🅺🆁🅸🆂🆃 🅰 🆁🅸🅻🆁🆄

"𝐻𝑒 𝑟𝑖𝑙𝑟𝑢, 𝐾𝑟𝑖𝑠𝑡𝑎 𝐼𝑠𝑢𝑎 𝑝𝑎𝑤ℎ𝑎 𝑎𝑤𝑚 𝑏𝑎𝑤𝑘 𝑘ℎ𝑎, 𝑛𝑎𝑛𝑔𝑚𝑎ℎ𝑛𝑖𝑎ℎ 𝑎𝑤𝑚 𝑟𝑎𝑤ℎ 𝑠𝑒; 𝑎𝑛𝑖 𝑧𝑎𝑤𝑛𝑔𝑖𝑛 𝑃𝑎𝑡ℎ𝑖𝑎𝑛 𝑎𝑛𝑔𝑎 𝑎𝑤𝑚𝑎, 𝑃𝑎𝑡ℎ𝑖𝑎𝑛 𝑡𝑙𝑢𝑘𝑎 𝑎𝑤𝑚 𝑐ℎ𝑢 𝑡ℎ𝑖𝑙 𝑡ℎ𝑙𝑎̂𝑘ℎ𝑙𝑒𝑙ℎ ℎ𝑙𝑒𝑖ℎ 𝑡ℎ𝑒𝑖ℎ𝑎ℎ 𝑎 𝑟𝑢𝑎𝑡 𝑙𝑜 𝑣𝑎, 𝑚𝑖ℎ𝑟𝑖𝑛𝑔𝑡𝑒 𝑎𝑛𝑔𝑎 𝑙𝑜 𝑝𝑖𝑎𝑛𝑔𝑖𝑛, 𝑏𝑎𝑤𝑖ℎ 𝑎𝑛𝑔𝑎ℎ 𝑎 𝑖𝑛𝑠𝑖𝑎𝑚 𝑎, 𝑎𝑚𝑎ℎ 𝑙𝑒ℎ 𝑎𝑚𝑎ℎ 𝑎 𝑖𝑛𝑡𝑖𝑡𝑙𝑎̂𝑤𝑚 𝑡𝑎 𝑧𝑎̂𝑤𝑘 𝑎. 𝑇𝑖𝑛, 𝑚𝑖ℎ𝑟𝑖𝑛𝑔 𝑎𝑛𝑔𝑎 𝑙𝑜 𝑎𝑤𝑚𝑖𝑛 𝑎 𝑖𝑛𝑛𝑔𝑎𝑖𝑡𝑙𝑎̂𝑤𝑚 𝑎, 𝑡ℎ𝑖 𝑘ℎ𝑎𝑤𝑝 ℎ𝑖𝑎𝑙𝑎 𝑡ℎ𝑢 𝑧𝑎̂𝑤𝑚𝑖𝑛 𝑎 𝑙𝑜 𝑎𝑤𝑚 𝑡𝑎 𝑎, 𝑘𝑟𝑎𝑤𝑠𝑎 𝑡ℎ𝑖ℎ𝑛𝑎 𝑛𝑔𝑒𝑖 𝑐ℎ𝑢." (𝑃ℎ𝑖𝑙𝑖𝑝𝑖 2:5-8)

‘He rilru Krista Isuaa awm bawk kha nangmahniah pawh awm rawh se,’ tiin Tirhkoh Paula’n ringtute a fuih sauh sauh a. Eng ang rilru hi nge Krista rilru chu ni tih kan hriat a ngai ta a. Hnam bil rilru a ni lo phawt a, hausak tum tak rilru a ni lo a, lar tum tak rilru pawh a ni lo a, thu duh tak leh mite diriam tak rilru nen chuan dang tak a ni. Mahni dinhmun siam tum avanga khaw hawi lo leka bei thin rilru a ni lo a, mite aia chungnun tum phet rilru pawh a ni lo. Krismasa Lal Krista lo piang lawm tura kan inbuatsaih tan mek lai hian Krista rilru hriat i han tum teh ang.

𝗧𝗵𝗹𝗮𝗸𝗵𝗹𝗲𝗹𝗵 𝗵𝗹𝗲𝗶𝗵 𝘁𝗵𝗲𝗶𝗵 𝗹𝗼𝗵 𝗻𝗲𝗶 𝘁𝗵𝗶𝗻 𝗿𝗶𝗹𝗿𝘂 𝗮 𝗻𝗶.

