𝐏𝐄𝐍𝐓𝐈𝐊𝐎𝐒 𝐏𝐀𝐖𝐈𝐌𝐀𝐖𝐇𝐍𝐀

 

Vawiinah hian Pentikos ni ropui kan lo thleng leh ta. He ni pawimawhzia hi ringtute tan hmaih theih a ni lo a. A awmzia kan hriat thiam dan hian kan ‘Thlarau Nun’ ah kawngro a su nasa hle dawn a ni. Thuthlung Tharin Thlarau Thianghlim chungchang a zirtirna zawng zawng Pentikos thlirlawkna emaw, en letna emaw vek a ni, an ti hial a ni. Kohhran thenkhat phei chuan an hmingah ‘Penticostal’ tih an dah ngat reng a. Ringtute zawng zawng hi pentikos sawtpuitu leh kha mi nia thil thleng avanga kan nih ang ang hi ni ta kan ni theuh mai.

Hemi nia thil thleng mak leh ropui tak kha Sinai tlanga Mosia Dan lak nên khan tehkhin a ni fo a. Latin tawnga Bible letlingtu ropui Jerome-a (AD 342-420) chuan, “ Hmanlai zawkah khan Sinai a awm a, tunah chuan Zion; hmanah khan tlang a nghing dur dur a, tunah chuan in a nghing dur dur; kha tih lai khan tlangah mei a chhuak, tunah chuan lei tam tak ri kan hre thung; hmanah chuan kelpa ki an ham ri a, tunah chuan Chanchin Tha thawm a thang ta,” tiin a khaikhin vel a ni. Pentikos ni atang hian van leh khawvel a danglam ta a ni deuh ber mai. Pentikos ropuina kan han sawi mai theihte chu:

𝐓𝐡𝐥𝐚𝐫𝐚𝐮 𝐓𝐡𝐢𝐚𝐧𝐠𝐡𝐥𝐢𝐦 𝐁𝐚𝐩𝐭𝐢𝐬𝐦𝐚 𝐝𝐢𝐤 𝐭𝐚𝐤

Pentikos atang hian Thlarau Thianghlim hnathawh chu, a hma a mi zawng zawng hnawl miah lovin, tihlen (enlarged) a ni ta a. Chu Thlarau Thianghlim chu chatuana a Kohhrante chenchilh turin a lo thleng ta bawk a. A inhnuk dawk ngai tawh lo. Pentikos hma zawng khan Thlarau chuan thil siam zawng zawng a vawng a, thinlung a tithar a, a zirtir a, thilpek a pe tih kan hria a, heng zawng zawng hi tunah a la thawk vek. Pentikos danglamna chu, ringtu zawng zawngten Isua pian hmaa mithianghlimte leh a rawngbawl laia amah ringtute anga Krista lo la kal tur beiseia hma lam thlir tawh lovin, tunah chuan Krista lo kal tawh, thi tawh, tho leh, tuna ropui taka roreltu chu an nei tawh tih an hre ta hi a ni a. Hei hi Pentikos hlutna leh ropuina kan hmuh dan tur tha ber a ni ngei ang. Chu thu ropui chu Thlarau Thianghlimin a rawn hriattir ta a ni. Thlarau Thianghlim baptisma chu Kohhranin lo changin, hriatna thar leh thiltihtheihna thara thuamin a awm ta a ni.

𝐊𝐫𝐢𝐬𝐭𝐚 𝐢𝐧𝐡𝐥𝐚𝐧𝐧𝐚 𝐜𝐡𝐚𝐰𝐢𝐦𝐚𝐰𝐢𝐢𝐧 𝐚 𝐚𝐰𝐦

Lal Isua kha mihringte sual thawina atan Good Fridayah Kalvary tlangah a thi tih kan hria a. Pathianin chu inthawina chu a pawm a ni tih hriat nan thihna ata a kai tho ta a. Chu chauh chu a la tawk hauh lo. Chawimawina a khum tir ta a ni. ‘Khawvel sual zawng zawng thupha chawina’ (I Jn. 2:2) atana Krista inhlanna chu Pain a pawm a, a chawimawi nân (Tirh. 2:33) Pa chuan Thlarau Thianghlim a rawn tir ta a ni. Vanah chawimawia a awmna chuan leiah Thlarau Thianghlim leih buak a nih tir ta a ni (Tirh. 2:32-33). Lal Isua pawhin Thlarau Thianghlim lo kal tur sawiin Amah a chawimawi tur thu a sawi lawk kha. Ringtute chuan Krista inhlanna hlutzia leh thihna hneha thawhlehna ropuizia te chu hre thiamin amah an chawimawi bang thei ta lo a ni.

