𝐊𝐑𝐈𝐒𝐓𝐈𝐀𝐍𝐓𝐄𝐍 𝐒𝐀𝐁𝐁𝐀𝐓𝐇 𝐒𝐄𝐑𝐇 𝐋𝐎𝐕𝐀 𝐂𝐇𝐀𝐖𝐋𝐇𝐍𝐈 𝐊𝐀𝐍 𝐒𝐄𝐑𝐇 𝐙𝐀𝐖𝐊 𝐂𝐇𝐇𝐀𝐍 𝐓𝐇𝐄𝐍𝐊𝐇𝐀𝐓

 


  1. Thuthlung Hluia kan hmuh angin Sinai tlang Thu Sawm Pek (Ex 20:8-10) ah chuan Israel zawng zawng chu Sabbath serh tura thupek a ni a. Hei hi strict takin an kalpui a. Thuthlung Thar hunah pawh Judate (Isua leh zirtirte telin) chuan uluk takin an serh thin a ni tih kan hria. Pharisaite phei chuan an uar hle a nih kha.

 

  1. Thu sawm pek zingah hian 9 te chu Thuthlung Thara sawi nawn leh tihngheh an ni a. Matthaia ziakah  tualthah, uire, rukruk, hretu dera tan, leh nu leh pate chawimawi chungchang sawi a ni chauh a; Rom 13:9-ah awhna chungchang a sawi tel bawk. Uluk taka Pathian be tura zirtirna chuan thu sawm pek hmasa 3 hi a huapa ngaih a ni a. Thuthlung Tharah hian  uar taka Sabbath serh tura  inzirtirna hi a awm ta meuh lo va, Isua ngei pawh khan Sabbath lal a nihzia a sawi zawk a(Mt 12:8, ref Mk 2:27). A hun laia mite duh ang diak diak chuan a serh lem lo tih pawh kan hria a ni.

 

  1. Thuthlung Hlui chuan Dan zawm sakhua a nih avangin Sabbath serh pawh a tel a. Mahse, Thuthlung Tharah erawh chuan Dan hnuaia awm lovin Khawngaihna hnuaiah kan awm thung (Rom 6:14-15). Sabbath chungchang zawng zawng chu Kristaah a famkim tawh a. Ani chu kan chatuan chawlhna a ni. Sabbath serh a la ngaih zel chuan Dan hnuaiah kan la awm tihna a ni ang. Thuthlung Hlui-a serh leh sang dan zawng zawng kha kan zawm ngai tawh lovin kan zalen tawh a, nun dan tha (moral laws) te chu kan la ngai pawimawh hle a. Chungte pawh chu kan zawm that avanga chhandam kan ni chuang lo va, Pathian duh zawng ti tura min kaihruaitu atan kan hmang tawh zawk a ni.

 

  1. Sabbath serh leh serh loh hi buaina ber tur a ni tawh lo tih Thuthlung Tharah a lang chiang hle (Rom 14:1-12, Col 2:16,17; Tirh 20:7).. Kristiante rilruah hian sabbath serh lam aiin Lalpa Ni (chawlhni) ngaih pawimawhna a thang nasa chho hle a ni. I Kor 16:2 leh Thup 1:10-a kan hmuh Lalpa Ni hi Kristiante Chawlhni hi a ni ngeia ngaih a ni. Thuthlung Thar ziah hun chhung ngeiah pawh Tirh 20:7; I Kor 16:2; Thup 1:10 -ah te hian Chawlhniin an inkhawm thin tih kan hre chiang thei a. Kum 115 AD leh 135 AD vela thuziakahte khatih hun lai khan Chawlhni an serh tawh tih chiang takin a lang a, kum 500 AD-ah phei chuan tih dan phung pangngai a ni daih tawh a.

 

  1. Kristian hmasa berte, Isua zirtirte leh midang, kha Juda vek an ni a. Juda sakhua kha chhuahsan turin an inngai miah lo va, chhuah san pawh an tum  lo hrim hrim a nih kha. Mahse an Chanchin Tha hril awmzia leh nihphung an hre chiang telh telh a, Juda sakhua nen kha chuan a inrem fuh chiah thei lo tih an hre chhawm ve zel a, anni pawh Juda sakhua atang chuan an inla hrang telh telh niin a lang. Jentail an tel tam telh telh bawk nen, Juda sakhaw zia an kalsan thui telh telha Sabbath aiin Chawlhni a lar zawk ta zel a ni. Kum zabi 2-naa Kohhran pate (Church Fathers) Justin Martyr, Ignatious, Irenius, Clement of Alexandria, leh zabi 3-naa mi Tertuliana te chu Sabbath serh tul ti lo tak vek an ni, an ti.

