𝐓𝐈𝐇 𝐇𝐎 𝐇𝐈𝐀𝐍 𝐊𝐀𝐍 𝐂𝐇𝐀𝐊 𝐙𝐀𝐖𝐊 𝐙𝐄𝐋 𝑻𝙝𝙪𝙝𝙧𝙞𝙡𝙩𝙪 4:9-12, ( 𝗡𝗘𝗜𝗖𝗖 𝗧𝗮𝘄𝗻𝗴𝘁𝗮𝗶 𝗥𝘂𝗮𝗹 𝗡𝗶 𝟮𝟬𝟮𝟯 𝗣𝘂𝗮𝗹)

North East India Christian Council tana tawngtai rual ni, kum tin October Pathianni vawi thumnaa neih thin chu vawiin October 15 hi a lo ni leh ta a. Hemi niah hian NEICC hnuaia kohhran zawng zawngten NEICC tan Pathian an au ho thin a. Northeast khawpui 9-ah kohhran pawl hrang hrang Pastor leh Upate inluhthelhin Pulpit Exchange an tih program hmangin mahni pawl Biak In ni lovah thu an va sawi thin a, an hlim ve thei hle a ni. Hemi niah hian NEICC rawngbawlna atan thilpek lak khawm thin a ni bawk a, hei hi NEICC chet velna kawngah a pawimawh hle. Hetianga tih hi thil thar a lo ni lo va, kum 1947-a an lo rel daih tawh kha a ni.

Hemi ni hian NEICC office lam atanga thupui an thlan chu thuhriltuten an sawi thin a. Kohhran thenkhatin remchan zawkna avangin thupui an lo siam a nih pawhin thil thaah ngai tho ila. Kumin thupui chu, ‘Kan tihho hian kan chak zawk’ (Stronger Together) tih a ni a, a chang tlawhchhan pawh Thuhriltu 4:9-12 a ni nghe nghe. NEICC chuan tihhona boruak hi a hlutzia leh Pathian duh zawng a nihzia a hriat avangin a motto atan pawh ‘One in Christ’ (Kristaah Pumkhat) tih hi a hmang ngat a. Johana 17:11-a Lal Isua tawngtaina ‘Pumkhat an nih theih nan...’ hi tihhlawhtlin tumin a bei tang tang a ni. Ringtute innghirngho leh inhuat, darhsarh leh mahni mual muala tlat darh hi Hmelmapa duh zawng tak mai leh keini suala tlu tawhte chak lohna nasa tak a nih avang hian thlarau nun dik chuan a vei lo thei lo a ni.

NEICC-ah hian India hmarchhak kohhran pawl 37 kan tel a, Kristian pawl (para-church) 18 lai kan awm bawk. Heng pawl 55 zingah hian Zoram Kristiante kan thawhhlawk hle a, a khaidingtu leh tichaktu pawimawh kan ni tih hi sawi a nuam thin a ni. He Council hian project lian tak tak 3 – Union Christian College, UCC Higher Secondary School, leh Peace Centre te a enkawl a. Office hi Shillong-ah neiin hmarchhak Kristiante hi a vil a ni ber mai. Remchanna ang zelin Seminar, Trainning leh Workshopte a buatsaih awl lo va. Kohhrante tih dan phung entawnin NEICC hnuaiah hian hmeichhe lam hma – NEICC Women Assembly leh thalai lam hma- NEICC Youth Assembly te a awm a. Hengte hian an hmazawn zelah India hmarchhaka hmeichhiate leh thalaite tichak turin hma a la thin a ni.

Tunhnaia India hmarchhaka mite harsatna tawh langsar chu Manipur buaina hi a ni a. NEICC hnuaia kohhran pawl leh mimal thahnemngai tam takin an vei a, an che chhuak nasa hlawm hle a, a lawmawm takzet a ni. NEICC pawhin theih ang angin hma a la a. Press Release (Chanchinbua thu chhuah) te siamin, Candle Light Vigil (Pun khawma tawngtaina leh thusawina neih ho) te a huaihawt bakah member unit tinte hnenah tawngtaina hun a bika hmang turin a ngen tawh a. India Prime Minister hnenah remna leh muanna a thlen hma theih nana tan la thuai thuai tura ngenna a thawn tawh bawk a ni. Manipur Lamka hmunahte team intirin sum fai Cheng Nuai Sawm chuang tanpui nan a sem chhuak tawh a. Remchang hmasa bera Manipur Chief Minister hmu turin a inbuatsaihna a kal mek. Manipura tuarna nasa tak tihnep tumin ‘The Manipur Relief, Rehabilitation and Restoration Project’ (The M3R Project) bul a tan chho mek a. He project hian NEICC unit zawng zawngte leh mimal thahnemngaite hnenah Manipur tan thilpek a khawn ang a, tangkai taka hman a nih theih nan tan a la dawn a ni. Mi tinte thlawpna duhawm tak kan dawn ngei kan beisei.

