𝐌𝐈𝐏𝐔𝐈 𝐌𝐎𝐕𝐄𝐌𝐄𝐍𝐓 𝐏𝐀𝐇𝐍𝐈𝐇

India rampui kan thlir chuan thil a inmung deuh mup mup niin a lang thei a. Kum 2014 atanga kum 12 lai mai rorelna lo chelh tawh, hneh hleihtheih loh sorkar, tlak hniam a hneka hmasawn zel anga lang chu a nghing lawih lawihin a hriat ve tlat mai a ni. A ruk tak chuan hotu liante pawh an mangang ruin a rin theih a. He thil an hmachhawn dan hian kum 2029-a inthlanpui lo awm turah thui takin awmzia a neih theih hmel a, engtin nge ni zel ang kan lo thlir ang. Khawvelah hian tumah hi mahni duh duha sapatal thei kan awm lo va. Khawi kilah emaw, khawi hmunah emaw, khawi atangin emaw min thlirtu a awm a, kan chungah a rorelna a rawn lang thin a ni ber e.

𝐊𝐮𝐦 𝟐𝟎𝟏𝟏 𝐀𝐧𝐧𝐚 𝐇𝐚𝐳𝐚𝐫𝐞 𝐌𝐨𝐯𝐞𝐦𝐞𝐧𝐭 𝐤𝐡𝐚

Kum 2000 chho chawhnu lamah khan Congress Party kaihhruai United Progressive Alliance sorkar khan corruption chungchangah beih a tawk nasa hle. An mualpho nawn awn awn a nih ber kha maw. A lar zualte chu 2G Spectrum chungchangte, New Delhi Commonwealth Games thlen dan chungchangte kha an nia. Mipui lungawi lo, beidawng laklawh an tam hle a nih kha. An thinurna inhrikthlakna turin thil remchang tak mai a rawn awm ta a. ‘India Against Corruption’ tiin political party ni lem lo, mi thahnemngai tak takten hma an rawn la a. New Delhia Jantar Mantar leh hmun dang dangah an pungkhawm luih luih mai thin a nih kha. A huhang na tak a ni.

Kha movement meizang hlaptu zinga lar ber chu Anna Hazare kha a ni a. India ram zalenna sualtu zinga tel phak, Gandhia hnungzuitu pawimawh tak a ni a. Ani khan Jan Lokpal an tih mai, corruption hnu chhuitu tur pawl, sorkar hnuaia awm si lo kha din turin hma a la kha a nia. A movement kha lo thang zelin mipuiin an lungnih lohna khawl khawm sa bun chhuahna hmanrua atan an hmang ta ni ber tur a ni. Anna Hazare phei kha chuan politics lam hawi zawnga kalpui a tum miah lo va. A hnungzuitu lar ber Arvind Kejriwal erawh chuan Aam Aadmi Party dinin New Delhia UT-ah te pawh sorkarna a siam phah zar zar a ni. Punjab leh Gujaratah te pawh a tla na hle tih kan hria. Pu Hazare kha lehkha thiam sang em em lo ni mah se a thachang daltu Arvind Kejriwal, Kiran Bedi, Prashant Bhushan, Manish Sisodia, Yogendra Yadav leh Shazia Ilmi te kha mi vengva tak tak an ni hlawm a, an buai vak lo.

Kha India Against Corruption kha kum 2014-a BJP sorkar a lo din theih chhan pawimawh tak pakhat a ni kan ti lo thei lo va. Chuti zawnga sawi fak theih loh pawhin khatih laia UPA sorkar tlak chhiat chhan pakhat chu a ni chiang a ni. Direct takin tuman eng party atan mah an campaign lem lo. Amaherawhchu, khatih laia Congress leh a sangawizawnpuite rin tawk lohna leh puh chhiatna a lian a, an beiseina nghahna tur party dang an zawng a, vawiin thleng hian an tho chhuak rih lo a ni ber awm e. Mipui hi duh dan dana chawh kawi theih an ni lo tih a chiang a ni.

