🅺🆁🅸🆂🅼 🅰🆂-🅰🅷

Kum khat chhunga kan hun nghahhlelh ber chu a lo thleng leh ta a. Nikum lamah mumal lo takin kan tlingtla tawh a, kumin pawh kan duhthu chu a sam chiah dawn lo a nih leh hi. Kan tum buau hlawm a nih pawhin ‘duhtawkin kan hmang zing tawh alawm mawle,’ tih mai a finthlak hmel e. Engemaw zawng chuan Pathianin Krismas laimu zawk ngaihtuah chiang turin min duh te pawh a ni mai thei asin. A hlimhlawp lama tlan reng kan tam thin kha. Krismas tak tak lawm kum ni zawk hlauh se!

𝗞𝗿𝗶𝘀𝗺𝗮𝘀𝗮𝗵 𝗵𝗶𝗮𝗻 𝗟𝗮𝗹 𝗹𝗼 𝗽𝗶𝗮𝗻𝗴 𝗸𝗮𝗻 𝗹𝗮𝘄𝗺

Ka vai thian neihve pakhatte kohhran chuan Krismas an hmang duh miah lo. An ngai Kristian lem lo a ni! Ringtu theuh theuh ngaihdan a dang mang e maw. Kan zingah pawh tun thlengin mi thenkhat sawipawr tum tlat an awm leh thin. Tin, kan hre sual chawk bawk a. Krismas hi Isua birthday emaw lo ti tlat kan awm leh thin. December 25-ah hian a piang chiah nge chiah lo tuman an hre lo. Mahse hemi nia a pian lawm hi a pawina a awm lem lo thung. Hemi niah hian a lo piang lo a nih pawhin he khawvela a lo kal kan lawm hona ni a ni ve mai tih hriat tur a ni.

Isaia 9:6-ah “Kan tan naupang a lo piang a, fapa pekin kan awm ta. Rorelna chu a kokiah a chuang ang a.” tih kan chhiar kha. Krismas nia kan lawma hi lei leh van roreltu a ni a. Khup tinreng a hmaa an thingthit a, lei tinrengin a lalna an puan hmain kraws kawng a zawh a la ngai a, lallukhum a khum hmain hling lukhum a khum a tul a, Juda hnam sakeibaknei kha beram no nunnem anga a lo kal a la ngai tlat si a nih hi. Amahah hian lalna leh thuhnuairawlhna, thiltihtheihna leh tuarna, hmangaihna leh channa, ropuina leh inngaihtlawmna a luang khawm vek. A hming ‘Maka’ a ni si a!

𝗞𝗿𝗶𝘀𝗺𝗮𝘀𝗮𝗵 𝗵𝗶𝗮𝗻 𝗕𝗲𝗶𝘀𝗲𝗶𝗻𝗮 𝗡𝘂𝗻𝗴 𝗸𝗮𝗻 𝗹𝗮𝘄𝗺

Krismas hi hmanlai thil thleng tawh lawm chauh a ni lo va, thil lo la thleng tur buaipui ringawt pawh a ni chuang lo. Krismas chu Isua Krista takzia hriatfiahna hun, kan tun huna kan chen mek, nakin hun tha min hruai thleng tur thil a ni. Isaia hian a lo sawi chiang em a nih hi. A hming Maka kan tih hian mak danglam hrim hrim aiin a thatzia hriat phak loh khawpa mak a kawk a. He khawvelin a pek buaipui tlak tak tak si loh itawm deuh anga lo lang thin mai mai buaipui tawh lovin a tak tak hlimpui tham chu kan buaipui tawh a. Lal Isua-ah chuan hringnun chhe tawh hi a tihdanglam vekin a awm a ni si a. He khawvelah hian fin a har, chet fuh reng pawh thil awm hleithei a ni lo. Eng kawng ber nge kan zawh dawn tih kan buai fo thin. Mahse, Remruattua rem ruat anga nungte tan a hahdamthlak tawh, tunah chuan remruattu rintlak ber kan nei tawh si a. Ama remruatna anga awmte tan chuan hringnun buai tak hi dik leh fel taka paltlang theih dan a awm tawh a ni.

Pathian Chaka lam kan tan avang hian a changtupa lam tang tihna a nih avangin kan hmachhawn engkim hnehin a tawpah chuan a chak zawk kan la ni ngei dawn tih a chiang a. Kan thil buaipui hi khawvel hmuh theih china tawp mai ni lo, chatuan kaihhnawh nun kan neia Chatuan Pa angchhungah kan awm avang hian a thlamuanthlak a ni. Chu muanna duhawm tak, khawvel mite hriat phak loh, Pathian leh mihring remna chu Remna Lal chuan min rawn pe ta a ni. Lei leh van inremna ni chu beiseina nunga thlirin remna rawngbawl hna chu kan thawk sauh sauh a ni.

