𝐆𝐎𝐎𝐃 𝐅𝐑𝐈𝐃𝐀𝐘 𝐀𝐓𝐀𝐍𝐀 𝐈𝐍𝐁𝐔𝐀𝐓𝐒𝐀𝐈𝐇

Hnam tin hian thil tih dan phung kan nei theuh va, zeizia kan nei hrang vek a, kan hman thiam bik thil leh ngaih pawimawh zual pawh a awm thin. Mizote pawh kan bang chuang lo. Mizo Kristianna nihphung leh kan kalpui dan hrim hrimah pawh hian thiam bik riau kan neihzia chu a lang a. Chung zingah chuan Kristian hunpui pakhat Good Friday hi a ni ngei ang. Good Friday leh Easter Sunday ai daiha Krismas leh Kum Thar kan uar thin hi Bible-in heng thil pahnih a ngaih pawimawh chin ve ve han chik deuh chuan a mak duh angreng hle a ni.

𝐓𝐡𝐥𝐚𝐫𝐚𝐮 𝐩𝐚𝐰𝐥𝐧𝐚 𝐜𝐡𝐚𝐧 𝐤𝐚𝐧 𝐭𝐮𝐦 𝐝𝐚𝐧

Mizoten thlarau pawlna chan kan tumna hmun chu huau huauna hmunah a ni deuh ber awm e. Kan lam nasatna hmun leh kan pun khawm tamna hmunah chan san kan tum ta a ang thin hle. Tunhma chuan fianriala Pathian pawlna nei tura infuihna hi a tam hle. Mahnia awm kerh kerh a, ngaihtuahna fim hmanna hmun hi Pathian pawlna thuk tak nen a inhmeh a ni awm asin. Tin, Mizoten pawlna thar kan beisei a Camping leh Crusade kan nghak tlat mai hi ngaihtuah nawn a ngai ta. Min tiharh tura mikhual Speaker leh kan hriat chian em em loh mi ‘Pathian hman lai’ kan han ti thla zen leh beisei tlat te hi a puitlin thlak ber lo a ni. Thlarau nun hmasawnna tura midanga rinna kan nghat lutuk leh min siamthatsak tura kan ring lutuk hi thanmawhbawk pawi ber a ni awm e. Chuvangin, kohhran hunpui rawn inher chhuak hrang hrangte hi hmang tangkai thiamin keimahni inbuatsaih ta ila, kan Thlarau nun atan awmze thuk tak a neih a rinawm a ni.

𝐋𝐮𝐧𝐠𝐧𝐠𝐚𝐢𝐡 𝐡𝐚𝐩𝐭𝐚

Mizo Kristian nuna thil mak tak mai chu Good Friday hun chho va kan nunphung kan tidanglam lem lo tlat hi a ni a. Rual ute pawhin ‘Good Friday tuka thlai chi thlak a to tha duh,’ an lo ti thin kha a nia. An serh nasa em em lo niin a lang. Eng pawh ni se, kum tina lo inher chhuak thin Good Friday leh Easter hun te hi khunkhan leh uluk takin hmang ila, inbuatsaihna atan mahni inserh leh Pathian pawl tamna hun atan hmang chho ta ila kan Thlarau nunah awmze thuk tak a neiin a rinawm. Bible leh lehkhabute chhiar tam lehzualin Lal Isuan kan tana tuarna awmzia leh a thawhlehna ropuina chhan, kan nuna a lan chhuah dan tur thlengin chhui tam ta ila kan Thlarau nunin a hlawkpui lehzual ngei ang le. Mipui huap program siam belh a, boruak nu angreng tak kara Pathian pawlna thar chan tum ai chuan mahni nunphung pangngaia inserh leh Pathian pawl tam tura tan lak hian awmzia a nei thuk thei ngawtin a rinawm. Good Friday kar ‘Lungngaih hapta’ an lo tih thin chauh tal pawh hi ti thei ta ila kan nunah awmze thuk tak a neih a rinawm tlat a ni.

