𝐂𝐇𝐀𝐍𝐂𝐇𝐈𝐍 𝐓𝐇𝐀 𝐇𝐑𝐈𝐋 𝐋𝐄𝐇 𝐑𝐀𝐌 𝐂𝐇𝐀𝐍𝐆𝐊𝐀𝐍𝐍𝐀 𝐒𝐔𝐈𝐇𝐙𝐀𝐖𝐌 𝐀 𝐓𝐔𝐋 𝐓𝐀𝐖𝐇

Nimin piah January 11 khan state holiday meuh puangin ‘Missionary Day’ kan hmang a. Kan pioneer missionary te hlutzia leh khawvel pumpuia Chanchin Tha hril tur kan nihziain rilru a hneh thar hle. Chanchin Tha hlutzia leh hril hna pawimawhzia inzirtir hi a tul reng a, thangthar mi tha an inpek zel a ngai. Tun hnaiah hian kan uar tawk ta lo emaw a tih theih hial a. Khawvel dinhmun en hian Pathian khawngaihna avanga kan kawl Chanchin Tha  a mamawhzia  a chiang viau thung a ni. Chutih lai reng chuan he thil hlu ber kawltute hian kan thil kawl hi kan rula raw neih mai mai emaw tih theihna chhan tam tak a awm. Talent khat dawngtu anga utawk tur vawn ve ngawt hi Chanchin Tha nihphungin a kalh a, Chanchin Tha hrilin a ngeih loh ber a ni dawn si a. A nih tur ang tak hi ni zo sela chuan kan ram leh hnam hmel pawh a tidanglam uar uar tur a ni sia.

𝟏. 𝐌𝐚𝐧 𝐟𝐮𝐡 𝐚 𝐡𝐚𝐫 𝐚 𝐧𝐢𝐚𝐧𝐠 𝐞

Chanchin Tha hi kan ram leh hnam lipse vektu tur a ni tih hi man fuh harsa kan ti thin khawp mai. Kan sorkar policy kaihruaitu tur leh kan eizawn dan piah lamah kan hnathawh dan zawng zawng luan chhuak a, chiah zawp vektu tur a ni tih hi kan piantharpui hleithei lo. Pathian Thu kan duh chin pawh hi kan mimal harsatnate min sut kian saktu leh kan inchhung buaina min lak kian saktu ang vel atan a ni ber a. Kan ni tin hna, kan chhungkaw policy, kan thawh ber tur thil min hrilhtu atan a ni tih kan hre hleithei lo a ni ber e. Hemi kawngah hian Setanan hlawhtlinna ruam a la ngah a ni mai thei. A awm ve tho mai. Kan mit tivai tur hian a tang nasa dawn em!

Chik takin han thlir ila tunhnaia kan ‘harhna’ hlimpui tak takte pawh hi min tihlim thar leh boruak thar min pe thil an ni deuh mai emaw tih theih a ni a. Heti chauh pawh hi ni se hlu tak an nih dan phei chu a awm ngei e. Mahse harhna dik tak kan ni tin nun min tihdanglamsak vektu leh kan ram hmelhmang tidanglam dawrh zo kan mamawh ta a nih hi. I tawngtai nasa ang u. Thlarau Thianghlim hnathawha kan ngaihte pawh min tihlim er er leh min lamtir mup mup zo boruak nu angreng tak te a ni tlangpui tawh a. Finna leh thahnemngaihna, thianghlimna leh remhriatnaa min thuam theitu leh ram tihhmasawnna kawnga min nawr zotu thlarau lam a ni pha meuh lo. Ram siam tha dawrh zo harhna kan mamawh a nih hi!

