𝐊𝐓𝐏 𝐊𝐀𝐍 𝐕𝐀𝐍𝐆𝐋𝐀𝐈

Kristian Thalai Pawl General Conference a lo hnai leh ta. He hun pui Kristian nula leh tlangval tana hlu em em mai hian rilru a tithar hle mai. Thenkhat chuan huau huau pangngai leh intihhlimna programme satliah angah an ngai mai mai a ni awm e. Thlarau mit a men loh theih vet vet khawp mai. Pathian hminga thalai heti zah kal khawm thei, hetiang ‘mipui fuan khawmna nasa ber’ Mizo thalaiten Pathian hminga an la ti thei hi a lawmawmzia kan lo mangnghilh palh ang e aw. Kan ram tan beiseina meichher a la alh tha reng tihna a ni. Conference-ah chuan thu chhia leh tangkai lo an lo zirtir reng reng si lo. Inkhawmpui hrim hrim bakah hian a inbuatsaihna lama thalaiten discipline an kenkawh dante hi hmaih chi a lo. Hla zir, drama zir, solo zir, sum tuak, etc., a tam lutuk. Keini ang, kum tlin hma hauh atanga KTP tel ve chak tawh tan hi chuan General Conference-a kal te chu Muslim hovin an ram thianghlim ‘Mecca’ tlawh an chak aia chakawm a ni ang chu! Tlumte thlir takin kal ve hun tur kan thlir thin a nih kha.

𝟏𝟗𝟗𝟒: 𝐙𝐚𝐫𝐤𝐚𝐰𝐭 𝐇/𝐒 𝐆𝐞𝐧𝐞𝐫𝐚𝐥 𝐂𝐨𝐧𝐟𝐞𝐫𝐞𝐧𝐜𝐞

KTP General Conference-a kal kha thil awlai tak a ni bik lo a. Chutih laiin keini rawlthar, Kohhran leh KTP-a active tir tan chuan kan ti ti lian ber pakhat a ni thin. Ka hriat phakah chuan Revd Chuauthuama Character Study ropuizia kha an sawi nasa hle. A buin ka lo chhiar ve nghe nghe a. Thil tha intihhmuhna pawimawh a nihzia a lang. Remchang ka neih hmasak ber chu Gospel Centenery kum, 1994 Zarkawt H/S Field-a nghah a nih kum kha a nia. Khatih lai khan Pachhunga College-ah BA zirin Khatla-ah kan khawsa a. Khatla KTP atang khan Hall sak hnatlangah pawh ka va tel nual. 

Mizo zinga thu sawi thiam berte zinga mi Rev Vanlalbela’n thupui ‘Rinawmna’ a sawi pap pap te kha ka la hre reng mai. Kan branch Khatla KTP atang khan Pu Thanzawna (Khatla Upa ni ta) te ho, ‘Rendezvous’ lar lai kha a ni bawk a, an thawh hlawk leh khawp mai a. Khatla KTP kha chu aw...nuam ka va ti thin tak em! Ka hringnun hun pawimawh laia ka lo tel thin kha chung lam remruat ropui tak ni ngeiin ka hre thin a ni. Ka damchhunga ka theihnghilh theih tawh loh tur ka zir hnem em mai! Mahse, a conference ber kha chu mahni in atanga hman kha a ni roh va, riak lut ngata hman nen chuan min tawh dan a inang lo deuh tih te pawh ka hre chhawm ve ta zel a ni.

𝟏𝟗𝟗𝟖: 𝐒𝐞𝐫𝐜𝐡𝐡𝐢𝐩 𝐆𝐞𝐧𝐞𝐫𝐚𝐥 𝐂𝐨𝐧𝐟𝐞𝐫𝐞𝐧𝐜𝐞

College ka zawh chhuah tak hnu chuan tum lawk em em lohvin Shillonga zir zawm turin ka chhuk ta daih a. Shillongah chuan KTP chhunzawm zelin Bial KTP Office Bearer zingah te ka’n awm ve ta hial a! Rawngbawlpuite chuan Serchhip Conference-a kal turin min ruat ve ta hlauh mai a. Ka second-hand coat buang fit that hret nen phur takin ka thawk chhuak a. Khatih lai khan Zoram Pawn Mizo Kohhran kan la nih lai a nia, ZPMK KTP pawh kha a hrangin kan la awm a, General Conference-ah pawh chuan mikhual ang deuhvin ‘special treatment’ min pe thlap a, nuam kan ti hle a ni. 

Aizawl atangin CKTP chuan kan kalna tur min buatsaih sakin, kan ngaihsan em em Synod Choir ho kalna motorah min teltir a. Nula ho chu an khek ve hlat thin a, mak kan tih an hlau deuh thinin ka hria a. Keini lah chuan be tha ngam lo khawpin kan lo ngaisang em em si! Mak ka tih deuh zawk chu khatih laia Synod Choir Conductor (ni tain ka hria) Pu F. Lalthanmawia (Bungkawn Upa ni ta) khan ka hmingin mi lo ko nalh mai a, kan inhriat awm pawh ka hre si lo. A hnua ka zawhin tum khat Capital bus-ah kan lo chuang ho tawh a ni awm e! Keini ang tlangval mawlmang ve tak, khawlaia mi ennawn hlawh mang ngai hlei lo min han hre tlat mai kha fakawm tak a ni. KTP hruaitute kha kan va han chung en thin tak e aw! An phu thin bawk a ni.

