𝐊𝐇𝐀𝐖𝐍𝐆𝐀𝐈𝐇𝐍𝐀𝐀 𝐂𝐇𝐈𝐀𝐍𝐆 𝐋𝐎

Mizotawng pianpui tawng atana nei ve lo kan thian pakhat chuan nula pakhat chungchang sawiin, “A ni hi chu ka ngaizawng ni lovin ka khawngaih tlat,” a ti ta roh a. Hre phak te chu kan lo ip chawih chawih mai. Kha nula khan khawngaih bik nih kha a lo duh ikhaw lo mai bawk a. Mi aia nula ‘khawngaihthlak’ bik nih chu thil duhawm tak va ni suh. Kan thianpa khan a tawngkam hmanin midang aia ‘chau bik, thei lo bik, midangte tluk lo bik, tlawm bik, chan chhe bik,’ tihna a kawk thei tih a man pha miah lo. Chutiang chiah chuan ‘Pathian khawngaihna a ni e,’ kan tih hian ‘phu loh malsawmna leh duhsakna’ kan dawn, keimahni lama chhuan tur reng awm lo tihna a lo ni daih a. Khawngaihna pawm tur chian inngaihtlawm hle a ngai. Thenkhat chuan Chhandamna pawh hi eng emaw tizawng taka kan thawh chhuah ni se an tih hmel zawk thin a. Khawngaihna vek a nih chuan a dawngtuin a bat a rul zo seng dawn lo a ni si a. Khawngaihnaah chuan kan chiang em tih inenfiahnan a hnuaia mite hi hmang ta ila:

𝐈 𝐢𝐧𝐜𝐡𝐡𝐮𝐚𝐧𝐠 𝐟𝐨 𝐚 𝐧𝐢𝐡 𝐜𝐡𝐮𝐚𝐧 𝐤𝐡𝐚𝐰𝐧𝐠𝐚𝐢𝐡𝐧𝐚 𝐢 𝐦𝐚𝐧 𝐥𝐨 𝐭𝐢𝐡𝐧𝐚 𝐚 𝐧𝐢

Bible-in Pathian khawngaihna a sawi chuan ‘phu loh malsawmna’ mi tling lo ten kan dawn hi a kawk deuh ber a. A awmzia chu ringtuin a phu loh tawp malsawmna a dawng tihna a ni. Hei hi thu ril tak a ni. Chanchin Tha laimu leh Chhandamna hnuk a ni bawk a. Chu malsawmnain a ken tel chu mihring nihna chau em em pawm theih a ni a. Mahse, kan tawngkamah hmang tlanglawn hle mah ila a nihna tak pawha nun chhuahpui loh a awlsam hle thung. Mahni tana pawm nuam leh hlimpui awm ni fo mah se, nun chhuahpui lamah chuan kan tifuh lo fo thin niin a lang. Midang nena nun honaah leh rawngbawlnaah hian midangte aia thei zawka inngaihna a lo piang hma duh khawp mai a lo ni a. Thlarau chang sang bera inngaite nunah pawh hei hi a lo lang leh zawk thin. Thei intihna leh midangte aia sang zawka inngaihna hi rin loh hlanin a rawn inpho chhuak a, chu chu Thlaraua tihhlum loh chuan rah duhawm lo a chhuak thin a ni. Thei riau intia kan inchhuang fo a nih chuan khawngaihna a nihzia kan man lo hle tihna a ni a, Thlarau dan hmang lovin khawvel danin kan inteh hman tihna a ni ang. ‘Phu loh malsawmna’ ah chuan inchhuanpui tur a awm miah si lo va.

𝐌𝐢𝐝𝐚𝐧𝐠𝐭𝐞 𝐢 𝐡𝐧𝐮𝐚𝐢𝐜𝐡𝐡𝐢𝐚𝐡 𝐭𝐡𝐢𝐧 𝐜𝐡𝐮𝐚𝐧 𝐤𝐡𝐚𝐰𝐧𝐠𝐚𝐢𝐡𝐧𝐚 𝐢 𝐦𝐚𝐧 𝐥𝐨 𝐚 𝐧𝐢 𝐛𝐚𝐰𝐤 𝐚𝐧𝐠.

Khawngaihna ziain a hnawl chian em em chu midangte hnuaichhiahna hi a ni ang. Chu chu mahni inngaihsanna leh induhtawkna, tling intihna atanga lo chhuak a ni chiang si a. Mite nena inkhaikhin a, an ni aia thei zawka inngaih leh chumi avanga hmuhsitna lo chhuak hi chapona kan tih tak chu a ni. Mahni inhmuh lenna dik tak a ni si a. Pathian min dahna avanga hotu nihna te, roreltu nihna te phurh thiam chu sual a ni hauh lovang, chutiang dinhmuna dingte chuan an mawhphurhna te tha takin an hlen chhuak tur a ni ngei a. Fing leh fel pawla Pathianin a siam pawhin pawm thiam mai tur a ni. Mahse chumi avanga midangte chungtlak leh hmuhsit phah chu chapona kan tih hi a ni thung. Lal Isua tehkhin thua bawi pakhat a puin a a leiba a ngaihdamsaka kha a zia a mak hle a ni. Rs. 7,600,000/- hu vel a ngaihdamsak hnu khan a chhuak a, ama sum Rs 760/- vel batu a bawipui khan a pek theih loh avangin a hrawkah a rek a, jail a tantir a nih kha (Matt 18: 21-35). Khawngaihna a man lo chiang rem rem hle a ni. Hetiang nun hi engtik lai pawhin kan nei thei reng tih hriat a tha. Rawngbawlpuite hmuhsit rukna te, hnuaichhiahna leh sit riauna te kan lo neih ruk chuan keimahni ngei pawh Pathian khawngaihna avang chauha nung leh che, a rawngbawlna kengtu kan nihzia kan hai a ni ngei ang. Midang deu riauna te kan nei fo a nih chuan chhiahhlawh sual pa ang chauh kan ni tihna a ni.