𝐏𝐚𝐭𝐡𝐢𝐚𝐧 𝐊𝐨𝐡𝐡𝐫𝐚𝐧 𝐚 𝐝𝐢𝐧𝐠 𝐭𝐚

Tunlai tawnga sawi chuan Pentikos hi Kohhran ‘Rising Day’ a ni mai awm e. Hemi ni atang hian Pathian Kohhran chu pawl anga dingin ringtute inpawlkhawm, thuchah (message) leh tihtur bik (mission) neiin a lo awm tan ta a ni. Kohhran chu Genesis 17-ah Pathianin Abrahama hnena thu a thlunnaa inphum daih tawh a ni a, Isua khan a zirtirte a koh khan bul a tan a, Thlarau Thianghlim hnathawh ropui tak chuan ruangam a neihtir ta a ni. Thlarau thuamna changin zirtirte khan khawvela Chanchin Tha hril turin hriatchianna leh huaisenna mak tak mai an lo nei ta a ni. Thuthlung Hluia Thlarau Thianghlimin mi thenkhat a chhun khah zeuh zeuh ang kha ni tawh lo vin, chatuana a kohhrante kalsan tawh lo turin Thlarau Thianghlim chuan a rawn chenchilh ta a ni. Hei hi thu ropui tak, ringtute meuh pawhin kan man fuh loh fo a ni. Krista chanchin dik taka hril a nihna hmunah Kohhran a awm tihna a ni a, Kohhran a awmna hmunah chuan Thlarau Thianghlimin hna a thawk a ni tih hriat a tha.

𝐊𝐫𝐢𝐬𝐭𝐢𝐚𝐧 𝐦𝐢𝐬𝐬𝐢𝐨𝐧 𝐚 𝐥𝐨 𝐩𝐢𝐚𝐧𝐠

Pentikos atang hian Kohhran hna ‘Chanchin Tha Hril’ chu a taka nunpui leh a awmzia dik tak hriat a lo ni ta bawk a. Pathian Ram chungchang Isuan a zirtirte a lo hrilh thin (Tirh. 1:3), khawvel zawng zawngah a thuhretute an lo nih theih nan Thlarau Thianghlim pek a tiam a nih kha (Tirh. 1:8). Zirtir dangte nena ding hova, Peteran thu a’n sawi piap piap khan (Tirh. 2:14) a vawi khatna atan he mawhphurhna hi hlen a ni tih kan hre thei a ni. Tirhkohte Thiltih bu zawng zawng hi chhiar ila, Thlarau Thianghlim thuam tharna avanga ringtute chu ‘Krista thuhretu’ an nih dan kan hmu a, “Judate ramah leh Jerusalem khuaa a thiltih zawng zawng hretute kan ni e,” (Tirh. 10:39) tiin Chanchin Tha chu an lo puang thei ta zel a ni. Thlarau Thianghlim lo thlengin a tum chu Chanchin Tha hril thei tura ringtute tihchak kha a ni ber awm e.

𝐓𝐡𝐥𝐚𝐫𝐚𝐮 𝐭𝐡𝐢𝐥𝐩𝐞̂𝐤 𝐩𝐞𝐤 𝐚 𝐧𝐢

Kohhran nun leh hnaah mi tangkai ni turin ringtu tinte chu Thlarau thilpekin a thuam ta a ni. Mosia duhthusâm Numbers 11:29-a mi kha a takin a thleng a, Pentikos ni atang chuan, “…eng mak taka lut tura kotu … thatna,” chu an, “entir theih nan,”(I Pet. 2:9) Kristian zawng zawng chu a ko ta a. Thlarau thilpek chu, ‘mi thianghlimte tihfamkim nan Krista taksa siam tha turin’ (Eph. 4:12) a pe ta theuh a ni. He Thlarau Thianghlim hnathawh hi hnam zawng zawng hnena Chanchin |ha hril a nih hma zawng chuan a awm zel dawn bawk a. Thlarau thilpek hi mimal intih len nan emaw, lar khelhna leh ‘celebrity’ status neih nan a ni lo va, kohhran tihchak nan, kohhran chhunga hman tur a ni. Ringtuten kan thilpek dawn theuh kan rawn ken khawma, Isua ropuina tura kan hlan hian Pathianin ropuina a lo chang thin a ni. Tin, ringtu tinin he thilpek hi kan dawng theuh bawk a. Thlarau Thianghlim tau a tet a ni ringawt e.

