CHANCHIN THA NIHNA TAK

SAKAWLH LEH A CHHINCHHIAHNA

- RE Ralte

            Zirtirna thli chi hrang hrang intleh chhawk fua fua reng mai tur hre lawk a, Hebrai ziaktuin, “Zirtirna tinreng leh zirtirna mak tak len bovin awm suh u…,” (13:9) tia min fuihna pawh fimkhur phah nana hmang lovin, a sawi thiam leh kan thin thawng zawnga sawi theite hian min tibuai fo thin. Zirtirtu thar lo chhuakte hian Pathian Thu leh thil dang kan hriat tawk lohnate remchanga lain,   mihringa awm ve tlat ‘hlauhna’ an chhawr tangkai a, thlarau lama ‘hriatna’ bik neia inchhalin min hneh an tum thin a ni. Mi tam takah an hlawhtling a, hruai bovin an awm mek a. Tam tak chu tul lo taka tihbuaiin an awm mek bawk a ni. Ringtu huaisen nih hi a pawimawh tak zet ta. Huai tur chuan kan huaina chhan hriat a tul bawk ang. Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk a ni (II Tim. 1:7). Thil ho te-a kan buai leh thin chhan chu – Pathian Thu chhut chiangin kan zir peih lo va, mi sawia kan innghah lutuk thin vang hi niin a lang.

            Sakawlh chung changah pawh zirtirna dangdai tak tak, Bible chang thenkhat tlawh chhan chung siin theh darh a ni mek a. Ringtuten ngaihtuahna fim tak nena kan dawnsawn a tul tak zet mai.  Pathian min pek kan rilru leh ngaihtuahnate a huna hmang taima si lovin mi thenkhatin thil an rawn sawi a, tam tak chuan a ni ber emaw kan lo ti leh mai thin hi a pawi hle a ni. Pathian Thu hi bih chianga, hma kan sawn zel hi kan Pathian min duh dan a ni tih hre hmasa phawt ila.

Sakawlh Nambar leh Chhiarpui (Census)

            Tunlaia Sakawlh lo lar chhan ber chu kum 10 dana India sorkarin a neih thin chhiarpui vang hi a ni a. Khawvel danglam zelah sorkar chuan a ram mite hriat chian a duh telh telh a. Chhiarpui pawh tunhma aia changtlung leh chipchiara neih a ni ta. Unique Identification Number (UID) tih a lo chhuah chhan pawh hei hi a ni. Infosys Company Co-chairman Nandan Nilekani chuan lehkhabu pawimawh tak The Idea of India tih a ziak a. Thil tam tak a ziah zingah India ramah ramdang mi lo lut nasa lutuk leh, ram hmelma Terrorist-te pawh awlsam taka an khawsak ve mai theih thin avangin ram mi (citizen) inhriat zung zung theihnan UID nei theuh ila, chu chu thil tam takah a tangkai tur zia a sawi a. Chu chu sorkarin tha a tih em avangin a ‘idea’ neitu ngei chuan bawhzui rawh se, a ti a. Nandan Nilekani chu Cabinet rank hial pein he hna hi a thawh tir ta a ni. Ram chhung mi leh sa te tana thil tha tak tih tum an niin a lang a, sakhaw lam thil a kaihhnawih bawk lo a ni. India ram hi ram zalen a nih avangin a ram hmelmate hial pawh zalen taka an khawsa thei tlat hi India sorkar hian a vei hle tih hre phawt ila a tha awm e.

            Chhiarpui leh Sakawlh hi a inzawm leh zawm loh hi tuman an hre lo tih hi thil chiang hmasa ber a ni. He chhiarpui leh Sakawlh chhinchhiahna chung chang thu theihdarhtute zinga mi 3 chu he lehkha ziaktu hian phone-in a be thei hlauh mai a. Tumahin a inzawmna chiah an hre bik lo a ni. Mi thenkhat phei chu sum hmuh nana hetiang lehkha hi ziak ta vel mai mai an ang hle. Kan hriat chian loh hlauhna avanga thil tha lang chiang sa reng hnawl tum tlat hi ringtute tih tur ni awm lo tak a ni.

            Hemi chung changah hian hriat chian erawh chu kan nei.

(i) Chhiarpui hi Pathianin a khap lem lo tih hi a ni. Numbers bu kan chhiar chuan Israel fate inchhiarna bu a ni tih kan hre thei mai ang. Tin, kan Lalpa Isua Krista ngei pawh kha Kaisara Augustan khawvel zawng zawng hming ziak tura a tih laia Bethlehem khuaa hming ziak tura kal an nih kha hre reng ila. Thuthlung Thar Bu hi ‘chhiarpui’ tih velah a buai lem lo a ni e.

