𝐀𝐘𝐎𝐃𝐇𝐘𝐀-𝐀𝐇 𝐑𝐀𝐌 𝐓𝐄𝐌𝐏𝐋𝐄 𝐀𝐍 𝐇𝐀𝐖𝐍𝐆 𝐃𝐀𝐖𝐍 𝐓𝐀

Tunlaia India ram pumpuiin a buaipui rawn ber chu vawiin January 22, 2024 –a Ayodhya, Uttar Pradesh hmuna Hindu Pathian Rama temple an hawn tur hi a ni a. He thil hi chanchin thui tak nei leh Hindu - Muslim boruak tha lo thuk tak inphum a nih mai piah lamah India secularism kaihnawih thil a nih avangin mi beng a verh lo thei lo va. Kum 2024 inthlanpui thlir renga PM Modi-a leh a pawl ten boruak an siamna hmanraw tha a nih hmel avang pawhin ngaihthah theih a ni lo. Chuachhapah, India ram hi Hindu ho ta a ni, tia tang pawl ten an thiltum lian ber pakhat, rei tak an sual tawh, tihhlawhtlinna pawimawh a nih dawn miau avangin chutianga ngaitute (Hindutvadis-ho) tan chuan thil ropui leh chhinchhiah tlak tak a ni.

 

𝐀𝐲𝐨𝐝𝐡𝐲𝐚 𝐁𝐮𝐚𝐢𝐧𝐚

Ayodhya hi Hindu pathian Rama pianna hmun niin an ngai a. An sakhaw lehkhabu Ramayana pawh Ayodhya ram leh a chhehvel behchhan a ni nasa viau awm e. Rama pianna hmun tak nia an ngaihah hian tunhma chuan Hindu temple a awm niin an sawi a. Chu chu Muslim lal Babara khan tichhiain a hmun takah chuan Muslim ho masjid (pathian biakna hmun) a sak hnan ta niin an sawi a ni bawk. He Babri Masjid hi kum 500 dawn a lo ding tawh a (1528-a sak), he Masjid awm hma hian temple chu a lo awm reng em, tih chu sawifiah hleihtheih a ni tawh lo. Archeological Survey of India –in Masjid ni lo building eng emaw chu lo ding tawh angin an report a, India historian leh mithiam dang thenkhat chu Hindu temple a nih lohzia lamah an tang na hle thung. Eng pawh ni se, Hindu firfiakte chuan awm angin an ngai lui a, Bapri Masjid chu thiat a, Ram Mandir sak chu an tum nghet hle a ni. Kum 1949 khan he Muslim biak in chhungah hian Rama leh Sita lim tuten emaw an lo va dah a. Jawaharlal Nehru khan la chhuak turin a ti a, mahse tuman an la chhuak ngam lo a ni awm e.

BJP mi hrang LK Advani a vanglai 1984 chhoah khan he boruak hi a sosang nasa hle. December 6, 1992 khan kar sevaks (Hindu volunteers) 150,000 vel inhawr khawmin Muslim ho biak in Bapri Masjid chu ni khat thilthuah an chhu chhe ta vek mai a. Hmanlai building ngang a nih avang khan a har lo viau a ni awm e. A sawhkhawk pawh a na – Mumbaiah bomb a puak nawn awn awn a nih kha. Kum 2019 khan Supreme Court-in thu a titlu ta a: 1. Babri Masjid tihchhiat kha thil dik lo a ni, 2. He ram hi sorkar ram a ni. 3. He hmun taka Ram Mandir sak phalna hi sorkarin a pe. 4. Muslim-te tan Masjid sakna tur ram sorkarin a pe bawk ang. A thu han en mai pawh hian Hindu firfiak deuh ho duh dan tak a ni a, Muslim ho chuan an Babri Masjid leh a dinna hmun chu an chan ta tih a chiang a ni.

