𝐓𝐀𝐖𝐍𝐆𝐓𝐀𝐈 𝐓𝐇𝐔𝐏𝐔𝐈 𝐀 𝐕𝐀 𝐓𝐀𝐌 𝐄𝐌!

Covid-19 hripui avangin khawvel pumpuiin kum 2020 leh 2021 te kha kan chan a tih theih hnuah lei rem kan rap tan chauh emaw kan ti a, hripui tel tawh lo mah se kum 2023-ah meuh pawh hringfate buaina khawp thil a thleng hnem khawp mai. Khawvel hian a tha zawngin hma a sawn hlawl lo emaw tih mai a awl a nih hi. Thiamna a chher chhuah tawh zawng zawng, hriatna a hai chhuah tawh zawng zawng, finna a zir chhuah tawh zawng zawngte hian inhuat, innghirngho leh intai te hi a tibang thei lo emaw tih mai tur a ni. Mawl lai thil nia kan ngaih te pawh kan tual zawl ngeiah a thlengin chanchin duhawm lo kan dawng awl lo a nih hi. Ringtute nasa lehzuala kan tawngtai a, rim lehzuala Pathian min kohna ‘Khawvel Eng’ leh ‘Lei Chi’ kan nihna kan phur chhuah a ngai dawn a ni. A bul tan nan tawngtai thupui tur a va han tam si ve le:

𝟏. 𝐑𝐮𝐬𝐬𝐢𝐚 - 𝐔𝐤𝐫𝐚𝐢𝐧𝐞 𝐈𝐧𝐝𝐨𝐧𝐚

He indona hian kum 2 a awh ta. Ni 24.2.2022-a Russiain Ukraine a va run khan kar 2/1 bak tang zo turah a ngai lo a ni awm e. Kum 2 a ral dawnah pawh an la inbei rup rup reng a nih hi. Nunna chan leh thil tihchhiat a nasa tawh hle. August 2023 khan United States chuan thi leh hliam Nuai 5 vel awm tawh angin a chhut a. A dik tak hi tuman hre thei lo mah se a tak chu hei aia tam turah an ngai bawk. Chu chu Mizoram mihring zawng zawng zahve vel a ni a, rapthlak tak a ni.

Ukraine ram chhunga mahni awm hmun raltlan san mi nuai 8 vel leh ram danga raltlan chu aia tam niin an sawi. Hemi bakah hian in leh ram tihchhiat zawng zawng leh indo senso phei chu chhut chhuah harsa khawpa tam a ni. Indopui II-na hnu lama inbeihna nasa ber a ni tawh a, ban an la tum lo. Indona hi mihring thih tam lam chauha teh theih a ni lo va, nun leh ram a tihchhiat hi pawi thui tak a ni. Ei- bar chungchangah ringawt pawh ngai awh leh turin kum tam tak a ngai thin. Tin, mi tam zawk hi chuan a thu hi kan ngaithla liam ve mai thin a, a tuartu tak takte hmakhua chu thim tak a ni tih i hai lul lo vang u.

𝟐. 𝐈𝐬𝐫𝐚𝐞𝐥 – 𝐇𝐚𝐦𝐚𝐬 𝐈𝐧𝐛𝐞𝐢𝐡𝐧𝐚

Israel leh a chhehvela Arab ho inrem hleithei lo leh innghirngho reng thu hi chu thil thar a ni lem lo va. Hun engemaw chen chu ‘indo’ em lova an ngawih vang vang hnuin kum 50-na hnua nasa ber tih theih chu nikum khan a rawn irh chhuak leh ta hlauh mai. October 7 khan Hamas (Gaza Muslim pawl) ten Israel ram lamah rocket 5000 vel chu minute 20 vel chhung chauhvin an han kap lut tehreng a nia. Israel pa te thin thawk pawhin a chhang let na rem rem hle a ni.

Hamas hovin an beih chhan nia an sawi chu – Israel sorkarin Gaza strip atanga bungraw chhuak leh lut a control tlat duh lohna, Palestina mite chunga Israelte hleilenna hluar, leh Palestina mi tam tak tang awm mekte chhuah tura nawrna te an ni ber a. Keini ho zinga tam zawkin Israel hi han tan sa ngawt thin mah ila, Palestinian ho ngaihdanah chuan Israel sorkar hi huatthlala tak a ni ve tho a. Hetianga beih thut hi dem tlang viau mah se, Israelin a beih let nasat dan em em hi hleihluak an tiin ram dang dem a hlawh viau a ni. Tunah hian mi 22,000 vel lai thi tawha report a ni a. Tunah pawh an la inbei reng tih hria ila.

𝟑. 𝐌𝐚𝐧𝐢𝐩𝐮𝐫 𝐁𝐮𝐚𝐢𝐧𝐚

Nikum chhunga kan suangtuah lawk miah loh thil thleng chu Manipur buaina, Meiteiten Zohnahthlakte an beihna hi a ni a. Rinaiin he buaina hian a daih rei ta a, engtikah tak tawp ang maw? Keini ang ngaihtuah phak chinah chuan a tawp dan tur pawh hi hriat thiam a har tawh hle a ni. Meitei lam hian Zohnahthlakte hi ningin Manipur atanga hnawh chhuah an tum a ni a. Chuti maia inhnawh chhuah chu thil theih a nih hmel lem lo va. Hetih lai thung hian, Imphal phai atangin Zohnahthlakte hnawt chhuak mah se, tlang ram lamah an awm ngam bik chuang lo va, tlang leh phai inthenna fel tak a lo awm a ni reng mai a.