𝟐. 𝐂𝐡𝐚𝐧𝐜𝐡𝐢𝐧 𝐓𝐡𝐚 𝐧𝐞𝐧𝐚 𝐢𝐧𝐦𝐚𝐰𝐢 𝐫𝐚𝐦

Kan ram hi Chanchin Tha nen a inmawi em? tih zawhna hi kan chhan theuh a tul a. A dikna kan hriat a ngai! Nikum inthlan campaign hlapuia ‘corruption’ kan sawi hluar lutuk te kha ka lo ip deuh chawih chawih a. Kan sawi uar ta lutuk mah mah emawm ka lo ti hial zawk. Kan Governor zahawm takin Assembly a address-na hmasaah ‘corruption’ tihbo a tulziate a sawi vak mai kha - a ni Kristian pawh ni lem lo min hriat dan tur chuan a va han duhawm lo em! Mizoram hi state dangte ang em ema ‘corrupt’ ang chuan ka la pawm phal hauh lo mai. Mahse, kan tih tur tak ti fuh hleithei lo leh kan nih tur ang ni pha lova awm reng hi pawi zia ka hmu pha ve rei ruai a. Chanchin Tha dik taka hril chuan khawtlang thatna a kawk ngei ngei a, khawtlang thatna atana thawh pawhin Chanchin Tha hrilna kawngah sawhkhawk a nei ngei ngei thin a ni.

Chanchin Tha chu ‘chatuan nunna’ thu a ni a. He khawvel piah lam zawm nun a nih miau avangin he khawvel tehfung ringawt chu a tawk hauh lo vang. Chutih laiin chatuan atan pawha thu hlu tling chu he lei atan phei chuan a hlutna khawrh chhuah sen loh a ni ngei ang. Chanchin Tha hmel mawi lang fiah hleithei lova kan ram a la awm a nih chuan a bul atanga kan zir that a tul a ni zawk ngei ang. Kan lo hriat dan a ningnelin a kim lo deuh pawh a ni mahna. Tunlai tehfung atanga teh thiamten teh sela Chanchin Tha nena inmawi ram kan la nei ngang si lo va. Hemi hre phak ram hruaitu, politician, Kohhran hruaitu, khawtlang hruaitu kan va mamawh tak em!

𝟑. 𝐒𝐮𝐢𝐡𝐳𝐚𝐰𝐦 𝐚 𝐧𝐠𝐚𝐢

Chanchin Tha leh changkanna, Pathian Thu leh ram hmasawnna kan suihzawm a tul tak tak tawh a. Hetiang ti lo hian kan intihlim rei ta mah mah a nih hi. Kristiante chuan ‘changkanna’ a nih vang ngawr ngawrin kan um tur a ni lo va, ‘hmasawnna’ ngawr ngawrah kan lungawi zo hek lo vang. Amaherawhchu, he India ram, Hindu 80%, Muslim 15% a nihnaah hian Kristian ram chu an mithmuha ‘changkang’, an hriat dana ‘hmasawn’ a nih a ngai. Chu chuan kan Chanchin Tha hril hnaah sawhkhawk a nei ang a, kan rinna hlutna an teh thiam ang. Kan Chanchin Tha hlimpui leh hril hi a tha tak tak em?, chatuan chu sawi loh damchhung atan a tha tawk em?, tih chu kan ram nihphung an enin an hre thiam mai dawn a ni. Keini pawhin Chanchin Tha hlutna hi 'van kai leh kai loh, thih hnua hriat chauh chi' mai a ni lo tih pawm thiama, kan lantir a tul ta. Kan Revival Speaker te pawh hian heng thute hi sawi uar mawlh teh se!

‘Kristiante chu kan khawsak a nuam tur a ni,’ ka ti mawl tawp lem lo. Tunlai American Prosperity preacher ho angin hausakna/hriselna leh kraws pu-a Isua Krista hnungzui ka suihzawm thiam hauh lo mai. Mahse ka sawi hi chu Kristian ramah hian midangte hma an sawn theih nana hnathawh hi a awm tur a ni, mahni inchhekarbawm aiin midangte changkanna buaipui hi a tam tur a ni, ka tihna a ni zawk. Thlarau leh taksaa midangte tana malsawmna nih kan buaipui chuan ramin hma a sawnpui lo thei lo. Chutiang ram, ‘khawizu leh hnute tui’ luanna ram kan din hunah chuan kan Chanchin Tha hril chu bengkhawn loh theih loh a ni ngei ang le. Kum 1800/1900 chho va Europe rama missionary tirh tau a teh a, kan ram kilkhawr ber pawh a rawn thlen, a hlawhtlin em em chhan kha maw – Europe kha khawvel ram zawng zawng chung en thup an nih pakhat vang a nih ka ring tlat. Kristianna hmel an titha a, ram hmasawnna leh Chanchin Tha an suihkawp thiam vang a nih pakhat kha maw. Taksa leh thlarau tana itawmin an lantir thei si a.