(ii) Ringtute tih tur chu rinawm taka sorkar thu zawm hi a ni tih kan hriat chian a ^ul. Rom 13:1,2-ah, “Mi tin an chunga roreltute thu thuin awm rawh se. Pathian thu lovin tumah roreltu an awm si lo; roreltua awmte hi Pathian ruat an ni. Chuvangin tupawh roreltu hnial chu Pathian ruat dodal an ni a; a dodaltute chuan anmahni chungah rorelna an hmu ang,” tih kan hmu. Sorkar chuan a ram mipuite thatna tur nia a hriat angin thil a ti zel dawn tih pawm ila. Hmanlaia dictatorship (mi pakhat rorelna)-ah pawh Paulan hetianga a sawi chuan tunlai Democracy-ah phei chuan hei hi a chiang leh zual. Mipuite hi sorkar kan ni si a. Sorkar ding laiin kan Pathian duh dan kalh zawnga ro a rel a nih chuan ringtute chu do ngam tur leh awih lo ngam tur pawh kan ni. A tawpkhawka kan chunga thuneitu ber chu Pathian a ni si a. Amaherawhchu, direct taka Pathian Thu kalh ni lem lo thilah chuan kan chunga roreltu Pathian ruatte thu hi kan awih zel hi Pathian duh dan a ni.

            Kan hriat lem loh thilah kan buai lohva, thil awm dan kan hriat fiah theih china hma kan lak chuan UID te, Census te, microchip te leh barcode te hi kan hlau lem awm lo ve.

Sakawlh Nambar 666 leh Barcode

            Sakawlh nambar chhuttu thenkhat chuan UPC Barcode-ah hian 666 an hmu tlat mai. Hei pawh hi intihthaihna thil chiang lo ni leh bawkin a lang. Barcode chi hrang hrang a awm a. Number 666 nena an sawizawm Barcode hi UPC Barcode (Universal Product Code) an ti bik. UPC Barcode-ah hian a laiah leh a sir pahnihah rin pahnih kal thiang a awm a, chutah chuan 666  inphumah an ngai. A hnuaia milem hi en la.

            Rin pahnih kal thiang sei bik deuh te hi 6 angin an sawi ta a. Han en chiang la, 000146-a nambar 6 chungah khian rin thiang pahnih a awm bawk avangin rin thiang sei deuh hlek te hi 6-ah an ngai a, UPC barcode tinah rin thiang sei deuh pathum a tel zel avangin 666 inphum-ah an ngai ta a ni. Hei chi Barcode kalhmang hriat thiam chuan a ho hle. Tin, rin pahnih kal thiang sei bik deuh te hi number code ni lovin ‘guard bar’ an ti a, a laia mi hi ‘middle bar’ an ti bawk; an pahnih hian scanner-in a chhiar theihnana lo tanpuitu mai an ni.

            Kan hriat thiam theihnan heti zawng hian han sawi ila. Barcode hian number 0 atanga 9 hi ama code bikin a chhinchhiah vek a. Computer Scanner chuan chu chu a lo hmu thiam ta thin a ni. Chu code-ah chuan number pakhat hian pindan (rin)  7 a nei theuh a. A dum leh a varin han entir ila (Barcode-ah hian a var pawhin awmzia a nei vek).

            Hetiang a nih avang hian nambar 6 leh guard bar leh middle bar danglamna chu a hnuaia figure hian a tilang chiang hle.

            Milema a lan dan ang hian B hi Barcode-a rin thiang pahnih, a sir ve vea mi kha a ni a, M hi a laia rin thiang pahnih hi a ni thung a, 6 code nena an danglam zia chu a lang tawh mai awm e. Tin, rin dum hi 1 lo ni ta zel sela, rin var hi 0 lo ni ta se, Computer scanner-in guard bar a chhiar dan chu 101 a ni a, middle bar chu 01010, nambar 6 chu 1010000 a ni. A sira rin thiang pahnih leh a laia rin thiang leh nambar 6 hi a inanna a awm thei ngang lo a ni.

            Chuvangin, Computer-in a lo hmuh danah chuan nambar 6 leh guard bar te hi chu a inang lo hle a ni. Tin, Barcode hi tun thlengin mihringa bel ni lo va, thawmhnaw-a bel a nih rih avangin Sakawlh nambar nen chuan sawizawm a la har lehzual a ni. Kum 1971-a UPC Barcode siam chhuaktu George J. Laurer chuan, “Nambar 6 code leh guard bar te hi rin thiang inan deuhna lai nei ni mah se engmah hlauhthawn tur a awm lova, Sakawlh chhinchhiahna Thupuan 13:18-a mi nen inzawmna an nei lo; engemaw tia lo awm palh mai a ni,” tiin barcode leh 666 chung chang an zawhna a chhang.

Sakawlh Nambar leh Microchips

            Microchips te, verichips te, RFID te leh Sakawlh chhinchhiahna hi sawi zawm a ni bawk a. Thil chang kang leh hriat thiam harsa a nih avangin hlauh mai pawh a awl hle a ni. Thil thar lo chhuak hi ringtuten kan hlauh zela, kan hmuh Setana zel dawn chuan buaina tur a tam hle ang. A hlui hlui a tha chuang lova, a thar thar bawh huam huam pawh a tul ber chuang lo tih hria ila. Kan nih dan leh tih dan pangngai hi a ropui ber chuang lo a, hmasawnna hi Pathianin a do lem lo a ni.