Zawhna tam tak - Eng tikah nge an chen ho leh theih ang? Inrelbawlna hran (separate administration) pe lo hian inremna hi at thleng thei ang em? Separate administration hi pe dawn ta se Meitei ho chuan an thil tum an hlawhchham chhiava a ni dawn si, a sawhkhawk eng nge ni ang? A har khawp mai. Hetih lai reng hian mipuiin an tuar a, khawsak a harsaa, Krismas ruai theh pawh an awm lo hial a nih kha. Kan mite harsatna hi i hriatpui reng ang u.

𝟒. 𝐑𝐚𝐦𝐩𝐮𝐢 𝐏𝐨𝐥𝐢𝐭𝐢𝐜𝐬

Mizote hi India mi nihnaah hian kan nghet tawh hle a, a chhan chu India hian kan beiseina leh kan mamawh min phuhruksak dawna kan hriat nghet tawh vang a ni a. Tunhnaiah hian rampui sorkar (central sorkar) lam kalphung han bihchian hian min hnar riauva hriatna te a awm thei dawn dawn ta mai. India ram a lo din dawn khan hnam tin, sakhaw tin, chi tin lenna sorkar ‘secular state’ siam tumin tan an la nasa hle. ‘India ram hi Hindu ho ta bil a ni a, Hindu kalphungin a kal tur a ni,’ tih tumtute kha an rapbet zo a. Amaherawhchu, chu ‘Hindutva’ zung chu a thi bik hauh lo va, zung kaih zelin rampui sorkarna changtute an lo ni ta hial a.

Kum 2014 inthlanpuiah khan hemi pawl hi an chak a, 2018-ah an chak lehzual bawk a, kuminah hian an la chak zel ang em tih chu mi tinin kan thlir thup a ni. India hmar lam ‘Hindu heartland’ an tiha an chak chhoh dan thlir hi chuan an chak leh ringtu an tam a, mahse India chhim lamah thung hnuhma an nei hleithei lo hi an lu tihaitu a ni ve tho. Hetih lai hian, keini Mizo Kristiante pawhin sakhaw zalenna humhalhtu tur leh kan Lalpa Chanchin Tha zalen taka kan hril theihna tur sorkar kan neih theih nan kan tang ve tur a ni ang. Hindutva hi chuan Kristian sakhua hi ram dang sakhua, India sakhua ni ve lo, angin a ngai tlat mai si a. Chuvangin, tunlai rampui politics hian thlarau lam thil a kaihhnawih thuk hle tih hriat thiam a tha ngawt mai.

𝟓. 𝐒𝐨𝐫𝐤𝐚𝐫 𝐓𝐡𝐚𝐫

Mizoram hi state naupangte a ni a, kawng tam takah state dangte tluk lo mah se demawm a ni hauh lo. Amaherawhchu, kum 40 dawn kan ram kalphung leh kechheh dan chuan mipui a tilungawi zo tawh ngang lo va, tun hmaa sorkar thinte kha hnawlin sorkar thar hlak tih theih kan nei ta run mai. Kum 2023 chhunga kan hlim tlanna ber pakhat a ni mai awm e. Kan hriat reng tur erawh chu – ‘mi tin beisei a sang em em a, ram leh hnam hruai hi thil awlsam a ni lo,’ tih hi a ni.

Kan ram hi state dang nena tehkhin chuan ram nuam a ni a, mahse Kristian ram kan nihna atanga tehin kan hlawhchham thui viau bawk a ni. Sorkar thar hian ‘Krista Chanchin Tha nena inmawi’ ram rorelna kan neih theih nan tan han la sauh sauh sela. ‘Mi tha tak,’ nih ringawt te, ‘Corrupt loh,’ ringawt te, ‘Kalphung thar,’ tih ringawt te hian ram a siam tha dawn lo va, ‘Finna’, ‘Thiamna’, ‘Hmathlir’, ten a thuam tel a ngai dawn a ni. ‘A ngaihna hria,’ nih a ngai. Kan Zoram kalsiam hawi zawng hi han sawn dawrh teh se. Kan duhsakna kan hlan a ni. India ramah Mizoram, Nagaland, Meghalaya te hi ‘Kristian hmel’ an nih miau avangin kan ram hruai hna hi thlarau lam thil a ni tih hai theih a ni lo.

𝐀 𝐡𝐧𝐚 𝐩𝐮𝐢 𝐛𝐞𝐫 𝐳𝐚𝐰𝐤 𝐜𝐡𝐮

Mi tam zawkin tawngtaina hi a hna tak kan thawhna kawnga belhchhahtu maiah an ngai a, thenkhat phei chuang beidawn tawpa tih chi chauhvah an ngai chawk. Tawngtai hi hna hmasa ber leh tul ber a ni tih kan hriat thar a tul. Kan ban phak leh phak lovah Pathian duh loh zawng thil tam tak a thleng a, engmah ti thei ve lo anga inngaih a awl khawp mai. Hna pawimawh ber ‘tawngtaisakna’ kan nei thei tih hriat a pawimawh e. Kan tawngtai loh chuan kan fail sa a ni reng zawk. Tichuan, indona leh innghirnghona te hi a lo reh theih nan te, rampui sorkar leh kan ram sorkar tan te dil awl lo ila. Kan ram hruaitute phei chu thahnemngai takin i tawngtaisak mawlh mawlh teh ang u. An mamawhna a sang em mai.