𝐋𝐀𝐖𝐌𝐀𝐖𝐌 𝐂.𝐂.𝐌.

Mi tam takin kan nghahhlelh em em Council of Churches in Mizoram (CCM) chu hmanni 27.10.2024 khan hawn a ni ta a. Mizo Kristiante tana ni chhinchhiahtlak a ni ta reng mai a. Pathian Ram ngaihven mite tana ni ropui tak a ni. He bul tanna hian rah tha lehzual theihna turin i tawngtai mawlh mawlh ang u. Tunlai khawvelah Krista Isua ringtute tanho a tulzia hre pha lo kan nih chuan sakhaw thilah mual eng hmu pha lo kan ni tih pawm thiam mai a ngai awm e.

𝐑𝐚𝐰𝐧𝐠𝐛𝐚𝐰𝐥𝐧𝐚 𝐢𝐧𝐡𝐫𝐢𝐚𝐭 𝐭𝐚𝐰𝐧 𝐚 𝐭𝐮𝐥 𝐳𝐮𝐚𝐥 𝐭𝐚

Kohhran Siamthatna, Reformation, hnu khan Protestant kohhrante chu ringtu mimal thuneihna leh zalenna uar an nih avangin a phirsi duh ta angreng hle a. Rawngbawlna kawng leh Pathian Thu hriatthiamna kawngah uar zawng leh duhzawng a lo inang lo fo bawk a. Kohhran pawl hrang hrang lo awm ta nuk hi Protestant Kohhrante chak lohna pakhat a lo ni ta. Thil pawimawh em em leh tul tak nia hriat chiah theih si lovah buai nek awl tak a lo ni a. Tanrualin kan chak sauhva, inthen darhin beih kan awl zual tih Hmelmapa hian a hre chiang em a ni!

Sawiseltuten sawi tur ngah viau mah sela he kan dinhmun duhawm lem lo tak hi Pathian khawngaihna zarah kan chakna a nih hlauh theih dan pakhat chu thlarauva pumkhatna kan vawn tlatin a ni. Engemaw zawng chuan hetianga tlang hranga awm a, kan tui lam leh thiam lam kan han bawh sang sangte hian rawngbawlna pumpui a tihchak theih dan a awm. Chuvangin Kohhran pawl hrang hrangte hi kan rawngbawlna theuh kan inhriat tawn a tul a ni. Tunlai khawvelah phei chuan kohhran mal hi mahnia kal ngut ngut thei a ni lo tih a chiang viau a. Kohhran pawl dangte nena inhretawn leh tiho zela kan kal a ngai a ni. Chumi kawngah chuan Council ang chite hi a pawimawhna a langsar telh telh dawn a ni.

𝐈𝐧𝐩𝐚𝐰𝐦𝐭𝐚𝐰𝐧 𝐭𝐡𝐢𝐚𝐦 𝐚 𝐭𝐮𝐥 𝐭𝐞𝐥𝐡 𝐭𝐞𝐥𝐡

Mi thenkhat chuan danglamna hi an tuipui a, an chhui vak vak thin. Chuti lam lo ngai thlarau riau chi pawh awm theih a ni awm e! Mizoram kohhrante erawh hi chuan kan inanna lam han chhui ta ila a tam thei ngawt ang tih a hriat theih mai a. Kan inunauna leh inpawmtawn theihna chin hi uar tham nangiang a awm ang. Thinlung lamah hian ringtu tam zawk chu kan inhlat tak tak lo. Pathian fakin kan lam ho thei vek! Kohhran pawl dang tihphungte ti ve lem lo mah ila kan pawm thei tlangpui vek! Kan danglamna sepsel tak takte hi chu kan thlarau nun thuk tak khawih pha em emah kan ngai lo tlang a nih hi.

Mi tam tak chuan doctrine lamah pawh hian Nicea Thurina kir leh an lo duh tawh thin. Hei hi min ko khawmtu tur pawimawh tak pawh a ni mai thei. Pa leh Fapa leh Thlarau Thianghlim Pathian Pakhat, Lal Isua tlanna avang chauhva chhandam, Thlarau Thianghlim thiltihtheihnain a vawn, thih hnuah Vanram nuam leh Hremhmun rapthlak, Chanchin Tha hril pawimawhna - hetiang thil kan pawm dan hlawmah te hian Mizo Kristian te chu kan danglam tam lem lo. Kristian thurin tlanglawn pangngai hi chu a awm a, a bak thil thuk zawk hrilhfiah dan chi hrang hrangah erawh chuan danglamna inpawmsak tawn dan zir a tha khawp mai. Chuvang chu ni tur a ni, kal hmasaten,

In essentials, unity

In non-essentials, liberty

In all things, charity.

an lo tih thin! Thu tluangtlam tak anga lang ril ropui tak si a ni.

