𝐊𝐎𝐇𝐇𝐑𝐀𝐍: 𝐙𝐀𝐁𝐈 𝟏𝟗-𝐍𝐀 𝐀𝐓𝐀𝐍𝐆𝐈𝐍

Pathian Kohhran chanchin hi a ngaihnawm hle a. Ringtu mimal chanchin ang maiin a ngaih theih dan a awm. Harsatna leh buaina a tawk hnem hle a. Chu chu tunlai hun (Modern times) ah phei chuan a lang chiang lehzual. Hriatna lo thang zelin hmanlai deuh zawk atanga a tihdan phung pangngai kha a rawn su dawrh dawrh a. Kohhran chuan a dinhmun a siamrem deuh a ngai fo a ni. Chutiang karah chuan Pathian mi rinawm an lo chhuak a, Kohhran tana thih huamin an bei a, Chanchin Tha mei chu mit lova inhlanchhawn zel a lo ni thin a ni.

𝐒𝐚𝐤𝐡𝐚𝐰 𝐭𝐡𝐢𝐥𝐚𝐡 𝐤𝐡𝐚𝐰𝐭𝐡𝐥𝐚𝐧𝐠 𝐚 𝐜𝐡𝐢𝐫𝐢

France Revolution 1757 khan sorkar leh khawtlang nun atangin Kristianna a paih chhuak dawrh mai a. Thil pawi tak leh Kristian ram tana thil thar a ni. Sakhua chu tibo hlen lo mahse sakhaw dinhmun chu a tiderthawng ta hrim hrim a. Ngaihtuahna thar a lo chhuak ta tuam tuam mai. Ludwig Feuerbach (1804-1872) chuan Pathian hi mihringte suangtuahna vak velin a siam a ni, tih thu a rawn zirtir a. Communist ngaihdan zirtirtu Karl Marx-a (1818-1883) pawhin Pathian chu harsatna leh hrehawmna tuar mihringten inhnem nana an ngaihtuah chhuah mai mai angin a zirtir ve bawk. Rilru zirna lama mithiam Sigmund Freuda (1856-1939) chuan sakhua hi mihringte 'duhthusam' mai mai angin a zirtir thung.

Heng zirtirna leh hriatna lo pungin a hrin thil tam tak avangin 1920 a lo thlen meuh chuan mi tam takin Kristian sakhua chu mimawl sakhua angin an ngai nghet ta a ni. Russian Revolution (1917) in a rah chhuah Union Soviet Socialist Republic chuan mimal nun leh khawtlang nun atanga sakhua tih bo a tum tlat a. Sapho khawtlang nunah Pathianin hmun a chang tlem sawt hle a. Berlin bang pui 1989-a a chim atang khan sakhua lamah a rilru a zau leh ta chauh a ni.

Kum 1800 chhovah Kohhranin hetiang hriatna leh thiamna lama hmasawnna nasa tak a hmachhawn avang hian Pathian Thu an lo rin leh zirtir dan hmasa pawh theologian ten an ennawn nasa hle a. Mite hriatthiam theih zawnga sawifiah an tumna lamah Mizo Kristianten kan hlauh em em Liberal Theology te pawh a rawn lar ta a ni. He theology hian mihring hriatna leh thiltihtheihna a dah sang a, Bible pawh mihring kut chhuak dang ang thova ngaiin mihring thatna lam a uar hle a ni.

𝐂𝐡𝐚𝐧𝐜𝐡𝐢𝐧 𝐓𝐡𝐚 𝐡𝐫𝐢𝐥 𝐭𝐚𝐮 𝐚 𝐭𝐞𝐭

A lehlam thungah chuan heng hunah hian Chanchin Tha hril harhtharna a chhuak nasa a. India rama Protestant missionary hmasa ber Bartholomew Ziegenbalg chu 1706 khan Chennai a rawn thleng a. 1793-ah William Carey-an Serampore-ah rawngbawlna bul a tan bawk. China lamah Hudson Taylor-a kalin China Inland Mission chu 1865 khan a din a. Adoniram Judson-an martar thakin Burma ramah Chanchin Tha a hril bawk a ni. Missionary tam tak hi kohhran mal tirh ni bik lovin Missionary Society rawn piang ta chur churin a chhawr an ni deuh ber. Missionary-te hian hmanrua an theih ang ang an hmang a. Thil chhinchhiah tlak tak pakhat chu hmeichhia rawngbawltu (missionary) an tam ta hle kha a ni.

Missionary-te chuan tih that tam tak nei mahse han thlir let chuan tih fuh loh pawh an lo nei ve fo thin a ni awm e. Mahni ram leh hnam dah chungnunna leh an rawngbawlsakte hmuh hniamna an nei fova, khawthlang nun leh Kristian sakhua hi an hmer kawp thui lutuk thin bawk. Mahni pawl tan a tina a, khawvel sorkar nen an kalkawp fo. Tin, sum hmang thiam lo an tam a, an rawngbawlsakte anmahniah an innghahtir nasa. Amaherawhchu, an rawngbawlnate an hmangaih tak tak thung. An tawng an zir thiam a, an nunphung an ngaihlu a, zirna tha buatsaihsakin damdawi in leh school an din sak thin. Bible, Kristian thuziak leh hla te letlingin politics leh khawtlang nun hmun tam takah an siam tha a, Kohhran an din thin a ni.