Serchhipa kan thlen in lah a nuamin mikhual thleng zo pawl tak ni tura an ngaihah khan min dah bik emaw tih mai tur a ni a. Concrete in nuam takah kan thleng a, chawhmeh te kha kan han nei tui thin khawp a, branch dang nula chhe lo deuh deuh kha an thleng ve nual bawk nen! Kan hotupa Zodina (MZU Prof ni ta), ft 6 chuanga sang, smart thlarah mai kha chu keini (thianpa Ricky te nen)  ft 5 pel awrh te nen chuan chhas ho melh dan kha a inang thei lo tih kan hrethiam rang hle a ni. Kan thlen in pa, Kohhrana inhmang thuk em em ang pawha lang lo khan Pathian ni tukah uluk takin chhung inkhawm min hmanpui thlap a, ka ngaisang hle a ni. 

Khami tuma kan Speaker kha Rev Vanlalzuata a nia, thupui “Midangte tana nun” tih pawh kha inkhawmpui zawh rual khan a ziak lei theihin a awm nghal niin ka hria. “Kan thlenpui nula pakhatin ‘Ka pu, nuih dur durna tur sawi rawh aw’ mi ti a...” tih te kha a sawi chhuak a, kan nuih tak dur dur kha! Variety Programa zai tura Shillong Bial member chhuanvawr ni thin Zoram lama an bial aiawha rawn tel thianpa ChKa kha a timak ve ngawt mai. Suit nena mipui hmaa zai kha a duh tlat lova, an thlen in hla fe-ah a va inthlak ngat a, kamis pangngai nen, “Thinlung huaisenin kan zui nang che...” tih hla mawi lutukin a sa vang vang mai a nih kha. Hemi kum hian 'Lal Immanuela ram zauh tur leh' tih hla kha mipui hla hit a ni a. Conference hnu lamah pawh khan kan bial velah chuan a thunawn tlar tawp kha 'Halleluia Amen' tih tur nge 'I ta an ni si a' tih tur tiin thenkhat chuan inhnialna hlimawm an chhunzawm zel a nih kha.

Fraternal delegate kan nih avang khan stage-ah min thuttir thin a, min duhsakna ni mah se nuam erawh kan ti vak lem lo zawk mah mah a. Tum khat phei chu Ricky nen kan zai tui lutuk lam kan chak si, dawhsanah em chuan kan ngam si lo. Inkhawm lehah chuan lam nasat tumin lamtual hnaihah kan insawn a, mahse lam mood lam kha a bo daih mai si! Mak ve tak a ni. Duh hun huna lam theih pawh hi a lo ni lem lo! Khatih lai khan pandal ban tlem khan sawi a hlawh nasa a. Ban 4 chiah nei pandal pui takah kum hmasa lamah an lo hmang tawh a ni awm a. ‘Serchhip pandal chuan ban 1 chauh a nei dawn’ tih kha a lar hle a. Kan han phur khawp a. Mahse, a ban pui ber khan a zawh tak loh avangin a dona dang chu a awm ta nualin zawk a niin ka hria. General Secretary Upa F Remthanga’n a hna a hneh thinzia leh thu puan a thiam thin zia leh aw mawizia kha ka sawi hmaih thei thlawt lo a ni.

𝟏𝟗𝟗𝟗: 𝐊𝐚𝐰𝐧𝐩𝐮𝐢 𝐆𝐞𝐧𝐞𝐫𝐚𝐥 𝐂𝐨𝐧𝐟𝐞𝐫𝐞𝐧𝐜𝐞

A kum leh conference chu Kawnpui-in an thleng dawn tih kha a chiang sa a. Kei erawh chu kal ka inring tawh lo va, mahse a tlawngawl ber nih vang emaw min ruat leh ta a. Phur angreng takin Shillong atangin ka thawk chho leh ta a. Kan thian leh unaupa H. Lalmuanpuia (Kawnpui Upa a ni tawh) te khua a ni bawk lo nen, ka thlen chilh ta rap reng a. Thlengtu khua inbuatsaihna a nasa lehpek khawp mai a. 

Kan thlen in kha pandal atanga hla lo tak kha a nia, mikhual chaw ei tur number kha an hre dik hleithei lo, a chhan pawh veng hla zawka thlengte khan haw a buaithlak a vang khan an kil ve tawp mai thin a lo ni a. A remchang angreng, hmel kha kan inchhinchhiah hman tak tak si lo va! Khami tuma kan thlenpui, pa fel deuh, inkhawm lam pawh uar lutuk lem lo, thlengtute puia lo fatu ve mai thin kha tunge aw ni ang? A hming ka hre chhuak zo tawh lo a, an veng ka chhinchhiah bawk si lo. Lung tilengtuah an chang zo ta chu a ni mai e.

