𝐀 𝐌𝐀𝐊 𝐓𝐇𝐈𝐍 𝐌𝐀𝐍𝐆 𝐓𝐀𝐊 𝐄

He khawvelah hian thil mak tak tak a awm a, a thleng thin bawk a. Tun hnai mai a thil thleng kan buaipui deuh luai luai hi mak ka lo ti ve leh em em a. Harsatna leh buaina te hi loh theih lohva kan chunga thleng a awm theih laiin siam chawp buaina, ti lo ila buai loh mai na tur thilte pawh a awm ve a, chutiang chu tuna kan buaina hi niin a lang. Mizoram Kristiante chuan Pathianni hi Pathian chibai buk nan kan hmang thin a, mipui kaihhnawih thil dang reng reng chu he ni bikah hi chuan kan ti ngai lo tih hi tupawhin kan hriat a ni. Chuvangin, vote chhiar ni pawh hi a hma ni emaw, a tuk emaw kha ruat mai se chuan buaina a awm lo ni mai tur a ni.

𝐄𝐂𝐈 𝐡𝐮𝐧 𝐫𝐮𝐚𝐭 𝐝𝐚𝐧 𝐤𝐡𝐞𝐫 𝐡𝐢 𝐚 𝐦𝐚𝐤

Hman deuh khan Pathianni ah inthlan an rawn ruat ringawt tawh kha a ni a, khami tum khan Mizoram atanga kan dilna avangin an ti danglam ta nih kha. Inthlan buatsaih tura sorkar laipui rinrawl ECI meuh chuanan thutlukna in a kaihhnawih turte chu hre ve awm tak chu an ni a, an timak lu deuh tih loh rual a ni lo. Mizo Kristianten Pathianni kan hman dan te, kan khawpui ber pawh Pathianniah kher hi chuan a reh ruai thin tihte, hlimhlawp leh thildang engmah kan huaihawt ngai lo tih te chu tumahin an hai mawlh lo, Kristiante ni serh bawhchhiat avanga kan dawnsawn (react) dan tur pawh an hre lawk thiam hial ang. Chuvangin, ECI hian min chhaihin min bawl a ni ber lawm ni? A sorkar laipui thu leh hla lo hlein ka hre nghe nghe a, Mizo mipuite hi min nau ta lu deuh em ni dawn zawk le aw?

𝐏𝐚𝐰𝐢 𝐭𝐢 𝐥𝐨 𝐩𝐚𝐰𝐥 𝐚𝐧 𝐥𝐨 𝐚𝐰𝐦 𝐳𝐞𝐥 𝐡𝐢 𝐚 𝐦𝐚𝐤

Hetiang thil hi a lo thlen takah chuan pawi ti lo pawl pawh kan mite zingah ngei an lo awm leh ta zel a. Sawi mam dan chi hrang hrangte chu an thiam leh hriat ang angin an vawrh chhuak ta hlawm a, Pathianni theology te, Sabbath serh chungchangte, roreltute thu awih thute thlengin an vawrh darh ta chum chum mai a ni, a mak ka ti ngawt mai! Vote chhiar a ni emaw, ni lo emaw inkhawm lo tur tam tawk tak chu an awm ngei ang tih chu tlang hriat a ni a, sabbath serh thinte pawh an awm a, chu pawh tlang hriat bawk. Mahse, Mizo Kristian nawlpuite chu hemi niah hian kan Pathian chibai buk turin naupang, nula leh tlangval, nu leh pa kan phu suau suau dawn a ni tih chu a chiang sa reng mai a. Tin, mi zawng zawng deuh thawin kan ram hruaitu tura kan thlan tlinte chu tunge an nih tiin kan bengkhawn thup dawn avangin Pathian chibai kan bukna rilru pawh a tiphawklek ngei ngei dawn a ni.

