𝗞𝗢𝗛𝗛𝗥𝗔𝗡: 𝗛𝗨𝗡 𝗟𝗔𝗜𝗛𝗔𝗪𝗟 (𝗔𝗗 𝟱𝟬𝟬-𝟭𝟱𝟬𝟬)

Hun laihawl (AD 500-1500) tir lamah Rom sorkar chak ta lo leh Islam sakhua lo len bakah kohhran chhungkua a tawih ruk avangin kohhran a tlahniam hle a ni. Chauh chhung erawh hi a rei lo lem lo a. Kum AD 1000 a lo nih meuh chuan Europe ram pum puiah kohhran a ding hman vek tawh a ni. Politics leh khawtlang nunah kohhran dinhmun a nghetin Pope thuneihna pawh a sang sawt hle. Zirna lamah ‘scholasticism’ an tih chu uar thar a ni a. Hei hian vawiin thlengin hnuhma a nei thuk khawp mai. Kum zabi 7-na a Muslim sakhua rawn piang chuan Africa hmar lam leh Palestina rama Kristianna chu a rawn khawih buai tan ta bawk a.

𝗩𝗮𝗻𝗴 𝗹𝗮𝗶, 𝗖𝗵𝗮𝘂𝗵 𝗹𝗮𝗶

Isua pian atanga kum 1000 a liam meuh chuan Kohhran chu pawl hausa ber, sorkar ai pawha thiltithei zawk a ni tawh a. Puithiam, bishop, archbishop leh Pope-te thuhnuaiah Kohhran chu a awm a, mi zawng zawng kohhran chhunga an awm tlat si avangin Kohhran chuan khawthlang ram chu a awp a ni ringawt. Pope chu sorkar Lal leh Roreltu te aiin a lal zawk a. Puithiamte chuan rawngbawltu, school teacher, police, judge, retheite enkawltu hna an kawp vek mai a ni awm e. Tunlaiah chuan kan Pastorten rawngbawlna bik deuh chu nei mahse thlarau lamah phei chuan ropui bikna an nei chuang lo tih kan hria. Hun laihawl mite chuan Kohhrana an ngaih chu Puithiam ho kha an ni mai a. Puithiamte chu Pathian nemngheh an nih avangin thiltihtheihna mak danglam tak neiin an ngai mai bawk. An kutah thih leh dam a awm tlatin an hre thin a ni.

He puithuna (atthlak ?) hian an nunah hlauhnain a thawk nasa hle. Khatih hun laia Kristian sakhua chu hlauhna sakhua a ni a, Kohhran chuan a mite chu hlauhna leh tihnain a khuahkhirh tlat a ni. Pathian an ngaih dan chu misual hremtu Pathian tihbaiawm tak, khur chunga biak tur a ni a. Hmangaihna leh khawngaihna Pathian a nihna thu hi chu an hril meuh lova, sual erawh chu a kiam chuang meuh lo a ni awm e. Serh leh sang lam an uar nasat avangin kum zabi 19-na lai vela Hindu sakhua nen a inang deuhthaw a ni, an ti.

𝗞𝗼𝗵𝗵𝗿𝗮𝗻 𝗜𝗻𝘁𝗵𝗲𝗻 𝗣𝘂𝗶

Mi tamtakin a tirah chuan Roman Catholic kohhran hi a awm ngawr ngawr a, chumi atang chuan Protestant hi kan chhuak ta niin an ngai. Hei hi a dik lo hle. A tirah chuan khawtin kohhran kha kohhran dangte zai ngai tak chung leh independent tak siin an ding a. Thurin lamah an inlahrang vak ngai lo. Khawpui lian deuh Rom-te, Constantinople-te, Alexandria ang tea kohhran hruaitu bishop awm chu an induh deuh thin, an ti a. Chuvangin Rom khaw bishop chuan khawdang bishop chungah rorel a tum ta tlat a, lian ber angah ngaih theih a ni ta reng bawk.

Amaherawhchu, lian ve tho Constantinople kohhran chuan a ngai thei vak bik lova; tawng (khawchhak Constantinople Greek tawng hmang vs. khawthlang Rom Latin tawng hmang) leh Pathian thu lak dan kawng thenkhatah (Thlarau Thianghlim chu Pa atanga chhuak tih leh, Pa leh Fapa atanga chhuak) te leh kohhran kalphung thenkhatah (milem hman dan leh ngaihdan, adt.,) danglamna a tam tak avangin 1054 khan Rom kohhran (khawthlang kohhran) leh Constantinople kohhran (khawchhak kohhran) chu an lo inthen ta a ni. Hei hi 'the great schism' an tih Kohhran inthen pui hmasa zawk a ni (a tum hnihna chu Reformation). Khawchhak kohhran hian Europe khawchhak lam leh South India pawh a rawn huam a, doctrine leh kohhran nunah buaina lutuk hmachhawn lovin tun thleng hian puithu takin an la kal map map a ni. Mizoten kohhran kan hriat ber leh min hringtu zawk erawh chu khawthlang kohhran hi a ni.