            Tunlai khawvelah chuan sum tam tak taka indawrnaah miten pawisa note (cash)-in an inpe kher  tawh lova, an bank account-ah an in-transfer sak tawh mai a ni. Tin, Credit Card te ram changkang zawkah an hmang lar a, keinin ATM card kan hre ve tan bawk. Hetiang tho hi a ni a. ATM card-a banka kan sum neih zah leh kan nihna thenkhat an phum ang hian microchips te reuh te-ah chuan thil pawimawh a inphum teuh thei dawn a ni. Ram lo chang kangin a nih tur angin han hmang thei ila chuan pawisa note ken a ngai tawh lovang a, zin veivak mite tan phei chuan a him viau dawn a ni. Tih bo leh inruksak a awm thei tawh dawn si lo va. Tin, Sakawlh chhinchhiahna chu chal leh kuta hmuh theih maia taksa pawn lama awm tur a nih kha, microchips te phei chu taksa chhunga awm daih tur a nih avangin Bible ziak ang ngau ngaua chhut pawhin a inmil chiah lo a ni.

Sakawlh Nambar leh Thupuan Bu hrilhfiah dan

            Sakawlh nambar 666 hlauh leh hlauh loh chung chang hi Thupuan Bu hrilhfiahnaah a innghat thui khawp mai. Thupuan hi Bible-ah chuan hriat thiam leh hrilhfiah har ber lehkhabu a ni awm e. Hrilhfiah dan kawng hrang hrang a awm. Bible zir mi, Thuthlung Thar mithiam tam ber chu Preterist an ni. Preterist ho chuan Thupuan Bu-in a sawi thil thleng tam ber, bung tawp lam tih loh chu, kum zabi 1-naah a thleng vek tawhah an ngai. Bung 13 leh 14 vela sakawlh hi chu Nero Kaisara-ah khan an bel hmiah a ni (a hmingah hian 666 chiang takin a chhut chhuah theih). Preterist taka i chhiar chuan Sakawlh leh a nambar 666 tih vel chuan i rinna kalkawng a tibuai lo hle ang. Preterist te hi Bible ngaisang tawk lo va puh chi an ni lo va, Reformed theologian leh Bible Scholar tam zawk chu Preterist an ni tih hriat a ^ha khawp mai.

            Idealist an awm leh a. Chungte chuan a indawta thil lo thleng lam aiin a ‘thlarau lam thuchah’ an uar a ni. Heng ho hi chuan khawvel thil thleng indawt dan zel tur, he lehkhabu atanga sawifiah tum lem lovin a thuchah zirtir an buaipui zawk a. Chutiang mi kan nih chuan eng hunah pawh Sakawlh hi hmuh tur a awm fuk thei ang a, 666 pawh hi a tam thei ngawt ang. Mahse, a hrang a hraia ringtute hremhmun tlak phahna chhan tur ang ema hlauhawm ni chuan an hre lem lo. Harsatna tam tak ringtuten an tawk thin ang, tuar pawh an tuar ang, mahse a tawpa hnehna changtu tur chu Pathian a ni tho, tih hi an thupui chu a ni.

            Kan hriat lar ber leh pawm thiam ber chu Dispensational hrilhfiahna ang hi a ni a. Hun hnuhnung indawt dan an dawi dan chu hetiang hi a ni. Hrehawmna nasa tak (tribulation = hun harsa)  lo thlen hma hian mi thianghlim lawr a awm ang (rapture) a, ringtu zawng zawng chu vanah hruai chhohva an awm hnuah chauh hreawmna nasa tak chu a rawn thleng dawn a ni. Chumi hnuah Lal Isua a lo kal ang a, tichuan kum sang rorelin a zui  ang (millennium) an ti. He hrilhfiahna hi i pawm a, Isua Krista ringtu i nih bawk chuan Sakawlh leh nambar  666 chu i tan a hlauhawm miah lo tihna a ni. Hun harsa (tribulation) chhunga Sakawlh hi lo lang tura ngaih a ni si a. Sakawlh lo lan hma-in mithianghlim lawr a thleng dawn a, chutah chuan ringtu zawng zawng chu lawrin an awm dawn a ni. Ringtu dik tak i nih a, lawra ila awm lo a nih chuan rapture a la thleng lo tihna a ni ang a, rapture a la awm loh chuan Sakawlh a la lang dawn lo tihna a ni bawk ang.