𝐋𝐞𝐧𝐭 𝐒𝐞𝐚𝐬𝐨𝐧

Kan Kristianpuite zawng zawng hian Lent Season an tih hi an hmang thin a lo nia. Hei hi keini Mizoten kan uar loh tak a ni tlat hi a mak angreng a. Camping leh Crusade kan uar chhan pawh hi ni thei tak ang maw? Lent hian Easter Sunday hma kar ni 40 a huam a. Ringtu tam takin heng hunah hian Isua thih leh thawhlehna lam hre chiang lehzual turin an inserh hrang a, thil tam tak an insum thin a ni. Thenkhat chuan sa pawh an ei duh lo va, hlimhlawp programme reng reng an kal duh lo va, mipat-hmeichhiatna te pawh hmang lo turin an inthiarfihlim thin a ni. Hemi hun chhung hian an tawngtai hnem a, Bible leh Pathian Thu lam te an chhiar a, Pathian lam an hawi thin a ni. Tihluihna lam ni lovin mahni thahnemngaihna leh inpekna atanga tih a ni tlangpui a. Catholic leh Orthodox Kristiante tih chi emaw kan lo ti deuh mai hi Protestant lam pawhin an lo uar hle tih hriat a tha. Hemi hun bika chhiar tura buatsaih lehkhabu pawh Saptawng chuan a awm nual a ni. He kawng hi kan ropuina tur ni lovin Krista kan hmangaih avang liau liaua zawh tur chi a ni bawk awm e.

𝐊𝐫𝐚𝐰𝐬 𝐇𝐥𝐮

Pathian rilru puthmangin min chhandam lo a, Pathian Fapain Kraws a tuar vanga chhandam kan ni mai zawk a ni. Pathian hmangaihna, khawngaihna, ngilneihna, thatna, dawhtheihna, etc., zawng zawng hi Kraws tel lova awm a ni lova. Hmangaihna, khawngaihna, ngilneihna, thatna, dawhtheihna zawng zawng hian Kraws a rawn thlun zawm vek a, Kraws kaltlangin kan lo chang ta mai chauh a ni e. Chuvangin sual pawi tham lo anga i ngaih, Pathian pawhin a palzam mai mai dawna i hriat zawng zawng, i ngaimawh tham lohte kha Pathianin a ngaihdam dawn chuan Kraws a kaltlang veka tih a ngai. A te ber pawh kha Kraws kaltlang lo chuan ngaihdam theih a ni lo. He thu hi a serious hle mai. Kraws kaltlang lovin engmah pek i ni si lo. Pathian Fapa meuh a thih a tul a ni. Chuvang chuan alawm Kristian, i Lalpan i tana a tuarna hi theihnghilh ngai lo la. Kraws bulah chuan chhuan tur pakhat mah i nei lo tih pawh hre reng ang che. Chu chu i hmuh fiah poh leh i nun chawmin a awm ang.

𝐔𝐫𝐡𝐬𝐮𝐧 𝐚 𝐩𝐡𝐮

Isua thihna leh thawhlehna thu hi Chanchin Tha bu 4-te uar ber a ni tih a chiang a. Uar mai ni lovin an ziah chhan a ni zawk hial a ni. Lehkhathawnte pawh hemi tlawhchhan Chanchin Tha vek a ni a. Kum tina a champha a lo her chhuah leh hian theih anga urhsun leh uluka hman a tha hle ang tih chu a hriatthiam theih mai a. Amah kan zawn chuan a pawlna duhawm tak kan chang ngei dawn tih a hriat theih a. A ni chauh emaw, Biak Inah chauh emaw hman tum mai lovin a thlen hma fe atangin lo inbuatsaih ila. Kalvari tlang lam thlirin boruak dang na deuh deuh rilru la peng theitu hnawl thiam ila a tha awm e. Chu chu Pathian kan hnaihna tura a duhzawng tak a nih ngei a rinawm. Hnam dangte angin ni 40 chhung em kan ti thei lo a nih pawhin Lungngaih Hapta tal hi chu tangkai taka hmang turin kan induhsak a ni.

*****