Krista chuan Pathian anga awma Pathian tluka awm chu thil thlakhlelh hleih theih lovah a ruat a ni. Chumi awmzia chu, midangten malsawmna an dawn theih nana mahni nihna chen pawh thlahlel hlei thei lo thin rilru a ni e. Tunlai ringtute hi mahni nuam tih chin piah lama midangte vei leh inpe kan awm meuh lo emaw ni aw…tih theih a ni ta. Kan inchhung lum nuam te, kan nunphung pangngai changkang angreng tak te, kan budget pangngaite hi kan thlahlel lutuk anga midang tana malsawmna thlentu nih kan tlin loh a hlauhawm dawnin ka hre ta. Thuhriltu ropui Lalkherha kha rawngbawlna avangin in pawh a awm hman meuh lo a, a fate pawh a hai hial a ni, amah pawhin a fapa a hai thak a ni awm e. Tum khat chu a zinna khaw pakhatah tleirawl chi phur hi a tawk a, chumi zingah chuan a fapa a lo tel ve niin. A fapa a nih a hre miah lo a, a fapa pawh chuan a hre miah lo, an ti.

Krista rilru chu midangte that nana thlakhlelh hleih theih loh nei tlat rilru a ni a. Chutiang rilru chu neih i tum ve teh ang. Thlakhlelh i lo ngah lutuk palh ang e. Khawvel mite chu mahni dinhmun siam turin thlakhlelh hleih theih loh nei turin tan an la ve tho, nalh an tum luatah puar pawh an puar ngam lo ve tho, officer nih an tumna kawngah mutmu pawh an tuah lo ve tho, hausak an tumna lamah rilru leh taksa an hah ngawih ngawih ve tho. Mahse Krista rilru chuan midangte avangin thlakhlelh hleih theih loh a nei a ni. Chu chu a danglamna tak chu a ni.

𝗠𝗮𝗵𝗻𝗶 𝗶𝗻𝘁𝗶𝘁𝗹𝗮𝘄𝗺 𝘁𝗵𝗶𝗻 𝗿𝗶𝗹𝗿𝘂 𝗮 𝗻𝗶

He lai changah hian Mizo Biblea an dah tel loh Saptawng version thenkhata awm a awm tlat mai. Kan Bible-a ‘He rilru, Krista Isuaa awm bawk kha nangmahniah awm rawh se,’ a tih mai lai hian ‘He rilru, Krista Isuaa awm bawk kha, midangte nena in inkar boruakah, awm rawh se,’ tiin midangte nena nun hona thilah a keuh thlu a ni. Chu chuan a thuchah pawimawhna hmun hi a rawn tichiang lehzual a. Hringnunah hian ‘tlawm’ a awm a, ‘mahni intihtlawm’ a awm. ‘Tlawm’ hi chu duh lo chunga loh theih loh vang a ni duh.

Indopui II hun lai Japan kha atirah chuan a chak pep pep khawp mai. An sipaite kha Japanese Samurai rilru an tuh fuh a niang, ram leh hnam tana thi ngam thah ni awm an nia. Kamikaze an tih thlawhna pu ten a puak thei thei phurin an thihchilh ngam miah zel si. Tlawm chu an tum lo nasa. Mahse, Hiroshima leh Nagasakiah Atom bomb an han thlak zet chu…an duh vang reng chu a ni lo. Mahse, an tlawm lo thei lo a ni. Dawl zawrin an zawr a ni.