𝗞𝗿𝗶𝘀𝗺𝗮𝘀𝗮𝗵 𝗰𝗵𝘂𝗮𝗻 𝗥𝗲𝗺𝗻𝗮 𝗹𝗲𝗵 𝗠𝘂𝗮𝗻𝗻𝗮 𝗸𝗮𝗻 𝗹𝗮𝘄𝗺

Thuthlung Hlui zawlneite hrilhlawk chu sakeibaknei leh beram no an tlat zaa, miten an ngunhnamte leilehnaa an chher a, indo thu an hriat tawh loh hun kha a ni a. Remna Lal lo piang hian he hun hi a rawn hawng ta a, a famkimna hun kan nghak mek a ni. Pathian Ram chu a lo thleng tawh a, chu chu mi thenkhatin an tem tawh a ni. He khawvelah hian chumi temtute nunah chauh remna leh muanna tak tak chu a thleng a. Chumi changtute chuan he khawvelah hian kan kangkai ve zel tur a ni bawk ang.

Hebrai tawnga remna leh muanna sawi nana an hman thin shalom chuan innghirnghona awm lova reh vawng vawng ringawt hi a kawk lo a ni awm e. Thil awm lo sawina aimahin thil hlu tak awm sawina – midangte nena inremna, nunkhaw nawmna, hnianghnarna leh dikna te a awm kawp vek a, chu thil chu an induhsak thin. He shalom a thlen theihnan hian eng chen nge kal kan inhuam le? Pathian leh mihring inkara inremna a lo thlen leh mihring leh mihring inkara inremna a awm theih nan eng nge kan tih ve ang? Chu chu Krismas min chona theuh a ni.

𝗞𝗿𝗶𝘀𝗺𝗮𝘀𝗮𝗵 𝗰𝗵𝘂𝗮𝗻 𝗧𝗵𝗮𝘄𝗵 𝗵𝗼 𝗛𝗹𝘂𝘁𝗻𝗮 𝗸𝗮𝗻 𝗹𝗮𝘄𝗺

Thil pakhat ri tleng ringawt hi a mawi har khawp a, chutiang chi hrang hrang a lo rik hian a ‘music’ bik ta riau thin. Chu chu ri chi hrang hrang tang ho chu ri pakhat ai chuan a mawiin a pui daih a ni tih kan hre vek ang. Mal tan ai chuan thawh ho ropuina leh that zawkzia Krismas hian a tilang a, chumi nun chu a rawn lang chhuahtir bawk a, he khawvel hian chu chu a mamawh mang e.

Krismas hi tih hona tha chanchin a ni. Mi fing ber leh mi tluangtlam ber te, leh lei mi leh van mi fuan khawmna hun a ni a, Pathian Fapa-in nu leh pa atana mihring chak lo tak a rawn panna hun a ni. Van zaipawlten lei mihringte an rawn zawmnaa hun a nih chu! Kristian thurin hrim hrim hi thawh hona leh inremna vulh tumna thurin a ni ber mai a. Trinity thurin hlutna te hi kan hre telh telh dawn! Minung pathum, hrang hlak inpumkhat si hi chatuan thil a lo ni daih! Danglam chunga inrem taka awm ho hi Kristian sakhuain a hril Chatuan thuchah a lo ni a! Chu chu Krismas laimu chu a ni e. Krismasah hian hengte hi kan nunah lian thar mawlh teh se.

𝗞𝗿𝗶𝘀𝗺𝗮𝘀 𝗱𝗶𝗸 𝘁𝗮𝗸 𝗮𝘄

Nulat-tlangval, zu leh sa hmanga nuam taka Krismas hmang thinte khan an lo va hlat rem rem em. A pian kan lawm bera lo kal chhan chu ‘Diabola hnathawh tih boral’ a ni miah mai si a. Taksa nawmna ringawt buaipuia Krismas hman nawm tumtuten an lawm fuh ngai lo. Sum leh paia hlawkna thlahlela hmangtute hlei hlei hian an su fuh lo mawle. Krismas chu engkim kalsana mihringte tana inpekna lawm hun kha a nia. Chu nun chu pawh fuh a har khawp mai. Kumin Krismas chu ‘Kan hmang nuam lo,’ ‘Ka ning,’ ‘A hrehawm,’ ti zawnga ngaihtuah lovin, ‘Tunge ka pek ang?’ ‘Eng nge ka theh chhuah ang?’ ‘Engtin nge kan chhungkua kan chet ang?’ tiin Krismas kut ‘Pek chhuah kut’ hi hmang tha ta ila, hriat reng tlak a va ni dawn em!

Tichuan, Krismas nihna tak pawh tumin tan la ila. Nulat-tlangval, zu leh sa hmanga nuam taka Krismas hmang thinte khan an lo va hlat rem rem em. A pian kan lawm bera lo kal chhan chu ‘Diabola hnathawh tih boral’ a ni miah mai si a. Taksa nawmna ringawt buaipuia Krismas hman nawm tumtuten an lawm fuh ngai lo. Sum leh paia hlawkna thlahlela hmangtute hlei hlei hian an su fuh lo mawle. Krismas chu engkim kalsana mihringte tana inpekna lawm hun kha a nia. Chu nun chu pawh fuh a har khawp mai. Kumin Krismas chu ‘Kan hmang nuam lo,’ ‘Ka ning,’ ‘A hrehawm,’ ti zawnga ngaihtuah lovin, ‘Tunge ka pek ang?’ ‘Eng nge ka theh chhuah ang?’ ‘Engtin nge kan chhungkua kan chet ang?’ tiin Krismas kut ‘Pek chhuah kut’ hi hmang tha ta ila, hriat reng tlak a va ni dawn em! Tichuan, Krismas nihna tak pawh tumin tan la ila.

KRISMAS CHIBAI LE

*****