihdamna kha Pathian khawngaihna thilmak a ni. Pathianin a man a pek chu Kraws a ni. A dang i la beisei a nih chuan inngaihtuah nawn leh rawh. Pathian tana inpekna thar nei zel tur pawh hian Thlarau khawih tharna kan ngai, kan ti. “Chu chu…kha kha,” kan ti. A changin kan vui…a changin kan sawi chhia…a changin kan rel. A changin kan that chhia…a changin kan ngaihsak peih lo…a changin kan do hial. Kraws kan hmu chiang lo a ni. Nangmah vanga Kristan Krawsa a tuarna hmaah hian chhuanlam engmah tha tawk i siam thei lovang.

Pathian hmangaihna, khawngaihna, ngilneihna, thatna, dawhtheihna, etc., zawng zawng kha Kraws tel lovin a awm lo. Pathian rilru puthmangin a chhandam lo che a, Pathian Fapa  Kraws a tuar vang khan a ni. Hmangaihna, khawngaihna, ngilneihna, thatna, dawhtheihna zawng zawng hian Kraws a rawn thlun zawm vek a, Kraws kaltlangin kan lo chang ta mai chauh a ni e. Central sorkar thatna NREGS-a lo luang chhuak hi kan VC kaltlang lo chuan kan dawn loh ang hian Kraws kaltlang lo chuan Pathian ngaihdamna hi kan chang lo a ni.

Chuvangin sual pawi tham lo anga i ngaih, Pathian pawhin a palzam mai mai dawna i hriat zawng zawng,  i ngaimawh tham lohte kha Pathianin a ngaihdam dawn chuan Kraws a kaltlang a ngai tlat zel. A te ber pawh kha Kraws kaltlang lo chuan ngaihdam theih a ni lo. A serious hle mai. Kraws kaltlang lovin engmah pek i ni si lo. Pathian Fapa meuh a thih a tul a ni. Chuvang chuan alawm Kristian, i Lalpan i tana a tuarna hi theihnghilh ngai suh aw. Kraws bulah chuan chhuan tur i nei lo ve. Pathian Fapa sualna nei lovin kan sual avanga a taksa thler, a thisen far leh a rilru hliam a, a thlarau a chauhna hmun Kraws bulah hian kan neih leh kan theih chhuan tur zawn hmuh a har khawp mai.