Khatih lai kha zaithiam Daduhi lar vanglai kha a nia. An branch zaipawlah khan a rawn tel ve niin thu kha a thang a. Mahse a solo lo! Gospel leh lengzem lam chu an inthliar fel hle mai. KTP levelah hian kan la strict hle niin ka hria. A tha. Kan speaker kha Upa H. Thangmawizuala, Emmanuel Hospital Association-a missionary ni mek a nia. Thupui ‘Tunge ka tirh ang?’ tih kha a challenging hle thin a. Bible Study Rev Dr Vanlalchhuanawm-an a la bawk a, rawngbawltu an tha hle a ni. 

Mi hneh ber zawk chu Dr Lalhmingliana visual presentation, ama thla lak ngei hmang a drugs hlauhawmzia a sawi kha a nia. Khang hun laia damdawi lar Proxyvon mi taksaa a hnathawh rapthlak tak takte kha big screen-in min han entir a nia. Khatiang presentation en tawh chuan damdawi ruihtheih hman ngam chi ni dawn lova ngaih theih hial a ni. CKTP Leader Rev Lalthankhuma, thuhriltu ropui tak, ka camp luh hmasa ber Speaker-in Daniela sakeibaknei puka an thlak thu vel a han sawi mai kha chu a va han ngaihnawm tak em! Thlarau leh taksaah kan hlawk hle a ni ber mai.

𝟐𝟎𝟎𝟎: 𝐙𝐞𝐦𝐚𝐛𝐚𝐰𝐤 𝐆𝐞𝐧𝐞𝐫𝐚𝐥 𝐂𝐨𝐧𝐟𝐞𝐫𝐞𝐧𝐜𝐞

Kum 2000-ah hi chuan conference tel tumna ka nei nasa ta lem lo a. Mahse eng ti tiin emaw ka inhnamhnawih leh ta tlat a. Zemabawk field chung lamah in sain hna ka thawk ni tin a. Conference thawm chu kan hre dum dum a, a boruak chuan min chiah hneh hle tho mai. Pathianniah erawh chuan thianpa pakhat nen Kulikawn lam atangin a scooter-in kan inphur phei ve a. Speaker Rev H Remthanga, khatih laia Kohhran hruaitu pawimawh lo ni tawh, thupui ‘Hma i sawn zel ang u,’ tih sawiin a tang hle mai. A hun tawp ber, a sermon tawp lamah chuan sound system a thi ta rup mai a. Siam that mai a harsa ni ngei tur a ni. Mipui sing tel tak meuh chu mike tel lova han auh luih chi a ni ngang si lo. A buaithlak duh khawp mai. 

Tlaiah chuan a scootera mi phurtu ka thianpa khan a bialnu a hmu tlat mai a. Hnawksakah mi ngai ta aniang chu, kan thian dang tuna Mizoram BJP President Vanlalhmuaka kuta mi dah hmiah a. Hmuaka lah khan lirthei a nei bik bawk si lo! Town bus lah chu khawi lamah! Engtin nge Kulikawn ka thlen phei ang tih kan buai hle. Vanneih a siamin lehkha zir laia kan senior thin RSa te nupa cara lo kal ve kan tawng hlauh a, kan bet ve ta a ni. Khami ni kher kher kha chu ‘Thian tha chu ni lo ila thalfang char’ ka ti rap rap mai kha a nia! Ka thianpa erawh kha chu min phatsan chhan nu nen khan an innei ta nghe nghe a! Kohhrana mi rinawm pawimawh tak chhungkua an ni ta zel bawk a! ‘All’s that ends Well’ kan ti tawh mai aniang chu!

𝐊𝐓𝐏 𝐡𝐢 𝐚 𝐡𝐥𝐮 𝐭𝐡𝐥𝐚𝐰𝐭

KTP (Kohhran dang thalai pawl-te pawh a ni tho ang chu) hi rawlthar leh tleirawl puitlin zir mekte tana a hlutna hi sawiin a siak lo. Pastor rau rauah pawh hian KTP chhum hmin hi chu kan induh ve ngawt zel a nia! Kan hruaitute kan rin zawh leh dah sanzia te, Pathian thu leh nun dan phung min zirtir zawng zawng te, Pathian ropui nana memberte talent hai chhuah an tum nasatzia leh thalai Pathian hnaih nachang hre lote an veizia te a ropui thin a ni. Chutih rualin leadership trainning tha tawp a ni reng bawk a. Tu leh fate inhmang tura duhsak ngawih ngawih tur a ni. Thalaite intihhlimna leh huau huauna pawl ang mai maia ngai lo awm ve mah se, a nihna tak an pawh phak ngai loh vang a ni ngei ang. Chuvangin, KTP hi vul zel sela, Pathian thutak hi thangtharte tan sawr chhuak zel sela, Isua Krista hriatna kawngah thalaite hruai chhunzawmin Kohhran kut-ke lo ni zel rawh se. KTP kan vanglai reng kha a nuamin kan thatpui em mai!

*****