𝐊𝐀 𝐁𝐎𝐗𝐄𝐑 𝐍𝐆𝐀𝐈𝐇𝐒𝐀𝐍 𝐋𝐀𝐖𝐑

 

Boxing chungchanga ka hriatrengnaa hla ber chu thil hre ve thei chang chang kan nih lai khan khawi lam atanga kan neih English magazine nge hriat tawh loha inhnek lem vel awmna, Cassius Clay tih vel thla awmna kha ni tain ka hria. Kha Cassius Clay kha Muhammad Ali tia kan hriat lar chhunzawm tak zel kha a ni a. Kan rawlthar chhoh khan Mike Tyson a lar hle a. TV-ah pawh a inhnek kan hmu ta zeuh zeuh a. Ani kha Mizo ngaihsan chi, te zawk ni zel mah se inhnekpuite pantu zawk ni char char thin kha a nia. Kan ngaisang khawp mai. Mahse a nun a uluk lo hle tih kan hre chho nghal a, Islam sakhuaah te a inlet rawl nen. Bei a tidawng deuh a ni.  Hman ni ka Netflix-a ‘Big George Foreman’ tih film ka en chuan ka boxer ngaihsan tehchiam ngai loh, ngaihsan tak fu chu nasa taka ka ngaihsanna a lo belhchhah tak avanga ka ngaihsan ‘lawr’ ni ta ka tawng ta a ni. George Foreman hian kum 30 (1967-1997) lai boxing a khel a, kum 18 a nihin a khel tan tihna a nih chu.

 

‘𝐁𝐢𝐠 𝐆𝐞𝐨𝐫𝐠𝐞 𝐅𝐨𝐫𝐞𝐦𝐚𝐧’ 𝐚 𝐡𝐦𝐮𝐡𝐧𝐚𝐰𝐦

George Foreman ka hriat tantirhna chu Evander Holyfield nena April 19, 1991-a an inhnek kha a nia. Khatih lai khan kum 42 lai a ni tawh a, World Heavyweight Champion ni mek Holyfield kha kum 29 chauh a la ni thung. Kum 13 laia naupang zawk boxer tha eltiang kha hneh ta lo mah se Round 12 lai a ding tlang kha thil mak tak a ni zawk a. Points an puan lai a hmel pawh kha ka la mitthla thei hial, ka tan deuh zawk vang  pawh a ni ngei ang. Hemi an inhnek hma hian kum 10 (1977-1987) chhung zet boxing a lo chawlhsan tawh a. A khelh tirhin1968 Summer Olympics Boxing champion a lo ni tawh a, 1972 khan Muhammad Ali tukzaltu boxer rothap Joe Frazier knock-out ngatin World Heavyweight Boxing Champion a lo ni daih tawh a. Kum 10 chawlh hnua a rawn comeback hnu kum 4-naah an vanglai hmang mek Champion a hneh zo ta lo pawh kha thil awm lo em em a ni lo tih a lang. A film-ah phei kha chuan tu emaw khan ‘Round khat la belh sela chuan i hneh viau ang’ a lo ti nghe nghe. Kei chuan khami tum bak kha ka hre chhunzawm ta vak lo a. Kha kha a come-back thlen theih sang ber ni turah ka lo ngai mai ni tur a ni. Mahse ‘Big George-a’ thawnthu a tawp tlat lo.

 

