𝐑𝐀𝐔 𝐙𝐀𝐖𝐈 𝐑𝐄𝐈𝐇 𝐑𝐀𝐖𝐈𝐇

Mizote tawngkam hman rim ber pawl zinga tel chu ‘rau’ hi a ni a. Kan hriat thiam dan erawh a dang khawp mai. A sawi fiah dan awlsam pakhatah chuan ‘rau’ tih hian nunphung pangngai huang chhung pawn hreta Pathian nena kaihhnawih thil tih thin hi a ni awm e. Hlim theuh theuhah pawh midangte aia hlim zual deuha lang chu ‘rau’ kan ti chawk a, tui theuh theuhah pawh midangte aia tui chu ‘rau’ kan ti deuh mai a, phul theuh theuhah pawh midangte aia phul nasa deuh chu ‘rau’ kan ti mai niin a lang. Hei hi a dik chin pawh a awm ang. Mahse, heti zawng lo pawh hian a ‘rau’ theih viau tho niin a lang a. A nihna takah chuan zawi reih rawiha ‘rau’ hi kan mamawh tak, kan inzirtir tura tha tak a ni awm asin.

𝐏𝐡𝐮𝐛𝐚 𝐥𝐚𝐤 𝐫𝐢𝐥𝐫𝐮 𝐩𝐚𝐢𝐡 𝐛𝐨

Phuba lak rilru hi mihring pangngai piankena tel ve hrim hrim a ni a. Thawnthu-ah pawh phuba lak hi thu ngaihnawm ber pawl a tling thin. Count of Monte Cristo, Alexander Dumas ziah te kha thawnthu ngaihnawm chuai thei lo a nih kha. Film lamah pawh a hmuhnawm thin. A changtupa phuba lak hun tur kan nghak thup thin a nih hi. Kan chunga kawhmawh bawl tawh te leh mawi lo taka lo che tawh te chunga kan theih anga kut thlak let kan nghakhlel a. Remchang kan hmuh velah kan tuan ta chat mai thin a ni. Tam zawk chuan awm rengah ngaiin hnehna hlado kan chham hial thin a ni mai thei. Pathian duh dan erawh a lo dang daih mai thung a, phuba lak reng reng hi a lo phal lo niin!

Thuthlung Hluia ‘mit aiah mit, ha aiah ha’ tih chu Thuthlung Tharah chuan vuak chhiat a ni ta a. Kan phuba a tul ang anga la turin Pathian ring mai tura tih kan ni zawk. A chhan pawh mihring finna leh hriatnain phuba lak boruak hi a tlin thlawt loh vang a ni ngei ang. Tih pelh rem rum a awl. Amaherawhchu, kan mihring zia phuba lak chakna rilru hi paih a har khawp mai thung a. Min lo sawi chhetute na taka beih let te, min reltute chhiatna sawi chhuah ve nghek mai a awl a. Rorelna fung chelhtu zawka tan tawh phei chuan kan thiltihtheihna chelek mai a awl thin a ni. Phuba lakna rilru avanga chanvo tha an phu ang hup beh sak te, chawimawina an dawn tur thuai chhum sakte thleng hian a ‘rau’ lo chhiava a ni. Thlarau Thianghlim leh phuba lak rilru hi a inkawp hlei thei lo a ni ber mai.

𝐌𝐢 𝐟𝐚𝐤 𝐤𝐡𝐞𝐥𝐡 𝐥𝐨𝐡 𝐭𝐡𝐢𝐚𝐦

Mite kuhmuma par hi thil theih tak a ni. Mahse a ropui lem lo. Tum loh deuhva thleng thei a nih rualin thenkhat chuan an thiam riau a ni awm e. Hetiang tih duhna rilru hi a ‘rau’ lo hle tih a chiang mai a. Mite chawimawina leh fakna dawn tur dawnsak tumna rilru ang chi phei chu rilru dik a ni thei lo hrim hrim. Chutianga hlimna pawh hlimna suak a nihzia a lang reng mai a. Mahni inbumna nuihzatthlak tak a ni awm e. Zawi reih rawiha thlarau mi nih dan chu miten chawimawi an phu ang zela chawimawi an nih theih nana thiltih thinte hi a ni ngei ang. Hei hi mi tam takin an tlin lova midang hming thatna tur hup beh sak an tum hial thin hi thil pawi tak a ni. Midang kan chawimawi hian keimahni kan mawi tel zel a ni tih hi Setana hian min hai luihtir thin.