𝐈𝐧𝐝𝐢𝐚 𝐡𝐦𝐚𝐫𝐜𝐡𝐡𝐚𝐤-𝐚𝐡

He mission hna tautet hi Northeast India-in kan lo hlawkpui a, 1829 khan Serampore mission-in Guwahati-ah school a din tan a, 1836-a American Baptist Missionin China ram luh tumin Assam chhungah hmun an khuar bawk a. An hlawhtling hleih theih loh avangin a chhehvel hnam hovin an that phah ta a ni. Garo ram (Meghalaya)-ah chuan Garo mi piangthar hmasa pahnih ten Chanchin Tha hril rawngbawlna an tan hmasa ber. A ropui hle. Khasi Jaintia ram (Meghalaya) lamah chuan Serampore mission bul tanin (1813), Welsh Missionary Society chuan 1841 khan Thomas Jones a rawn tir ta a ni. Nagaland-ah 1871 khan Chanchin Tha Winter Clark-a’n a thlen a. Mizoramin 1894-ah a dawng bawk. Manipurah chuan William Pettigrewan 1894 khan Meitei zingah American Baptis Mission tirhin hna a tan a, a harsat deuh avangin 1896 khan Tangkhul Naga ho zingah a insawn ta a ni. Manipur chhim lamah thung chuan Watkin R. Roberts leh Mizo missionary (Savawma, Thangchhingpuia leh Vanzika) ten Thadou-Kuki Pioneer Mission kum 1910 khan an tan a, hei hi 1919-ah NEIG Mission tia thlak a ni. Manipur chhim lama Kohhran din kawngah hian Mizo rawngbawltute an tangkai zia hi a hriat reng tlak hle.

Roman Catholic ten 1872 atang khan Northeast an tlawh zauh zauh thin a. Luhchilha an rawngbawlsakte chenchilha rawngbawlna chu German mi Salvatorians an tih te, Belgium atangin Jesuits an tih leh Salesian Don Bosco te an ni. Kum 1990 a lo thlen meuh chuan Northeast Kristiante chu Roman Catholic 43%, Council of Baptist Churches in the Northeast India 26%, Presbyterian Church of India 23% kan ni ta a ni.

𝐊𝐨𝐡𝐡𝐫𝐚𝐧 𝐢𝐧𝐩𝐮𝐦𝐤𝐡𝐚𝐭𝐧𝐚 𝐦𝐨𝐯𝐞𝐦𝐞𝐧𝐭

'Mahni seh seh mual hranah' tih chu an ning ta a ni ang. Missionary society pawl hrang hrang chuan zai khata luan pawimawh zia an hre ta a. Edinburgh khawpuiah 1910 khan World Missionary Conference neih a ni a. An phur hle. Kum 10 chhunga khawvel pumpui hi Kristiana siam theih an inring hial. He inkhawmpui pawimawh tak atanga thang chho zelin 1948 khan World Council of Churches a lo ding ta. WCC-ah hian Roman Catholic leh evangelical/fundamentalist pawl henkhat tih loh chu khawvel kohhran lian deuh hi an tel vek tih theih a ni a. Catholic kohhran lamah Pope ro nei mang lo tura an ngaihin beisei loh takin Vatican Inkhawmpu II-na a ko ta thut mai a. Catholic thurin leh kalphung tam tak ennawn a ni a, Catholic Kohhran chu rahbi tharah a chuanpui ta hial a ni. Protestant kohhran pawh kalsual pawla ngaih chu banin, "unau inthenpuite' (separated brothers) tiin an pawm a. 'Catholic Kohhran pawnah chhandamna a awm lo' ti thin khan Catholic Kohhran nen lo chuan chhandamna a awm lo,' an lo ti thei ta a ni.

𝐓𝐥𝐚𝐧𝐠𝐤𝐚𝐰𝐦𝐧𝐚

Kum zabi 20-na tawp lamah meuh chuan khawvela Kristiante inzarpharh dan a dang ta hle a. Kristian ram ni thin Europe leh North America lamah Kristianna a tlahniam nasa hle a. A chhan pawh khawsak phung nawmna leh mihring thiamna sang zel avanga mihring induhtawkna lo awm ta hi a ni awm e. Chutih rualin mak tak maiin tun hmaa Kristian la ni ngai lo ram South America, Africa leh Asia ramah te Kristian an pung nasa a, mi thiam tam takin hei hian Kristianna nihphung leh awm dan tur a la tidanglam nasa hle dawnin an hria a ni.

*****