𝗠𝘂𝗮𝗹𝗽𝗵𝗼𝘁𝗵𝗹𝗮𝗸 𝗖𝗿𝘂𝘀𝗮𝗱𝗲𝘀

Kum sangbi a ral hun lai vel hian Kohhranah thil chhinchhiah tlak a thleng nual mai. Khawchhak leh khawthlang kohhran inthenna bakah Crusades chanchin hi a ni. Crusades hi kohhran chanchina lungchhiatthlak ber pawl a ni awm e. Mi thenkhatin Muslim leh Kristiante indona angah an-ngai. Heng sakhua pahnihte indona hi a ni ngei a, mahse Kristianten Pathian ram leh lei ram an thliar hran theih loh vanga lo chhuak a ni ber zawk. Arab mi aia nunrawng Seljuk Turks ho lo lianin Palestina ram leh Asia minorte an la zo va, ram thianghlim tlawh tumtu te an lo tiduhdah fo thin, Jerusalem lak let tumin Pope hovin Crusades (Kraws indona) 'Indona thianghlim' an tih maiah chuan an 'Krista sipai' an intir ta chum chum mai a ni.

Europe ram atanga ral do tura kal chu Crusaders an ti a, mi awm tha peih lo crusader an tam hle a ni awm e. Naupang te hial pawh tira 'naupang crusade' an tih pawh a awm. Sakhaw thilah hian tih lutuk awm thei tak a ni. Naupangte phei kha chu hi salah an man phiar a ni awm e. Crusade chhung (1095-1270) hian a tirah Kristiante chan a tha deuh a, an inchak chhawk a ni ber. Amaherawhchu, thawh runpui vawi 8 aía tlem lo crusade a zawh meuh chuan ram thianghlim inchi khat pawh an la let ta lo. Muslim leh Kristian inkarah inhriatthiam lohna vawiin thlenga tuha a awm avangin Muslim zinga rawngbawl a harsat phah hial a ni. An beisei ber pakhat khawthlang leh khawchhak inkara inremna pawh a thleng ta chuang lo a ni.

𝗧𝗵𝗹𝗮𝗿𝗮𝘂 𝗧𝗵𝗶𝗮𝗻𝗴𝗵𝗹𝗶𝗺𝗶𝗻 𝗮 𝘁𝗵𝗮𝘄𝗸 𝗿𝗲𝗻𝗴

Hun harsa leh ke chheh sual karah Pathian kohhranah chuan kawng dik zawng pawl an awm reng tho. Chung zingah chuan Franciscan leh Dominican an tihte hi an pawimawh hle a ni. Francis of Assisi (1182-1226) bultanin Friars an tih ho chuan retheih, thianghlim leh thuawihna thutiam la chungin kawtthlerah an kal chhuak a, mi retheite tanpuiin Chanchin Tha an hril thin. Anni ang deuh bawk Dominic (1170-1221)a pawl Dominicans an tih ho chuan zir thiamna hmanginzirtirna dik lo an hmachhawn a, zirna tha pein mite nun an chawikang zel bawk. Tun thlenga theologian ropuia ngaih, Roman Catholic theology innghahna chher chhuaktu thawh hlawk Thomas Aquinas pawh he Dominicans zinga mi hi a ni. Heng Franciscans leh Dominicans ho hian tharum tel lovin Muslim leh zirtirna dik lo zuitute zingah Chanchin Tha an hril thin a ni.

Heng hun chhovah hian Kohhran mimir zingah siamthat tumna boruak a rawn chhuak leh hlat thin bawk. Albigenses an tih chuan Roman kohhranin thuneihna a pumhmawm chu an sawisel nasa hle a, Waldenses an tih ho thung chuan Latin tawng chauh ni lovin, hnamtinin anmahni tawngin Bible an chhiar thei tur a ni tih an kalpui bawk. Heng boruak rawn inmung hi ram pum huapa tiak chhuak lovin nem beh a la ni rih a, a puah chhuah hun erawh chu a awm dawn tih a chiang a. A hnu lawk Reformers ho hunah a rawn thleng ta rup rup mai a nih kha.

Kan hriat tura tha erawh chu - Kohhran hian hun thim leh chauh laite a paltlang hnem tawh hle a, khawvel mithmuha a vanglai tak hi thlarau lama a hniam zual lai a ni thei bawk, mahse Pathian Thlarauvin a chelh tlat avangin thim karah eng a chhitsak lo ngai lo, tih hi a ni ngei ang.

*****