Kumin atan thupui thlan hi a pawimawhin kan mamawh lai taka lo tla angin a ngaih theih hial a. Ringtute hi mahnia tal hrang lova a huhova kan awm hian kan chak zawk a ni tih hi a chiang hle a ni. Esopa thawnthua(?) pa pakhat thi mai turin a fate inngeih lo lutuk ko khawm a, thing tel ulh tliah harsatzia leh a mal mala a awlsam sizia kawhhmuh a, tanho pawimawhna a zirtir khan Thuhriltu 3:12 “...hrui thum hrual chu a chal lawk lawk ngai lo ve..” tih kha a lo chhiar tawh thin ni ngei tur a ni. Kan Pathian hi thil chi hrang hrang ngaina thin Pathian a ni a. Chi hrang tam tak awm khawm hian mawina leh chakna a nei a. Pathian hian thil inang tlang put hi a duh kher lo bawk a. Ringtute pawh chi hrang hrang ni mah ila Kristaa pumkhatna kan neih hi kan vawn tlat chuan a hlu em em dawn a ni. Pathian nihna ril ber pawh pumkhat ni si, hrang bawk si ‘Trinity’ kan ti a ni lawm ni kha? Hrang si a, pumkhat sia kan awm hian kan Pathian nihna kan pho chhuak a lo ni reng awm e. Kohhran pawh hi a greek tawng chuan ekklesia a ni e, an ti a. Chu chu pakhat aia tam sawina a ni, an la ti lehzel. Pathian hian a mite hi inmamawh tawn, intichak tawn, indawm tawn, inlawm tawn, inzilh tawn, intanpui tawn, leh rawngbawl ho turin min duh a nih ber hi maw.

Pathian hian vun rawng tur te, tawng leh nunphung inang tlang thap thap turin min ti kher lo a. Kan tum ram leh rawngbawlna erawh chu inkhuangrual tha turin min duh ngei ang tih a hriat theih mai. Chu chu Bibleah a chiang khawp mai. Khawvela Chanchin Tha hril turin min duh a, kan awmna apianga a duh dan nung chhuaka, tanpui ngaite tanpui turin min duh mai a ni. Ringtu tam zawk chuan kan mimal nun chauh kan buaipui thin. Pathian pawh kan mimal harsatna min chin felsak atan kan duh tawk mai niin a hriat hial thin a. Chutiang thil chu thlarau berin kan hre bawk a! Mahse, hei hi inzawt ila, “Keimahni mamawhin kan rilru a luah khah hneh hle lai hian, Pathianin eng nge a mamawh ve le?” tih hi. Mahni mamawh buaipuia kan hun kan hmanhlel lai hian Pathianin a eng nge a buaipuia, a vei ve ni ang, tih hi i chhut ve thin ang u hmiang.

Bible chang ngaithah hlawh ber tih theih pakhat chu II Kor 5:15,“... a nungte chu anmahni tân an nun tawh loh va, an thih aia thia tho leha tân chuan an nun tawh zâwkna tûrin a ni mi zawng zawng thih aiin a thih ni,” tih hi a niawm asin. Kristaa minung kan nihna chhan hi kan lo that zawk theih nan a ni ngawt lo va, kan sual ngaihdam nan a ni ngawt lo va, kan lo hlim zawk theih nan leh vanram kan kai theih nan pawh a ni ngawt lo. Kristaa kan nun chhan chu Amah Krista tana kan nun tawh zawkna turin a ni. Hei hi hriat thelh vangin mi tam zawk kan buai thin a nih hi. Isua Krista lo kal chhan, kraws lera a thih chhan, min chhandam chhan chu ‘Ama tana kan nun tawh zawkna turin’ a ni mauh mai. Chanchin Tha dik chuan Krista chu a lailumah a dah char char thin, Ringtu hian chu hmun chu kan chan palh chuan kan tisual a ni ang. Kristan a lai a chan hi kan thatpui ber si a, Chatuan thlengin...

Kan nihna hian mawhphurhna a keng a. Chu nihna chu kan chan ve chuan a mawphurhna pawh kan koah kan nghah ve a ngai dawn a ni. Tunhma deuh kha chuan Kristiante zingah Kohhran hna ber hi eng nge ni ang tia inhnialna a lo awm tawh thin. Tunah chuan an hre thiam tlangpui tawh a. ‘Khawtlang nun siam thatna hian Chanchin Tha hril hnaah hnuhma tha tak a nei thin a, Chanchin Tha dik taka hrilna leh nunpuina chuan khawtlang nun siam thatnaah sawhkhawk a nei lo thei lo,’ tiin. Chanchin Tha hi puan chhuah tur leh nun chhuahpui tur chi a nihzia kan hlamchhiah chuan kan thelh thui ngawt ang. A engemaw zawk zawk kan hlamchhiah chuan a kalh a kim thei lo a ni. Hril leh nun chhuahpui kawngah hian ringtu zawng zawngte hi pumkhat tur kan ni.

Tunlai khawvel hi ringtute, hmun tina awmte tanho pawimawh lai ber a ni awm e. A bik takin South East Asiaah hian harsatna a inmung chho zel an ti. Sakhua kan zalen lo telh telh a, a bik takin Kristiante kan chep ta viau a ni. Hmanni lawka Hindutva hlauhawmzia kan sawi changa kan ram a tihbuai phak tak tak ring thei lote ngaihdan chu Manipura thil thleng hian a vaw chhe hneh hle a ni. Biak In 300 chuang han inhal/tihchhiatsak hi khawvel hmun dangah a la thleng ngai lovin an sawi. Tribal leh bal loh thil chauh ni se Biak In suasamin awmzia a nei lo. Heti khawpa inteitheih lohna hi kan hmuh phakah a awm thei ang tih hi suangtuahnain a dawn pha ngai lo a ni. Hnam leh sakhaw lak sualna rilru kha tak atanga chhuak a ni ngei ang. Heng zawng zawng hmachhawn tur hian Presbyterian nih ngawt a tawk lo va, Baptist nih ngawt pawh a tawk lo va, Catholic nih ngawt pawh a tawk chuang loh angin Protestant kohhran pakhat lo nih ve ringawt a tawk tawh lo a ni. Kan din ho a ngai. Kan tihho hian kan chak zawk tlat si a.

*****