𝐂𝐇𝐇𝐀𝐍𝐃𝐀𝐌𝐍𝐀𝐀 𝐍𝐆𝐀𝐈𝐇𝐅𝐈𝐍 𝐋𝐎𝐇 𝐓𝐔𝐑 𝐓𝐇𝐈𝐋

A nihna dik tak Mizo Kristianten kan hriatfiah loh fo pakhat chu ‘Kristian nun’ hi a ni a. Chhandamna nen kan sawi zawm thiam meuh lo niin a lang thin. Pathianin a khawngaih vang liau liau, kan thiltih that leh chhiat vang ni hauh lova a fapa Isua Krista ringtute min chhandam thu ‘Protestant thupui’ hi kan tuipui a. Sawi nuam kan ti hlawmin pawm nuam pawh kan ti nangiang. Amaherawhchu, chu mi zawh chiaha Kristian nun hi kan Chhandamna hriat danah khan a tel meuh tawh si loh avangin a hlutna leh a pawimawhna kan pawh tawk lo fo a, kan tawngfai leh faih faih thin a nih hi. Thenkhat phei chuan tawngvai tih inhre map lovin an lo buaipui chek chuk mai bawk a! Tun tumah hian kan Kristian nun hi kan Chhandamna nena lak hran theih a nih lohzia khawrh chhuah i han tum dawn teh ang.

𝐀 𝐥𝐚𝐧 𝐜𝐡𝐡𝐮𝐚𝐡 𝐝𝐚𝐧 𝐜𝐡𝐢 𝐡𝐫𝐚𝐧𝐠 𝐡𝐫𝐚𝐧𝐠

He thua kan chian lohna hi kawng tam takin a lang chhuak thinin ka hria. A pakhatnaah chuan, ‘Chhandamna a bo thei em?’ tih zawhna kan chai foah hian a lang chiang hle. Thenkhat chuan thiltih vang a nih loh na na na chuan kan nun dan chu eng teh chiama pawimawh turah an ngai lo va. Engang pawhin nun bawrhbang se thih hnuah vanram kal tho turin an inngai. An inngai reng ang chu – thiltih tel miau hek lo! Thenkhat chuan Kristian nunah thiltih hi sawi bo lem chuang lovin dam chhunga malsawmna dawnna atan a ni, an ti mai a. Kristian nun tha chu van thleng phak lo, dam chhunga Pathian malsawmna dawn leh dawn lohna thil ang chauhvin an ngai a ni deuh ber.

Thenkhat erawh chuan thih hnua lawmman dawn tam leh tam loh thilah an ngai mai bawk. ‘Vanram ka kai dawn phawt chuan lawmman chu dawng lo mah ila,’ tiin leia mahni duhzawnga nuna thih hnua vanram kai tawk tawkah lungawi angin an insawi. Duham berten duham lo awm taka lan an tum dan a ni mai mai awm e. A dang lehah chuan, ‘Thiltha tih chu chhandamna kan chan hnua kan nih dan tur a ni,’ han tih liam mai hi a awm bawk a. Hetianga sawi hi a dik viau laiin a nihna a phawk chhuak zo lo deuhvin a hriat thung. Thiltha tihah chuan tla chhe ta viau ila engtin nge ni ta ang? Kristian nun tur angin nung mumal ta lo ila, kan chhandamna dinhmun ni ta ang le? Chhandam chu kan ni ve hram hram tho dawn em ni ang? Nge a bo dawn?

𝐊𝐚𝐧 𝐦𝐚𝐧 𝐭𝐡𝐢𝐚𝐦 𝐥𝐨𝐡 𝐥𝐞𝐡 𝐭𝐡𝐢𝐧

He buaina kan tawh chhan chu Chhandamna awmziaah kan chian tawk loh vang ni berin a lang. Chhandamna pumpui chu Chhandamnaa thil pawimawh tak ‘thiamchantirna’ nen kan ngaihfin avangin chiang lo ruaiin kan hmu ta thin a ni. Thiamchantirna kan tih chu Pathianin misual thiam a chantirna kha a ni a. Chu misual chuan thil tha eng mah a tih hmain Isua Krista a rin avang chauhvin thiam changah pawm a ni ta a. Chu pawh chu Lal Isua felna kha ama felnaa chhiarsak a nih tak vang a ni. Chu vangin mi tupawhin, ‘Isua Krista ka ring e,’ thinlung taka a tih khan ama fel leh fel loh kha Pathian chuan en tawh lovin a rin Krista felna kha a en ta daih a; a fel leh fel loh teh nan Krista felna chu a hmansak ta zawk a ni. Hei hi Pathian hmaa thiam kan chan dan ‘imputation’ (felna bel) an tih chu a ni a. Pathian khawngaihna vang chauh a nihzia pawh a lang chiang nghal hle a ni.

