𝐓𝐇𝐋𝐄𝐌𝐍𝐀 𝐇𝐌𝐀𝐒𝐀 𝐁𝐄𝐑 𝐊𝐇𝐀

Han ngaihtuah chian chuan Isua thlemna tawhte kha an mak angreng ngawt mai. Lung chhanga chantir (ei leh in lam), temple chhip zum atanga zuan thlak (thilmak buaipuina) leh bawkkhupa chibai inbuk (tunge a tawpkhawka lal ber?) chungchangte a ni a. Hengte hian kan thlarau nun a huam kim hneh angreng nen a awmzia hi chuti tak chuan kan lo la ngaituah meuh hlawm lo mai thei a. Tun tumah hian a thlemna hmasa ber awmze ril tak thur chhuah i han tum dawn ang hmiang.

𝐂𝐡𝐡𝐚𝐧𝐠 𝐥𝐞𝐡 𝐥𝐮𝐧𝐠 𝐩𝐢𝐚𝐡𝐥𝐚𝐦𝐚𝐡

Isuan thlemna a tawh hmasak ber chungchang ka hriat tirh chuan ho ka ti angreng hle. Pathian Fapa engkim ti thei a ni sia a ril a tam chuan lung mai mai te chu chhang tui tak takah chantir mai tur alawm, thlemna em anga han sawi chu eng nge a chhan ni? tiin ka ngaihtuah. Aman a theih phawt chuan lung chhanga chantir chu a pawina leh dik lohna em em kei naupang mai tan chuan ngaihtuah thiam a har khawp mai. Mahse he thu hi lung chhanga lo chang emaw, chhang lunga lo chang satliah mai niin a lang lo tih te pawh ka hre thiam ve zel a. Tlai khat riltam tihreh thil mai a ni lo bawk a. Thlarau lam inbeihna ril tak leh thuchah ropui tak keng tel a ni a. Chuti ni lo se thlemna a tling lovang a, thil han sawi tham a ni hauh lovang.

Kha thlemna kha mahni chakna, mahnia awm thiltihtheihna hman chungchang a ni a. Pathianin kan kuta a dah mahni nawm nan chauha hman leh hman loh chungchang thil pawimawh tak a ni. Mihring ngaihtuahna pangngai chuan engkim ti theitu chuan riltam lai takin ei tur lung chhanga chantir chu a pawina kan hre pha lo. Mahse Isua thlemna tawh serious tak mai chu amaha awm thiltihtheihna chu ama nawmna leh ama duhzawng neihna atan a hmang dawn em? tih zawhna zawk kha a ni. Hei hi tun thlengin Kristian rilru leh khawvel rilru danglamna a la ni reng. Khawvel rilru chuan amaha awm zawng zawng chu ama nawmna atan hman a tum tlat thin.

𝐊𝐚𝐧 𝐭𝐚, 𝐤𝐚𝐧 𝐭𝐚 𝐥𝐨

Zofa Kristian zawng zawngin vawiina thlemna kan hmachhawn mek chu Isua thlemna hmasa ang hi a ni a. Hemi kan chhanna hian kan ram leh hnam dinhmun leh kan Kristian rawngbawlna chungchangah awmzia a nei hle zel dawn a. Kan her rem vat loh chuan kan hmalam pawh a thim viau thei dawn a ni. Tuna kan ram thanmawh bawk a nihna lai pawh a awm mek. Chu chu kan theihnate mahni inchhekarbawm nana hman kan tum tlat hi a ni a. Chu chu sualah pawh kan ngai lem lo va, kan tih awm reng leh thil tha takah kan ngai tlangpui. Chutiang tur chuan tan kan la sauh sauh thin bawk a nih hi.

Bible zirtirna hi Pathian Thu a nihna kan pawm dawn chuan hei hi kan ngaihthah a rem lo hle. Thuthlung Hlui tirah chuan mihring hmasate chu Eden huan ‘enkawl’ turin thupek an ni tih kan hmu a. Thuthlung Tharah chuan ringtute chu ‘mahni ta kan nih loh’ thu min zirtir bawk a. A tir atang reng khan Pathianin hringfate chu ama SUM enkawl tura a siam kan lo ni a. Chumi awmzia chu kan kuta awm, kan theihna, kan hausakna, kan hlawh chhuah kan tih zawng zawng hi Pathian ta vek zawk a ni a. Mi hausain a chhiahhlawh talent a kawltir ang khan kan vawn him leh tihpun atana min pek mai a ni. Mahni inchhekarbawm leh nawm chen nan a ni lo. Chutiang chu Pathian hre lo khawvel mite tih awm tawk chauh a ni.

𝐓𝐮𝐦 𝐥𝐨𝐡 𝐫𝐮𝐚𝐦 𝐥𝐚𝐦 𝐚 𝐧𝐠𝐡𝐚𝐰𝐧𝐠 𝐩𝐡𝐚

Mizote khawtlang nunah hian sawi chhuah si loh intihsiakna a awm a. Chu chu mi awm thei deuhte zingah a ni lehzual. In leh lo din ropui leh khawtlanga dinhmun (status) neih san hi kan inelna nasa tak a ni. Pa leh nu inti chin chuan an hre ru deuh vek. An ngaihtuah fo a nih loh pekin an nun kaihruaitu atan an hmang thin. Dinhmun thaa an lo dinin mahni tan emaw an ti a. An duh dan dana an kaih sawih theih atan an ro, an sum, an hlawh te chu a phalsak emaw an ti a. Khawvel rilruin a chiah hnehna lai tak chu a ni tih an hre lo.

Kan Pathian chuan a ropuina atana hmang tangkai tur leh a ram zau zelna atana enkawl turin Ama sum chu an kutah a dah mai chauh a ni reng si a. A kuta a dah hnem deuh chu hmang tangkai thiam deuh tura a ngaih te pawh an ni mai zawk ang. Nawm chen leh inchhekarbawm nan a ni mawlh lo a ni. He Pathian Sum kan enkawl dan hian Pathian chatuan thil tum leh Chanchin Tha hril a nghawng a ni tih te pawh hi hai loh tur a ni. Ringlote hnena Chanchin Tha hril hi kan missionary tirhte va thawh tur bik ni mai lovin kan zavaia kan thawh tur a ni si a.

𝐀 𝐭𝐡𝐥𝐞𝐦𝐧𝐚 𝐥𝐞𝐡 𝐤𝐚𝐧 𝐭𝐡𝐥𝐞𝐦𝐧𝐚

Isua thlemna tawh hmasak ber hi vawiin thlenga kan thlemna tawh a la ni ve tho a. A riltam laia lung chhanga chantir mai tura thlem a nih ang hian kan kuta awm kan theihnate chu keimahni intihnawm nana hmang tura thlemna hi kan ngaih pawimawh em em hlawm loh thlemna nghawng pawi tak nei thin a ni. Pathian sum enkawl hian mi zawng zawng kan khawsak dan a inang vek tur a ni tih lam aiin kan kuta awm ang hi thiam takin kan hmang tur a ni, tihna a ni ngei ang. Pathian hming zahawmna, Pathian ram thlenna leh Pathian duhzawng tih te rilrua vawng reng chungin.

*****