            Heng hrilhfiahna kipui pathum kan en chuan Sakawlh leh a chhinchhiahna hi ringtute tan chuan a hlauhawm lem lo hle tih a hmuh theih mai a. Hun hnuhnung thu leh Sakawlh chung chang sawi rapthlak leh ‘hot’ thei ber chu Dispensational (futurist)  hrilhfiahna hi a ni thin. Dispensational pre-millennial hrilhfiahna atang pawhin ringtu tan Sakawlh a hlauhawm loh zia a chiang ta a. Amaherawhchu, premillennialist zingah hian mithianghlim lawr (rapture) hun ngaihdan hi a inang lem lo fo mai. Mi then khatin rapture hi hun harsa hmaa thleng turah an ngaih (pre-tribulation) laiin thenkhat, hun harsat lai taka thleng turah an ngai (mid-tribulation), tin, hun harsa nasa tak thlen hnuah rapture thleng tura ngai an awm bawk (post-tribulation).  Mid-tribulation pawm ho pawh hian rapture chu hun harsat laia thleng ni mah se Sakawlh lo lan hmaa thleng tura an ngaih tho avangin Post-tribulation hrilhfiahna pawmte tan chauh hian Sakawlh leh nambar 666 hlauhna hian ringtu tan awmzia a nei a ni. Bible scholar tam zawk chuan he ngaihdan hi an pawm lo tih erawh chu a chiang a ni.

Sakawlh Nambar chung changa Bible zirtirna ni lem lo kan hriat sualte

            Sakawlh leh a nambar 666 chung chang han chhut chian deuh hian Bible-in a sawi fak lem loh kan buaipui nasa hlein a lang.

(i) Sakawlh hmu thiam bik zawlnei ruat an awm chuang lo.

            Bible kan chhiar chuan Sakawlh hi hriat harsa em em tur angin a sawi chuang hauh lo mai. Thlarau tanpuinaa lo hmu thiam bik deuha inchhal phei chuan an phuahchawp ve mai niin a lang. Sakawlh hi hriat harsa em em turin Bible-in a zirtir ngai lo. Thupuan 13:18-ah chuan, “Hetah hian fin a tulzia a lang. Chhut thiam chuan Sakawlh nambar chu chhut rawh se; mihring nambar a ni si a; a zat chu 666 a ni,” a ti mai a ni.  Johana hian Sakawlh chu mi tupawh, mi a nileng lo chuan, an hre thiam mai turah a ngai niin a lang. Chhiarkawpa a bulthut ‘belh’(addition or plus) thiam chuan a belh chhuak mai thei tur leh nambar 666 chhiar thleng thei chuan a hrethiam mai turah a ngai a ni. Thlaraua hriat theihna chhal thei bik an awm lova, zawlnei bik ruat an ni chuang lo. Mi pangngai chuan he Sakawlh hi kan lo hre thei vek dawn a ni.

(ii) Sakawlhin vawikhat a chhinchhiah tawh chu a reh thei tawh lova, hremhmunah an kal ngei dawn tih hi Bible-ah kan hmu lo.

            He thu hi kan sawi vung tak, Sakawlh number kan hlauh em em chhan a ni a, mahse Bible han bihchianin heti zawnga sawina a awm lem lo a ni. Piangthar tawh te pawhin he number 666 hi kan lo pu palh a nih chuan chhandam nihna theihna (chance) pawh kan hloh  hial turah kan ngai hi a mak ngawt mai. Thupuan 14:9-11 chuan chatuana hremna tawk te thu a sawinaah, “Tu pawh sakawlh leh a lim chu biaa, an chalah emaw, an kutah emaw a chhinchhiahna chuang tawh phawt chuan, Pathian thinrimna uain fir, a thinurnaa khat no chu an in ang a, vantirhkoh thianghlimte chu Beramno hmaah chung mite chu mei leh katin a kang ang . Anmahni hremna mei chu chatuanin a khu chho vang; sakawlh leh a lim betute leh a hming putute hremna chuan tawpintai a nei lo vang” a ti mai a ni. “Sakawlh chhinchhiahna vawi khat nei tawh chu meidila tlak ngei ngei,” tih lampang a kawk lem awm lo ve. Nambar 666 put vanga hremhmun tlate chu mahni duhna ngeia an hun tawp thlenga pute hi an ni mai zawkin a lang.

            He chang hian Sakawlh chibai buk leh chhinchhiahna neih hi a sawizawm niin a lang. ‘Chibai buk’ tih hi ‘worship’ a ni a, chu chu ‘Pathian bia’ tihna a ni. Pathian tak kalsana Sakawlh leh a lem Pathian anga bia a, Pathian tak aia thlangtute chu chatuan hremnaah an lut ngei dawn tih chu thil chiang sa, sawi nawn ngai lo a ni zawk. Chutiang mite chu Thlarau Thianghlim chhinchhiahna kawl ve lo te an ni. Isua Krista ring lo leh misualte chu chatuan hremhmunah an kal ang tih nen hian a inang renga ngaih theih a ni awm e. Sakawlh number 666 hi intihthaih nana hman chi niin a lang lo.