 

𝐑𝐚𝐦 𝐓𝐞𝐦𝐩𝐥𝐞 𝐜𝐡𝐮

Muslim ho biak in chhu chhiaa Ram temple han din ngat mai chu eng nge a tul em emna ni ta ang? Ayodhyaah an pathian Rama chu lo piang pawh ni ta se kha hmun chiah kha a ni tih tunge hria ang le? Engvangin nge Babri Masjid dinna ni lo hmun dangah an sak mai loh? Thuruk inphum chu - Hindu hovin hnehna an chang tih a entir vang ni ngeiin a lang. India ram hi Muslim ho leh Sapho awpna hnuaiah an lo awm ve ve tawh a. Sapho chu an haw fel then a, mahse Muslim ho erawh chu cham hlenin (India mi tam tak Islam an lo zui ve tawh bawk nen) an pung telh telh emaw tih tur a ni a. Hindu firfiakho chuan hun kal tawh leh hun lo awm zel tur dawnin hnawk an ti ta viau a ni awm e. Babri Masjid awmna hmun ngeia an pathian Rama Temple a rawn ding leh a nih chuan Muslimho lo rahbeh tawhna ata tho chhuakin an lehthal ve ta tih a entir a ni ngei ang. PM Modi hian a ngai pawimawh nangiang ni tur a ni, India Independence sual tluk hiala tul niin a sawi, an ti.

Ayodhya hmuna Ram Temple an hawn tur hi khawvel pumpuia Hindu temple lian ber 3-na tur niin an sawi hial a. Ram Lalla (naupang Rama lim) hi he temple lailum luahtu tur a ni. Temple leh a chhehvel hian acre 70 a delh a, a temple bik zau zawng hi - a vang ft 250, ft 380-a sei leh ft 161-a sang a ni dawn a ni. Tha tawk ren rawn tak a ni. Ahmedabada Sompura chhungkua, khawvel pumpuia temple 100 vel lo sa tawhten a sak hna hi an thawk a. Ban 366 a nei a, ban tinah Hindu pathian lim 16 zel a awm bawk a. A building hi chhawng 3 niin, gate 12, inthawina hmunpui 5 leh lecture hall, etc., hmun tam tak a awm dawn a ni. Ni khatah mi 70,000 velin tlawh thei tura ngaih a ni a. Thil mak ve tak chu he temple sak hmanrua atan hian thir an hmang miah lo hi a ni.

 

𝐒𝐚𝐰𝐢 𝐧𝐞𝐮𝐡 𝐧𝐞𝐮𝐡

He Ram temple hawn tur hi a phusa ber BJP chuan politics thila hman tangkai a tum nasa hle tih hriat theihin hawnna program hi a hmanhmawh nasa a. Chutih laiin Congress Party chuan a hawn inkhawmah an tel loh tur thu an puang tawh a, “Hei hi Hindu sakhaw thil ni lovin, Modi-a leh RSS-te politics thil mai a ni,” an ti ve tlat mai a. Vote an hloh pha ang nge an hmuh tam phah dawn ka la hria ang chu. Chutih laiin Trinamol Congress hotunu Mamata Bannerji chuan a hawn ni takah khan Bengalah Rally (kawng zawh) pui tak neih a lo tum ve mek bawk a. India ram Muslim political party All India Majlis-e-Ittehadul Muslimeen (AIMIM) hotupa Asauddin Owasi chuan thangtharte lo fuihin, “Babri Masjid an laksak tawh che u a, a dang pawh an tum zel lovang tih a sawi theih loh. Fimkhur rawh u,” a lo ti mek bawk a. Mak tak mai chu Hindu sakhaw hotu lian ber Shankaracharyas an tih 4 ten (Uttarakhand, Odhisa, Karnataka leh Gujarata awm te) tel an tum lo tlat hi a ni. “Temple zawh fel hmaa hnawhsaruma hawn tum hi Hindu dan kalh a ni a. Shastra an zawm kim lo a ni. Tin, hindu temple hi sakhaw thil a ni a, politiciante hawn chi a ni lo,” tiin hawngtu tur India PM Pu Modia an kheng na ve khawp mai. 