Krista rilru chu chutianga ‘tlawm’ chu a ni ve lo a. Amah leh amah a inti-tlawm mai zawk a ni. Midangten malsawmna an chan theih nan a ni bawk. Kan Boss-te laka kan intihtlawm hram hram chhan chu an duhsakna dawn zel kan duh vang emaw, an hremna kan hlauh vang emaw a ni ang. Keimahni tan Boss-te do a that loh vang a ni. Mahse Krista rilru chuan mi hniam leh bakberh zawkte tan a that dawn avangin ‘mihring anga piangin, bawih angah a insiam a nih chu.’ Thangkura fiamthu pakhatah khan, ‘Kan level puite kan pha lo,’ a tih kha a ni. Krista rilru chuan level puite a pha lo ngam. Intihzahawm a khel lo, status maintain a tum bawk lo. A tum ber chu midangte tana malsawmna nih theih a ni. An chanvo tur tha thei ang ber buatsaihsak a ni. Chumi kawngah chuan ‘amah leh amah a intitlawm’, midangin an titlawm lo, ama duhthu ngei a ni. Krista avangin engtin nge mahni leh mahni i lo intihtlawm tawh thin le? I nihna kha i hre ram mai em ni? Nge i nihna kha midangte chaldelh nan i hmang? Cartoon pakhat ka hmuh ka hre reng thin. Nu leh a fa kutdawh thlir lai lem pahnih a ni a. A pakhat zawkah chuan nuin a fa hnenah, “Lehkha i zir that loh chuan hetiang kutdawh rethei hi i la ni mai dawn a ni,” a ti a. A lem pakhat zawkah chuan nuin a fa hnenah, “Lehkha tha takin i zir ang a hetiang mi retheite hi nasa takin i la tanpui thei dawn a nia,” a ti. Pathianin min dahna hmun a sang emaw a hniam emaw midangte tana malsawmna nih theihna hmun a nih vek zia hria a, mahni level atanga mahni leh mahni intite thei fo nun hi a va pawimawh em!

𝗧𝗵𝗶 𝗸𝗵𝗮𝘄𝗽 𝗵𝗶𝗮𝗹𝗮 𝘁𝗵𝘂 𝘇𝗮𝘄𝗺 𝗿𝗶𝗹𝗿𝘂 𝗮 𝗻𝗶.

A va han turuin a va han pawimawh tehreng em! He thu hi Mizo Kristianten kan uar thar leh ka duh tak zet a ni. ‘Thi khawp hiala thu zawm rilru’ kan va mamawh tak em! Pathian thu zawm aia ngaihsan kan ngah mah mahin i hre thin em? Pathian hnathawh ropui kan sawi hian a thu zawm ropui thu kan sawi nge ‘khu tah’ ‘khi tah’ ‘sawta thleng’ ‘khata thleng’ ‘a hmuh’ ‘a chan’ kan ti thin le? Krista rilru chu thi khawp hiala thu zawm rilru a ni. Mahni thih zelna ruam chu.

Paula hian sawi tum a nei chiang ‘thi khawp hiala thu zawmin…’ a ti mai lo a, ‘krawsa thihna ngei chu…’ a ti ngat a ni. Kraws thleng lo a a thu zawm chu theih chin pawh a awm a ni mai thei. A zirtirte pawh khan an zawm ve thin kha mawle. Mahse Paula sawi Krista rilru hi chu ‘thi khawp hiala thuzawm’ a ni mai lo a, ‘Krawsa thi khawpa thu zawm’ a ni. Krawsa thih awmzia chu ‘hrehawm tak leh na taka thih’ tihna a ni. Chutiang khawpa midangte hmangaihna leh inngaihtlawmna chu ‘Krista Rilru’ nangmahniah awm rawh se, a tih chu a ni.

Khawvel chuan ‘Krista Rilru’ hi a hrethiam ngai hauh lovang, ringtu inti tam takin hmuh fiah harsa kan ti bawk anga, keini ang duangin music kan man hleihtheih loh angin an man hleithei lovang. Mahse ‘Krista rilru’ chu midangte tana malsawmmna ni tura thlakhlelh hleihtheih loh nei thin, mahni inti tlawm thin leh thi khawp hial-Kraws thihna hial pawh ni se, thu zawm thin rilru a ni e.

𝕶𝖚𝖒𝖎𝖓 𝕶𝖗𝖎𝖘𝖒𝖆𝖘 𝖈𝖍𝖚 𝖍𝖊 𝖙𝖍𝖚 𝖍𝖎 𝖐𝖊𝖎𝖒𝖆𝖍𝖓𝖎𝖆𝖍 𝖓𝖚𝖓𝖌 𝖙𝖍𝖆𝖗 𝖙𝖍𝖊𝖚𝖍 𝖗𝖆𝖜𝖍 𝖘𝖊! 𝕶𝖗𝖎𝖘𝖒𝖆𝖘 𝕮𝖍𝖎𝖇𝖆𝖎 𝖑𝖊.