𝐑𝐈𝐍𝐍𝐀 𝐋𝐄𝐇 𝐓𝐇𝐈𝐋𝐓𝐈𝐇 𝐈𝐍𝐙𝐀𝐖𝐌 𝐃𝐀𝐍

Protestant kohhran zawng zawngin chhandamna chungchang an zirtirna kawnga hriat sual awlsam angreng tak chu rinna leh thiltih inzawmna hi a ni a. Vawiin thleng hian buai deuh nak kan la awm reng. Rinna avanga chauhva chhandam kan nih avangin thiltih malmak thak a awl khawp mai, chutih rualin thiltih uar luata tih that avanga Pathian tihlawm tum nun neih a hlauhawm bawk si. Heti a nih avang hian Pathian Thu zirna ruamah phei chuan tawngkam hrang neiin ‘antinomianism’ (dan hnawlna) leh ‘legalism’ (tih dik vek tumna) tiin an sawi. Ringtu fing chu heng thil pahnih inkarah hian hahdam takin a awm thin a ni.

𝑶𝒓𝒅𝒐 𝑺𝒂𝒍𝒖𝒕𝒊𝒔

Zorama Kohhran lian ber Thurin puanchhuah chuan Isua Krista rinna dik takah chuan thiltih a tel zelzia chiang takin a sawi a. Chu chu he thurin hian a phut tlat bawk a ni. PCI thurin hian Chhandamnaa Pathian hnathawh hi a zep lo hle a ni, Thurin VI-ah chuan “Thlarau Thianghlim, Pa leh Fapa ata lo chhuak chuan mihringte chu chhandamna changtuah a siam a…” tih kan hmu a. Chu chu rahbi 6-in sawifiah a ni: 

(i) an sualzia leh chungpikziate a hriat chiantir a, 

(ii) Krista hriatna kawngah an rilru a tivar a, 

(iii) an duhthlanna te chawk thovin, 

(iv) Isua Krista chu an Lalpa leh chhandamtua pawm tura ngenin, 

(v) pawm thei turin a pui a, 

(vi) anmahniah felna rah chi tinreng a thawk chhuak thin. 

No (vii) belh a, ropuinaah a seng lut thin, tih telh a chakawm hle.

He rahbi zawng zawng hi Chhandamna rahbi kim a ni a. Hei hi Presbyterian Church of India ordo salutis (order of salvation), ‘chhandamna thu inchher chhawn dan’ a ni mai awm e. Pathian khawngaihna changtu chhandamteah heng zawng zawng hi lang ngei turah an ngai a ni ber mai. Duhna laia reh buna, tuipui chin chauh lak ngawt chi a ni lo. A vai hian chhandamna nei nun sawina a ni a. Rahbi (iv) –a ‘ngen’ tih hi Saptawngah chuan ‘convincing’ tih a ni a, ti tura inngen lam aiin ‘inhneh, inhmin’ lam a hnaih zawk awm e, rahbi (v)-a ‘pui’ tih pawh hi ‘enabling’ tih a ni leh a, tanpuina inpek lam aiin ‘intheihtir, theihna inpek’ lam a kawk zawkin a lang bawk a.

𝐂𝐡𝐡𝐚𝐧𝐝𝐚𝐦𝐧𝐚𝐚𝐡 𝐓𝐡𝐢𝐥𝐭𝐢𝐡 𝐚 𝐭𝐞𝐥

PCI Thurin VII chuan ti hian a sawi zawm a, “Pathianin Kristaah chuan mi zawng zawng hnenah chhandamna famkim chu a thlawnin a rawn hlan a, an sualte sim tur leh Lal Isua Krista chu an chhandamtu atana ring tur te, Amah entawn a, Pathian duh ang taka inngaitlawm leh thianghlima nung tur tein thu a pe a. Krista chu ringa a thu zawmtute chu chhandam an ni a, sual ngaihdamna te, thiam chantirna te, pathian fa nihna te, Thlarau Thianghlim chenpuina azara tihthianghlimna te, chatuan ropuina te an chang a,” a ti leh mai bawk. He Thurin hian rinna leh thiltih hi a suihzawm zel a, lak hran theih an nih lohzia a tichiang hle.

