𝐓𝐇𝐄 𝐍𝐄𝐖 𝐂𝐀𝐋𝐕𝐈𝐍𝐈𝐒𝐌

Kristian magazine chhiar hlawh ber pakhat Christianity Today Editorte zinga naupang ber pawl Collin Hansen-an 2006 issue daih tawhah khan John Calvina zirtirna lar thar chungchang, ‘Young, Restless and Reformed’ tih thupui hmangin article a ziak a, mi beng a verh deuh ni tur a ni kum hnih hnu 2008-ah lehkhabu puitling Young, Restless, Reformed: A Journalist’s Journey with the New Calvinists ti hming puin a chhuah ta hial a. Hansen-a hian America rama Calvinism a lar chhoh dan leh Baptist kohhrante (Calvinist lem lova ngaih thin) te meuh pawhin an tuipui dan a sawi a ni ber a. Heti lam tuipui deuhte tan chuan ngaihnawm tak a ni ve tlat mai.

𝟏. 𝐂𝐚𝐥𝐯𝐢𝐧𝐢𝐬𝐦 𝐡𝐢 𝐭𝐡𝐢𝐥 𝐭𝐡𝐚𝐫 𝐚 𝐧𝐢 𝐥𝐞𝐦 𝐥𝐨

Calvinism hi thenkhat chuan Reformed Theology an ti mai bawk a. A hming atang reng hian Kohhran Siamthat ‘Reformation’ hun lai atanga Protestant te innghahna thurin leh Pathian Thu zirtir dan a ni tih a hriat mai a. Tunlai thangtharte chuan zirtirna dang deuh huh angin an ngai fo tawh zawk a. Calvinism hi a ‘original’ ber zawk a ni, te pawh ti ta ila kan thelh thui lutuk lovang chu. Zirtirna phirsi ta zawk tam tak karah ‘Young, Restless and Reformed’ movement a tira mi kha an khawrh chhuak thar leh ta a ni ber zawk awm e. He movement, thenkhatin The New Calvinism an tih, 1980 chho vel atanga United States-a rawn lar chho ta hian sakhaw thila a phawvuak hlimpui mai piah lamah tunlai tak siin zirtirna ziktluak leh thurin dik a buaipui a ni deuh ber.

Tunlaia milar ngaisang uchuaktu ‘fans’ ten an atchilh laklawhte thil zawng zawng an pawm duak duak ang hian Calvinist intite leh Reformed theologian intite hian John Calvina zirtirna zawng zawng a kip a kawiin mahni mit leh beng hup chungin an pawm lui a ni ngai lo va. John Calvina Pathian Thu zirtir dan kalphung khan Pathian Thu an chhut thin tihna mai zawk a ni a. Chutiang chu Reformed Theology an ti a, Reformed Theologian-te chuan an theology chu Kohhran Pa Augustine leh Tirhkoh Paula zirtirnaah chhui lutin Bible zirtirna fir berah an inngai thin. Calvinist Thuhriltu ropui leh Revivalist George Whitefield kha a Calvinist viau nang a, “Johna Calvina thuziak hi ka chhiar ngai lo va, ka thu zirtir hi chu Bible zirtirna a ni mai zawk a nia,” a ti e, an tih chu!

𝟐. 𝐓𝐡𝐞 𝐍𝐞𝐰 𝐂𝐚𝐥𝐯𝐢𝐧𝐢𝐬𝐦 𝐜𝐡𝐮

TIME magazine-in 2009 khan ‘Ten Ideas that Change the World Right Now’ an tih zingah New Calvinism chu 3-naah a awm ngat a. Dah sang angreng viau mah se khawvel chu a her danglam ta em em lem lo nge kan hre thiam lo zawk! Thenkhat chuan ‘new’ leh ‘old’ then hran hi tul an ti lo hle bawk a. Calvinist zawng zawng an inang vek ngai lo va, an pawm dan engkim a inkhuangrual thup thup chuang lem lo. America ram theologian ropui ber anga mi tam takin an chhal Jonathan Edwards pawh Calvinist theologian nia hriat hlawh leh he New Calvinism-in a vawrh lar thar (American a ni vang pawh a ni deuh mahna) ni mah se ani hian John Calvina zirtira a kip a kawiin a zawm bik lovin an sawi. New Calvinism hi Reformed theologian mi hrang- JI Packer, RC Sproul, John MacArthur Jr., John Piper, DA Carson, Michael Horton, Albert Mohler, etc., te ho sulhnu-in a rah chhuah niin an sawi a, tam zawk phei hi chu an la dam nghe nghe a ni.