Hemi chinah chiah hian kan tihsual chu a lang ta thin a. Chu chu ‘thiamchantirna’ chauh hi Chhandamna emaw kan ti ta thin hi a ni. Ni e, chhandamna chu a ni ngei e, mahse thiamchantirna chauh hian Chhandamna a sawi kim lo tih hriat a tha. Thiamchantirna chu Chhandamna bawma awm pakhat a ni a. Chu Chhandamna bawmah chuan ‘tihthianghlimna’ te, ‘tihropuina’ te a la awm nuai mai. Tihthianghlimna chu tawngkam danga ‘Kristian nun’ kan tih hi a ni mai bawk a. Krista felna hmehbel saka kan awm tawh lanchhuahtirna hna a ni a. Chu chu Thlarau Thianghlim tanpuinaa Chhandam fate tih tur ni mai lovin an tih ngei ngei thin a ni. Thiamchantirna nena then hran miah loh tur a ni bawk. Thi hnua ropuina tawp lo changa Pathian hnena chawl tura Vanram kai (tihropuina) nen hian thil pakhat, sawi hran ngai angreng si, hrang miah si lo, ‘Trinity’ ang vel a ni mai awm e.

𝐊𝐡𝐚𝐰𝐧𝐠𝐚𝐢𝐡𝐧𝐚 𝐚𝐯𝐚𝐧𝐠𝐚 𝐫𝐢𝐧𝐧𝐚𝐚 𝐜𝐡𝐡𝐚𝐧𝐝𝐚𝐦

Hei tak hi thu ropui kan buai chhan ni si thin chu a ni a. Mihring dana mahni tih that leh that loh tehfunga hmana tling chin leh chin loh sawi theih chu ni se kan ngaihtuah thiam tur a ni a. Mahse, hlawh chhuah miah loh thilthlawn pek a nih miau avang hian hriat thelh leh hriat pelh hlek a awl thin a ni. Pathian khawngaihna hnathawhah chuan misual chuan Isua rinna a neih veleh Chhandamna duhawm tak chu a chang ta ruau mai a. Amaha awm thil tha eng emaw Pathianin a hmuh vang a ni hauh lo va, Pathian khawngaihna a dawn vang chauh a ni. Chhuan tur a awm hauh lo. Amaherawhchu, (hei hi a pawimawh) Chhandamna thilthlawnpek a dawnah chuan ‘thiamchantirna’ (mi fela puanna), ‘tihthianghlimna’ (Kristian nun), ‘tihropuina’ (Vanram kai) te a lo awm ta teuh mai a ni zawk. Chu tak chu a ni – chhandam tawh (sual ngaihdam tawh), chhandam mek (sual laka then hran mek) leh chhandam tur (sual awm lohna la awmtir tur) an lo tih thin chu. Chhandamna neitu nunah chuan heng zawng zawng hi a hun teah a lang zel dawn a ni.

Chuvangin ringtu nihna, Chhandam nihna chungchang hi sawi liam puat puat a felhlel fo ang. Thiamchantirna lai uar vak a, Kristian nun sawi thlen loh palh chu a tawngchham dawn a, a kim hleithei dawn lo a ni. Kan chin fo chu thiamchantirna atanga tihropuina kai nghal hmiah mai zel hi a nia! Piangthar tura mi kan duh luatah Chanchin Tha kan thlahdul palh hlauh chuan a fel lo ang. Mi thenkhatin an ching fo lehnghal a! Chhandamna Chanchin Tha kan sawiin a kimin ‘tihthianghlimna’ (Kristian nun) tel ngeia sawi a, hriat thiam pawh hriatthiam tur a ni. Chhandamna changtu atana min siamtu Thlarau Thianghlim chuan a suihzawm vek si a. ‘Free admission, mahse inadmit-na chuan tha taka zir tura class kal te, lehkha chhiar te a tel tlat,’ tih ang deuh a ni. Chhandamna huanga admit turin keimahni lam tlinna certificate a en hauh lo va, mahse min admit ve tawh si chuan a chhunga zirlai awm te chu min zirtir leh kan zir ve ngei ngei a keng tel tlat a ni.

𝐂𝐡𝐡𝐚𝐧𝐝𝐚𝐦𝐧𝐚𝐚 𝐭𝐡𝐢𝐥𝐭𝐢𝐡 𝐭𝐞𝐥 𝐭𝐥𝐚𝐭 𝐡𝐢

Mi tam tak chuan mihring thiltih tel lo Chhandamna an duh thin a. Hei hi an tihsualna niin a lang. An man fuh loh thin chu ‘thiltih’ (deed) leh ‘hlawh chhuah’ (merit) an ngaihpawlh vang a nih a rin awm. Chhandamna chu phu loh malsawmna a nih miau avangin hlawh chhuah tur a ni lo hrim hrim a, a nihna takah chuan hlawh chhuah zawh pawh a ni lo. Amaherawhchu, chu hlawh chhuah loh, khawngaihnaa dawnah chuan Pathian ‘duhzawng tih’, ‘thil tha tih’, ‘Kristian nun,’ ‘sual dona nun,’ ‘mihring hlui zia paih,’ a lo tel khiau si a. Hlawh chhuah tum ni miah lovin Chhandamna changtu chuan Chhandamtu duh zawngin a nung ta thin a ni. Lunghlu mawi tak a tuamtu lung pangngai atanga kher chhuah a tul thin ang hian amaha belsak ni tawh Krista felna chu he khawvel sual takah hian a lan chhuah theihna turin ni tina a kraws puin leh a taksa inthawina thianghlim atana hlanin a bei thin zawk a ni. Chu chu ringtua Thlarau Thianghlim hnathawh dik tak chu a ni a. A chhan pui ber pawh Thlarau Thianghlimin rinna leh thiltih te chu Isua Krista ringtu nuna a suihzawm tlat vang a ni mai e.

*****