PCI Thurin X-naah chuan Rinna leh Thiltih inzawmna, rorelna ni atan a pawimawhzia ti hian kan hmu: “Ni hnuhnungah chuan mitthite chu kaihthawhin an awm ang a, mi zawng zawng Krista rorelna thutphah hmaah an lang ang a, he dam chhunga an thiltih that leh that loh ang zelin relsak an ni ang. Ringlote leh mi sualte chuan thiam loh changin an sual hremna an tuar ang; Krista ring a, a thu zawmtute erawh chu a langchanga thiam chantirin an awm ang a, ropuinaa lawm luhin an awm ang. Chhandamna changtu turte chu ‘Krista ring a, a thu zawmtute’ tih a sawi chiang hle. Rinna leh thiltih hi a thlun zawm zel a ni.

𝐓𝐡𝐮𝐫𝐢𝐧 𝐝𝐚𝐧𝐠𝐚𝐡 𝐩𝐚𝐰𝐡 𝐚 𝐥𝐚𝐧𝐠 𝐜𝐡𝐢𝐚𝐧𝐠 𝐞

Chipchiar zawka ziak, Protestant Thurin hlun ber tia sawi theih Westminster Confession of Faith, Bung 13:1 chuan, “Hlawhtling taka koh, tihnun leh thinlung thar nei a, anmahnia thlarau thar siamsak te chu, Krista thihna leh thawhlehna thiltihtheihna leh Pathian Thu leh anmahnia cheng Thlarau chuan an mimal nunah a takin a tithianghlim zel a: taksaa sual bawihna nghawngkawl chu chhut chhiat a ni a, anmahnia sual tinrengte chu tihnep leh tihchak lohin a awm zel bawk; chhandamte nun dan thaa nung turin tihharh leh tihchaka awm zelin thianghlimna kawng an zawh zel a ni; chumi thianghlimna tel lo chuan tuman Lalpa an hmu thei lo.” A fiah fek fawk hle a ni.

He Confession vek Bung 17:1-ah “Mi tute pawh Pathianin a fapa Duhtaka-ah chuan pawm a, a Thlarauva hlawhtling taka a kohva a tihthianghlimte chu khawngaihna hmun atangin an tlu bo hlen thei lo; a tawp thlengin an bei hram zel ang a, chatuana chhandamin an awm ang.” Bung 18:1, “Mi vervekte leh siam thar lohten tisa takin Pathian duhsakna leh chhandamna chang inhriatna leh beiseina dik lo neiin mahni an inbum thei, mahse an beiseina chu a thlawn ang. Mahse Lal Isua tih tak zeta ringtu, tih tak zeta hmangaihtu, a hmaa chhia leh tha thianga awm tum mi chuan, he dam chhung hian khawngaihna hmunah an awm tih an hre ngei ang a, Pathian ropuina beiseiin an lawm thei ang, chu beiseina chuan a timualpho lo vang.” ‘Chhandamna bo thei lo’ tih changchawia rinna leh chumi azara piantharna an chan changchawia nunah lang lo teh mah se chhandamna huang chhunga indah lui tlat ho ngaihdan chu a phet chiang hle tih a hriat a ni.

𝐁𝐮𝐚𝐢𝐧𝐚 𝐭𝐮𝐫 𝐚 𝐚𝐰𝐦 𝐥𝐨

A.A Hodge-an Westminster Confession hrilhfiahna ziakin rinna leh thiltih inthlunzawmzia hi ti hian a sawi: “Ringtute nghehzia kan sawi hian suala chung chung pawhin kan chhandamna a bo tawh lo kan tihna a ni lo. Kan sawi tak zawk chu hei hi a ni – (i) Engang pawhin awm ila kan lo ring ve tawh a nih chuan chhandamna hi kan tan a chiang tawh ni lovin, ringtu tak kan nih chuan thianghlim tura beih hram hramna hi kan nunah a chiang a ni zawk, (ii) Chhandam leh chhandam loh chu thianghlima nung tura beih hram hramnaah chauh hian a lang a ni.”

Thiltih chhiar tel lo va chhandamna neih kan chak avangin ‘chhandamna bo thei lo’ thu ngaihnawm kan ti fo, thluk fuh lovin antinominism-ah kan lut thin. Tihsual hlauh luatah ‘chhandamna bo thei’ te kan sawi lek lek thin bawk a, legalism rawng kan kai thin. Pathian atanga chhandamna dik tak erawh chuan Khawngaihna vang chauh nia inhre rengin, chumi avang vek chuan sual hnehna nun a lantir thin. Buaina tur a awm lo. Chhandamnaah chuan Rinna leh Thiltih a inzawm reng si a.

*****