𝐄𝐧𝐠 𝐭𝐚𝐤 𝐬𝐚𝐰𝐢 𝐚𝐧𝐠 𝐦𝐚𝐰 𝐥𝐞?

Missionary rawng thleng hmasa William Williams te, rawn chamchilh hmasa Pu Buanga leh Sapupa te hian tuna kan dinhmun hi rawn hmu nge eng tin nge aw min fuih hlawm ang? Han zeldin chhin ta ila: “Zofate u Chanchin Tha hril zel rawh u aw...Chanchin Tha chauh hi Pa hnen kan thlen theihna tur thu awmchhun a nia. He thu hlu ber hi a la hre lote hriattir zel ang che u.  Amaherawhchu, tunlai khawvel inpawhtawnna tha tawh takah hian intirh chhuah mai leh inhrilh ngawr ngawr chauh hi a tawk tawh lo a nia. Miin an hre chiang tawh si che u a. Chanchin Tha nunpui ram in nih a ngai. Mizoram kha ringlote chung en khawpa ‘hmasawn’ leh ‘changkang’-a insiam a ngai. Chanchin Tha hmel in ni si a. In ram leh in nunah khawvelin in Chanchin Tha kawl rah leh a hlutna an hmuh a ngai. Chanchin Tha leh ram hmasawnna hna hi lo suihzawm tawh rawh u. A pawimawh a nia!” an tih i ring em le? Kei chu ka ring deuhroh tlat a ni.

“...𝒐𝒖𝒓 𝒑𝒓𝒐𝒄𝒍𝒂𝒎𝒂𝒕𝒊𝒐𝒏 𝒉𝒂𝒔 𝒔𝒐𝒄𝒊𝒂𝒍 𝒄𝒐𝒏𝒔𝒆𝒒𝒖𝒆𝒏𝒄𝒆𝒔 𝒂𝒔 𝒘𝒆 𝒄𝒂𝒍𝒍 𝒑𝒆𝒐𝒑𝒍𝒆 𝒕𝒐 𝒍𝒐𝒗𝒆 𝒂𝒏𝒅 𝒓𝒆𝒑𝒆𝒏𝒕𝒂𝒏𝒄𝒆 𝒊𝒏 𝒂𝒍𝒍 𝒂𝒓𝒆𝒂𝒔 𝒐𝒇 𝒍𝒊𝒇𝒆. 𝑨𝒏𝒅 𝒐𝒖𝒓 𝒔𝒐𝒄𝒊𝒂𝒍 𝒊𝒏𝒗𝒐𝒍𝒗𝒆𝒎𝒆𝒏𝒕 𝒉𝒂𝒔 𝒆𝒗𝒂𝒏𝒈𝒆𝒍𝒊𝒔𝒕𝒊𝒄 𝒄𝒐𝒏𝒔𝒆𝒒𝒖𝒆𝒏𝒄𝒆𝒔 𝒂𝒔 𝒘𝒆 𝒃𝒆𝒂𝒓 𝒘𝒊𝒕𝒏𝒆𝒔𝒔 𝒕𝒐 𝒕𝒉𝒆 𝒕𝒓𝒂𝒏𝒔𝒇𝒐𝒓𝒎𝒊𝒏𝒈 𝒈𝒓𝒂𝒄𝒆 𝒐𝒇 𝑱𝒆𝒔𝒖𝒔 𝑪𝒉𝒓𝒊𝒔𝒕.”

(𝑻𝒉𝒆 𝑪𝒂𝒑𝒆 𝑻𝒐𝒘𝒏 𝑪𝒐𝒎𝒎𝒊𝒕𝒎𝒆𝒏𝒕, 2010)