𝐊𝐇𝐀𝐖𝐕𝐄𝐋 𝐏𝐀𝐇𝐍𝐈𝐇

Mizo Cartoonist te hi an changkang ve tawh hle a ni. Idea tha tak tak nei, an kutchhuak awmze nei tak tak a awm nual tawh mai. Hman deuha ka hmuh phei kha chuan ka rilru a la thuiin Mizote khawvel pahnih a entir fuh hlein ka hria a. Mahse ka zawn let fe hnu pawhin ka hmu zo ngang tawh lo va, a Sap version zawk ka hmu fuh ta hlauh thung a. Chu cartoon chuan mihring chi hnih tilangin, pa pahnihin an fate ve ve kaia tual hmun phiattu an thlir dun lai a ni a. Pakhat chuan, “Lehkha i zir that loh chuan saw mi ang saw i la ni dawn a ni,” tia tual hmunphiattu chu kawkin a fa chu vau titih a. Pakhat zawk erawh chuan a fa hnenah chuan, “Lehkha tha taka i zir chuan sawtiang mi harsa zawk tan khawvel tha zawk i la siamsak thei dawn a ni,” tiin fuihna thu danglam a chhak chhuak ta a ni. Hengte khawvel hi a va han inhlat tak em!

𝐊𝐚𝐧 𝐥𝐨 𝐭𝐢𝐬𝐮𝐚𝐥 𝐟𝐨 𝐭𝐚𝐰𝐡 𝐞𝐦 𝐧𝐢?

He cartoon hian ka rilru a hruai thui takzet mai. Ka naupan laia ka nu leh pain lehkha zira mual eng hmu pha ve tura min fuihna zawng zawng te ka ngaihtuah nawna, a hmasa zawk ang deuh khi kan thluk dan a lo ni thin tih a chiang hle. "Retheih i chak em ni? I va zir tha peih lo ve," tiin min hau thin a nih kha. Keini thang kha chuan lehkha kan zir tang tang chhan pawh a ni deuh vekin ka ring. Lehkha zir te kha retheihna khawvel atanga kan zuan chhuah theih vena kawng a ni a. Mi an ve theihna kawng hnai ber a ni a. A pawimawh bawk a ni. Chu mahni dinhmun siamna dinhmun hnai ber chu mahni hmasialna rilru, inhaivur tumna rilruin a chawm nung a, hlawhtling ta thenkhatte chuan theih patawpa inchhekarbawm te chu an inthiam lo ta lem lo thin a ni.

Lehkha tha taka zirte kha midangte tana malsawmna nihna kawng hlu leh pawimawh a nihna lam kha kan ngaihtuah pha lova, kan nu leh pate pawhin an ngaihtuah pha meuh lo. Ram leh hnam tana thil hlu a nihzia kan infuih pha lo. Hausak leh milenna kawng a nih erawh kan hre bel hle. Mahni inhaivur leh inchhekarbawm mai lo chu kan ‘values’ ah a lo tel nasa lo a ni! Chumi rah chu vawiinah hian kan seng ta em ni? Heti taka hmasawnna rahbi kan rap fuh hleithei lo hi. Kan infuihnaah khan a thluk kan lo tisual reng em ni dawn le? Keimahni retheihnain min chim nat hlawm em avangin chumi khawvel a theih anga hlaa chhuahsan chu a pawina a awm hauh lo va. Mahse retheih leh harsatna te hi chhungkaw mal leh mimal thil a ni lo va, khawtlang pumpui huap leh mahni chauhva thansan hleihtheih loh, min chim let ngei ngei thin a ni tih kan lo hmaih thui mah mah a ni ang.

𝐊𝐚𝐧 𝐧𝐢𝐡𝐩𝐡𝐮𝐧𝐠 𝐛𝐮𝐥𝐭𝐡𝐮𝐭 𝐚 𝐟𝐞𝐥 𝐭𝐚𝐰𝐤 𝐥𝐨

He kan rilru puthmang hi thlarau leh taksaa kan nihna bulthut a ni hial awm a. Kan mithiamten sawi duh se Mizo society kha chu mimal thatna ngai pawimawh hmasa thin (individualistic) aia khawtlang thatna tur dah hmasa (communitarian) thin niin an sawi ngei ang. Thangthar khawvelah hian individualism hi kan intuh nasa tih a lang reng mai a. Kan rual elna te pawh heti zawng hian kan her deuh vek a. Pathian Thu kan inzirtir danah pawh hian mahni mimal chhandamna leh mimal nun harsatna te kan dah lian hle a, keimahni pawn lam khawvel a kaihhnawih tel kan chhut tam lo niin a lang. Thlarau lama kan mimal thil kan tifel thawkhata kan inngaih chuan chatuan atana kan dinhmun fel ta vang vang anga ngaih a awl khawp mai a nih hi maw.