He temple sak hna hi Shri Ram Janmabhoomi Teerth Kshetra Trust kuta dah a ni a, sum pawh an khawn nghal bawk. An tih tan ni atangin cheng vaibelchhia (VBC) 3500 vel thawh chhuak tawhin an sawi, temple sak nan liau liaua an sen hri Rs. VBC 1800 vel a ni tura ngaih a ni (www.thehindubusinessonline.com). Sorkar pawh theihtawpin a tang tih theih a ni a. International Airport te, hotel changkang tak tak, kawng mam tha, khawvela solar power streetlight thui ber, electric bus, adt., siamin mi hip an tum nasa hle.  The Week Magazine-in a sawi danin Uttar Pradesh CM hnena December 28, 2023-a reportah chuan – project 178 phal tawh zingah 101 kal mek; Rs VBC 29605.55 budget hemi kaihnawih atana hman phalna pek tawh; government department 37 te thawk tura thupek, 30 ten an thawk mek; kawng siam that nan ringawt Rs VBC 1019.4 hman tura tih. Maharishi Valmik International Airport siam nan ringawt pawh central leh state sorkarin Rs VBC 1463 sengin an insawi (TOI Jan 17, 2014). Hetih lai hian Ayodhya velah ram a hlu chho hle a ni awm e. A vela mite khawsakna pawh nasa taka chawi kang meka sawi a ni. Tun thla 2 chhung hian mihring VBC 2.5 velin he hmun hi an tlawh an ring.

 

𝐍𝐠𝐚𝐢𝐡𝐯𝐞𝐧𝐢𝐧 𝐧𝐠𝐚𝐢𝐡𝐭𝐮𝐚𝐡 𝐮𝐥𝐚

Kan sawi tawh angin he thil te lo tak mai awmzia leh a sawhkhawkte kan ngaihven a, kan ngaihtuah a ngai. Tunhmaa ram hruaitute tih duh miah loh sakhaw pakhat thiltiha central leh state sorkar fung chelhtute an phusa viau mai leh ngaih pawimawh bera an nei hian thil tam tak a kawk a. Hindutva a inbilh thukzia a lang lo thei lo a ni. Hetih lai hian Muslim-ho rilru chu a na ngawih ngawih ang tih chu hriat sa a ni a, mahse tumahin an bengkhawn lo emaw tih mai tur a ni thung. Shankharacharya-ho sawi ang khian sakhaw thil ni mai sela chuan tuman sawi theih kan nei lovang. A nihna takah chuan sakhaw mi Hindu dik takte rilru tinatu a la ni thei zawk ang tih sawiin Political Science Professor Dr G Ramachandram chuan, “Engtin nge Hindu sakhaw zuitu thangtharten mosque chhut chhiatsak chunga mandir sak hi an hriat thiam theih ang le? India pathian tam tak zinga lar ber pakhat Rama temple hetiang chunga sak a nih hi India nihphung nena inhmeh lo ber a ni. He templea an kal sakhawmi tak takte chuan hrehawm an ti kumkhua tawh dawn a ni,” a ti. An pathian Rama ber pawh chuan hria se na  ti ngawih ngawih zawk awm a ni.

India Kristian Scholar Vishal Mangalwadi chuan January 15, 2024 khan kan PM lehkha thawnin, “Milem biakna hi India politics nena kaih kawp chu i lo hlawhtling ta a. Hindutva kalpuituten India hi Hindu rama an siam theihna kawng mellung pawimawh tak a ni tih kan hrethiam e. India ram dintute khan hmasang thawnthu ang chauh pathian leh pathiannute biak an sawi mawi loh thin chhan ka han hrilhfiah zawk teh ang che...Mihring siam chawp biakna chuan India ram a tithuanawp thin a... Thil siam betute chuan thilsiam chunga rorel emaw, hman tangkai emaw an thiam thei ngai lo. A chhan pawh thutak zawng tura siam, thutaka innghat tura siam kan nih vang a ni. Pathian ram kan zawn a, a duhzawng tih kan tum tlatna hian hringfate tan hmasawnna a thlen thin a ni zawk a. Hmasang thawnthu leh thuvuvuk te chuan engemaw chen chu min tihlim viauin thu tha tak tak pawh a awm nual thei bawk ang. Mahse, thuvuvuk phuahtute siam ‘pathian’ kan biak phawt chuan mahni leh mahni inbumna khuarkhurum mawng nei lovah kan tla tihna a ni,” tiin. 

Eng pawh ni se, India ram nihphung, India politics, leh sakhaw zalenna kaihhnawih nasa tak thil a thleng tih i hre phawt mai teh ang.

****