𝐀 𝐡𝐧𝐞𝐤 𝐧𝐚 𝐩𝐚

Feet 6 leh inchi 4 laia sang palian George Foreman hi Boxing Champion awm tawhah chuan a la hnek na berin an sawi. Ani aia hnek na zawka an sawi Earnie Shavers chu tum khat pawh a champion lo thung. Champion belt a rawn lakna lamtluangah a hneh loh tura an ngaih Champion lai Joe Frazier kha round khatna leh hnihnaah vawi 6 a hnek tlu hman a ni. A title defence vawi khatnaah ‘The Greatest’ Muhammad Ali-an a vanglaia a hneh loh bawk Ken Norton chu TKO ngai khawpin a hnek chau bawk a. A hnek na thawkhat chu a ni ngei ang le. Muhammad Ali nena ‘Rumble in the Jungle’ an inbeihna kha a lar vet vet khawp mai a. Chak zawk fe tura ngaih a tlawm zawk ta tlat a. He fight hi i en chuan pan a, hnektu zawk chu Foreman hi a ni tih i hre thei mai ang. Ali erawh kha chu a tlanchhe tluan zak emaw tih mai tur a ni. Mizoten kan ngaihsan zawk chu Foreman-a style kha a ni. Mahse Ali khan a knockout zawk tlat si ale! Foreman hian drugs-in an hrai chauh vang ni te pawhin a hnu lamah chuan a sawi a, an inbeih hma lawka a mit dinglam chung chiaha hmun 11 laia thui ngai khawpa a inhliam khan effect a nei deuh pawh a ni mai thei e.   Ali hi beih leh a tum nasa viau nangin Ali zawk hian a thlim char char anga ngai te pawh an awm a ni. Upat lama ‘a hnek na pa’ inhnek tir leh chu a huphurh ve deuh a ni mai thei asin.

 

𝐁𝐨𝐱𝐢𝐧𝐠 𝐚 𝐩𝐢𝐚𝐧𝐭𝐡𝐚𝐫 𝐬𝐚𝐧 𝐝𝐚𝐢𝐡

Muhammad Ali nena an inbeih hnu khan a che fuh hleithei lo zui a. A tlawmna khan a rilru kal pangngai a tibuai ve nak pawh a ni mai thei. Tum khat phei chu a thi tep a ni awm e. Mahse chutih lai chuan amahah Pathian a inlar ta tlat. A piangthar ta. He khawvel hmingthanna leh ropuina chu a kalsan chiang hle. Muhammad Ali hnenah pawh khan a lo huatna zawng zawng avangin ngaihdam a dil hial a ni awm e. Boxer rothap, thinram leh hnek na ber mai chuan Chanchin Tha hril nuam tihna leh duhna thuk tak a nei ta tlat a. Khawlai leh kawng sirah te a au zar zar hnuah Pastor atan an nemnghet ve ta a nih kha. Chu mai duhtawk lovin thalaite kaihhruai nan ‘George Foreman Youth & Community Center’ Houston, USA-ah a din ta a ni. Midangte thlarau leh taksaa tanpui leh Pathian theih patawpa bawl chu a hlimna bul a lo ni ta zawk reng mai a. Boxing chu a thihsan chiang khawp a ni awm e. Lunglenna reng a nei lem lo. Mahse, Pathian remruatna mak tak chuan Boxing chu a pe let leh ta zawk a. A center-in sum leh paia harsatna a tawk ta chhan chhuah nan a thil thiam chhun ti mai turin, kum 10 a lo chawlhsan tawh, Boxing ringah chuan luh a tum leh ta a ni. Mi pangngai dinhmunah chuan boxing khel chi vak pawh a ni tawh lo, kum 38 lai a ni tawh si a. Mahse, Big George a che pui dawn chauh a ni zawk.

 