Thlarau chhandamna chungchang kan zirtirna te hian kan nun pumpui a khawih a, kan khawtlang nun a khawih dawn tih te hi inzirtir thiam a tul tawh a ni awm e. Keimahni bilin vanram kan kai a, kan hlimna tur ni lovin midangte tana malsawmna kan nih dan tur leh Krista Isua tana nung tur kan nihna lam kan uar tawk rih lo niin a lang. Pianthar leh thar lohte pawh hi Vanram kai leh kai loh lam issue aiin Krista tana nun leh nun loh issue lama sawi a pawimawhzia a lang telh telh dawn a ni. Tun kan damchhunga Pathian tana nun a pawimawh em avang hian chumi tawpnaah Vanram hi a dah a ni chauh mai zawk lovang maw? Vanram kai nana Kristian nun nung ve hram hram ni lovin tuna kan nun neih hi a hlut em avanga Vanrama tawp lo thei lo, ang zawng te pawhin Kristian nun hi hmu ta ila a hrisel zawk viau mai thei. Chuti lo zawng, kan ramah Krista hmel a lang fiah lo telh telh ang a, Kristian nih hlutna hi thangtharten an hmu thiam lo palh ang e.

𝐀 𝐭𝐡𝐥𝐮𝐤𝐚 𝐛𝐨 𝐭𝐡𝐮𝐢 𝐤𝐚𝐧 𝐭𝐚𝐦

Zirtirtu pakhatin a zirlaite a vau velna ka beng a rawn thleng a. “Kan lehkha zir chhan te chu hlawh tam deuh neih a, nupui hmeltha deuh neih hi a ni mai alawm,” a ti a nih chu! Hetiang rilru puthmang hi kan pelh hma chuan kan ram hmakhua chu thim tak a ni zel ang. Kan kuta theihna awm hi keimahni inhaivurna hmanraw tha atan chauh kan hman zel dawn chuan eirukna leh mirethei-hausa inkar thui tak tak chu a awm zel ang. Finna leh thiamna neih ve kan tum chhan pawh mahni nawmnan chauh a nih chhung chuan ram ropui kan kai ngai lovang. Chutiang ngaihdan chuan midangte chanai a ei theih hunah a inthiam lo lem lo va, ama punna a nih dawn chuan midangte hekna a pawi ti pha miah lo a, ram leh hnam vei a intih ve pawhin mahni pumpui hmangaih avang chauha vei a ni thin.

Ni e. Nihna sang leh dinhmun pawimawh te hi mi zawng zawng tan a ni lem lo. Mi tam zawk hi chu hetiang dinhmunah te min dah ve ngawt pawh ni se tihnawka hlawhchhampuitu kan ni zawk dawn tih a chiang. Kan finna leh thiamnain a pha ngai lovang. Pathianin talent min kawltir lam a ni lo a ni. Chumi avang chuan dinhmun pawimawha ding theite chu chanvo tha leh khawsakna dinhmun sang deuh hlekte pawh lo nei se thik thu a awm hauh lo. An ni tin khawsakte pawh lo nuam deuh mah se lawmpuiawm an ni. Mahse maw.... tu pawh hi ni se an thiamna leh theihnate hi anmahni inhaivurna hmanrua ringawta hmang tur chu an ni bik hauh lo. A theih anga tam nei a, hleihluak taka hausa tur pawh an ni bik chuang bawk lo. Midangte tana khawvel tha zawk siam tura mawhphurhna pawimawh leh dinhmun tha chelh an ni mai zawk tih hi i inzirtir tan teh ang u. Naupang ennawm mai mah ni se Spiderman-an “With great power comes great responsibility” a tih kha ram hnuk khawih thil a tling a ni. Talent 10 pek lakah chuan talent 10 a tihpun phut a ni a, talent 5 pek lakah chuan talent 5 dang a tihpun phut a ni tih hian a sawifiah viau bawk awm e.

𝐓𝐡𝐢𝐥𝐭𝐢𝐡𝐭𝐡𝐞𝐢𝐡𝐧𝐚 𝐤𝐚𝐧 𝐤𝐮𝐭𝐚 𝐚𝐰𝐦 𝐚𝐧𝐠 𝐳𝐞𝐥𝐢𝐧

Ram leh hnam siamtha turin politics atang chauha tih tur a ni bik hauh lo. Khua leh tui zawng zawngten kan phur rual a ngai a, mahni hmazawn zela kan mawhphurhna hlen tura kan tan rual a ngai a ni. Mahse sorkar hi ram roreltu an nih avangin chumi fawng vuantute chuan midang zawng thiltihtheihna a keng hnem tih hretute kan ni. Chu thiltihtheihna chu a chhe zawng leh a tha zawngin a thawk thei ve ve bawk a. Mizoram hmasawnna a zuana a zuan hun tur chu politics fung chelhtuten mahni inhaivur leh inchhekarbawm nan ni lova ram siam that tak takna tura an kuta thiltihtheihna an hman hunah a ni ngei ang. Zofate kan vanduaina chu chutiang taka titu kan la awm meuh lo emaw tih theih hi a ni a. Khawvel thar siama tihdanglam aiin mahni inhaivur kan la khel nasa zawk a, midangte khai chhuah aiin keimahni in leh lo kan la vei zawk tlat hi kan thanmawhbawk a ni. Thangthar politician beisei awm tak tak leh ram leh hnam hmangaihtu vengva tak takte hi chuan he kan mutan hi zuan khahlen thei tawh se a duhawm ngawih ngawih a ni.

Kan Lal Isua ni 40 chhung chaw a nghei hnu khan lung chhanga chantira intipuar tura thlemna nasa tak a tawk a. Mahse maw... ani kha chuan a thiltihtheihna kha amah intihtlai nana hman a duh miah lo a nih kha hre reng rawh. Thiltihtheihna an kawltir che kha midangte tana mawlsawmna i nihna tur mawhphurhna a nih kha, mahni intihtlaina tur ringawt a ni lo a nia.

*****