𝐃𝐔𝐇 𝐃𝐔𝐇 𝐕𝐎𝐓𝐄 𝐓𝐇𝐄𝐈 𝐊𝐀𝐍 𝐍𝐈 𝐄𝐌?



Inthlang ram nih manah kan ram hruaitu pawimawh berte kan thlang leh dawn ta chu a nia. Hei hi Democracy hlutna leh mipui mawhphurhna sanzia lanna a ni. Mihring chanchinah hian ram hruaitu thlan hi hmanni lawka an chin a ni a. Tunah pawh hian khawvel ram 167 zinga 72 chauh hi democracy ram tak taka chhiar theih niin an sawi. Chuvangin, kum 5 hnua kan inthlang leh thin hian mipui hnuaia politiciante leh ram rorelna a awmzia a tilang a. Mipui duh dan hi namnul mai mai a theih lohzia a hril chiang hle bawk a. Ram mi puitling chin chuan ram kalsiamah kan duh kan tih theih vena hun pawimawh a nih miau avangin a hlutzia hria a, thil ho te avanga tibawrhbang lo turin kan infuih a ni.
𝐑𝐨𝐫𝐞𝐥𝐭𝐮𝐭𝐞 𝐏𝐚𝐭𝐡𝐢𝐚𝐧 𝐫𝐮𝐚𝐭?
Tirhkoh Paulan “Roreltua awmte hi Pathian ruat an ni,”(Rom 13:1) a tih kha chai a hlawh fo thin. Ei loh fe fe mai bakah Pathian hre fuh lo tak tak roreltu hmuh deuh zut hnuah phei chuan awih a har hle awm asin. Paula sawina dinhmunah phei kha chuan Kristiante tan awih a har zual ngawt ang. Khatih laia mi ho kha mipui thlan pawh an ni ve si lo va. A tha tha leh a thiam thiam thlan pawh an ni chuang lo va. Lalber phei chu inthlahchhawn thil a la ni zui lehnghal a. Paulan Pathian ruat anga a han puang ngat mai hi chu Pathian a rinna thukzia a lang chiang hle a ni. Pawm thiam zir ve mai chi a ni.
Paula hian tunlaia kan rama inthlan dan chungchanga a lo sawi ni zawk sela chuan a inhmeh zawk hlein a rinawm. Kristian tamna ramah phei chuan ‘Roreltute hi Pathian ruat an ni’ han tihte chu awih a awl zawk a. Ringtu pungkhawmin kan duh tak kan thlan tlin hi chu ‘Pathian ruat’ ni zek zek awm leh ni ngei tur a ni a. Amaherawhchu, Pathian ringtute ber pawhin Pathian ruat ngei an nih theih nan kan tang nasa tehchiam hran lo va. Pathian duhzawng mi ngaihtuah lem lovin keimahni duhzawng mi kan buaipui ber niin a hriat fo. Chu chu Pathian pawhin min phalsakah kan ngai thin. Kan ti dik chiah ang em le? Pathianin kan kuta thiltihtheihna a dah hi kan hmang dik zel em? Roreltu a ruatna hmanruate hian eng ang tak mawhphurhna nge kan neih? A duh danin kan vote thlak ta lo ila Pathian ruat kan la ti thei tho ang em? Kan ram hruaitute ruat hi ngai pawimawh tawk lo ta ila kan Paula sawi hi a dik famkim thei tho ang em? Tui nu hman hreh miah loh leh voter te inthlahdah vangin mi lo tling ta se Pathian ruat a ni meuh ang em le?
𝐊𝐚𝐧 𝐯𝐨𝐭𝐞 𝐭𝐡𝐥𝐚𝐤𝐧𝐚 𝐫𝐢𝐥𝐫𝐮
Ram hmel hi kan hmel a ni a. A chhunga chengte nihna lantirtu chu pawn lam miten an hmuh dan kha a ni. Eng anga nasain mahni inhmu thain inbawl lungawi tawn mah ila, pawn lama miten min hmuh that tlat loh chuan Hmuichukchuruduninu inlazei ang chauh kan ni ang. Chuvangin ringtu tinte kuta Pathianin thiltihtheihna a dah, Zofa ringtute chenna, Kristian ram siamtu tur hruaitu pawimawh thlan chhuah mawhphurhna VOTE khat min pek theuh hi a va hlu em! Hman dik a va pawimawh tehreng em! Chu chuan kan ram hmel lan chhuah dan tur a hril si a. Pawnlam mite chuan kan ram hi Kristianna nena hmehbel loh theih loh khawpin Kristian intiten kan tam hneh si a. Mizo nih vang hrim hrim pawh a ni mai lo, kan ram a nih vang hrim hrim pawh a ni mai bawk lo, Isua Krista ringtu kan nih hlawm avang hian kan ram a that a ngai a. Ram siam tha tur chuan kan vote thiltihtheihna kan hman dik a ngai a ni.