𝐈𝐧𝐡𝐫𝐢𝐚𝐭 𝐭𝐡𝐢𝐚𝐦 𝐭𝐚𝐰𝐧 𝐚 𝐭𝐮𝐥 𝐫𝐞𝐧𝐠

Pathianin Kohhran a hmathlir dan chu mimal ropui bik tak awm a, tunlai celebrity culture anga ngaihsan fawr bik neih tur ang chi hi a ni lo va. Mi chak lo te te inhmangaih tawna intichak tawn turin a duang zawk a ni. Mi pakhatah Thlarau thilpek a kim ngai lo va, ringtuten kan thlarau thilpek kan dawn chi hrang hrangte chu kohhranah kan rawn keng khawm a, Krista tan kan par chhuak ta thin a ni a, chu chuan Kohhran a tifamkim dawn a ni. Thenkhat chuan Thlarau thilpek an dawn te mahni intihropui nan leh Pathian kohhran hial pawh ngaihnep nan an hmang mai thin. Kohhran aia ‘Thlarau’ chang sang zawka inngai hial pawh an awm! Thlarau Thilpek pek chhan nen a intu lo hle mai. He thilpek hi mimal inchhekarbawm nana pek a ni mawlh lo a nia!

He thu hi kohhran pawl hrang hrang kan awm deuh thluah thilah pawh hian a hman tangkai theih a. Keimahni awmna kohhran pawl bikah kan rinawm tur a ni a. A hmasawnna tura inpekna thuk tak leh a harsatna hmachhawn sut kian hna pawh kan kova innghat a ni ngei ang. Chutih laiin kohhran pawl dang an awm ve tih hi hmu pha khawpa kan thlarau mit a men a ngai thung a ni. Hemi kawngah hian Zoram kohhrante hi kan vengva khawp mai a, mahse hmasawnna tur kan nei miah lo chu a ni hauh lovang. Kohhran pawl dangte thatna leh kan uar loh lam an lo uarna kawng tam tak ngaihvena hriat te pawh kan thatpui awm e. Tunlai khawvela Kristian kan nih anga harsatna kan tawh tak neuh neuhvah hian heti lama hma kan sawn theuh a pawimawh zual ngei ang.

𝐋𝐚𝐥 𝐈𝐬𝐮𝐚 𝐭𝐚𝐰𝐧𝐠𝐭𝐚𝐢𝐧𝐚 𝐤𝐡𝐚

‘Hmangaihna,’ ‘Thianghlimna,’ ‘Rinawmna’, leh adt. chungchang hril a ngai reng ang hian ‘Inpumkhatna’ chungchang hril pawh hian tawp intai awm thei dawn lo a ni awm e. He lui kamah ngat phei hi chuan a dikna a lan har hmel loh! ‘Kan inpumkhat tawk tawh,’ tih ngawt theih a ni lo va. Kan phak chin zelah khan Kristaah kan inpumkhat em? tih kan zawh a ngai. Khawvel pum huap Kristian inpumkhatna sawi chang a awm ang a, state pum huap, mahni kohhran pawl chin, tualchhung kohhran chinah…chutiang zel chuan inpumkhat taka kan awm hi a pawimawh nangiang a.

Chutih lai mekin Hmelmapa hian ringtute then darh i thiltum pakhat a ni tih hria ila. Kan inthendarh chuan rawngbawlna a nih ang a ni thei dawn lo tih a chiang a. Chu chu a thlahlel ngawih ngawih a ni. Kan Lalpa khan a hria a niang chu, “Pumkhat an nih theih nan…” tiin a tawngtai lawm lawm a nih kha (Johana 17:11,21). Kan nihphung rengah ringtute hi maltlat tur kan nih lohzia a chiang a. Mi kan lo hnih thum chuan innghirngho, ngaihdan inang lo leh ro hran neih duhna a lo lian mai thin dawn a ni tih a hmu chiang hle a ni. Chuvang chuan inpumkhatna hi thlarau lam thil a ni tih i hre phawt mai teh ang u.