Bible hi 666-ah a buai lem lo

            “Sakawlh Nambar,” “The Number of the Beast,” “666” han tih te hi hman atang tawha Sap thu leh hla ziakmiten an lo hman tangkai tawh thin a. A rapthlak a, a ngaihnawm hle bawk avangin mi suangtuahna ramah a lian a, ziakmiten an ngaihlu viau thin a ni. Pathian Thu ngaihsak vak lem lote pawhin an sawi ve fo. Bible erawh chi chuan a ngai pawimawh vak lo em ni aw? tihna ka nei. Bible-ah hian a lang tlem hle mai, vawi 1 chiah a lang a ni (Thupuan 13:18), kutziakbu lamah phei chuan eng nambar tak nge a nih hi a chiang chiah lo leh nghal.

            Tuna kan kuta Bible hi Pathian mite avang chauha fel taka thliar sa nei thei kan nih hriat nawn a tha awm e. Tuna kan chhiar theih mai anga a lo awm theihna kawng hi a thui khawp mai. Kum sang chuang kutziakbu (manuscripts)  an hmang a, chu chu khawnvar tha pawh awm mumal lo, tunlai kan lehkha ang pawh ni lo rairuang leh savun lehkhaa an ziah te an ni hlawm. Thuthlung Thar kutziakbu hi copy 5686 a awm tih hre hmasa la. Tichuan, Mizo Bible lehlin thar han keu la, phek 419-naa Thupuan 13:18 note-ah chuan ‘Mss(kutziakbu tihna) thenkhatah 610 tih te, 640 tih te a ni,’ a lo ti kiau mai. Tin, Saptawng Bible Version thar tak pakhat English Standard Version i en chuan 616 tih a ni ve bawk tih thu helaiah hian note an siam ve leh a. (Mi tam takin 616 hi a hmasa (original) zawkah an ngai). Tichuan Bible kutziakbu copy hrang hrangah Sakawlh nambar chu 666 te, 610 te, 640 te leh 616 tih tein a lo inziak a nih chu. Nambar 666 hi a awmang ber chu a ni tho a, kutziakbu tam bera a inziak dan a ni bawk. Mahse, heng zawng zawng atanga kan hriat theih chu an zinga a eng nambar pawh hi a ni thei vek a, Bible hian a nambar ngau ngau aia ngaih pawimawh zawk daih a nei a ni, tih hi a ni ngei ang.

Sakawlh hlauh dan tur

            Thupuan Bu hian Sakawlh chung chang a sawi ngei a. Setana hmanraw pawimawh leh thil ti thei tak a ni tih pawh kan hria. Sakawlh leh Setana leh Sual hi an inzawm reng avangin an hlauhawm vek a ni. Sakawlh hlau viau siin Sual kan nel viau ang tih a hlauhawm hle a, chu chu Sakawlh bumna dik tak chu a ni zawk. Sakawlh a lo lan chuan a nih dan tur Bible-in chiang takin min hrilh a, hetiang laka kan inven fimkhur pawh a tul ngei ang.

   (i)  Sakawlh chuan thilmak tihtheihnain mi a bum thin.

            Thupuan 13:13, 14-ah kan hmuh angin Sakawlh chuan, “mihring mithmuhah van atanga leia mei tlaktir thei khawp hialin thilmak ropui tak a ti thin. Leia awmte hnenah Sakawlh, khandaiha hliam hnu la dama chawimawi nan amah lem an siam tur a ni tih sawiin, Sakawlh mithmuha thilmak ti tura thu a hmuh, chung thilmak avang chuan leia awmte chu a bum bawk a,” tih kan hmu. He chang atang hian thilmak (miracle) hi amah ngau ngau chuan Pathian atanga chhuak a ni vek lem lo tih leh min bum thei thil a ni, tih hi a ni. Tin, Sakawlh chuan a hmang tangkai hle a ni tih pawh kan hria.

            Sakawlh tan chuan ringtu suakte chu ‘bel chhunga sa’ ang an ni a. Mahni nawmna leh hlawknana intisakhaw mi ho chuan Sakawlh hi an bawh huam huam dawn a ang. An tangkaipui theih tur thilmak tihtheihna nasa tak a nei dawn si. ‘Thilmak’ hmachhuanin ‘a thlarau’ ber angah an chhal ang a, Sakawlh do chu ‘thlarau’ lam thil hre thiam lo ang hialin an ngai thei ang. Bible-in  a zirtir leh a kawh tum ber Krista Kraws leh a thawhlehna tuipui a, nitina Kraws put ngaisang lem lo; ringtu nun hi hlimna ang chauhva dawng a, rikpui hlut theih lam chauh ‘thlarau’ thila ngaia, sual simna leh tuarna hlamchhiahte chu he Sakawlh hian a member atan a admit nghauh nghauh dawn a ang hle a ni.

            Chuvangin Sakawlh hi i hlau theuh ang u. Pathian Thu-in eng anga awm turin nge min duh tih hi Bible zira kan ngaihtuah reng a ngai. Sakawlh hlauh dan dik chu sual hlauh hi a ni. Harsatna danglam deuh tawh ve leh Kristian inzirtirna pangngai duh tawk lova sakhaw dang maiba/maibi pan mai te, aienthiam rawn mai te, an rawngbawlna kalhmang a him em tih pawh ngaihtuah lem lova ‘tawngtaia hre thei’ tih pan ngawt te hi fimkhur a tul tak zet. A dik leh a dik loh lam chhut lova mahni thatpui tur leh hlawkpui tur lam emaw, kan hlimpui tur a nih chuan eng pawh ngaizam thiam viau thin kan nih chuan Sakawlh tan chuan hmin kan awl ngawt ang. Sakawlh chuan a thilmak tihtheihna mak tak chuan mi tam tak a bum dawn si a.