𝐁𝐚𝐰𝐥 𝐭𝐡𝐚𝐦 𝐦𝐚𝐢 𝐦𝐚𝐢 𝐤𝐚𝐧 𝐧𝐢 𝐡𝐢 𝐚 𝐦𝐚𝐤

Kan ramah hian han inhampuar viau thin mah ila, rampui (central) lam atanga thlir hi chuan kan te lulai em mai a, ngaih pawimawh tham kan awm lo a ni ang e, “A pa tet nen, a rak ve leh hlat thin!” min ti liam mai mai thin nia ngaihbel theihin thil a thleng ta zauh zauh mai. Hetiang boruak hnuaiah hian min enkawltu hi kan tan pa nih a tlin leh tlin loh a lang chiang zual thin. Pa tha chuan a fate zinga a te ber pawh namnul mai lovin a ngaihsak thin tih kan hria a, a duhzawng leh a ngaihhlut zawng pawh a theihnghilh ngai lo. Pa tha lo erawh chuan a fate zing rau rauah ngaihpawimawh bik leh palzut bik a nei thin. ECI-in hetiang a a tih avanga kan lungawi lohna hian tul lova tha leh zung insenna a siam belh ta nual a, tul lovah min chaih buai kual thui ta hle a ni.

𝐓𝐡𝐞𝐧𝐤𝐡𝐚𝐭 𝐦𝐢𝐭 𝐚 𝐥𝐚 𝐯𝐚𝐢 𝐫𝐞𝐧𝐠 𝐡𝐢 𝐚 𝐦𝐚𝐤

Kristiante tana Hindutva ideology hlauhawmzia leh India ram tana a that lohzia thu hi vawi duai lo kan sawi tawh a, mahse, mi tam zawk chuan kan var pawh zo tak tak lo a ni, a mak hle mai. Ka ram leh ka hnam leh ka sakhua aiin keimah mimalin ka thatpui dawn nia kan hriatna hian kan mit a ti del tlat tih a chiang reng mai. Kum 5 kal ta kha niin ka hria, Churachandpur-a Theological College pakhat, ka thianpa Principal a nihna hmunah Hindutva hlauhawmzia ka sawi nghek mai a. Zawhna hunah chuan pa pakhat, pawr ve angreng tak hian, “Hetiang hi engnge kan tan a hlauhawmna?” tiin a la rawn zawt ta cheu va, ka thianpa pawh chu a thuthmunah a lo phun nang nang tih ka la hre reng a ni. Tunah erawh chuan kha pa ngei pawh khan a hrethiam tawh ngei ang, thla 7 dawn chu nunphung pangngai pawhin an nung thei ta lo a ni si a. Kuki zinga an mithiam pakhat chuan seminar-ah, “Manipur hi a bultanna mai a ni tih i hre vek ang u,” a ti ngawih ngawih mai a ni. Chutih laiin Mizoramah ngei pawh BJP party candidate vote tlin lo tum phette pawh kan awm ta zel mai si a, a mak a ni.

𝐏𝐚𝐭𝐡𝐢𝐚𝐧𝐧𝐢 𝐡𝐥𝐮𝐭𝐧𝐚 𝐤𝐚𝐧 𝐡𝐚𝐢 𝐡𝐫𝐞𝐭 𝐭𝐡𝐢𝐧 𝐡𝐢 𝐚 𝐦𝐚𝐤

Pathianin lei leh van a siamin a ni 7-naah a chawl a, chu chu serh turin mihringte a hrilh a ni tih kan hria. Kha ni 7-na kha Judate Sabbath, vawiina Inrinni kan tih hi a ni. Pathian Fapa Lal Isua Krista thihna hneh a a thawhlehna ni kha tuna Pathianni kan tih hi a ni ta thung a. Chuvangin, a tira Kristian, Juda hnam deuh vekte khan Sabbath chu an serh a, Isua thawhlehna ni pawh chu an serh tel tan ta a. Chumi hnuah Kristianna kha Juda mi ni lo, Jentailte zingah a pawmtu an lo pung ta zel a, Sabbath serh aiin Lalpa Ni serh an lo tam ta tawlh tawlh a ni.

Kristianten Pathianni kan serh kan tih hi Judaten Sabbath an serh ang em ema serh kan ni lo tih a chiang a. Amaherawhchu, ni 7-a ni 1 hi Pathian chibai bukna ni atan kan ruat hrang thlap a, hemi ni hian kan taksate kan ti hahdam a, buaina dang hrang hrangte dahthain Pathian chibai kan buk thin a ni. Chuvangin, Pathianniah kher hi chuan keini Kristiante tan chuan Pathian biakna tih loh chu boruak dang neih a rem lo va, tunhma atanga kan tih ngai loh kumkhua a ni bawk a. Pathianni hlutzia te, kan thlarau nun atana a pawimawh ziate hi ngun zawkin ngaihtuah chiang theuh ila, Pathianni kan hman thin dan pawh i ngaihtuah nawn theuh ang u.

****