Heti a nih lai hian vote thlak chungchangah hmasawnna tur kan la ngah a ni awm e. Thil engkim deuhthaw thlarau mit nena kan melh thiam titih tawh hnu hian Vote thlak leh thlarau nun kan la kai kawp thiam tlat lo hi kan thanmawh bawk a ni mai thei. Mahni mimal thatpui tura kan hriatte chu kan vote tlangpui a. Kan duh dan dana tih theihah kan ngai. Keimahni bik ina chhawr tur nia kan hriat chu vote thiangah kan inngai a. Thil nih dan tur pangngaia ngaiin inthiam lohna kan nei lem lo. Kan nihna kan pawm dan leh kan tih tur kan rel dan hian a thleng thui lo thin a ni. Thenkhat phei chuan an vote hlu takte an zuar hial a ni awm e. A hlutzia leh mawhphurhna a kentel ropuizia an hre pha lo pawh a ni mai thei. Thiltihtheihna hlu tak sorkar leh Pathianin a pek chu ngainepin, Esauva dungthula vawi khat riltam tihreh nana an hralh mai mai a nih chuan an chungah chung Pathian a lawm lovang tih chu a lang reng a ni. Roreltute Pathianin a ruatna hmanruate hian kan mawhphurhna kan hmang tha thin em? Pathian ruat ngei thlan kan tum em? Chutiang mi chu kan zawng em?
𝐃𝐮𝐡 𝐝𝐮𝐡 𝐯𝐨𝐭𝐞 𝐭𝐡𝐞𝐢 𝐤𝐚𝐧 𝐧𝐢 𝐞𝐦?
Kan ram kalsiama pawimawh ber kan roreltu kan thlan turah hian ram hmangaihtu Pathian chuan a mi duhzawng thlang turin min tih ngei a rinhlelhawm hauh lo va. Chutiang mi chu bengsika ngaihtuah a; chu mai ni lo, zir chiang a kan thlan a ngai dawn a ni. Chu chu kan mawhphurhna, Pathianin a duhzawng a thlentirna hmanrua min pek chu a ni. A duhzawng ngei, a ram siamtha theitu tur thlang turin a ti che a ni lo thei lo. Mahni hmasialna tel hauh lovin i vote thiltihtheihna chu i hmang dawn nia. Ram pum huap thatna aia mahni tanghma hainain a kaihhruai che chuan i ti dik hauh lovang le.
“Ka vote a nia, ka duh duh ka thlang ang chu,” tih liam mai theih a ni. Hei hi kan rilru put dan tlangpui pawh a ni. Ringlo leh khawvel miten lo ti mah se ringtuten kan ti thei ang em? Keimahni duh aiin Pathian duh a lal zawk dawn lawm ni? Mahni tanghma haina leh inhaivurna hmanrua atana hman ngawt tur a ni ang em? Chutiang mai mai tur chuan Pathianin he vote thiltihtheihna hi i kutah a dah lo. Ram tana tha tur hre turin ngaihtuahna seng mawlh la, huaisen takin i lungthlukna chu vote ang che. Mahni hmasialna tel miah lova i vote ngat chuan Pathianah thiam i chang ngei ang. Chutiang pawh ni lova, therhlo dawn vang mai mai te, mahni mimal thatpui tura ngaih vang mai mai te, ngaih pawlawhna nen mai maia Pathian ruat kalha i vote hlu tak i tibawrhbang a nih vaih chuan rorelsak i la nih dawn mai piah lamah kan ramah Lalpa duhzawng tihin a awm lo chhunzawm zel dawn a ni. Aw Ringtu, duh duh vote thei i ni lo a nia!
𝐒𝐮𝐩𝐞𝐫𝐩𝐨𝐰𝐞𝐫 𝐤𝐚𝐧 𝐧𝐞𝐢𝐡 𝐡𝐢
Maimawmin a seh avanga superpower nei ta Spiderman-an a duh ang anga maimawmril a tihchhuah leh maimawm ang maia banga a han lawn zung zung mai han hmuh chuan superpower neih a chakawm narawh e. Wolverine-an a kutzungtang kar atanga chemte hriam ang maia hriam 3 thawt a han tichhuak thei leh ‘healing factor’ neia engang pawhin hliam se a dam zung zung mai te a awhawm. Superman anga thlawh theih mawlh mai kha naupan lai chuan a chakawm thin a nih kha. Tunah chuan phuahchawp mai ni lo puitling chinin kan neih theuh kan Super Power ‘vote thiltihtheihna’ kan neih, hmang thiam hle tura Pa-in kan kuta a dah hi a dik thei ang bera hman i han tum teh ang. Kan duh ni lovin A duh thlan tur a ni e.
*****

Comments

Popular posts from this blog

𝐙𝐔 𝐋𝐄𝐇 𝐑𝐔𝐈𝐇𝐇𝐋𝐎: 𝐓𝐇𝐋𝐀𝐑𝐀𝐔 𝐍𝐔𝐍 𝐀 𝐍𝐆𝐇𝐀𝐖𝐍𝐆 𝐃𝐀𝐍

CHANCHIN THA NIHNA TAK

Engtinnge Kristian Nun Nghet kan neih theih ang le?