 

  1. Kum zabi 2-na huna Kristian Pathian Biak Inkhawm dan chu Juda sakhaw thil nen danglam tak a ni tih a lang. Pathian thu (Tirhkohte lehkhathawn leh Chanchin Tha bute) an chhiar a; fakna hla an sa ho va; Sermon an ngaithla a; an tawngtai ho va; Lalpa Zanriah an kil ho thin. He sakhua hi a juda tawh hlawl lo a ni ber mai. Juda mi pawh Kristian Pathian biak dan chu Juda sakhua Pathian biakna angin a ngai thei lo sa a ni. Chawlhniah hian Kristian tawh phawtin hnathawh an thulh nghal kher chuang lo va, awm ni kham hi lal Constantinea thupek (321 AD) atanga an chin than chauh a ni, an ti bawk.

 

  1. Chawlhni hi kan Lalpan sual thiltihtheihna leh thihna hneha a Thawhlehna ni a ni a, chumiah chuan thil engkim siam thar a lo ni a, Thlarau Thianghlim lo thlen (Pentecost) ni leh Kohhran din tanna ni a nih avangin Kristiante chuan kan serh a ni. Kristian te nihna (identity) atan hian a pawimawh em mai!

 

  1. Kristianten Chawlhni serh tura kan inzirtir hian Sabbath serh dan kan entawn deuh ngei a, mahse Sabbath serhna rilru ang diak diak kha chu a ni tawh lem lo va. Kar tluan ni tin ni 7 chhunga thinlung taka Pathian be tura inzirtir hi kan tih dan  zawk a ni a. Lalpa Niah (Chawlhniah) hian a huhova Pathian biakna (corporate worship) kan nei chauh zawk a ni a. Ni 6 chhunga kan khawsak dan hi Chawlhni hun kan hman thatin a sil fai zo lo va, Chawlhnia Pathian biak pawh hian ni 6 danga kan khawsak dan tha takin a ai a awh zo chuang lo. Ni zawng zawng hi Lalpa tan a ni.

 

  1. Chawlhnia hian kan taksate tihahdam a, rilru Pathian lama hawitir a, kan ringtupui unaute nena inpawla hun hman hi kan thlarau nun tan a tha a. Pathian Thu ngaithlain, inzirtirna te a awm thin. Pathian lama intuaitharna hun pawimawh a ni a. Thlarau lam thilin hemi ni bika kan hun zawng zawng hi luah khat thin se a duhawm khawp mai. Chu chuan nun hrisel min pe zel dawn a ni.

 

  1. Chawlhni hi serha Pathian lam thil ngaihsak zualna ni atana kan hman thiam telh telh hi kan nun atan a pawimawh hle a. Tunlai khawvel buai tawh takah hian chu chu kan hriat thar theuh a pawimawh hle. Dan anga Sabbath serh rilru hrim hrim lam aiin Sabbath principle hmanga Pathian pawl thiam a pawimawh hle mai. Chu chu Pathianin min phutna pawh a ni ngei ang. Pathian hre chang lo leka thil danga inhmang leh buaite hi chu an buai lutuk mah mah a ni ngei ang.

 

  1. Chawlhni bikah hi chuan Pathian biak inkhawm mai piah lamah Youtube lama sermon ngaihthlak te, Fakna hlaa inchiah te, lehkhabu tha chhiarna hun tein hmang thiam ila. Khawvel thil rilru la peng thei tak boruak atana inthiarfihlim thiam hi kan Chawlhni hman dan tur a ni ngei ang. Kan Pathian hian kan neih sum leh pai atang chuan sawma pakhat (1/10) a phut tih kan hria a. Kan hun hman danah erawh pasariha pakhat (1/7) a phut thung. Hun chungchangah a phut lian zawk a ni tih hriain ama rawngbawlna, amah hnaihna, leh amah pawl nan kan hun i phal ang u.

 

  1. Mi thenkhat chuan Sunday hi sun-god Mithra biak ni a ni a. Chu chu Kristianten kan zawm tak avangin ni (sun) chu kan be ve ta ang thawthangin an sawi thin. Hei hi sawi duh dan mak tak a nih hmel zawk a. Eng emaw ti tiin hmanlaia sun-god an biak ni nen a lo inang pawh ni sek sek se ni-pathian (sun-god) te zawng kan biak loh chian em hi! A date insut vanga kan buai dawn chuan buaina tur a tam dawn em mai!

