𝐏𝐀𝐓𝐇𝐈𝐀𝐍 𝐇𝐈 𝐊𝐀𝐍 𝐇𝐋𝐀𝐔 𝐋𝐎 𝐓𝐇𝐈𝐍 𝐌𝐀𝐍𝐆 𝐓𝐀𝐊 𝐄

Inthlan a lo hnai a kan ze zahpuiawm a lo lang leh ta tuam tuam mai. Kan sawi Pathian Thu nia a lan lai rengah pawh kan duh zawnga kan her thinzia leh mahni inhaivur duhnain min hneh hlawmzia a lang thin ka ti lo thei lo a ni. Mizote hi Pathian Thu duh tak hnam kan niin an sawi thin, a dik pawh a dik ang. Pathian thu hria nih pawh kan chak tlang viau a nih hi, chutiang mi chu kan ngaisang bawk a. Mahse kan mihrinna hi a lang hma ve thin ngawt mai. Politics ruama thuneihna leh hamthatna te hi, kan han it nghal ngawt a, thlarau thil mi aia hre turu deuh nihte hi kan han tum ve leh ngawt a, Pathian hming chhalin kan han tizui lehnghal! Chung Pathian hian engtin tak min ngai ang maw?

𝐙𝐚𝐰𝐥𝐧𝐞𝐢 𝐚𝐧 𝐩𝐮𝐧𝐠 𝐥𝐞𝐡 𝐭𝐚

A lehlam zawnga ngaihtuah chuan a nuihzatthlak zawk hial mai. Pathian zawlnei han nihte hi milar (celeb) nihna ang deuhvah kan ngai a, kan rilrua lo lang kan duh zawng apiangte Pathian hnen atanga dawn angin kan sawi miah miah mai zel ni tur a nia. Dinhmun tha beiseiin Zawlnei nih kan chak! A va han intu lo thin tak em! Thuthlung Hluia zawlneiten an hreh thin tehreng nen! Mittui tla zawih zawih leh hlau leh khur chunga sawi an ni thin kha a nia! “Lalpa ka hnenah pawh a inpuang ve tho,” titu Miriami te kha chu an phar uar mai a nih kha le! “LALPA thu chu Jeremia hnenah hetiangin a lo thleng a...Semaia hian in hnenah thu a hril a, ani chu ka tirh a ni lo, dawt a rintir che u a ni. Chuvangin LALPA chuan heti hian a ti: Nehelam mi Semaia leh a thlahte chu ka hrem dawn. In zingah thlah pakhat mah a nei lo vang a, ka mite tana thil tha ka tih tur pawh a chang ve hek lo vang....” (Jer 29:30-32) tiin zawlnei der chung chang thu a vaw thla hem mai. Zawlnei der nihte hi kan hlau lo emaw tehreng ni!

𝐏𝐚𝐭𝐡𝐢𝐚𝐧 𝐓𝐡𝐮 𝐡𝐢 𝐢𝐧𝐟𝐢𝐚𝐦𝐧𝐚 𝐚𝐧𝐠 𝐥𝐞𝐤𝐚𝐡 𝐤𝐚𝐧 𝐧𝐠𝐚𝐢 𝐞𝐦 𝐧𝐢?

Kan ramah hi chuan Pathian Thu hi ‘game’ ang lekin kan khel emaw tih theih chang a awm thin. Intihhlimna thil mai mai angin thlarau mi intite meuh pawh hian an ngai emaw ni aw? Rilru lam zirmiten (psychologist-te) han lepse tak tak se thlarau thil anga kan puh leh kan hlimpuite hi kan lar chakna rilru inphum reng inpho chhuahna mai mai te, kan milen chakna rilru sawi chhuah ngam loh keh chhuak mai mai te, kan intihhlim nuam tihna chhuanlam chi khat mai mai angtein an hmu chhuak teuh ang tih a rin theih hial a ni. India ramah pawh state te pawl bera sorkarna siam leh siam lohte hi Engkimtithei, Lei leh Van Siamtu leh Roreltu Pathian zawlnei intiten zu tuipui tlata mawle! Tuipui rala Donald Trumpa President a nih chhunzawm tur leh tur loh an dawn laiin mahni ram chhung India ram ngei chungchang an dawng ve lo a ni awm e! Mak tak a ni. An sawi ang tawk hi chu Kristiannain a kaihhruai ve lem loh Chanchinbu Opinion Poll te pawhin an sawi thiam zawk. Pathian zawlnei intite hian heng thil aia pawimawh puan chhuah tur an hre hlawl lo emaw ni le? Thuthlung Thar zawlneite nen an buaipui a inhlat awm mang e!

