𝐏𝐀𝐓𝐇𝐈𝐀𝐍𝐈𝐍 𝐓𝐇𝐀𝐍𝐆𝐓𝐇𝐀𝐑𝐓𝐄 𝐀 𝐌𝐀𝐌𝐀𝐖𝐇

Pathian Thu kan chhutin thil inkawlkalh angreng tak, sawi fiah mai theih loh, pawm kawp lohva dik hleithei si lo a awm thin a. Ringtu tam tak than a thut chhan pakhat pawh chutiang thila sir khat chauh an hmuh thin vang ni thinin a lang. Kan thupui pawh hi han en ila, Pathian kan mamawhzia chu kan inhrilh chamchi a. Piangthara Pathian neia kan inhriat tawh chuan ngaih that mai a awl viau. Mahse, a lehlamah Pathianin eng atan nge min mamawh tih kha hriat veleh a ngai a. Chu chu kan sut fuh loh chuan a dik tluantling dawn chuang lo va. Rual u zawkte chu an nih nih an ni thawkhat tawhah ngai chhinin thangtharte tan han sawi bik deuh ta ila.

  

𝐑𝐚𝐦 𝐥𝐞𝐡 𝐡𝐧𝐚𝐦 𝐭𝐚𝐧 𝐏𝐚𝐭𝐡𝐢𝐚𝐧𝐢𝐧 𝐚 𝐦𝐚𝐦𝐚𝐰𝐡 𝐜𝐡𝐞

 Mizote hi hnam naupang te kan ni a, Mizoram state pawh India ram state naupang leh te ber pawl a ni tih kan hria a. Kan inhmuh hniam lutuk hlauvin kan rual ute khan min fuih nan min lo bawl thui deuh emaw ka ti thin. Mizote hi hnam ropui ber emaw kan intilaklawh tlat mai niin a lang. Kan thatna leh kan sanna lai kan sawi nasat avang hian thangthariten kan chak lohna lai kan hmu thiam lo palh ang tih ka hlau thin a. Kan lo ni reng tawh a nih phei chuan siam tha thuai tura kan tan a ngai a ni. He ram hi Isua Krista hming nena sawi zawm ram a ni a. Hmuhsitawm taka awm reng a rem lo.

 Kan ram nawmna lai ber khawtlang zalen kan nihna lai hi kan chhiatpui ang tih a hlauhawm ta. Mipat-hmeichhiat, zu leh drugs, kan hmingchhiatna ber a ni tih theih a ni ta hi a pawi. Pathian malsawmna nia kan ngaih central sorkar sum chena thawk rim lutuk lova khawsak nawmna kan chen hi a rei ve thawkhat tawh hle a. Chu chuan materialism leh consumerism-ah min hruai lut nasa tih a hriat theih. Heti reng a nih chuan ram leh hnamin a tuar nasa telh telh ang. Thangtharte u, nawm tum lutuk lo ula; milen khel ngawt suh u. Mahni mamawh leh midang tanpuina tur thawh chhuah theih tum ula, ram leh hnam siam that vei rawh u.

 

𝐊𝐨𝐡𝐡𝐫𝐚𝐧 𝐭𝐚𝐧 𝐏𝐚𝐭𝐡𝐢𝐚𝐧𝐢𝐧 𝐚 𝐦𝐚𝐦𝐚𝐰𝐡 𝐜𝐡𝐞

 Social media kan hman nasat hnu hian Kohhran selna a nasa ta hlein a lang thei a. A nihna tak zawkah chuan kohhran hian seltu a tlachham ngai lo zawk a ni. Tunlai khawvelah hian mite rilruah kohhran dinhmun a hniam ta hle ni lovin Kohhrana vui vai thinten platform an nei tha ta, an thawm a ring ta tihna te a ni zawk ang em? Eng pawh ni se, miten duh duh an sawi tak siah chuan kan fimkhur telh telh a, kan uluk telh telh a pawimawh dawn a ni tih a hriat mai.

Thangthar kohhran hlutna hre pha, kohhran rawngbawlna atana inpe, ti mai mai lo, mahni invawng, khawvel thil nena nun chawhpawlh duh ngai lo, vervekna nun nena kohhrana inhmang lo, Krista taksa hmangaihtu tak tak kan mamawh a ni. A nihna takah chuan Mizo hnam chawitu, ram tana malsawmna thlentu, hnam dangte zinga chhuanawm tham institution kan neih chu Kohhran deuh chauh hi a ni awm zawk asin. Kohhran deu zawng leh tihthuanawp tuma thu vawrhvir fotute hi hetianga ti tura  ‘paid writers’ an lo ni palh ang tihte hi a hlauhawm hial zawk a ni.