  (ii)  Duhamna bawiha tang tan Sakawlh a hlauhawm

        Sakawlh chhinchhiahna putute lo chuan tuman engmah an leiin an hralh thei lo tih Thupuan 13:17-ah kan hmu. Sakawlh hmanraw pawimawh ber chu ‘lei leh hralh’ control hi a ni tlat mai. Chu chu mite a bumna ki tur, kan chak lohna theuh a ni. ‘Lei leh hralh’ kan tih hian sum leh pai lam duhamna (materialism) leh thil neih belh chak huam huamna (consumerism) hi a kawkin a lang. Hman deuha kan thiannu pakhat hmeltha ve tak, “Engnge i hobby?” tia an zawh tum a, “Shopping (bazar kai)” titute ang tan kha chuan Sakawlh chhinchhiahna put loh chu a harsa ngawt ang.

            Sum leh Pai zawnna kawngah leh hausak tum luata khaw hmu lova kawng eng pawh zawh pawisa lo kan nih chuan Sakawlh member ni tura candidate tling ngei tur chi kan ni ang. Sakawlh chuan lei lam malsawmna a vur nasa a ni. Tin, Thupuan hian, “ringtute an ril tam ang a, ei tur nei lo hialin an awm ang,” a ti hauh lo. An mamawh chu Pathianin a pe zel ang, khawvel tehfung (standard) atang chuan an hrehawm ngei ang, mite neih ang pawh an nei zo lovang. Mahse, Pathianin an mamawh chu a pe zel thung ang. Lei leh hralh lo pawhin an dam thei, nunna atana thil tul ber a ni lo tih a chiang a ni.

(iii)  Nawmsip bawl ngainatute chu Sakawlh mite an ni thin

            Thupuan 14:4,5-ah Sakawlh laka him turte chung chang kan hmu, “Chung chu hmeichhe laka intibawlhhlawh lo, invawng thianghlim, Beramno kalna apianga zuitute an ni, mihring zing ata thlan chhuah, Pathian leh Beramno tan rah hmasate an ni. Dawt an sawi ngai lo va, hmelhemna an nei hek lo.”(lt) Hei hi kan ngaihtuah chian a pawimawh hle. Mipat-hmeichhiatna kawnga bawrhbang taka inhmang, taksa tinuam thei nia an hriat thil tha lo ruihtheih thil chi hrang hrang laka invawng thianghlim ngai lo, dawt sawi hreh miah lo, Isua zui tum lo te hi an him lo hle a ni. Hetiang taka nung tura engmah pawisak nei tawh lo ho phei chi chu Sakawlh pawlah hian an intat lut a ni ber e. Chhandamna changtute zia a ni mawlh lo a ni.

            Sakawlh chhinchhiahna hi kan hriat miah lohva, kan duhthlanna pawh ni lova lo put ve mai chi a ni em? Niin a lang lo. Kan sawi ang hian sakhaw mina suaka sakhaw mi (nuna Isua lal tak tak lo), sum ngaina, leh nawmsip ngaina mite; vawiinah pawh Pathian aia heng thil buaipui tlat zawkte hi chuan a hring a hranin Sakawlh hi lo lang mah se an bawh huam huam tho vang tih a rinawm. A chhinchhiahna 666/610/640/616 hi put palh hlauh te chu khawi lamah, ‘min put tir ve hram rawh u,’ tiin an chal leh kutte an dawh sawk sawk zawk ngei ang. Vawiinah Krista aia Setana i thlan zel chuan Sakawlh member nunin i nung zel tih i lo inhre dawn nia.

Bible, Chhandamna leh 666

            Pathian Thu ngainatute tana ngaihmawhawm ber chu Sakawlh Chhinchhiahna sawi vungtute hian Chhandamna thu-a thil pawimawh an hlamchhiah daih mai hi a ni. Nambar 666 put ve loh hi Chhandamna angah an ngai deuh thaw niin a lang. Nu pakhat chu a nuna Pathian leh a Kohhrante ngaihsaka simna nun lang lem si lovin Chhandam nih tumin he zirtirna thehdarhtute sawi hi a lo awih hle a ni awm e. Tuar pawh a huam hial a ni. Tin, mi thenkhat Pathian lam hawi si lo Sakawlh lo hlau ve em em pawh an awm chawk. Sakawlh hi a hlauhawm a, Setana hmanrua thiltithei tak a nih avang hian a laka him pawh tum ngei tur a ni. Mahse Pathian Thu-in a sawi dan hian hlau thung ila. Chhandamna chu 666 inbel loh ni lovin Isua Krista neiha, Aman min neih hi a ni. Sakawlh laka himna tak tak chu 666 pu lo tura inven lam aiin Pathian hlau leh tiha Isua Krista rin hi a ni zawk. Thuthlung Thar thuchah chiang tak mai rinna avang chauha khawngaihnaa chhandam kan nihna aia sang zawk hi a awm lo tih i hre nawn ang u.

