𝐌𝐀𝐍𝐈𝐏𝐔𝐑 𝐌𝐀𝐍𝐆𝐀𝐍𝐍𝐀

Kar hnih khat leka inching fel mai tur emaw kan tih Manipur buaina chuan kum khat leh a chanve lai mai a daih ta. Engemaw chen an reh deuh hnuin tunlai hian boruak thar a rawn nei leh ta hlat a. He buaina hnuaia chengte tan a hrehawm turzia te leh an nunphung a tihkhaihlak nasat turzia hi ngaihtuah tham tak a ni. Dam loten enkawlna an dawn mai theihte kha an dawng thei ta lo a, zirlaiten muang tak leh thahnemngai taka lehkha an zir thin kha an chhunzawm hleithei ta lo tih pawh a chiang a ni. Thil man a sang lo thei lo va, mi rethei zawk tan a hrehawm zual dawn a. Thin phu lo leh muang dap maia han mut vang vang chaktu an tam ngawt ang. Remna leh muanna hlutzia min hrilh nawn hlawm teh se. Hetih lai hian Manipura kaihhnawih thil thleng pahnih rilru la riau a awm a.

 

‘𝐃𝐨𝐧’𝐭 𝐖𝐨𝐫𝐫𝐲, 𝐁𝐞 𝐇𝐚𝐩𝐩𝐲’ 𝐭𝐢𝐡 𝐡𝐥𝐚 𝐚𝐧 𝐬𝐚 𝐭𝐚

 

Kar khat vel liam ta chauhah khan Youtube video upload thar chu kan TV-ah a rawn inlar deuh hlawl a. Kuki nula, Manipura awm ni ngei tura ngaih theih, an hming pawh Phalnu, Chichin, Neneo & Chochoi ten ‘Don’t Worry, Be Happy’ tih hla an rawn sak thar chu a lo ni a. He hla hi tleirawl te kan nih laia Bobby McFerrin sak thin kha a ni a, an ni hian Quadraphonic group ho sak dan lain Bob Marley hla lar ‘Three Little Birds’ tih nena thiam taka kai kawpin an rawn sa nalh hlarh hlarh khawp mai. An hmel a thain an aw a mawi bawk nen, viewer pawh an ngah sawt khawp a nih hi. Ka ngaithla kham thei meuh lo! Ka rilru la tak zawk erawh chu he hla an han sak chhan kher hi a ni a, an khawtlang nun harsatzia leh an tuarzia a lang ruak lo thei lo a ni.

 

Heti taka rei nunphung pangngai a khawih danglam tak leh thihna a thlen deuh reng takah chuan mihring rilru pawh a hnual lo thei lo va. Beidawnna ruama lut leh harsatna nasa tak tak hmachhawn mek te pawh an awm lo thei lo a ni. Mi tam tak tan ei leh bar zawnna a harsa bawk a. Chutiang thil duhawm lo tuar mek mipuite chawk tho turin heng nula, talent nei tha tak takte hi an rawn thawk chhuak ta a ni ber awm e. ‘Don’t worry, Be happy’ (Lungngai lovin lo hlim rawh aw) an ti hep hep mai a ni. ‘Kan lungngaih hian kan hrehawmna kan belhchhah mai a nia; Mutna tur khum i neih loh va, I chennain ngei atanga an hnawh chhuah dawn che pawhin lungngai lovin lo hlim reng ang che. Thil tha lo zawng zawng hi, a te ber thleng hian a la fel vek dawn a ni!’ tiin. Hetiang thute hi kan unaute hian hla pui atan an mamawh tawh a nih hi! An va khawngaihthlak tak e aw!