Hei nena inzawm tlat ‘rau’ lo rem rem tak chu mahni hming chhiat thup nana midangte thiam lohna phawrh chhuah phet tum hi a ni. Political party pakhat thil chin nuihzatthlak angreng tak ang chi hi ni maiin ka hria. An chet chhiat deuh chuan hmanlaia party dang thiltih fuh loh sawi chhuah phet an tum zel! I sual khuh nana midangte sual phawrh i hreh lohva, i chaklohna khuh tuma midangte chak lohna hai lan i tum thin chuan Pathian duh loh zawng tak i ti a ni tih hria ang che. Hei hi chu mihring tehfungah pawh nawi tak a ni tih a lang reng mai. Hetiang timi hi thlarau leh taksaah a ropui viau theih ka ring miah lo. Thil mak tak chu hming that khel miah lo an hming tha thei em em mai te hi a ni.

𝐓𝐡𝐢𝐤𝐧𝐚 𝐫𝐢𝐥𝐫𝐮 𝐯𝐮𝐥𝐡 𝐥𝐞𝐧 𝐥𝐨𝐡

Exam tihchhiat vanga rilru hrehawm lutuka kan awm laia thianten an tichhe ve tho tih hriat veleh rilru a dam huai thei thin kha chu mak ve tak a ni. Mihring rilru nihphung a phawrh chiang hian ka hre thin. Pawi tih lehzual vawng vawng zawk awm a nia! Hringfate hi midangte nena inkhaikhin reng mai hi kan ni a, sang zawk nia kan hriatnain min tihlim a, hniam zawk nia kan inhriatin kan hnual thin mai maite hi a lo ni a. Hetiang rilru hi Pa-a chhuak niin a rin theih bau loh a ni. Ringtute kan intehna tur chu kan mihringpuite ni lovin, kan Lal Isuaah a ni zar zar tur a ni a, kan hlawhtlinna leh hlawhchham pawh min kohna zawnah zel a ni zawk ang. Kan dinhmun tak tak chu nula bem thlu zo lo theuh theuh insawitheih siak ang chauh kan ni si a.

Mihring rilru sual chu midangte hlawhtlinna aiin midangte hlawhchhamnaah a lawm zawk mah mah thin a. ‘Engmah an ni bik lo,’ tihte hi a inhnemna a ni. Lungawipui chau angreng tak a ni. Mite kuta sahrang hmuh len hi mihring ze duhawm lo, Setanan kan rilru a tihhrehawmna hmanrua leh kan tih loh tur tur ti tura min thlemna thil a ni. Pathianin mal min sawm tura kan duh chuan min hmangaih ang thovin midang a hmangaih a, malsawmna pawhin a vur ve ngei ang tih pawm thiama thikna rilru kan paih bo thiam a tha dawn a ni. Rawngbawlpuiten mi fak an hlawh a, kan thenawmte an kai san a, kan dawn ve rih loh malsawmnain a vur ruih ruih laia ‘E...Pathianin kei ang thovin a hmangaih alawm le!’ ti mai thei khawpa thikna rilru paih bo theih hi zawi reih rawiha ‘rau’-na chi khat chu a ni ve hrim hrim ang. Thikna leh khakna hian kan hlimna tur a vawchhe nasa fu a, midangte nunah thil tha lo a thlen nasa thei viau a ni.

Mi tlangpuiin kan hriat thiam danah hian ‘thlarau’ leh thil zawi reih rawh a inhmeh mawh hle a. Boruak nu deuh leh thawm na tak te leh ‘rau’ a inhmeh bikin a hriat thin. Zawi reih rawiha ‘thlarau mi’ nihte chu sawi pawh kan sawi ngai awm lo ve. Amaherawhchu, a tak ram leh thlarau nun nihphung tak tak kan chik chuan zawi reih rawiha ‘rau’ hi a lo harsain awmzia a lo nei nasa ber zawk awm asin. Rawngbawlnaa hruaitu chanvo chelh tan phei chuan kan zir makmawh niin ka hre thin.

*****