𝐈𝐧 𝐜𝐡𝐡𝐮𝐧𝐠𝐤𝐚𝐰 𝐭𝐚𝐧 𝐏𝐚𝐭𝐡𝐢𝐚𝐧𝐢𝐧 𝐚 𝐦𝐚𝐦𝐚𝐰𝐡 𝐜𝐡𝐞

 Social mediaa kan hmuh mawi lo tak taka khawsa thin, ‘Kristian tih atan chuan a mawi lo mang e,’ kan tih hiala awm thinte hi, ‘An chhungkua inenkawlna engtin nge ni ang aw?’ tih a awl thin khawp mai. Tumah hi chapo thei chu kan awm loh laiin, chhungkua inenkawlna hi a pawimawhna a va han sang tehlul em aw! Chhungkuaah ‘values’ kan intuh that a pawimawh a ni. Buaipui tham a ni e.  Tunlai thangtharte hi kan nu leh pate nun dan result kha kan nia, keini hian eng ang ‘thangthar nun’ tak nghawng chhuak ve ang maw?

 Chhungkaw innghahna pa ber zu leh nulaa nawmchen, sum leh pai umna kawngah te an tal buai tlat mai te hi chu chhungkaw memberte ruh a na ngawih ngawih mai a nih hi. Chhungkaw nu berin khawvel par mawina leh nawm chenna te chu felna leh thutak aia a buaipui zawk tlat hi chhungkua mai piah lamah ram leh hnam chhiatna bul a ni.  Chhungkaw nghahfak thalaite hi mahni duh thu ngeia nu leh pate ruh timawihtu, nawm leh hlim tum luata chhungte nun tihah ngawih ngawihtu ‘thalai’ kan ni ang tih a va hlauhawm em! A rapthlak a ni. Theih chin leh phak chin inchen lo mah se farnute innghahna tlak, nutate chhuan ruk, nu leh pate lawm rukna nih i tum hram hram ang u.

 

𝐍𝐚𝐧𝐠𝐦𝐚 𝐭𝐚𝐧 𝐋𝐚𝐥𝐩𝐚𝐧 𝐚 𝐦𝐚𝐦𝐚𝐰𝐡 𝐜𝐡𝐞

 Ram leh hnamin a chan nasat ber chu mahni nih tur ni pha lote hi an ni e, an ti. Chutiang chiah chuan Pathian Ramin a chan nasat ber chu Kristian mahni nih tur ang ni pha lote an ni leh a. Mahnia ‘potential’ (nih theih sang ber) Pathianin a dah sawr chhuak zo lo hi kan tam viau awm asin. I nih theih ang ang sawr chhuak vek turin Lalpan a duh che a ni. Chu chu thil chin tha lo te, thatchhiatna te, dawngdahna te, nunphung uluk loh avangtein i sawr chhuak zo lo ang tih a hlauhawm thlawt a ni. Mi tam tak lo nih tawhna a ni si a.

I ‘potential,’ i hriat aia ropui sawr chhuah dan chu khawvel mithiamte pawhin hrilh theih che an nei nual ang. Mahse a hnukpui, mi mawl ber tan pawha hriat thiam awlsam ber chu Isua Krista a ni. Chu chu Lal Isua chuanna tura i inpek phal kha a ni mai. Midang nena in teh vak a ngai lo, inthikna leh inerna rilru a hring duh a, tul lo taka beidawnna a thlen thei bawk. Lal Isua chawimawia awm theihna atana sabengtung chan chan inhuam erawh chuan Isua thiltihtheihna chuan kan theihna leh theihna piah lam a sawr chhuak a, mihringin ‘potential’ an tih piah lam thleng thlengin van malsawmnain min vur thin a ni.

Mizo Kristiante mamawh ber pakhat chua an Chhandamna hi anmahni tan bil maia an kawl loh thiam hi niin a lang. Kan Chanchin Tha hril hrim hrim pawh hi a ‘man-centred’ lutuk chuan a theology a tawngchham thei a. Pathian atanga sawia ‘God-centred’ taka kan chhawp a ngai tawh niin a lang. Keini erawh chuan thlarau bo hip tumin ‘seeker-sensitive’ zawngin kan kal rup rup a, puitlin kawng zawh a har kan ti deuh niin a hriat. A tawpkhawkah chuan engkim mai hi Pathian tan, ‘God-centred’ vek tur kan nih hmel sia.