 

𝐍𝐮 𝐚𝐧𝐠 𝐟𝐮𝐡 𝐥𝐨 𝐝𝐞𝐮𝐡 𝐤𝐡𝐚

 

Hetih lai hian tuipui ral lam atangin Zohnahthlak nu pakhat ang fuh lo deuh rawn viral chiam mai kha a nuihzatthlak angreng hle. Thenkhat tam tak chuan an helh viau mai lehnghal a. Khatiang video social mediaa lo upload duh zel mai rilru kha thil pawi tak pakhat chu a ni awm e. Hetiang hunah hi chuan mi tin mai hian thil hriatthiam dan leh hmuh dan, ngaihdan engemaw tak kan nei theuh mai a. Thil nihna hre chiang lo tak emaw, sawi awm lo tak tak lo sawi bawrh bawrh pawl emaw awm theih a ni chiang. Tawng ri chauh hi chu a tham ral leh mai thin a ni a, a pawi nep deuh fo a.  Thuziak emaw video emaw hi chu a awm reng thin si a, fimkhur a ngai zual thin a ni. Hetiang hi chu thehdarh loh hram hram hi ram leh hnam hmangaihna thil pawimawh tak a ni awm e. Delete hmak hmak a him ber.

 

He thilah hian Zoram lama Zofate rilru zauzia leh Mizona an ngaih pawimawhzia pawh a lo langin ka hria a. Tichuan, Zoram lam chuan nu leh pa chan chang turin a inpeih viau tawh tih pawh a lang ruak ruak mai. Kan pi khan a tih dik loh hre thuaiin inngaitlawm leh inchhir takin ngaihdam dilna a han tichhuak leh var a. Hmangaihna leh khawngaihna rilru nen kan han ngaidam leh dual mai kha a ropui dangdai hle a ni. A video pahniha a thusawite hi lepse vak vaka, a dik leh dik lo chhut vak vak pawh thil tul lo tak a ni. Thinlung takin ngaihdam a dil a, kan pawm thiam tawh a nih kha. Ngaihdam ngai chu ngaihdam mai hi kan that tlanna a ni zawk ngei ang. Mi tin hian thil han sawi sual hret chang te hi kan nei theuh vang a, chutiang thil hmanga inchu tawn tur chu Zofate hi kan ni lo ve.

 

𝐈 𝐭𝐚𝐰𝐧𝐠𝐭𝐚𝐢 𝐳𝐞𝐥 𝐚𝐧𝐠 𝐚𝐰

 

Zofate kan tawngtai sauh sauh a ngai. Manipur harsatna hi thil awlsam tak a ni lo tih a chiang tawh hle a. Hnam chi hrang hrang kaihnawih a nei duah mai a. Zohnahthlak ten an ram delh chin sawh thlak an tum hle lai hian, Meitei lam chuan ar hmai tiat pawh hloh an tum bik si lo. Chutih laiin Manipur Naga lam chuan an chanvo awm anga an ngaih chin miin an sah thlak sak hlauvin an veng khiau mai a ni a. Kan PM lah chuan Ukraine lam a vei zawk emaw tih turin a va kan ngat zawk a ni si a! Roreltute tan pawh a harsa ngiang ni tur a ni. Chuvangin he khawvel roreltute hian kan tawngtaina tam tak an mamawh a ni tih i hria ang u.

 

Zofa khawvelin hetiang taka harsatna kan tawh hi a tha zawngin a rah chhuak ang tih kei chuan ka ringhlel lo va. Buaina a zawh meuh chuan tunhma zawng ai khan kan inpumkhat tawh ang a, inpawhtawnna rilru pawh a thangin Zofate khawvel hi a zau sawt ang. Chu chu malsawmna lo thleng tur chu niin a lang. Tunah pawh hian Mizona huang chhungah kan rilru a lawi lut tha sawt hle. Zohnahthlak zawng zawng hian Mizo nihna (identity) bak hi chu han kal thui pui tur tak tak kan nei lo va, han thatpui tur tham a awm lo. Mizo ang pawh hian tlem tak kan ni tih kan pawm thiam a, kan pawm ngam a ngai. Chi bil te zawka inhlawm hran tum hi mi thenkhat tan chuan hlawkna awm thei pawh ni se mi tam zawk tana tha miah lo a ni a; inhlawm khawmna hi a len poh leh a huap zawng zawng tana tha vek zawk si, niin ka hre thin.

https://youtu.be/kI6h9-Q4L8o?si=qRnC4jVzIQuZj2H0