            Tin, Bible-ah hian Sakawlh chung chang hi Thupuan 13 leh 14-ah kan hmu tam zual a. He bung pahnihahte hian nasa taka sawi a ni. Amaherawhchu, sakawlh nambar 666 te, chhinchhiahna te, hremhmun te a sawi lai hian RINGTUTE HIMZIA a sawi nawn leh ^hin. Sakawlh chuan hnam tin, mi tin,tawng tin leh Jentail-te chunga thuneihna a neih thu leh mi thianghlimte a do leh hneh hial pawh phal a nih thu a sawi zawh chiahah, “Lei leh van siam hmaa talh tawh Beramno Nunna Lehkhabua hming chuangte chauh lo chuan khawvela mi zawng zawngin amah chu an be dawn a ni,” tih a sawi (Thup. 13:8). Sakawlh a lo lan hunah chuan Kristian inti ^heuh ^heuh zingah Beramno Nunna Lehkhabua hming chuangte chu tute nge an nih kan hre chiang tawh dawn a ni. Chungte chuan Sakawlh an zui dawn si lo.

            Tin, Sakawlh nambar chungchang 13:18-a a sawi zawh chiahah inzawmzatin 14:1-ah Zion tlanga Beramno ding leh mi 144000, an chala Beramno hming leh Pa hming inziak a hmuh a sawi nghal bawk. Heta 144000 hi hrilhfiah dan chi hrang hrang awm mah se, Isua Krista ringtute chu fiah taka chhinchhiah an nihzia a lang chiang a ni. Ephesi 1:13,14-ah ringtute chu Thlarau Thianghlima chhinchhiah kan nih zia hi hre tel bawk ila. Chuvangin, Sakawlh chhinchhiahna 666 ai hian Thlarau Thianghlim chhinchhiahna hi a fiah zawk tih Bible-in a sawi hi vawng tlat ang u. Chu chhinchhiahna dawntute chu Isua ringtu, Lal leh Chhandamtu a nihna pawmtute hi an ni e.

            Bible chang kan hriat fuh loh fo pakhat chu Matthaia 24:24, “Krista derte leh zawlnei derte an lo chhuak dawn si a, chung chuan thei ang sela thlante meuh pawh an tihder theih nan chhinchhiahna leh thilmak ropui takte an ti ang,” tih hi a ni. Tunlaia he thu vawrh lartu pakhat chuan he chang a, ‘theih ang sela’ tih hi hmaih luiin, ‘thlante meuh pawh an tihder theih nan…’ tiin a sawi nasa hle. Bible a chhiar chiang lo hle a ni. Sakawlh chuan thei se chu thlante hi tihder a duh tak zet a, mahse Krista ringtu tak tak chu a tihder thei lo tih amah pawhin a hre chiang hle.

Sakawlhin 666-in Ringtu dik takte a chhinchhiah duh dawn em ni?

            Sakawlh hlauhna hian kan ram Kristian te hi min tibuai leh thin. Census-a tel duh lo te, UID, Barcode, microchips hlau ta tlat te, khawvel changkannain a ken tel leh ram pum huapa that tlan zawkna tura sorkar hmalaknate hlau zawnga lo dawngsawng tlat kan awm thin hi a mak ngawt mai. Sakhua hian thil a tihbuai theih zia a lang. A hlau zawnga lak chuan a hlauhawm em bawk a ni.

            ‘Kan hriat miah lohvin Sakawlh chhinchhiahna 666 hi kan lo pu reng palh ang a’ tih hi kan hlauhthawn ber chu a ni. Sawi tawh angin a inzawmna pawh tuman an hre chuang lova, a hlau deuh pawh hian a heng thilte leh sakawlh hi a inzawm palh an hlau mai a lo ni. Min lo chhinchhiah ruk reng hi kan hlau a ni awm e! A mak ang reng hle. Census-a kan tel chuan, kan duh emaw kan duh lo emaw Sakawlh memberah kan hming ziak luh vea a lo awm reng kan hlau a. UID te hi rawn tipuitling (implement) tak tak se inziahluhna hmanrua tha tak a nih kan ring a. Kan hlau. Thenkhat chuan heng avang hian khawvel kohhran inzawmkhawm World Council of Churches meuh pawh kan hlau a ni awm e!

            Ka chian ve dan chu hei hi a ni. Sakawlh (Anti-Christ) hian he khawvelah hian ro rawn rel ta se. Lal hrawtin a hote zawng zawng nen han leng vel sela. Membership drive neiin a chhinchhiahna bel tur mihring duh thawh viau ta se; Sakawlh hian a member atan ringtu dik tak chu a duh ka ring lo. Chhinchhiahna 666 hi a pek phal ka ring lo. “Nang chu ka member atan i tlak (qualify) lo,” a tih ka ring. Engvangin maw?