𝐊𝐮𝐦 𝟐𝟎𝟐𝟔 𝐂𝐨𝐜𝐤𝐫𝐨𝐚𝐜𝐡 𝐉𝐚𝐧𝐭𝐚 𝐏𝐚𝐫𝐭𝐲 𝐌𝐨𝐯𝐞𝐦𝐞𝐧𝐭

Beisei piahlamah thil mak tak hringnun khawvelah hian a rawn thleng leh tlat thin. Tunlaia rampui sorkar rorel lai tiluhaitu Cockroach Janta Party lo awm tan dan hi mak tak a ni bawk. Hei hi political party tak tak pawh a la ni lo tih kan hria a. A bul lo intanna pawh intielna ang deuh a ni a. Chief Justice of India Surya Kant -an May 15, 2026 khan social media hmanga roreltute bei vak vak thin ho chungchang sawiin, “Chukchu (cockroach) ang chauh thangthar an tam. Hna an nei lo va, thawh bulfuk tak pawh an nei lo. A then chu media and ni a, a then social media; a then RTI activist, a then activist dang. Mi an bei nghek nghek ringawt mai thin a ni,” tiin a deu hlek a.

Hei hian Abhijeet Dipke, Boston University-a India politics chungchang zir mek thin a khei ta riau a. ‘Chukchu zawng zawng hi tang rual ta se?’ tih chu social media platform pakhat X -ah chuan a post ta nghal a. Tih belh zelin Instagram lamah Cockroach Janta Party tih a din fiam ta a, a manifesto chhawp chhuahte pawh nuihzatthlak angreng tak tak an ni. Follower 1.5 crore (Vaibelchhe khat leh a zahve) nei anga inchhal theiin a lar ta hial a. Tu tan pawh han ngaihthah mai mai chi a ni ta lo a ni.

Chutia tum loh deuha a lar tak hluaiah chuan thil awmze nei tihpui zel theih niin an hre ta a ni ang. CJP bultantupa Abhijeet Dipke chu India ramah a rawn haw ta hial a. Amah lo puitu lehkhathiam, naupang te te an lo awm thluah mai – Saurav Das, Ashutoh Ranka, Ajinkys Shinde te. An hmalakna hmasa ber atan NEET Exam zawhna put ru avanga mi tam tak buaina chu bitumin Union Education Minister Darmendra Pradhan chu inban turin an nawr ta a. Han tang ngial mah sela a tawpah chuan a tang zo ta lo nge nge a ni.

Special Intensive Revision hmanga voter vaibelchhe 13 lai paih an nihnaah mawhphurtu bera ngaih Chief Election Commissioner Gyanesh Kumar chu bang turin an nawr ve leh ta a. Hei phei hi chu a pui lehzual hle. Central sorkar pawhin Central Armed Police Forces sipai 23000 lai koh luh phahin an sawi. CJP hotute pawh a man tliar tliar bawk a. Heti a nih avang hian he thalai movement hi chuti mai maia en liam theih a ni tawh lo tih a chiang. Sorkar laipui inenfiahna tur, thil pawimawh zawk chu a protest len leh len loh, CJP member tam leh tam loh lai tak hi ni ber lovin – thangthar heti zah beidawng leh lungawi lo an awm mai hi a ni ang.

𝐏𝐚𝐰𝐧𝐠 𝐬𝐚𝐩𝐚𝐭𝐚𝐥 𝐚 𝐭𝐡𝐞𝐢𝐡 𝐥𝐨𝐡 𝐚 𝐧𝐢𝐚

He Cockroach Janta Party leh an thiltih thin hian sorkar mek NDA hi a vawrthla zo ang em tih chu sawi a harsa a, hunin rei loteah a rawn hril mai dawn a ni. Rorel lai tana a hlauhawm riauna chu Opposition party te hian remchangah hman an lo tum nasa em em thin hi a ni a. He movement hian hna nei lo thalaite leh a lainattute a ko chhuak a, sakhaw lak firfiakna a do a, constitution-in zalenna a ram mipuite a pek rahbehna thu te vawrh chhuak a, sorkarna fawng chelh laite thlak duhna thinlung a tuh fuh thei a nih chuan, tla thei tawh lo ang hial mi tam takin an ngaih kan rampui sorkar meuh pawh hi a inthlak ve rup thei a ni. Kan lo thlir zel ang. Lal ber leh thu nei ber emaw intiha mipui aw ngaihthah mai mai hi a hrisel lo a ni ber e.