𝐀𝐍 𝐙𝐀-𝐈𝐍 𝐈𝐍𝐏𝐔𝐌𝐊𝐇𝐀𝐓 𝐒𝐄𝐋𝐀

 

(Council of Churches in Mizoram hawn nia NEICC General Secretary thusawi)

 

Council of Churches in Mizoram, Pathian Kohhrante, Kan Lalpa leh Chhandamtu Isua Krista, Kohhranho Lu leh Neitu hmingin chibai ka buk a che u. He ni ropui takah in hmaa North East India Christian Council aiawha ka ding thei hi Pathian leh CCM hotute duhsakna hlu tak a ni tih ka hria a. Tunhmain NEICC Secretary tha tak tak kan lo nei tawh thin tih kan hria a, chutih laiin ka hun lai ngeia he thil a lo thleng hi a vannei ka intiin ka lawm hle a ni. NEICC pumpui aiawhin chibai bukna leh duhsakna sang ka hlan che u.

 

CCM lo ding tur boruak intham vel lai khan kan lo phur hle a. Ringtute inpumkhatna chawi nung zel turin state-level council din hi NEICC duh dan a ni a. Kum 2018 inkhawmpuiah state council din tura hma lak ni se tia rel a ni daih tawh a. Chu chu bawhzuiin kum 2019 chhung khan state pathum Mizoram, Meghalaya leh Manipurah te consultation neih a nia. Kan reportah chuan ‘Manipurah chuan tul tihna pawh a la awm lo va, Meghalaya-ah pawh an la harsat a, Mizoramah erawh chuan a hmin tawh e,” kan ti a ni. Chu chu vawiinah hian a takin kan hmu ta a, kan Pathian hnenah lawmthu kan sawi a, A hming ropui chu kan fak a ni.

 

India hmarchhak pumpui huap aia zim zawk hret, state tin chhunga ringtute hi inhriatthiam tawnna,  innauna leh inpumkhatna nghet lehzual zawka phuar ngheha an awm hi NEICC chuan a beisei reng a. State Council ang chite hi kan hmasawnna ni tura beiseina nen kum 2022-a Constitution a ennawn (6^th Revision) chuan “State chhunga kan unit-te chuan state council an nei thei ang,” tih hi a lo belh diam tawh a. Chumi tihlawhtling theitu hmasa ber Mizoram a lo ni ta leh state dangte entawn tlak taka hetiang thil a thleng hi a lawmawm takzet a ni. Kan Pathianin mal a sawm ngei ang tih NEICC chuan a rinnghet tlat a ni.

 

Mizorama Kristiante nihphung leh zia han en chuan hetiang CCM hi a ding har mah mah zawk emaw tih theihna chin pawh a awm a. He ramah hian kohhran pawl hrang hrang angin han awm thin mah ila kan danglam tam lo tih hi mi tam tak hmuh dan a ni. Kan thurin puan chhuahah te chu chu a lang chiang a. Thlarau nun (spirituality) kan duh danah hlim-lam ngaina leh ngaisang vek kan ni a; rawngbawlna (mission) hriat thiamnaah Chanchin Tha hril dah hmasa thin kohhran pawl kan ni theuh bawk a; Inrelbawlnaah centralization system hmang thiam em em theuh kan nih hi. Chumi system chhunga kan inbawkna hming chauh a dang emaw tih tur a ni. Kan Pathian Thu thiamte (theologiante) leh Kohhran pawl hruaituten (church leaders ten) ram leh hnam siam thatna lam an vei em em theuh bawk a. Kan inang put a ni ber mai.

 

Kohhran lo din tirh atangin Mizo Kristiante hi inpumkhat tak kan ni sa hrim hrim tih hi ka hriatthiam dan ve a ni a. Tunhnuah hian kan darhsarh ta zawk emaw tih theih a ni a, CCM hian kawng tam takah min phuar khawm that lehzual ka ringin ka beisei a ni. Kan nu leh pa kal hmasate khan inpumkhatnaah hian an lo lut thuk khawp mai a. Kum 1947 khan NEICC chuan India hmarchhaka Kohhran pawlte hi Kohhran pawl pakhat Church of North East India-a luang khawm turin hma a la a. Chu Church of NEI Constitution tur pawh chu duang vekin a member tin hnenah an pawm theih leh theih loh thu a zawt a. Chutih laia Mizoram chhunga NEICC kohhran member zawng zawng chuan “Kan pawm thei e,” tiin an chhang.

 

Chumi awmzia chu thuk tak a ni. Kan nu leh pate kha chuan “Kan kohhran pawl bil nihna zawng zawng hi hlipin Kohhran pawl pakhat ‘Church of North East India’ -a awm kan duh e,” an tihna a ni a. Lo ti tlang thei sela chuan vawiina nang leh keiin Kohhran kan hriatthiamna hi a danglam vek dawn a ni tih chu hai rual a ni lo va. Vawiina kan lawm em em CCM aia tha hi kan lo nei daih tawh dawn a ni tih a lang reng mai. Amaherawhchu, Mizoram ni lo state dang atanga ro dang a lo awm avangin an pamtul ta a nih kha. Tuna state council kan nei leh taah hian Pathian hnathawh a lang chhunzawm zel tih kan hre thei a ni. He council din tura NEICC Associate Unit 18-te zinga pakhat Mizo Theological Association te hmalakna zawng zawng a fakawm kan ti a, kan chhuang hle a ni.

 

Ringtute Inpumkhatna hi thlarau lam thil, kan dam chhunga pawl tin leh mimal tinin kan um ho tur a ni hrim hrim mai a. Krista Kohhrante hi ringtu mimal ni lo, ringtu tam tak awm khawm kan nih avang hian inpumkhatna hi a pawimawh reng dawn a. Inpumkhat lehzual tura kan beih tlan reng pawh a tul dawn a ni. Inthen darh leh innghirngho tura thlemna te hi Thlarauva kan tihmih zung zung thin a ngai dawn. Kan Lalpa Isua Kristan, “An za-in inpumkhat sela,” (Johana 17:11&21) tia a tawngtaina hi tihlawhtling turin tan kan lak reng a ngai a, Mizo Kristiante kan inpumkhatzia leh chumi kawnga thang lian zel turin tan kan la zel a ni tih vawiin atang hian khawvelin a hre dawn ta a nih hi.

 

Chuvangin, Council of Churches in Mizoram hi chung Pathianin thlahthlam lo sela, kan hotute hi finna leh thiamna, inpekna leh thahnemngaihna thinlungin thuam sela; member zawng zawngte hi chu inremna Thlarau chuan chatuanin min awmpui theuh rawh se. Amen.

*****