𝐇𝐞𝐛𝐫𝐚𝐢 𝐳𝐢𝐚𝐤𝐭𝐮 𝐥𝐞𝐡 𝐭𝐮𝐧𝐥𝐚𝐢 𝐳𝐚𝐰𝐥𝐧𝐞𝐢

Thuthlung Thara zawlnei chungchang chu Hebrai bung tir lamah chuan, “Tun hma hun zawng khan kawng tinrengin Pathian chuan kan pi pute hnenah zawlneite hmangin thu a sawi thin a; tun hun hnuhnungah hian kan hnenah Fapain thu a rawn sawi ta thung a ni; Ani chu a ro zawng zawng luahtuah a ruat a, amah hmangin lei leh van hi a siam a....Chuvangin, kan thu dawnte kha kan pawisa lehzual tur a ni, chuti lo zawng kan tawlh bo hlauh dah ang e...”(1:1,2: 2:1) tiin bul a tan a. Thil chiang em em chu Hebrai ziaktu hian thu zawng zawnga thu pawimawh lawr lak chu Isua chanchin a ni tih a chiang khawp mai a, thil dang sawi a tum lo hle a ni tih hi. Tunlai zawlneite hian Isua chanchin sawi hi duh tawk mai se tha tur a ni a, chutiang thute pawisak loh chuan tawlh bo a hlauhawm tihte pawh hria se. Inthlan dawn ti ti mai maite tuipui teh huam leh van chhala lo sawi ve fo a rem lo. Pathian a hlauhawm. Pathianin sawi tur tul a tih chin erawh Bibleah a chiang hle thung a ni. Sawi chak chuan chu chu sawi mai tur. Ram roreltu zawng zawng leh mipui hi Pathian hmaah kan awm vek a, kan thiltih dan leh kan thil zawn ang zela relsak kan ni dawn tih hriat chian a pawimawh mang e.

𝐏𝐨𝐥𝐢𝐭𝐢𝐜𝐢𝐚𝐧𝐭𝐞 𝐦𝐚𝐰𝐥𝐡 𝐦𝐚𝐢 𝐡𝐢

Ram hruaitu tha kan mamawh a, chutiang nei tur chuan politics a kaltlang a ngai. Politics khelh hi thil namai a nih lohzia leh politics tha kan duh em em lai hian politician tam tak hi chuan Pathian an hlau lo ngawt thinin a lang. Politics huang chhungah chuan Pathian pawhin a tehfung a thlah dul deuhvin an hria emaw tehreng ni? Eng tin nge an theih zawk? Politics hian engkim mai hi hman tangkai a tum thin, chutah chuan Pathian Thu pawh a tel ve chiang ang. Chu chu politics hlauhawmna lai tak chu a ni a. Ringtuin a hmuh fuh loh chuan a pawi ngawt ang. Mi tha tam takin zuan luh an tim phah chhan pawh a ni thin. Kan ramah hi chuan principle neia ram leh hnam siam that tumna ai hian mahni inhaivurna hmanrua atana politics khelh hi kan kalphung a la ni zel hi kan vanduaina a ni. He thil thlak ngam tur politician kan va mamawh tak em!

𝐌𝐢𝐳𝐨𝐭𝐞 𝐳𝐢𝐧𝐠𝐚 𝐭𝐡𝐢𝐥 𝐦𝐚𝐤

Chutih laiin Kristiante hal tak partya inpe thar leh chu party ticketa din tum an lo la awm lehzel hi Mizo Kristiante zinga thilmak tak mai a ni a. Sum leh pai kan pathianzia pawh a lang chiang hle awm e. Kan thenawm stateah World Record break hial awma Pathian Biak In hal leh tihchhiat tam a nih lai leh, Zo hnahthlakten heti khawpa he party sorkar hnuaia an tuar tawh hnuah pawh kan han thinhrik ngam lo hi chuan ‘Eng pathian nge maw kan biak ni dawn ni?’ tiin a zawh loh theih loh a ni. Manipur tribalte chuan a that lohzia an chiang tawh ngawt ang! Hre duh chuan zawh mai tur! Min bawlna mai mai hi an tawktarh therhlo it avanga kan lo nep zo ngang lo a nih phei chuan Isua Krista ringtu inti ngam tur pawh kan ni dawn em ni? Isua Krista zuitu ni lovin kan duhna lam lama phih kualtu kan ni zawk ngeiin a lang hial a ni. Kan duhna nen a inmil loh hunah chuan Pathian hi kan lo hlau lo ngam khawp mai tih a chiang.

Hawh u, mahni chhungkaw sum lak luh aia sang fea khawsa thei leh in leh lo ropui din theite ngaihnep kan inzirtir mek ang hian Pathian hming a narana sawitute hi ngaihsan loh i inzirtir teh ang u. Pathian tihna avang chauhvin ni bawk se.

𝐿𝑎𝑙𝑝𝑎 𝑖 𝑃𝑎𝑡ℎ𝑖𝑎𝑛 ℎ𝑚𝑖𝑛𝑔 𝑐ℎ𝑢 𝑖 𝑙𝑎𝑚 𝑚𝑎𝑖 𝑚𝑎𝑖 𝑡𝑢̂𝑟 𝑎 𝑛𝑖 𝑙𝑜; 𝐿𝑎𝑙𝑝𝑎 𝑐ℎ𝑢𝑎𝑛 𝑎 ℎ𝑚𝑖𝑛𝑔 𝑙𝑎𝑚 𝑚𝑎𝑖 𝑚𝑎𝑖 𝑐ℎ𝑢 𝑡ℎ𝑖𝑎𝑚 𝑙𝑜ℎ 𝑐ℎ𝑎𝑛𝑡𝑖̂𝑟 𝑙𝑜ℎ𝑣𝑖𝑛 𝑎 𝑐ℎℎ𝑢𝑎ℎ 𝑑𝑎̂𝑤𝑛 𝑠𝑖 𝑙𝑜 𝑣𝑎. 𝐸𝑥 20:7

*****