𝐇𝐞𝐚𝐯𝐲𝐰𝐞𝐢𝐠𝐡𝐭 𝐛𝐨𝐱𝐢𝐧𝐠 𝐜𝐡𝐚𝐦𝐩𝐢𝐨𝐧 𝐮𝐩𝐚 𝐛𝐞𝐫 𝐚 𝐧𝐢 𝐥𝐞𝐡 𝐬𝐢

Evander Holyfield nena an inbeih khan a taksaah pawh kum upa a nih kha a lang tawh a. Thang thar zawk han hnek zel chi a nih a rinawm tawh lo. Mahse a tum a la ruh viau zel. Kum 3 hnu 1994-ah chuan amah tlawmtu Evander Holyfield-a hneh loh Michael Moorer, ani aia kum 19-a naupang zawk, Champion ding lai chu a bei ta a. Hemi ni hian Muhammad Ali nena an inbeih nia a hak kekawr bul ngei kha a rawn ha ngat a, a mualpho tawhna chawh chhiat a tum a ni ngei ang. A fa rual chauh Moorer chuan a lo hnek nasa kher mai. Big George chu a chau chhe mai dawn emaw tih theih a nih laiin round 10-naah chuan remchang hmuin a hnek tlu ta der mai a, tho leh tur a awm ta lo. Kum 20 liam ta a a title hloh kha a la let leh ta! Hemi ni hian record 3 a siam nghal – (i) World heavyweight boxing champion upa ber – kum 45-ah, (ii) tum 2 championship belt hren thar inkar rei ber, kum 20, (iii) inhnekpuite nena upat dan inthlauh ber, kum 19. Record pui rem rem tak a ni. Tumruhna leh talent nen ringawta nih theih niawmin a lang lo. Chunglam inrawlh a ngai a ni. A comeback khan a nupuiin Boxing champion ni leh tura inlarna a lo hmu a ni awm e. Holyfield a hneh loh tum khan a nupui  pawh khan a hmu dik lo a nih te a inring hman rum rum a. Mahse, Big George-a a chiang thung. A record siam te hi khumtu awm leh thei tak ang maw le?

 

𝐊𝐚 𝐧𝐠𝐚𝐢𝐡𝐬𝐚𝐧 𝐜𝐡𝐡𝐚𝐧 𝐜𝐡𝐮

Harsatna lipui hleuh chhuah rual loh ni awm tak takah Foreman hi a pil zing hle. An naupan laiin an khawsak a harsa eltiang a, lehkha pawh a zir hleithei lo. Miten hmusita a inhriat tlat avangin rawlthar thinram em em, insual inpeih reng hi a ni ringawt thin. Muhammad Ali a hneh loh khan a mualpho hle, a hnu a match thenkhatah phei chuan mipui au el a hlawh nasa hle a ni. Mahse, a piangthar ta tlat a. Inhnek aiin pastor nih a duh ta. Mi tihnata eizawn leh intihlar  aiin mite tanpui tumin pastor hna leh thangtharte kaihhruai a tum a, a vanglaiin boxing a chawlhsan ta a nih kha. Chutih laiin a rawngbawlna chu a sum neihin a daih ta lo va, a thianpa’n a lo chalai ral sak bawk nen. A tum lawk loh deuhvin boxing a rawn let leh ta a nih kha. A kuttum chu thinur vang ni hauh lovin, mamawhtute tana thawk chhuak turin a han thlawh ta a. Upat lamah, fate rual chauh chauh thalai tha za zek zek te tukzalin Champion a ni leh ta ruau mai. Record a break. A harsatna, a mualphona, mite hmuhsitna zawng zawng kha ropui takin a hneh vek...Krista nena an tan dun chuan...

 

Boxing-ah hian ropui dan chi hrang hrang a awm thei ang. Muhammad Ali, vawi 3 lai Champion ding lai Championship belt chhuhsak thei; Mike Tyson, Heavyweight Champion naupang ber leh mipui hip ber; Floyd Mayweather Jr.  hneh loh nei lo record (50-0); Manny Pacquiau, boxing division 8-a champion thei; an tam ang. Mahse, Krista rawngbawlna thlan avanga boxing kalsan, Krista rawngbawlna atana rawn kir, kum 20 hnua a Champion belt hloh tawh rawn hreng leh thei, kum 45 nih kuma khawvel inelna hautak ber nia sawi theih Heavyweight Boxing Champion ni thei hi ka ngaisang lawr lak. Mahni talent leh theih zawng uma a theih anga liana inchhekarbawm nana hman tum mai lova, midangte malsawm nana ti a nih avang hrim hrim pawh hian...Zahna Chibai! A final record hi ‘76 wins, 5 loses, 68 knockouts’ a ni ta. Aaaa....Netflix-ah khan lo en ve ngei teh.

****