Comments

Post a Comment

Popular posts from this blog

CHANCHIN THA NIHNA TAK

Naktuk March 15 hi Presbyterian Kohhranin ‘Chanchin Tha Thlen Ni’ tia an serh thin kha a lo ni leh ta a. Hemi ni denchhen hian Chanchin Tha nihna tak hi ngaihtuah thar leh ila. Thil hlu apiang a lem (duplicate) a tam ang hian Chanchin Tha duplicate deuh hi lo tuipui chiam a awm theih avangin ngaihtuahna sen tam a pawimawh hle dawn a ni. Tumahin Chanchin Tha avanga malsawmna kan dawnte  hi an chhut sen a rinawm lo va, sum leh pai zawnga han chhut theih chi pawh a ni awm lo ve. Theih pawh ni se phal chi pawh va ni suh, a ngaihna a awm dawn si lo. Chanchin kan dawn tawh zawng zawnga tha ber leh hlu ber chu he Isua Krista Chanchin Tha hi a ni a. Chu chu kan lawmna a nih laiin khawvel su sawn dawrh dawrh khawpa thil ti thei chanchin a ni.   Chanchin Tha chu Bih chiang zawkten Chanchin Tha(Gospel) kan tih laimu tak hi hriat tumin an chhut thin a. A tir atanga ringtuten Chanchin Tha anga an lo hril leh hriat tlan nia lang chu Tirhkoh Paulan I Korinth 15:3,4-a a sawi, “ Krista chu Lehk
Read more

𝐙𝐔 𝐋𝐄𝐇 𝐑𝐔𝐈𝐇𝐇𝐋𝐎: 𝐓𝐇𝐋𝐀𝐑𝐀𝐔 𝐍𝐔𝐍 𝐀 𝐍𝐆𝐇𝐀𝐖𝐍𝐆 𝐃𝐀𝐍

Mi a nileng lo tan chuan ngawlvei pakhat hmuh tawh hnuah, zu leh ruihhlo te hi hnaih pawh hnaih tawh loh tur ni awm tak a ni a. Mahse vawiin thlengin thalaite nun a suat a, he kawng thim leh rapthlak taka luta, chhungkua leh khawtlang tibuaitu kan la awm zel hi Setana bumna nasa tak a ni tih hai chi a ni lo. Zu/Drugs ngawlvei hlim, hmeltha, pian nalh, hausa, ngaihsanawm an awm miah loh laia he tuarna khurpuia lut an lo awm leh thin hi a pawi ngawt mai. Zu leh Drugs ten kan taksa a tihchhiat theih dan chu kan hre tlangpui ang a (medical doctorten min hrilh dawn bawk a); he paperah hian kan thlarau nun a nghawng dan kan  zir bik ang. Zu leh Drugs te hian kan taksa a tihchhiat thin avangin an hlauhawm nangiang, mahse an hlauhawm chhan ber zawk chu kan thlarau nun an tihchhiat nasat em vang hian a ni. ‘Thlarau Nun’ kan tih chu             Thlarau nun chu tuna kan nun pangngai laka hrang daih anga kan ngaih chuan a pawi ngawt ang. A zau zawnga sawi chuan kan nun pumpui hi thlarau nun chu
Read more

Engtinnge Kristian Nun Nghet kan neih theih ang le?

             Chak lo bera inngai tan pawh Kristian nghet tak a neih theih. Beidawn mai tur a ni lo. Thil dang ang bawkin Thlarau lam dan (Krista Isuaa Nunna Thlarau dan, Rom 8:2) a awm a, chu chu kan zawm ve a ngai ang. Kristian nun nghet kan neih theih nan a hnuaia mite hi ngaihtuah ho ila: 1.        Kristianna awmzia hriat chian a ngai. Thenkhatin Kristian sakhua hi – misual pianthar, a hnua theih ang tawk tawka rawngbawl, tlin lohna laite Pathian khawngaihnain a hliahkhuh vek thin- angin an hria. A dikna chen chu awm mah se he theology hi a puitling lo hle a ni. Kristian nihna chu nun puma Krista vuantu tihna a ni. A khawthlir, a ngaihdan, a nun pumpui hi Krista tarmit atangin a thlir tawh a, Krista zuitu (disciple) a ni tawh tihna a ni. Kan thlarau nun hriltu ber nia kan hriat thin ‘piangthar’ tih tawngkam hi Bible-ah a lang tam lo hle a. Thuthlung Thar chuan ringtute sawina tawngkam atan  matheteuo  a hmang tlangpui. Chu chiah chu Matthaia 28:18  ‘Thupek Ropui’ kan
Read more