𝐕𝐚𝐧 𝐡𝐦𝐮𝐧𝐚 𝐈𝐬𝐮𝐚 𝐫𝐚𝐰𝐧𝐠 𝐦𝐢𝐧 𝐛𝐚𝐰𝐥𝐬𝐚𝐤 𝐜𝐡𝐡𝐢𝐧𝐜𝐡𝐡𝐢𝐚𝐡𝐧𝐚

Isua khan lei lama a rawngbawlna a zo fel a, vanah ringtu zawng zawngte tana tawngtai rawngbawlna a tan tâkna chu Pentikosah hian a lo chiang lehzual ta a ni. Vanah lak chhoha a awm hnu khan Krista chu Pathian thiltihtheihna dinglamah a han thu tih kan hria a ni(Tirh. 2:33; 5:31; 7:55). Van hmuna Isua rawngbawlna hi a hlutna kan pawh lo fo thin a. A mite tan Isua hian hna a la thawk reng a, chu pawh chu a lei taksa pu ngeiin a ni tih hria ila. Kan Lalpa hian amah ringtute hi min thlahthlam lo va, engtik lai pawhin kan aiawhin dilna a thlen thin tih thu hi Hebrai lehkhathawn ziaktu phei hi chuan a uar hle a ni (ref. Heb. 4:14-16; 7:25). Ani chu kan puithiam lal ber, min dil saktu, kan thuhretu, kan palai leh kan lal a ni si a.

Mi thenkhatin Thupuan 4 leh 5-a Isua Krista rawngbawlna kan hmuh hi intan ta angin an sawi. Beramno talh tawha chu (Thup. 5:6), minung 4 leh Upa 24 ten vanramah an lo lawm lut a, vantirhkoh tam takin hla, “Beram No talh tawha hi thiltihtheihna te, hausakna te, finna te, chakna te, chawimawina te, ropuina te, malsawmna te hmu tlak a ni e,” (Thup. 5:12) tih hla an lo sa a. Beramno inthawina rah hmasa ber chu intawngtaisakna a ni a (Thup. 5:8), ‘Pathian Thlarau pasarih, lei chung zawng zawnga tirh chhuahte,” (Thup. 5:6) tia sawi pawh hi Pentikos nia Thlarau Thianghlim leihbuak hi a niin an ngai. Chuvangin, pentikos nia thil thleng hi thlarau ramah chuan a puiin a pawimawhna a sang hle a ni.

𝐏𝐞𝐧𝐭𝐢𝐤𝐨𝐬 𝐥𝐚𝐢𝐦𝐮 𝐜𝐡𝐮

He Pentikos niah hian Thlarau Thianghlim rawngbawlna thar kan hmu a. Pathian chatuan thiltuma Isua chanvo leh dinhmun chiang taka hriattir an ni ta a, Isua nihna leh thuneihna chu a tharin an lo hre fiah ta a ni. Tichuan, Isua thiltihtheihna thu chu huaisenna mak tak nen an hril ta a, mihring beisei lawk dan bin let thakin Chanchin Tha chuan khawvel a dap ta a ni ber mai. Chanchin Tha eng avang hian khawvel pawh a danglam ta dawrh dawrh mai a ni tih history zirtute chuan kan hria.

Isua a thih khan an beidawng a, a thawhleh khan mak tiin a awmzia tak tak an pawh pha chuang lo. Thlarau Thianghlim leih buaka a rawn awm meuh chuan an rilru a tivar a, Krista Chhandamna awmzia an lo hre ta a, thuam thara awmin Chanchin |ha chu an buaipui ta luih luih mai a ni. Pentikos nia Thlarau Thianghlim lo thleng chuan Kalvari tlang, thlan ruak leh Kohhran a suihzawm ta vek a ni ber e. Thlarau Thianghlim hnathawh chuan chu chu a ngai pawimawhin a tifiah uar uar thin.