𝐈 𝐩𝐡𝐮𝐧𝐜𝐡𝐢𝐚𝐫 𝐯𝐢𝐚𝐮 𝐜𝐡𝐮𝐚𝐧 𝐤𝐡𝐚𝐰𝐧𝐠𝐚𝐢𝐡𝐧𝐚 𝐢 𝐦𝐚𝐧 𝐥𝐨 𝐚 𝐧𝐢 𝐧𝐠𝐞𝐢 𝐚𝐧𝐠.

Thenkhat chu Krista hnungzuina kawngah hian an phunchiar viau a ni awm e. Kohhranah te hian a thahnemngai lo zawk hi a phunchiar zawk an ni duh khawpin an sawi. An phunchiar viau chuan dinhmun beisei ruk an nei a, an ni thei si lo a ni duh. Chutiang tih chingte phei chu an thil lak dan a khawvel hle tihna a ni. Pathian hnung an zui avanga an tuarna leh channa sawi nuam ti riaute pawh an awm a ni awm e. Phu loh malsawmna awmzia an man lo a ni ngei ang. Pathian khawngaihna avang chauha chhandam, khawngaih rawngbawlna pek i nihzia hre chiang ngat la chuan phunna tur i hmuh zawng zawng kha chu hriatna chuan a nuai ral vek ang. Lungawi lohna tur i khawl khawm zawng zawng kha khawngaihna nena khaikhin chuan phawrh lan hrehawm khawpa zahpuiawm a ni mai dawn si a. Holy War an beih laia Hrangekan tank lian a rawn ken rup laia Sudden Muangan pistol chhete a lo phawi ve ang maia inhmeh lo a ni ang. Tuar nasa berte hian an tuar a ni tih an hre lo fo a, thawk nasa berte hian an thawh nasatzia an hmu hman lo thin. Sawisel tur leh lunghnurna tur hmu thei viaute hian mihring tehfung ‘a thei thei sanna’ hmangin khawngaihna ‘phu loh malsawmna’ hi an man lo a ni ngei ang. Mahni chakna vanga sang nia inhriatna leh Khawngaihna Theology hi a inrem lo a ni.

𝐈 𝐳𝐚𝐦 𝐭𝐡𝐢𝐧 𝐚 𝐧𝐢𝐡 𝐜𝐡𝐮𝐚𝐧 𝐤𝐡𝐚𝐰𝐧𝐠𝐚𝐢𝐡𝐧𝐚 𝐢 𝐥𝐚 𝐦𝐚𝐧 𝐟𝐮𝐡 𝐭𝐚𝐰𝐤 𝐥𝐨 𝐚 𝐧𝐢 𝐭𝐡𝐞𝐢 𝐚𝐧𝐠

Khawngaihna ‘phu loh malsawmna’ hi a lehlam atanga en chuan Zahngaihna ‘phu anga hrem loh’ tihna a ni ve leh chiah a. Thil pakhat tawngkam hrana sawina nih laiin a thluk tum dan a dang hret bawk a. Zahngaihnaah chuan kan phu tawk min pe lo va (a na lutuk dawn si a), Khawngaihnaah chuan kan phu loh duhsakna kan dawng (chhuan tur kan nei lo) a ni. Pathianin a zahngaihna vang liau liaua kan koa a nghah a nih avangin min kohna zawnah chuan zam tur zu awm hauh lo va! Zamna leh huphurhna mai bakah ngaihthat lohna te pawh hi mihring rilrua lo awm thin tih a chiang. Keimahni theihna hmanga tih tur ni dawn sela zam chhiat chu thil awm tak a ni. Mahse, Pathian khawngaihna huang chhungah hi chuan zam tur a awm lo tih Paulan a hre chiang em em a, “Khawngaihna zara he rawngbawl hna hi kan hmuh avangin kan zam lo ve,” (II Kor 4:1) tiin a sawi mai a ni. Kan theihnaa innghat a ni lo va, kan chaknaa ti tur kan ni lo va; keimahni inchhekarbawmna tur thil a ni lo va, fak kan hlawha ropuina kan channa tur thil a ni lo. Pathianin ama remruat anga tling lo leh chak lote hmanga a thiltum hlenna hmanrua kan lo nih ve takah chuan dawl lo leh zam lovin kan bawh chawt mai a ni. Chuvangin, i la zam fo a, i la hnungtawlh dawn uai uai reng a nih chuan Pathian Khawngaihna hi i la man fuh tawk lo a ni thei ang. Chak takin awm ang che. Khawngaihna chu nangmah lam ni lovin Khawngaihtu lam a ni zawk si a.

*****