Sakawlh member atana ringtu a tlak (qualify) loh chhan chu:

        (i) Ringtu chuan, ‘Hmanah chuan ka hlim ve tawh,” ti mai lovin Isua Krista hi a ring. Isua Krista, Lal leh Chhandamtu a nihna hi a pawm. A theih ang tawk tawkin a rawng a bawl a, A ram zau zel nan a thawk thin. Hetiang mi hi a thih thlengin nih a tum tlat. Chuvangin, Sakawlh (Anti-Christ = Krista Dodaltu) hian a mi do bera tana rinawm tlat hi a member atan a duh lul lovang.

        (ii) Sakawlh chhinchhiahna leh Thlarau Thianghlim chhinchhiahna a inbel kawp thei lovang. Ringtu chu Pathian fa a nih tawh avangin zakhamna thlarau, Thlarau Thianghlima chhinchhiah a ni tawh a. Chu chhinchhiahna neitu chu Sakawlhin a chhinchhiah ve dawn em ni? Awih a har.

        (iii) Pathian aiin Sakawlh a chak lo zawk. Sakawlh hlauh em emna hi, Pathian meuh ai pawha Setana chak zawk tura rin vang a ni. Pathianin a mite a humhim dawn a. Kan duhthlanna piah lamah Force-in  Sakawlh hian tumah a la dawn lo. Pathian aiin a chak lo ve. Kan duh lo chung chung Sakawlh member kan ni miah lovang. Kan chakna leh duhna atang chauh hian Sakawlh tihbaiawm member chu kan ni dawn a ni.

Sakawlh leh WCC

            Sakawlha puh hlawh hi an tam tawh viau asin. Kohhran Siamthat hun lai chuan Martin Luthera  chuan Catholic Pope kha Sakawlh ni chiahin a hria, Catholic ho chuan ani kha Sakawlh emaw an lo ti bawk. Protestant tamna rama an kut tuar nasa Anabaptist te (pawlchhuak an ni) chuan Reformers te kha Sakawlh angin an hmu ve thung. Kan sawi tak ang khan khawvel kohhran inzawmkhawm (Kohhran ni lo) pawl World Council of Churches pawh hi Sakawlh hmanrua lo la ni turah ngaiin thenkhatin an lo insawithaih a ni awm e. A mak khawp mai. WCC –a thil thleng tawh leh a tih tawh zawng zawng te a la tha vek e, tihna lam ni lovin (Kohhran tin/Pawl tin hian tihsual a nei tawh theuh)  WCC leh Sakawlh hian inzawmna a neih hmel loh ngawtin ka hria. WCC –a tel theite chu “Isua Krista chu Pathian leh Chhandamtu a nih pawmtu,” kohhrante an ni si a. Krista Dodaltu( Anti-Christ) Sakawlh nen chuan a inhlat hle a ni lawm ni?

Tlangkawmna

            Kan ram hi a sawi hlauhawm thiam thiam hi Pathian Thu sawi thiam emaw tihna ram, a chhut mak thiam thiam hi hre ril emaw tihna ram, mi sawi thaih thiam thiam ngaih ropuina hmun a ni awm e. Bumin i awm fo lovang u. Rilru hmang Kristian nih hi Kristian tha nihna a ni. Kan hma zawn leh kan bul hnaia sual awm te hi Sakawlh hmanrua zawk chu a ni a. Hengte hi a member atana min phuar nghehna hruihrual a ni. Sakawlh hlauvin, sual kan hriat chiante hi hlau ila, ram leh hnam tana thiltha tak niawma lang reng te hi chu hlauh a ngai lo ve.

            Zirtirna thli hrang hrang a lo tleh changin buai mai lova Kohhran zirtirnaa innghah ngam hi a chin felna hnuk hnai ber a ni awm e. A chhan chu Kohhrana rawngbawltute hi Ringtu zawng zawngin kan sawtpui theih nana Bible, Kohhran chanchin, Pathian Thu kalhmang (theology) te leh thil dang dang lo zir leh rilru lo seng nasa tawhte an ni thin. Kohhran hi Pathian a nih miau loh avangin a zirtirna leh ngaihdante chu cho (challenge) theih loh chu a ni lem lo. Amaherawhchu, fimkhur taka Bible biha a lo zirtirte kan challenge dawn a nih chuan rin thu mai leh dawn chawp mai mai ni lo, kan uar bikna lai chauh ni hek lovin Kohhranin a lo zirtir tawh chhan leh kalphungte a chin chhuaka zir ve veka kan challenge a ngai ngei ang. Chutiang challenge dawng turin hman atang tawhin Kohhran hi a inhawng reng thin.

            Chuvangin, insawithaih leh rinthu inbawlphawn siak mai mai hian thiltha tih min dalin Isua Krista ringtute hi min tihlau lul suh se.