Heti a nih lai hian New Calvinism chuan zia a nei ve ngei a. Reformed Theology pangngaiina a uarte an uar viau vek a ni tih chu a lang mai a. New Calvinism tia sawi theih ze thar lo lang chu: 1. Bible hi dik lo thei lo a nihna a pawm; 2. TULIP an pawm vek (A awmzia chu – mihring suala tlu tawhah hian Pathian lam hawi theihna chakna a awm lo, Pathianin mi a thlanin a mi thlanah a thlan chhan thil tha engmah sawi tur a awm lo; Krista thisenin amah ringtute chauh a tlan; Thlarau Thianghlimin a tihnunte chuan Krista an hnar ngai lo; Piangthar dik tak chu a tawp thlengin a rinawm thin? 3. New Calvinism chuan engkim chunga Pathian Lalna, Thuneihna leh Rorelna a zirtir; 4. Mipa leh hmeichhia inkarah inpuitawn tura siam kan nihna leh mipa mawhphurhna sang an zirtir, 5. Bible zirtirna kalh si lovin tunlai culture mila Kristianna kalpui thiam tha an ti; 6. Thlarau Thianghlim hnathawh chi hrang hrangah an inhawng zau. 7. Mission an ngai pawimawh hle a ni. Heng bak hi sawi tur a la tam thei ang.

𝟑. 𝐄𝐧𝐠 𝐯𝐚𝐧𝐠 𝐧𝐠𝐞 𝐍𝐞𝐰 𝐂𝐚𝐥𝐯𝐢𝐧𝐢𝐬𝐦 𝐚 𝐫𝐚𝐰𝐧 𝐜𝐡𝐡𝐮𝐚𝐡?

Khawvel inher zelah Kohhran pawh hian a zia a thlak ve thin a. Thang khatin uar bik deuh an nei deuh zel bawk a. Reformation chhoah chuan Reformed Theology a lian chho viau a (Lutheranism awm mah se a inhlat vak lem lo). Europe leh America rama harhna a thlen tak tak tirhah phei chuan Reformed deuh tak thuchah a ni deuh vek awm e. Mahse hun a rawn inher a, thuchah pawh a zia a dang ta. Calvinism ngialngan tak chu kalsanin Arminianism an tih mai zirtir danin mihring lam mawhphurhna ‘duhthlannaa’ innghat liau liau Chanchin Tha chu an uar ta a. Chu pawh chu an duhtawk ta lo zel a, ‘Thlarau’ hnathawh uarin thilmak leh boruak danglam uarna a lo sang a, tawnhriat danglam neih tumna boruak leh ngaihsan bikna a lo lian ta em em a ni. Chutah tak chuan Calvinism, Bible thua innghat, Pathian thiltihtheihna liau liaua innghat, Pathian Khawngaihnaa innghat, mihring chakna leh thiltihtheihna hmachhuan miah lo, Pathian ropuina atan chauhva nun – chu sap thalai tam takin an tuipui ta riau a ni a tih theih awm e. 

Hetiang boruak atang hian Mizo Kristiante pawh kan fihlim hauh lo. Kohhran a din tirh khan khunkhan takin a che tlangpui a. Zirtirna dik a ngaisangin mipuia tuh hram hram a tum thin a nih kha. Amaherawhchu, hlim harhnain min su dar ta a. Chutah chuan kan lut thuk ta lutuk ni tur a ni, sermon pangngai tha tak tak pawh kan hmu ‘thlarau’ zo ta lo va. Pathian biak boruak tha pangngai kan kham khawp lo fo niin a lang. Thlarau hnathawh leh mak danglam kan uar na lamah ‘doctrine’ kan hnualsuat a, zirtirna dik lam aiin kan hlimpui tur kan zawng thin. Kan inzir peih loh leh thatchhiat khuh mawi tumin Kristian nun tha atan hriatna dik te pawh hnawksakah kan ngai titih hial emaw tih theih a ni thin. Setanan Pathian mite a beihna kawng hrang hrang zinga a hlawhtlinna ruam a ni palh ang tih a hlauhawm thin a ni. Hmelmapa hian a chang chuan sual tur ngawr ngawr aiin a tling lo deuh zawk thlanga intilungawi mai mai tur hian min thlem thin a ni si a.

𝐓𝐥𝐚𝐧𝐠𝐤𝐚𝐰𝐦𝐧𝐚

Mizo Kristianten he thilah hian zir tur tha kan nei tih a chiang a. Revivalism (hlim harhna uar luat) hian Kohhran nun a tihchhiat theih dan chu kham khawp loh a ngah em em hi a ni a. Nunphung pangngai Kristianna a duhtawk ngang lo a ni. Pentecostal /Charismaticism (Thlarau hnathawh uar chi) hian ni tin nun pangngaia Pathian kaihhruaina ringtuin a chan thin a hnualsuat deuh bawk thinin a lang. American style evangelism, Charismaticism, Pentecostalism ten min hneh hle hlawm a. Prosperity Gospel leh Word of Faith Movement thlengin kan chaw lut hnial lo va. Kan thlifim thiam lem lo tlangpui bawk a. Amaherawhchu, Kohhran hi hetiang boruak ringawta innghat hian a awm reng thei dawn lo tih hrethiam pha ila. Kan uar lutuk chuan rilru hmang thiam chinte Kohhran atangin an hla telh telh mai ang tih a hlauhawm thei mai dawn a. Chuvangin, thurin fel taka innghat, tawnhriat nung tak nei si, awmze nei tak rawngbawlna leh kalphung Mizo Kristiante hian kan mamawh zel dawn a ni. Chumi hmu pha leh hrethiam tura kan inbuatsaih sauh sauh a pawimawh hle zel ang.

*****